Ihapari Comaana Cantikhiye ni Matewus 7:1-29
7 “Nhiye waahukhumu akhunaninyu, wiira nyuuva ciicammo nhihukhumwiye;
2 kontha mananna cinaahukhumweenyu akhunaninyu, nyuuva phinhaleenyu uhukhumwiya, ni mananna cinaaphimeleenyu akhunaninyu, nyuuva ciicammo phinhaleenyu uphimeliya.
3 Vano nlattuni nnoweheeheenyu ikokhola iri nniithoni wa munneenyu, masi nhikhitiriki woona ikopo iri nniithoni winyu?
4 Awula, nnowa cani mmwiirelaka munneenyu co: ‘Nkani kuukumiheni ikokhola nniithoni winyu,’ nyuuva mwaaneeneenyu nnarina ikopo nniithoni winyu?
5 Atthu owootha!* Mpacereke wiikumiha ikopo nniithoni winyu, vano phinhaleenyu woona mananna ookumiha ikokhola nniithoni na munneenyu.
6 “Nhivahe ilapwa citthu ca Nluku, ni nhivonyere mihakhu cinyu ikuluwe, wiira nnyo cihinyakelace ni cihoorukunuweleni ciwaaka wuulumani.
7 “Nhihiyerere ulepela ni nnaahala uvahiya; nhihiyerere utotha ni nnaahala uphwanya; nhihiyerere waatta nkhora, ni nnaahala uhuleliya;
8 kontha ule nolepela, naahala uvahiya; ule nototha, naahala uphwanya; ni ule naatta nkhora, naahala uhuleliya.
9 Khweeliini, tipani nohala ukupali unvaha mwaamwanawe nluku, uyova nalepenle iphaawu?
10 Awula, tipani aahala ukupali unvaha inwaa, uyova nalepenle ihopa?
11 Vano, nyuuva nhookhalaru atthu oonanara nrima, nnaakhitiri waavaha asaaneenyu citthu comaana; niireke Apaapeenyu ari wiirimu, khanhala utepa waavaha citthu comaana ale anaalepela?
12 “Phimaana, mananna cinoocivelaayani uwaceriya, mwaawacereke ciicammo akhunaninyu. Khweeliini, ila phiitthu impheelaaya uhimya Nlamulo ni Maporofeeta.
13 “Nvire nkhora woophurya, ukhala wiira nkhora muulupale ni iparapaara yuulupale, cinrwaana wuukhwani, ni enci phinviraaya;
14 masi nkhora woophurya ni iparapaara yoophurya, cinrweeha wuukumini ni atthu vakaani phinvira.
15 “Ratta naatthu owootha, anooweelani yeeraka wiira anooluma mwancina na Nluku. Ayo anawiipankaca ukhala atthu oomaala khampa ikhontwaa, masi khweeliini, ayo akhanle miici cowoopiha ni coovoliya itala.
16 Nyuuva nnohala waacuwelela ayo atthwaayo nlattu wo citthu cimpankaaya.* Niireke cinaahephiyaka mihokorokho co uuva mmwirini wo mwiiwa? Awula mihokorokho co ifiigu mmwirini wo mwiiwa?
17 Inanna imocaaru, mwiri womaana uneema mihokorokho comaana, masi mwiri woohinamaana uneema mihokorokho coohinamaana.
18 Mwiri womaana khuneema mihokorokho coohinamaana, ni hataa mwiri woohinamaana khuneema mihokorokho comaana.
19 Mwiri uhineema mihokorokho comaana, atthu anaakottola ni uvonyera wamooroni.
20 Khweeliini, nlattu wo citthu cimpankaaya,* nnaahala waacuwelela ayo atthwaayo.
21 “Nhoonihe toko wiira otheene ale ankiirela: ‘Pwiiya, Pwiiya,’* anaahala ukela muumweneni wa Nluku, masi anhala ukela paasi ale ampanka citthu cinaacivela Apaapa, ari wiirimu.
22 Ninaahala uphiya nihuku atthu enci anhalaaya ukiirela: ‘Pwiiya, Pwiiya, khanilalyeenre khampa maporofeeta mwancina ninyu? Khanoomonle maciini mwancina ninyu? Ni khanipankile miiriirya mwancina ninyu?’
23 Masi mi kinhala uwaakhula, kawiirelaka co: ‘Akinoocuwelani! Nkhume va, anamavirikaniha malamulo!’
24 “Phimaana, ule neewelela moolumwaaka ni novarela nteko, nolikana ninlopwana aankhili, aatekile inupaawe wamwalani.
25 Vano yahorupa ipula, yahocara maaci nne nipuronne, ni yahottikhiya* iphyoo yuulupale, masi ile inupeele khiyaamonre,* ukhala wiira yaatekiye wamwalani.
26 Uhiya commo, ule noviriyana ala moolumwaala ni woohivarela nteko, nohala ukhala khampa nlopwana nlolo, aatekile inupaawe wanhaavani.
27 Vano yahorupa ipula, yahocara maaci nne nipuronne, ni yahottikhiya* iphyoo nipuro naaryaaya iyo inupeeyo, ni iyo inupeenyo yahomaruwaca yotheene.”
28 Yesu umaliha wawe wuulumaca ala moolumwaala, atthwaayo yahotikhinihiya venci cinene nlattu wo mananna ceetthucihaawe,
29 kontha uyo aawiitthuciha akaviheriyaka niikuru ca Nluku, kahi khampa ceetthucihaaya anamantikhaaya.
Notas
^ Awula: “afaalusu.”
^ Niikereeku: “nlattu wo mihokorokho caya.”
^ Niikereeku: “wo mihokorokho caya.”
^ Awula: “otheene ale aneera wiira anaakiswalela.”
^ Awula: “yahovuka.”
^ Awula: “khayaakanyuwacile.”
^ Awula: “yahovuka.”
