MPANTTA 18
Makristau eekhweeli ninhala waacuwelela cani?
Ntuninyani motheene atthu imiliyau cene aneera wiira makristau. Masi kahi wiira atthu otheene ankupali citthu cimocaaru, awula aneettela citthu cimocaaru. Vano, ninhala ukhitiri cani waacuwelela makristau eekhweeli?
1. Nkristau eekhweeli tipani?
Nkristau eekhweeli khanle mwiitthuci, awula, ntthari a Yesu Kristu. (Nsome Miteko 11:26.) Isiyani inthoonyera ntthu ukhala ntthari a Yesu Kristu? Yesu mwaneene heera: “Mwaahihiyeke utthara moolumwaaka, nnaahala ukhala khweeliini attharyaaka.” (Joau 8:31) Iyo maanaaya wiira nkristau eekhweeli haana eewelelaka citthu ciitthucihilyaawe Yesu. Citthu ceetthucihaawe Yesu ni caapankaawe canvaranaca ni itthu inhimyaaya Nuulumo na Nluku. Inanna imocaaru, citthu cotheene cinoolumaaya makristau eekhweeli ni cimpankaaya, cihaana civaranacaka ni itthu inhimyaaya Ibiiblya.—Nsome Luka 24:27.
2. Manannani makristau eekhweeli cinthoonyeraaya nifento?
Yesu howiirela attharyaawe: “Nfentane, khampa miiva cuufentilyaakani.” (Joau 15:12) Manannani Yesu cithoonyenryaawe wiira aanaafenta attharyaawe? Uyo aanaakavihera attharyaawe ni anwuulumela moolumo oolipiha. Ni anviriha ukati wiira akhale wamoca naayo. Mpaka Yesu ahaamini uleva ukumyaawe wiira awoopole attharyaawe. (1 Joau 3:16) Inanna imocaaru, makristau eekhweeli khaanaaca wuuluma nifento paasi. Ayo anaathoonyihera nimoolumo ni citthu cimpankaaya wiira anaafentana.
3. Makristau eekhweeli ntekoni unvaraaya?
Yesu haavaha attharyaawe nteko wofayita cinene. “[Uyo] ahaaruma waalalyeera atthu Umwene wa Nluku.” (Luka 9:2) Masi ayo makristawaayo khayaalalyeera paasi mapuro yaathukumanaaya atthu wiira answalele Nluku. Ciicammo, ayo yanlalyeera mapuro aatthu enci ni inupa niinupa. (Nsome Miteko 5:42; 17:17.) Mahukwaala, makristau eekhweeli ciicammo anaalalyeera ikhweeli co mbiiblyani, pooti ukhala nipuroni. Ayo anawaafenta atthu, phimaana unawaattela nrima uvarela nteko ukatyaaya ni ikuru caya wiira yaahimyeere atthu ihapari co mbiiblyani cinvaha nweherero ni cimmaaliha.—Markus 12:31.
MUNCERERE WIITTHUCA WINYU
Moone citthu cinaavirikaniha makristau eekhweeli naale ahineettela citthu ciitthucihilyaawe Yesu ni ahinontakiha.
4. Ayo anaapheela ucuwela ikhweeli co mbiiblyani
Makristau okhalayi yaaneewelela Nuulumo na Nluku
Kahi wiira atthu otheene aneeciirela makristau anawoona ukhala itthu yofayita ucuwela ikhweeli co mbiiblyani. Moone IVIDIYU, ni mwamalihaka woona, moopele mwaha nna nikohonna:
-
Citthuni ciitthucihilyaaya ikereeca cikiina civirikanne ni nnye ciitthucihilyaawe Yesu?
Yesu heetthuciha ikhweeli co nnuulumoni na Nluku. Nsome Joau 18:37, ni mwamalihaka usoma, moopele mwaha nna nikohonna:
-
Toko cinryaawe Yesu, isiyani inhala unikavihera waacuwelela makristau ari “mphantte wo ikhweeli”?
5. Ayo anaalalyeera ikhweeli co mbiiblyani
Makristau okhalayi yanlalyeera ihapari comaana
Yesu hinaaya uturuwela wiirimu, uyo ahaavaha attharyaawe nteko unvariya mpaka mahukwaala. Nsome Matewus 28:19, 20 ni Miteko 1:8. Mwamalihaka usoma, moopele mwaha ala makohwaala:
-
Niireke ihapari comaana caahala ulalyeeriya micoko vakaani paasi? Caahala ulalyeeriya mpaka yaakhani?
6. Ayo anaweettela citthu cineetthucihaaya
Nlopwana neehaniya Tom, isiyani yaamwiirihile ukupali wiira haaphwanya makristau eekhweeli? Moone IVIDIYU, ni mwamalihaka woona, moopele mwaha ala makohwaala:
-
Ividiyu nonneehu, isiyani yaamwiirihile nlopwana neehaniya Tom uhiwacera-tho ittiini?
-
Isiyani yankupalihile nlopwana neehaniya Tom wiira hophwanya ikhweeli?
Wuulumaca paasi khuntosa, itthu yuulupale ukhanle upanka itthwiiyo. Nsome Matewus 7:21, ni mwamalihaka usoma, moopele mwaha nna nikohonna:
-
Itthuni intepaawe uvaha ifayita Yesu: ile ineereehu wiira ninaakupali awula impankeehu nooniheraka wiira ninaakupali?
7. Nifento ninthoonyeranaaya nikhanle nokhweeli
Makristau okhalayi yanfentana
Niireke khweeli makristau anaaleva ukumyaaya wiira awoopole mayamunnaaya? Moone IVIDIYU, ni mwamalihaka woona, moopele mwaha ala makohwaala:
-
Nvidiyunimmo, isiyani yaamwiirihile munna Lloyd uleva ukumyaawe wiira amoopole munna Johansson?
-
Nyuuva woonela winyu, itthu yaapankilyaawe munna Lloyd ahoonihera ukhala nkristau eekhweeli?
Nsome Joau 13:34, 35, ni mwamalihaka usoma, moopele mwaha ala makohwaala:
-
Manannani atthari a Yesu (makristau eekhweeli) yaahalaaya utafitana? Niireke wiira ayo yaahala utafitana yanweheraka ntthuuyo ikhapilaawe awula ilapwaawe?
-
Niireke wiira ayo yanhala uthoonyiherana nno nifentonno hataa yaaniyaka ikhotto?
ATTHU AKIINA ANEERA: “Ntthu pooti ukhala ittiini impheelaawe; itthu yuulupale ukhanle unkupaleela Yesu.”
-
Iveerusuni yo mbiiblyani yaahaleenyu usoma wiira munkavihere ntthu ucuwela wiira khuntosa unkupaleela Yesu?
UTHIKILELA
Makristau eekhweeli anawiiwelela itthu inhimyaaya Ibiiblya, anaathoonyihera nifento neekhweeli ni anaalalyeera ihapari comaana co mbiiblyani.
Wuupuwela
-
Citthu cotheene cinoolumaaya ni cimpankaaya makristau eekhweeli cinvaranaca niisiyani?
-
Ikhaleloni inaathoonyera makristau eekhweeli?
-
Ntekoni unvaraaya makristau eekhweeli?
MWAPHEELAKA UCUWELA CITTHU CIKIINA
Ncuweleehe ikhurupu yaatthu aneekurumica untakiha Yesu ni weettela citthu ciitthucihilyaawe.
Nsome ihantisi imoca yaathiyana ahiile ukhala ttoona ookereeca ni yaaphwanyile “amuci eekhweeli oominepani.”
“Ayo yaanaakhula makoho yaarinaaka yavarelaka nteko Ibiiblya” (Ukhalenla, 1 yo Abril yo 2014)
Moone mananna makristau eekhweeli cinaathoonyeraaya nifento mayamunnaaya ampheela ukaviheriya.
Mphwinko wo mayamunna unkavihera yakhumelelaka ihasara—Ividiyu yoothikileliya (3:57)
Nsomasome mananna makristau eekhweeli o mahukwaala cinaatakihaaya makristau okhalayi yiiwelelaka citthu ciitthucihilyaawe Yesu.
“Isiyani inaathoonyera makristau eekhweeli?” (Ukhalenla, 1 yo Março yo 2012)
