Ihapari Comaana Cantikhiye ni Matewus 6:1-34
-
MWAHA WAATAPHULENLYAAWE YESU UMWAAKONI (1-34)
6 “Mwiivarace wiira nhipanke citthu comaana, mpheelaka wooniya naatthu; kontha mwaapanka commo, khannohala waakhela itthuvo cinkhuma Waapaapeenyu owiirimu.
2 Phimaana, mwanvahaka itthu ntthu oohuva, nhivire nhimyahimyaka khampa ntthu noopa nipalapatta, toko cimpankaaya ale aneehimya ukhala atthu ooreera nrima, mapuro answalyaaya,* wiira attitthimihiye naatthu. Kinoohimyeerani ikhweeli wiira: Ayo ahaakhela itthuvwaaya.
3 Masi nyuuva, mwanvahaka itthu ntthu oohuva, nhihiye moono wonlopwana wacuwelaka itthu impankaaya moono wonthiyana,
4 wiira citthu nnovaheenyu cihicuwelaciye. Vano Apaapeenyu ankhitiri woona citthu cotheene, anaahala wuutthuvelani.
5 “Ciicammo, ukati woolompa, nhipanke khampa cimpaakaaya atthu owootha, kontha ayo waacivela ulompa aneemenle mmasinakooka* ni mapuro anviraviriya venci, wiira yooniye naatthu. Masi kinoohimyeerani ikhweeli wiira: Ayo ahaakhela itthuvwaaya.
6 Masi nyuuva ukati woolompa, nkele mpaani winyu ni ntthuke nkhora, vano mwaalompe Apaapeenyu. Vano Apaapeenyu ankhitiri woona citthu cotheene, anaahala wuutthuvelani.
7 Ukati woolompa, nhaakulelihace moolumo mamocaaru khula ikwaha, toko cimpankaaya atthu ahincuwela mananna onswalela Nluku, kontha ayo anooniha toko anaahala wiiwiya nlattu wowuuluma citthu cinci.
8 Nhikhale toko ayo atthwaayo, kontha Apaapeenyu anaacuwela citthu cimpheeleenyu, nhinaaya waalepela.
9 “Phimaana, woolompa mwiire co:
“‘Apaapeehu nri wiirimu, ninaalompa wiira ncina ninyu nihisimiye cinene.
10 Umweneenyu ulamulela va watuninyani va. Ipankiye impheeleenyu wiirimu ciicammo va watuninyani va.
11 Sontte, nnivahe ilelo iyoolya* yo nna nihukunna;
12 ni nnilevelele coottheka* cihu, toko hiiva cinaaleveleleehu ale annitthekela.*
13 Ni sontte, nnikavihere nahalaka vakaani upanka itthu yoohiloka, ni ciicammo nnoopole mmatatani wa Ntakhali.’*
14 “Kontha mwaalevelelaka apinaatamu citthu cinootthekelaayani, Athumwaninyu owiirimu, ciicammo anaahala wuulevelelani coottheka cinyu;
15 masi mwaahaaleveleleke apinaatamu coottheka caya, Apaapeenyu owiirimu, ciicammo khanhala wuulevelelani coottheka cinyu.
16 “Mwalakelaka uhilya nlattu wootthuka,* uwiitho winyu nhithoonyere uriipiya nrima, toko cimpankaaya atthu owootha,* yapheelaka wiira yooniye naatthu. Masi kinoohimyeerani wiira: Ayova ahaakhela itthuvwaaya.
17 Masi nyuuva mwatthukaka vale, nlokihace ikharari cinyu ni nkhuce,
18 wiira atthu ahicuwele wiira nhootthuka, masi acuwele paasi Apaapeenyu owiirimu, anwoonani mmwiitihoni. Vano ayo Apaapeenywaayo, anaahala wuutthuvelani.
19 “Nhiye wiicavyera mihakhu cinci va watuninyani va, kontha asinttuuttu ni nrenci, pooti uhononaca, ni ukhala wiira nno nipuro malatarawu ninhalaaya waaka ni winnya.
20 Uhiya commo, mwiicaavyere mihakhu cinci wiirimu, ukhala wiira nwo uweese ni nrenci khacinhala uhonona, ni ukhala wiira malatarawu khanhala waaka ni winnya.
21 Kontha itthu nyuuva intepeenyu uvaha ifayita, yeeyo phinhaleenyu utepa wuupuwela.
22 “Miithweenyu anlikanaca niilampata inookaviherani woona. Phimaana, niitho ninyu noonaka sana-saana, irutthwiinyu yotheene inaahala woonnya.
23 Masi niitho ninyu naahooneke saana, irutthwiiyo yotheene inaahala uripela. Vano wakhala wiira iyo ihoripela kahi woonnya, paasi irutthwiiyo khimala uripela!
24 “Khaavo nolamuliya waavarela nteko atthu eeli; kontha nohala unfenta mmoca, masi nkinooyo naahala unrusa, awula, nohala unvaresesa mmoca masi nkinooyo unthanya. Nyuuva khannolamuliya unvarela nteko Nluku ni ciicammo Mihakhu.
25 “Nlattu wo iyo itthwiiyo, kinwiirela co: Nhiye utepa ukhala nimasukhuli muukumini winyu, moopuwelaka itthu yoohala ulya awula uwurya, ni niirutthwiinyu, moopuwelaka itthu yoohala uwara. Ukumiinyu phitepile ukhalana ifayita uvikana iyoolya, ni irutthwiinyu phitepile ukhalana ifayita uvikana ikuwo cinwareenyu.
26 Mwaaweheehe asaanuni anvava uculu; ayo khaanaala ni khanhepha, ciicammo khanthotokaniha nnikhupini, masi Apaapeenyu ari wiirimu, anawaaliha ayo asaanunyaayo. Niireke nyuuva khantepile ukhalana ifayita waavikana asaanuni?
27 Iriyariinyu, tipani nokhitiri wuncerera ukumyaawe nanka vakaani, nlattu wookhala nimasukhuli?
28 Ni kontha isiyani nnokhaleenyu niisukhuli nlattu wo itthu yoowara? Mwiitthucere inanna cinoonuwaaya ifoloore contakhwani, nnyo khacinvara nteko ni khacinttottha ikuwo.
29 Masi kinawuuhimeeryani wiira, hataa mwene Salomau yooyo, uhookhalaru wiira aawara citthu cinci cooreera, khaawara waalikananaawe nanka ifoloore imoca.
30 Ukhala wiira Nluku naareeriha malasi ontakhwani, anoonuwa nhina wo nihuku nimoca, ni waaseele waya wuuma ni upahiya naatthu. Khannokupali wiira uyo naahala utepa wuuwarihani nyuuva, alopwana owaamini vakaani?
31 Phimaana, nhikhale nimasukhuli mweeraka: ‘Ninhala ulyani?’ awula, ‘Ninhala uwuryani?’awula, ‘Ninhala uwarani?’
32 Kontha citthu cotheene nnyo, phi citthu atthu ahinoncuwela Nluku cineekurumicaaya cinene waavya. Athumwaninyu owiirimu, anaacuwela wiira nyuuva nnaapheela citthu cotheene nnyo.
33 “Phimaana, nhihiyerere uhoolelihera Umwene wa Nluku ni upanka citthu cinoncivela, citthu cikhwaawe cotheene cimpheeleenyu, uyo naahala wuuphwanyihani.
34 Vano, nhikhale nimasukhuli nlattu wo citthu co meelo, kontha nihuku no meelo niri nimasukhulyaaya. Ni khula nihuku nihaana marikarikwaaya.
Notas
^ Niikereeku: “mmasinakooka.” Iyo maanaaya mapuro yaathukumanakaaya ayuuta wiira alompe ni asome Cowantikhiya Cowaarya.
^ Mapuro yaathukumanaaya ayuuta wiira alompe ni asome Cowantikhiya cowaarya.
^ Niikereeku: “iphaawu.”
^ Niikereeke: “citthu cinaalokiheehu.”
^ Niikereeku: “ale anaalokiheehu.”
^ Awula: “Tiyapu.”
^ Nlattu wo ittiini, ahaavo mahuku ayutaa yaalakelakaaya uhilya.
^ Awula: “afaalusu.”
