Ihapari Comaana Cantikhiye ni Matewus 4:1-25
4 Nnepa wowaarya, wahomwiiriha Yesu urwaa muuthakoni wiira attehattehiye ni Tiyapu.*
2 Ukhala wawe mahuku 40 woohilya itthu, uyo yahonvola itala.
3 Vano, Tiyapu ahowa ni ahomwiirela: “Wakhala wiira weeva mwaana a Nluku, utatuse ala malukwaala iphaawu.”
4 Masi, uyova ahomwaakhula eeraka: “Uhantikhiya nnuulumoni na Nluku: ‘Pinaatamu khankhala nkumi nlattu wophaawu paasi, masi haana eewelelaka moolumo otheene ankhuma wa Yehova.’”*
5 Vano, Tiyapu ahoncisa u Yerusalemu ni ahonrwaana waculu itempulu.
6 Vano, ahomwiirela Yesu co: “Wakhala wiira weeva mwaana a Nluku, wiivonyere vathi, kontha uhantikhiya nnuulumoni na Nluku wiira: ‘Nluku naahala uruma malayikhaawe,’ ni ‘ayo anaahala wuukaphula wiira inyaa caa cihiipwesanihe wanlukuni.’”
7 Vano, Yesu ahomwiirela: “Ciicammo uhantikhiya nnuulumoni na Nluku: ‘Uhinttehattehe Yehova Nlukwaa.’”
8 Vano, Sotwani ahoncisa wamwaakoni woorekama cinene ni ahonthoonyihera ikuvernu cotheene contuninyani ni uttitthima waya.
9 Ni ahomwiirela: “Mi kinaahala wuuvaha citthu cotheene nnya, wakikhoromelaka ni wakiswalelaka imaara imoca paahi.”
10 Masi Yesu ahomwaakhula eeraka: “Ukhume va, Sotwani! Kontha uhantikhiya nnuulumoni na Nluku: ‘Unswalele Yehova* Nlukwaa, ni unvarele miteko co wuuswalini uyova paasi.’”
11 Vano, Tiyapu ahokhuma ni yahowa malayikha unkavihera Yesu.
12 Ukati Yesu waacuwenlyaawe wiira Joau hotthukeliya nkhattya, uyo ahorwaa u Kalileeya.
13 Ukhuma wawe u Nasaree, ahorwaa ukhala u Kafarnau nseresere ipahari, ncoko wo Sepulau ni u Nafitali,
14 wiira yiirannye moolumo a porofeeta Isaiya:
15 “Nyuuva atthu nnokhala ilapo yo Sepulau ni ilapo yo Nafitali, waattamela iparapaara inrwaa upahari, mphantte nkhwaawe wo mooloko Jordau, u Kalileeya unkhalaaya atthu o mapuro menci!
16 Atthu yaari wapiphini, yahoona wonnyeelaka venci nipuro naaryaaya, ni ale yonkomile nipuro nooripela ni nowoopiha cinene, yahoona wonnyeelaka nno nipuronno.”
17 Ukhuma ule ukatyuule, Yesu ahancera ulalyeera, eeraka: “Nrukunuse makhalelweenyu, kontha Umwene wa Nluku uhanle wancera ulamulela.”
18 Eettakoono nseresere ipahari yo Kalileeya, ahomoona ntthu ni mwaamunnawe, aari Simau wamoca ni mwaamunnawe eehaniya Antere. Yesu aawoonile ayo yavonyeraka ntthavi naya mpahari, ukhala wiira ntekwaaya waari uvara ihopa.
19 Uyo ahowiirela: “Nkitthare ni mi kinaahala wuuvahani nteko woowaavya atthu.”
20 Woohipica, ayo yahohiya matthavyaayo ni yahontthara.
21 Weetta wawe vakaani, ahomoona-tho nlopwana nimwaamunnawe, aari Tiyaku mwaana a Sepeteu, nimwanhimaawe eehaniya Joau. Ayo yaari nkalawani wamoca naathumwanaya, yalokihacaka matthavyaaya, ni uyo ahowiihana.
22 Woohipica, yahokhuma nkalawanimmo, waahiya athumwanaya ni yahontthara Yesu.
23 Uyo aheetta micoko cotheene co Kalileya, eetthucihaka mmasinakooka, alalyeeraka ihapari co Umwene wa Nluku ni avonihaka khula iretta.
24 Ni ihapari caamuuluma uyova, caahomwaryeela ilapo yotheene yo Isarayeeli, ni anwaaneliya atthu oowerennya iretta coovirikana, atthu ookeliya ni maciini, anacilicili, atthu oopahuwa, ni uyo aanaavoniha.
25 Nlattu wo iyo itthwiiyo, atthu enci yaanonttharatthara, atthu yaakhuma u Kalileya, u Tekaapoli, u Yerusalemu, u Yuteya ni mphantte nkhwaawe wo mooloko Jordau.
Notas
^ Awula: “Sotwani.”
