MPANTTA 14
Nluku unoncivela aswaleliyeke inannani?
Khampa conneehu nhina mpantta 13, Nluku khankupali ittiini cotheene. Masi hi pooti wanonswaleleehu Mumpiihu nimananna cinoncivelaaya. Vano ‘inannani yooswali [awula ittiinini]’ uyova inkupalyaawe. (Tiyaku 1:27, niwehero) Nttwee noone itthu ineetthucihaaya Ibiiblya nhina uyo mwahooyo.
1. Isiyani inhala unikavihera ucuwela inanna yomaana yonswalela Nluku?
Itthu inhala unikavihera ucuwela ikhanle Ibiiblya. Yesu ahomwiirela Nluku co: “Moolumwaa akhanle ikhweeli.” (Joau 17:17) Ittiini cinci uhiya utthara itthu ineetthucihaaya nuulumo na Nluku, nnyo cintepa uvaha ifayita ilema ni citthu cineetthucihaaya apinaatamu. Masi Nluku khanaakupali ale ‘annyema malamulwaawe.’ (Nsome Markus 7:9.) Coo, hi ninontteeliha nrima Yehova, neewelelaka itthu inhimyaaya Ibiiblya.
2. Manannani cinlamuliyeehu unswalela Nluku?
Nihaana ninswalelaka Nluku kontha uyo phinumpile. (Apokalipise 4:11) Phimaana, khaninlamuliya waaswalela attontto awula ilatarato.—Nsome Isaiya 42:8.
Uswali wihu uhaana ukhalaka ‘wowaarya ni unoncivela’ Yehova. (Arooma 12:1) Iyo maanaaya wiira nihaana niiwelelaka malamulwaawe ni ufenta. Wootakihera, atthu anonfenta Yehova anawiiwelela malamulwaawe anooluma nhina uthelanaca. Ni ayo khampanka citthu toko, unlya soone, ulya citthu coohapala ni uhapaliya. a—Nwehe niwehero.
3. Kontha isiyani ninlamuliyeehu unswalela Yehova wamoca naakhunanihu?
Yehova nonilepela urwaa mmamikutthaanoni kontha uyo naanifenta ni naacuwela wiira upanka commo unaanikavihera ukhala ootteeliya mpaka. Narwaaka mmamikutthaanoni co wanlokoni, hi ninanttottopela ni ninanswalela Yehova. Inanna imoca yoopanka iyo, ukhanle wiipa ninttottopelaka Nluku. (Nsome Isaalimu 104:33.) Macipo aneepiya mmamikutthaanoni anaanivaha iparakha ‘yonttottopela Yehova wanlokoni.’ (Isaalimu 111:1, 2) Uhiya commo, hi narwaaka mmamikutthaanoni, ninawaalipiha akhunanihu naayo ciicammo anaanilipiha.
MUNCERERE WIITTHUCA WINYU
Moone nlattuni Yehova khunoncivela unswalela nivarelaka nteko ilatarato ni ciicammo moone nlattuni ikhanlyaaya itthu yuulupale unttottopela Nluku.
4. Wonswalela Nluku khaninlamuliya unvarela nteko ttontto awula ilatarato
Nincuwela cani wiira Nluku khunoncivela hiivano unvarela nteko ttontto awula ilatarato wonswalela? Moone IVIDIYU, ni mwamalihaka woona, moopele mwaha nna nikohonna:
-
Khalayi, iriyari yaatthu yanswalela Nluku, ahaavo yaamananihile unswalela uyova yanvarelaka nteko ttontto. Isiyani yaakhumelenle nlattu woopanka iyo itthwiiyo?
Ahaavo atthu aneera wiira ukati wonswalela Nluku, anonvarela nteko ttontto kontha ampheela wiicoona utepa umwaattamela uyova. Masi niireke wiira iyo inanna yomaana yonswalela Nluku? Nsome Nkwaha 20:4-6 ni Isaalimu 106:35, 36. Mwamalihaka usoma, moopele mwaha ala makohwaala:
-
Citthuni awula ilataratoni cipacileenyu uwoona atthu yavarelaka nteko wiira answalele Nluku?
-
Niireke Yehova unancivela uwoona atthu yavarelaka nteko ilatarato wiira answalele?
-
Nyuuva woonela winyu unaareera uvarela nteko ilatarato awula ttontto wiira ninswalele Nluku?
5. Unswalela Yehova paasi unaanikavihera unyema citthu cineetthucihiya cowoothiya
Moone manannani unswalela Yehova toko cimpheelaawe cinnikaviheraaya unyema citthu cineetthucihiya cowoothiya. Moone IVIDIYU.
Nsome Isaalimu 91:14, ni mwamalihaka usoma, moopele mwaha nna nikohonna:
-
Hi ninthoonyihera wiira ninanfenta Yehova nanswalelaka uyova paasi. Isiyani Yehova innikhuluvelihaawe napankaka iyo itthwiiyo?
6. Mmamikutthaanoni cimpankiya Usalau yo Umwene ninanswalela Nluku
Hi ninonttottopela Yehova ni ninaalipiha mayamunneehu nakomentariki ni neepakavale mmamikutthaanoni ceekristau. Nsome Isaalimu 22:22, ni mwamalihaka usoma, moopele mwaha ala makohwaala:
-
Nyuuva unawuucivelani wiiwa ikomentaariyu mmamikutthaanoni?
-
Waanoocivelani wiitthenkaca wiira nkomentari?
7. Yehova nokhala ootteeliya naahimyeeraka akhunanihu citthu cineetthuceehu
Otheene cihu ninaakhalanaka ukati wooreera waahimyeera akhunanihu ikhweeli co mbiiblyani. Nsome Isaalimu 9:1 ni 34:1. Mwamalihaka usoma, moopele mwaha nna nikohonna:
-
Nyuuva nheetthuca ikhweeli co mbiilblyani cinci. Ikhweelini yoocivenleni unhimyera ntthu?
ATTHU AKIINA ANEERA: “Hi pooti unswalela Nluku manannani. Itthu yuulupale ukhanle upanka citthu comaana.”
-
Nyuuva nnaakupali?
UTHIKILELA
Hi ninontteeliha nrima Mumpiihu nanswalelaka uyova paahi, nanttottopelaka mmamikutthaanoni ni naahimyeeraka akhunanihu citthu cineetthuceehu.
Wuupuwela
-
Isiyani inhala unikavihera ucuwela inanna yonswalela Nluku toko cimpheelaawe?
-
Kontha isiyani ninlamuliyeehu unswalela Yehova paasi?
-
Kontha isiyani nihaana ninswalelaka Nluku wamoca naale ampheela upanka citthu cinoncivela?
MWAPHEELAKA UCUWELA CITTHU CIKIINA
Nsome ihantisi yaathiyana amoca yaatteeliye venci cinene uhiya waya waaswalela attontto.
“Nna co akinaaswalela attontto” (Ukhalenla, 1 yo Julho yo 2011)
Ncuwele itthu inhala wuukaviherani ukomentari mmamikutthaanoni.
“Munttottopele Yehova wanlokoni” (Ukhalenla, yo Janeiro yo 2019)
Moone mananna mikutthaano cinkavihenryaaya ula mmirawoola, hataa ukhalaka wiira waanonrikarikela urwaa Usalau yo Umwene.
Atthu enci ankupali wiira makristau ahaana yavarelaka nteko nsalapa ukati wooswali. Niireke iyo ikhweeli?
“Kontha isiyani Masaahiti a Yehova khanvarela nteko nsalapa?” (Mwaha umphwanyannya nsayitini jw.org)
a Niwehero: Ninaahala woopela mwaha nnyo citthunnyo nhina mipantta cikhwaawe.
