Nluku nawaalattula atthu onlaponi moothene wiira amphiyeere anlompaka. (Isaalimu 65:2) Masi uyova khanviriyana, awula khanaakhelela khula ulompiya. Wootakihera, malompelo a nlopwana owaahuviha amwaarawe anaarikarika uviriyaniya. (1 Peturu 3:7) Maisrayeli waakhanyereraaya upanka citthu coohiloka, Nluku khaaviriyana ulompawaya. Masi, Nluku naaviriyana ulompa wa ntthu ootepana uttheka akhala wiira horukunusa nrima. Unawoonannyaa wiira ulompa ukhanlee ureeriyawihu.​—Unsome Isaiya 1:15; 55:7.

Ulompa ukhanlee mphantte wo maswalelweehu, phimaana nihaana ninlompaka Mpattusiihu paahi, Yehova. (Matewus 4:10; 6:9) Uhiya voo, ukhalawihu atthu oopahuwa, nihaana nivahereraka ulompawihu ni ncina na Yesu, kontha aakhwile nlattu wo matampiihu. (Joau 14:6) Yehova khunoncivela wiira ninlompeke ni moolumo oosunkiya mmuru awula owantikhaciya wanipuroni. Mpheela ninlompeke ninrima woothene.​—Unsome Matewus 6:7; Afilipo 4:6, 7.

Mpattusiihu naakhitiri ciicammo uviriyana ulompiya woomaleliya. (1 Samuweli 1:12, 13) Uyo naanilattula wiira ninlompeke khula ukathi toko, uwicisu, uhiyu, woopheela ulya, hataa ciicammo nasankaka.​—Usome Isaalimu 55:22; Matewus 15:36.

Umphiyeera Nluku khinakhala itthu yoohirika kontha nirii wariyari wo atthu oohimwaamini Nluku ni antarawaca  inatiryaawe yoowaana nnema nlaponi moothene. (2 Timotiyu 3:1, 4; 2 Peturu 3:3, 13) Phimaana nimpheela ukhala wamoca ni mphwinko waasunnihu annilipihera, ni ayo ciicammo anaanipheela.​—Usome Maberewu 10:24, 25.

Ukhala mpatthani aatthu anonfenta Nluku unaanikavihera umphiyeera Nluku. Mikutthaano co Masaahiti a Yehova cinkhala ukathi unlipiheriyeehu ni waamini waakhwiihu.​—Usome Arooma 1:11, 12.

Weeva pooti umphiyeera Yehova woopuwelelaka itthu yiitthucalyaa mmolumoniwawe. Wuupuwelele miteko, malakihero, ni inatiri ca Nluku. Wuupuwelela nilompaka unaanikavihera ulemeliha wokhweeli nifento na Nluku ni ucuwelacawawe.​—Unsome Josuwe 1:8; Isaalimu 1:1-3.

Weeva unhala umphiyeera Nluku, wankhuluvelaka ni wamwaaminiki. Waamini uri khampa mwiri woopheela umiceriya. Uhaana umicera woohihiyerera waaminiwaa wuupuwelaka citthu cinlipiherera cinkupalyaa.​—Unsome Matewus 4:4; Maberewu 11:1, 6.

Yehova nawaawacera ale anonfenta. Uyo pooti wuusunka wo citthu coothene caahala utankanya waaminiwaa ni nweherero wo ukumi woohimala. (Isaalimu 91:1, 2, 7-10) Uyo naanuupusera unyema makhalelo yaahala woopopiha ukumiihu nuutteliyawihu. Yehova naaniitthuciha makhalelo omaana.​—Usome Isaalimu 73:27, 28; Tiyaku 4:4, 8.