Ihapari Comaana Cantikhiye ni Matewus 28:1-20
28 Uvira waya isaapatu, uwicisu waya nihuku noopacera isumana, Maria Madalena ni Maria nkhwaawe, yahorwaa woona mahiye a Yesu.
2 Vano, wahokhumelela uttettemelaca wotthaya, nlattu wonlayikha na Yehova, nahoowa mpaka wa mahiyeni a Yesu, ukumiha nluku naakhuneeliye mahiye, ni nuwunkomela nno nlukunno.
3 Woonnyeela waya nno nlayikhanno, wakhala khampa uverunya ni ikuwo caya caari khampa mahutte.
4 Nlattu wowoova, akhalenlyaayo yahothukumela ni yahokhala khampa yahookhwa.
5 Vano nlayikhanno nahowiirela athiyanaayo co: “Nhoove, kontha mi kinaacuwela wiira nnomwaavya Yesu eeviye wanipottoni.
6 Uyo khaavo, honwelelihiya toko caahimilyaawe, nweeke mwawooneke nipuro naataleliyaawenno.
7 Vano, nrwee woohipica ni mwaahimerye attharyaawe wiira, uyo honwelelihiya ni nna vaa, hohoolela u Kalileya, wonwo phinhaleenyu umoona. Iyo phaawilyaaka wuuhimeeryani.”
8 Vano, woohipica yaahokhumaca umahiyenwo, ni unaattenleene nrima ni yoovaka, yahothupuluwa wiira yaahimerye attharyaawe Yesu citthu cotheene yoonilyaaya.
9 Ni Yesu ahorwaa uwoonanana ayo athiyanaayo, ni aheera: “Salaama!” Umoona waya, yaahomwaattamela, yaahonkhoroma ni yahovara metto cawe.
10 Vano, Yesu ahowiirela: “Nhoove! Nrwee mwaahimerye asunnaka wiira arwee u Kalileya, wonwo phinhalaaya ukoona.”
11 Ukati athiyana waaryaaya mphironi, akhalenli akhwaawe yahorwaa usittatti ni yahaahimerya ahooleli aanankuttho citthu cotheene ceerannyeele.
12 Vano, anankuttho uthukumana waya ni mahumu aapoovu wiira alakele itthu yoohala upanka, yahaavaha akhalenli nsurukhu mwinci woparaatha,
13 ni yahowiirela co: “Mweere, ‘attharyaawe yaahoowa uhiyu hiiva narupaka winnya irutthwaawe.’
14 Vano, nnya citthunnya eewaka kovernatoore, hiiva ninaahala umwaakhula, nyuuva nhikhale niiwasiwaasi.”
15 Vano, ayo yahokusa nsurukhu woparaathooyo ni yahopanka toko caarumiyaaya. Ni iyo ihantisiiyo ineera imwaryeelaka iriyari yaayuuta mpaka mahukweehwaala.
16 Vano, atthari 11 a Yesu yahorwaa u Kalileya, umwaakoni Yesu aawiirenlyaawe wiira arwee awoonanane.
17 Umoona waya Yesu, atthari akiinaayo yaahonkhoromela uhoolo wawe, masi akiinaayo khayaakupali wiira aari thuuyova.
18 Yesu ahowaattamela ni ahowiirela: “Kihovahiya ukhulupale wotheene wiirimu ni watuninyani.
19 Phimaana, nrwee mwaapanke eetthuci atthu olapo cotheene, mwaapattisaka mwancina naathumwaane, namwaana ni nonnepa wowaarya,
20 mwawiitthucihaka wiiwelela citthu cotheene cuurumilyaakani. Ni ncuwele wiira miiva kiri ni nyuuva mahuku otheene, mpaka wiimaleloni ulumwenku wo citthu coohinamaana.”*
