MPANTTA 19
Niireke Masaahiti a Yehova akhanle makristau eekhweeli?
Hiiva Masaahiti a Yehova, ninaakupali wiira nikhanle makristau eekhweeli. Kontha isiyani? Nhina ula mpanttoola, ninaahala woopela mwaha itthu inlipiherera citthu cinkupaliihu, kontha isiyani nineeciihaneehu Masaahiti a Yehova ni manannani cinthoonyeraneehu nifento.
1. Citthu cinkupalyaaya Masaahiti a Yehova cinlipihereriya niisiyani?
Yesu heera: ‘Nuulumo [na Nluku] nikhanle nokhweeli.’ (Joau 17:17) Khampa Yesu Kristu, citthu cinkupaliihu cinlipihereriya ni Nuulumo na Nluku. Moone mananna cimpankeehu iyo itthwiiyo ikhumelo yancenryaaya ihantisiihu yo mahukweehwaala, mwaakha wookhalaka 1870. Uyo ukatyuuyo, ihaavo ikhurupu yaatthu yancenre usoma Ibiiblya sana-saana. Ayo atthwaayo yaapheela ucuweleeha itthu ineetthucihaaya Ibiiblya. Yeeweehaka itthu ineetthucihaaya Ibiiblya, iyo itthwiiyo phaakupalyaaya, hataa ivirikanaka ni ile yeetthucihiya mmakereeca. Vano, ayo yanwiitthuciha nnyo ikhweeliinnyo atthu akhwaawe. a—Nwehe niwehero.
2. Kontha isiyani nineeciihaneehu Masaahiti a Yehova?
Yehova atthu anonswalela nowiihana masaahityaawe, kontha ayo anaahimyaca ikhweeli cawe. (Maberewu 11:4–12:1) Wootakihera, khalayi Nluku ahowiirela apoovwaawe: “Nyuuva nkhanle masaahityaaka.” (Nsome Isaiya 43:10.) Yesu ciicammo nawiihaniya “Saahiti ookhuluvelya.” (Apokalipise 1:5) Phimaana, ikhumelo mwaakha wo 1931, nahancera wiiciihana Masaahiti a Yehova. Unaanitteela nrima ukhalana nno ncinanno.
3. Manannani Masaahiti a Yehova cintakihaaya nifento nithoonyenryaawe Yesu?
Yesu aanaafenta cinene attharyaawe ni uyo aawoona ayo ukhala amucyaawe. (Nsome Markus 3:35.) Inanna imocaaru, Masaahiti a Yehova anawaataana ni akhanle amuci amphwanyannya ntuninyani motheene. Phimaana ayo aneehananaaya munna ni nuunu. (Filemoni 1, 2) Hi ciicammo ninaweettela moolumo o mbiiblyani aneera: “Nfente mphwinko wo mayamunna wotheene,” awula mwaafente mayamunna otheene. (1 Peturu 2:17) Hi ninthoonyera nno nifentonno nimananna menci, venci-venci wakhalaka wiira mayamunneehu anaapheela ukaviheriya.
MUNCERERE WIITTHUCA WINYU
Ncuwele sana-saana ihantisi yo Masaahiti a Yehova ni moone citthu cikhwaawe cinthoonyera wiira ayo akhanle makristau eekhweeli.
Makristau eekhweeli citthu cinkupalyaaya cinlipihereriya niibiiblya ni anaawiitthuciha atthu citthu cineetthucaaya
4. Citthu cinkupaliihu cinlipihereriya mbiiblyani
Yehova ahohimya khalayiiru wiira waphiyaka ukati wo mahuku ookhicera, ikhweeli co mbiiblyani canhala wiiweehiya sana-saana. Nsome Daniele 12:4 ni niwehero. Mwamalihaka usoma, moopele mwaha nna nikohonna:
-
Toko cinhimyaaya ila iveeruswiila, isiyani ‘yaahala winciva’ ukati apoovu a Nluku waahalaaya usoma cinene Ibiiblya?
Moone manannani ikhurupu imoca yaasomaaya Nuulumo na Nluku. Nhina iyo ikhurupwiiyo ahaavo nlopwana mmoca eehaniya Charles Russell. Moone IVIDIYU, ni mwamalihaka woona, moopele mwaha nna nikohonna:
-
Nvidiyunimmo, manannani nlopwana eehaniya Charles Russell wamoca naakhunanawe caasomaaya Ibiiblya?
Mwaanaacuwela?
Ikwaha cikhwaawe, hi ninaarukunusaka citthu cinkupaliihu co mbiiblyani. Kontha isiyani? Kontha Nluku naakavihera atthu wiiweeha citthu co mbiiblyani vakaani-vakaani, toko vaavale ncuwa wookhuma uwicisu ninkaviheraaya wooniya citthunnyo vakaani-vakaani. (Nsome Miruku 4:18.) Phimaana, hataa ukhalaka wiira itthu inhimyaaya Ibiiblya waviraka ukati khinrukunuwa, hiivano neeweehaka sana-saana itthu inhimyaaya, ninaarukunusa citthu cinkupaliihu.
5. Masaahiti a Yehova: ninaalalya ikhweeli ca Yehova
Kontha isiyani nithanlileehu ncina Masaahiti a Yehova? Moone IVIDIYU, ni mwamalihaka woona, moopele mwaha nna nikohonna:
-
Kontha isiyani pooti waneereehu wiira ncina Masaahiti a Yehova nihothanliya saana?
Kontha isiyani Yehova aathanlilyaawe atthu wiira akhale masaahityaawe? Kontha ayo masaahityaayo yanhala waakihera ncina nawe, ukhala wiira atthu enci anawuuluma citthu cowoothiya yamwaacaka uyova. Nttwee noopele mwaha citthu piili cinootherihiyaawe.
Ittiini cikhwaawe cineetthuciha wiira Nluku nopheela wiira atthu anvarele nteko ttontto awula ilatarato ukati wonswalela uyova. Masi niireke wiira iyo ikhanle ikhweeli? Nsome Levitiku 26:1, ni mwamalihaka usoma, moopele mwaha ala makohwaala:
-
Niireke khweeliini Nluku nopheela wiira ninvarele nteko ttontto ukati wonswalela uyova? Yehova nowoonela cani attontto?
Ittiini cikhwaawe cineetthuciha wiira Yesu khanle Nluku. Masi niireke phiyeeyo? Nsome Joau 20:17, ni mwamalihaka usoma, moopele mwaha ala makohwaala:
-
Niireke wiira khweeliini Yesu khanle Nluku? Yesu ni Nluku khanle ntthu mmoca?
-
Nluku haathanla apoovu wiira attonkace ikhweeli cawe ni ca mwanawe. Nyuuva nneecoona cani ucuwela winyu iyo itthwiiyo?
6. Hiiva ninaafentana
Ibiiblya inawaalikaniha makristau ni miphantte coovirikana co mwiirutthuni yaapinaatamu. Nsome 1 Akorintu 12:25, 26, ni mwamalihaka usoma, moopele mwaha ala makohwaala:
-
Isiyani makristau eekhweeli inlamuliyaaya upanka yamoonaka nkhunanaya ahuvahuvaka?
-
Nyuuva mwiitthucileni woona winyu mananna Masaahiti a Yehova cinfentanaaya?
Wakhalaka wiira ihaavo ilapo amphwanyannya Masaahiti a Yehova ampheela ukaviheriya, woohipica mayamunnaaya o ntuninyani motheene anawiikurumica wiira yaakavihere. Wiira moone ntakihero nimoca, moone IVIDIYU, ni mwamalihaka woona, moopele mwaha nna nikohonna:
-
Nvidiyunimmo nihoona wiira yakhumelelaka ihasara, Masaahiti a Yehova anawaavererya mananna wiira yaakavihere mayamunnaaya yaakhumelenle iyo ihasareeyo. Iyo itthwiiyo inthoonyera isiyani?
Makristau eekhweeli anaathoonyihera nifento yaakaviheraka ale ampheela ukaviheriya
ATTHU AKIINA ANEERA: “Masaahiti a Yehova ikhanle ittiini ikhumelenle phiyaaru.”
-
Ikhumelo mwaani wancenryaawe Yehova uwiihana atthu anonswalela masaahityaawe?
UTHIKILELA
Masaahiti a Yehova akhanle makristau eekhweeli. Hi nikhanle amuci amphwanyannya ntuninyani motheene anonswalela Nluku, citthu cinkupaliihu cinlipihereriya niibiiblya ni ninaawiitthuciha atthu ikhweeli ca Yehova.
Wuupuwela
-
Kontha isiyani nithanlileehu ncina Masaahiti a Yehova?
-
Manannani cinfentaneehu?
-
Nyuuva woonela winyu, Masaahiti a Yehova makristau eekhweeli?
MWAPHEELAKA UCUWELA CITTHU CIKIINA
Ncuwele sana-saana ihantisiihu.
Testemunhas de Jeová — Fé em ação, parte 1: Da escuridão para a luz (1:00:53)
Moone ntakihero ninoonihera wiira Masaahiti a Yehova khayoovile uvaanyiha citthu ceetthucihiya cowoothiya.
Moone makoho atthu enci ampankesaaya nhina Masaahiti a Yehova.
“Makoho ampankesiya nhina Masaahiti a Yehova” (Mwaha umphwanyannya nsayitini jw.org)
Nlopwana neehaniya Stephen ampanka mphantte ikhurupu yaapanka ikhirini nlattu woothanyanaciya. Moone isiyani yaamwiirihile urukunusa makhalelwaawe waacuwela wawe Masaahiti a Yehova.
“Makhalelwaaka yaanaaca utepaca uhikhala saana” (Ukhalenla, 1 yo Julho yo 2015)
a Niwehero: Irevista intepeehu uvarela nteko ineehaniya Ukhalenla, inaahimyaca ikhweeli co mbiiblyani ikhumelo mwaakha wo 1879.
