Ihapari Comaana Cantikhiye ni Matewus 8:1-34
8 Yesu ukhuruwa wawe umwaakoninwo, atthu enci yahancera untthara.
2 Vano, nlopwana aari namakuttula, ahowa nipuro naaryaawe Yesu, ahokhoroma uhoolo wawe ni ahomwiirela: “Mwatthuna vale nkivonihe.”
3 Ni Yesu ahotaphula moonooyo ni ahonvara uyo nlopwanooyo, eeraka: “Kinaapheela, uvoneke.” Woohipica, uyo nlopwanooyo ahovona.
4 Vano, Yesu ahomwiirela: “Ratta wiira nhihimyahimye, masi nrwee mwiithoonyihere wa nankuttho ni mwavahe itthuvo inlepeliya ninlamulo na Moceesi, wiira ucuweliye wiira khweeliini nyuuva nhovonihiya.”
5 Uphiya wawe u Kafarnau, nlopwana mmoca nhooleli aanakhotto, ahorwaa mpaka nipuro naaryaawe Yesu, uyo ahonlepela
6 ni ahomwiirela co: “Pwiiya, nantekwaaka noorupaathi, nowuntakya ni iyo itthwiiyo inanwerya cinene.”
7 Yesu ahaakhula eeraka: “Kaphiyaka nwo kinaahala unvoniha.”
8 Nhooleli aanatoropooyo ahomwaakhula eeraka: “Pwiiya, khunkiphwanela uwaakhelani mpaani waka, masi mweeraru avone, uyo naahala uvona.
9 Kontha miiva ciicammo kinlopwana kinwiiwelela akhulupale, ni kihaana anatoropa kinaahoolelaaka, ni kinaamwiirelaka mmoca: ‘Urwee!’ nuuyo naarwaa, ni kinaamwiirelaka nkhwaawe: ‘Uwe!’ nuuyo naawa, ni kinawiirelaka ipotthaaka: ‘Upanke ila!’ niiyo inaapanka.”
10 Ukati Yesu wiiwilyaawe iyo, ahokhala ootikhinihiya cinene ni ahowiirela ale yantthara: “Kinoohimeeryani ikhweeli wiira: Akinapaca umoona nsarayeli mu, ntthu rina waamini toko ula.
11 Masi kinwiirelani co: Anaahala uwa atthu enci yakhumaka mphantte unkhuma ncuwa ni unkela ncuwa, ni ayo anaahala wonkoma wiira alye meeca mamocaaru ni Aparahaamu, Isaaki ni Yakopi Muumweneni wo wiirimu;
12 masi asaana o Muumweneni wo wiirimu, anaahala uvonyeriya vate ni nwo phinhalaaya wunla ni ukhuura miinwaaya.”
13 Vano, Yesu ahomwiirela nhooleli aanakhottooyo: “Urweeke, iwiirannyeele ile inkupalyaa.” Ni nantekooyo ahovona yoole ukatyuule.
14 Uphiya wawe uwanuwawe Peturu, aahaaphwanya amaathyaawe Peturu aneecaatalenle yaaweryaaka ikopo.
15 Vano, ahaakwanya ntata naya ni yahovona ikopweeyo, ayo yaahunwa ni yahorwaa umwaaphyaacera.
16 Wiila waya, ahorwaaneliya atthu yaakenle maciini; ni ahoomola ayo maciinnyaayo ninuulumo nimoca paahi, ciicammo ahaavoniha atthu otheene yaawerennya,
17 wiira yiirannye ile yaahimilyaawe porofeeta Isaiya: “Uyo homaliha iretta cihu ni hocisa mahuvihweehu.”
18 Yesu uwoona wawe atthu enci ananrukurenrye, ahowiirela eetthucyaawe wiira arwaace mphantte nkhwaawe wopahari.
19 Namantikha mmoca, ahomwaattamela ni ahomwiirela: “Mwiitthucihi, kinawuuttharani motheene munhaleenyu uvira.”
20 Masi Yesu ahomwiirela co: “Akhwantte ahaana nipuro noorupa, inuni cihaana ipuuru, masi mwaana apinaatamu, kharina nipuro noorupa.”
21 Vano, mwiitthuci nkhwaawe aahomwiirela co: “Pwiiya kimpaca toko urwaa waasikha apaapa.”
22 Yesu ahomwiirela co: “Uhihiyerere ukitthara, waahiye atthu ookhwa yavithanaka ayaayoru.”
23 Vano, Yesu ahokela nkalawani ni eetthucyaawe yahontthara.
24 Yeettakoono, ahokhumelela naphuvu muulupale mpaharimmo, mpaka mawimpi yankhuneela ikalaweeyo, masi Yesu anrupa.
25 Ayova yahorwaa unvusa, yeeraka: “Pwiiya, nnoopole nihanle ukhwa!”
26 Masi uyo ahowiirela co: “Nnotepelani woova commo, alopwana ookhalana waamini vakaani?” Vano, ahonwa ni ahopwapwela iphyoo ni ipahari, ni woohipica naphuvuuyo ahomaala.
27 Nlattu wo iyo itthwiiyo, ayo alopwanaayo yahokhala ootikhinihiya, ni yaheera: “Ula nlopwanoola tipani? Hataa iphyoo ni ipahari cinaamwiiwelela.”
28 Uphiya waya mphantte nkhwaawe wopahari, ncoko wo Katare, alopwana eeli ookeliya maciini, yahokhuma umahiye ni yahorwaa mpaka waaryaawe Yesu. Ayo waanaacivela nkhitto, phimaana khaavo aakhitiri uvira ule nttaloole.
29 Ni yahancera ukhuwela, yeeraka co: “Unnipheelela isiyani mwaana a Nluku? Waawile unittharusa uhinaphiya ukati?”
30 Uttayi wo nne nipuronne, canoonnya ikuluwe cinci cilyaaka.
31 Maciinnyaayo yaahancera unlepela, yiiraka: “Unoomolele mmakuluweni cirinnye vale.”
32 Ni uyova aheerela co: “Nrweeke!” Naayo maciinnyaayo yahokela mmakuluweni, ni ikuluwe cotheene cahotuthuwa, cahotthawa, cahomorela mpahari ni cahokhwa mommo.
33 Ale yaahakhela ikuluwe, yahotthawa ni yahorwa usittatti uhimyaca citthu cotheene coonilyaaya, uhela nhina ile yaawiirannyenle ale alopwana yaakeliye nimaciinnyaale.
34 Vano atthu otheene yaari usittatti, yahokhuma wiira yamoonanane Yesu, umoona waya, yahonlepela wiira akhume ule ncokoole.
