Woohitikhiniha, ala mooniherwaala omeetthucero ari mbiiblyani aholipihera nifentonaa ni Yehova. Nna nifento nna ninlamuliya ulipihaciya woohoceeleliya. (1 Peturu 2:2) Uwehererawaa wo ukumi woohimala unhala ulipa wakhanyereraka umphiyeera Nluku usomaka Nuulumo nawe.​—Unsome Joau 17:3; Yuda 21.

Wanhalaaya wuncereryaa ucuwelawaa myaha ca Nluku, waaminiwaa unaarwa ulipa. Waaminiwaa unaahala wuukavihera unciveliha Nluku. (Maberewu 11:1, 6) Waamini unaahala wuuvaha ikuru yoorukunusa nrima nuurukunusa makhalelwaa.​—Usome Miteko 3:19.

Weeva pooti wuucivelaka waahimerya akhunanaa citthu ciitthucalyaa—oothene cihu unaanicivela uvaha ihapari comaana. Waahihiyerere usoma Ibiiblya, weeva unaahala wiitthuca coovarela nteko Ibiiblya wiira waattonkacere atthu cinmwaminnyaa Yehova ni wiira waathoonyihere ihapari comaana cirivo mbiiblyani.​—Usome Arooma 10:13-15.

Atthu enci anancera ulalya yaahimeryaka asipatthannyaaya ni asimucyaaya myaha cohapari co citthu ciitthucalyaaya. Masi wuulume ratta. Uhiya weerela ittiinnyaaya ikhanlee yowootha, waahimeerye inatiri ca Nluku. Wuupuwelele wiira itthu inaatikhiniha venci cinene atthu, phi ile impankaa, uhiya inhimyaa.​—Unsome 2 Timotiyu 2:24, 25.

Usoma Nuulumo na Nluku ninaahala wuutthukula nru.  Wahoolo, weeva pooti waataana cinene ni Yehova. Khweeliini, weeva pooti urwaa ukhala wanlokoniwawe.​—Unsome 2 Akorintu 6:18.

Weeva pooti utthukuwa muru waahihiyerereke usoma Nuulumo na Nluku. (Maberewu 5:13, 14) Unlepele Saahiti a Yehova wiira oosomane Ibiiblya, ni ilivuru O Que Nos Ensina a Bíblia? Wanhalaa wuncera wiitthucawaa Moolumo a Nluku, makhalelwaa anaahala utepa winciva ukhala omaana.​—Usome Isaalimu 1:1-3; 73:27, 28.

Ihapari comaana cinweela wa Yehova, Nluku ootteeliya. Weeva pooti umphiyeera waattamelelaka nlokonawe. (Maberewu 10:24, 25) Uhihiyerera wiikurumica wiira uncivelihe Yehova, unkhala uvaresesa ukumi weekhweeli—ukumi woohimala. Umphiyeera Nluku, khweeliini itthu yoorera upanka.​—Unsome 1 Timotiyu 1:11; 6:19.