MPANTTA 27
Mpankekeni wiira ukhwa wa Yesu Kristu uwoopoleni?
Hiiva ninvara matampi, ninhuvahuva ni ninkhwa kontha Atamu ni Hawa yaahoohiya umwiiwelela Nluku. a (Nwehe niwehero.) Masi hataa ukhala commo hiiva nihaana nweherero. Yehova ahonveleeliha Mwanawe, Yesu Kristu, wiira anoopole mmatampini ni muukhwani. Ibiiblya ineetthuciha wiira ukhwa wawe uyo honoopola. Woopoliya inkhala iperesu inliviya wiira atthukuliye ntthu. Iperesu ilivilyaawe Yesu ukhanle ukumi weepinaatamu waarinaawe woohipahuwa. (Nsome Matewus 20:28.) Yesu ahaamini uleva ukhala mahuku otheene va watuninyani va. Coo, uyo honihulela iphiro wiira niphwanye-tho citthu cotheene Atamu ni Hawa cihalenlyaaya. Ukhwa wa Yesu unaathoonyera wiira Yehova ni uyova anaanifenta cinene. Ula mpanttoola unaahala wuukaviherani utepa usukhuru wiivaherera wa Yesu.
1. Manannani ukhwa wa Yesu cinnikaviheraaya mahukwaala?
Hiiva nikhanle atthu oopahuwa, phimaana ninaapankaka ikwaha cinci citthu cinonrusa Yehova. Masi nlattu wo itthu inipankenlyaawe Yesu, hiiva pooti wanleveleliyeehu itampi cihu. Vano wiira nileveleliye, nihaana noonihera uttharuwa weekhweeli, ulepela uleveleliya ni Yehova mwancina na Yesu Kristu ni wiikurumica wiira nihaakulele-tho upanka yeeyo itthwiiyo. Napankaka commo, hiiva ninaahala ukhalana upatthani woolipa ni Yehova. (1 Joau 2:1) Ibiiblya ineera: “Kristu khwile nlattu wo matampi weemaara imoca mpaka, ntthu oweettela isariya ukhwa nlattu wo ale ooheettela isariya, wiira aarweehele wa Nluku.”—1 Peturu 3:18.
2. Manannani ukhwa wa Yesu cinhalaaya unikavihera wahoolo?
Yehova ahonveleeliha Yesu wiira avahe ukumyaawe woohipahuwa ‘wiira ntthu nohala umwaamini Yesu hitankanyiye, masi aphwanye ukumi woohimala.’ (Joau 3:16) Nlattu Yesu wowiivaherera, Yehova naahala umalamaliha citthu cotheene cootakhala cinkhumelela nlattu Atamu woohimwiiwelela uyova. Iyo maanaaya wiira, naaminiki wiivaherera wa Yesu, ninaahala ukhalana iparakha yookhala upeephoni mpaka va watuninyani va!—Isaiya 65:21-23.
MUNCERERE WIITTHUCA WINYU
Mwiiweehe sana-saana kontha isiyani Yesu khwilyaawe nlattu wo hiiva ni manannani iyo itthwiiyo cinhalaaya wuukaviherani.
3. Ukhwa wa Yesu unaanoopola mmatampini ni muukhwani
Moone IVIDIYU, ni mwamalihaka woona, moopele mwaha nna nikohonna:
-
Iparakhani Atamu ihalenlyaawe uhiya wawe umwiiwelela Nluku?
Nsome Arooma 5:12, ni mwamalihaka usoma, moopele mwaha nna nikohonna:
-
Isiyani inniirannyeela nlattu wo itampi ya Atamu?
Nsome Joau 3:16, ni mwamalihaka usoma, moopele mwaha nna nikohonna:
-
Kontha isiyani Yehova anveleelihilyaawe mwanawe va watuninyani va?
-
Atamu aari nlopwana oohipahuwa, masi nlattu woohimwiiwelela Nluku apinaatamu otheene anaavara matampi ni anaakhwa
-
Yesu aari nlopwana oohipahuwa, ni nlattu woomwiiwelela Nluku apinaatamu otheene pooti ukhalana ukumi woohipahuwa ni ukhala mpaka
4. Ukhwa wa Yesu pooti waakavihera atthu otheene
Moone IVIDIYU, ni mwamalihaka woona, moopele mwaha nna nikohonna:
-
Manannani ukhwa wa nlopwana mmoca paasi cinwaaya waakaviheraka atthu otheene?
Nsome 1 Timotiyu 2:5, 6, ni mwamalihaka usoma, moopele mwaha nna nikohonna:
-
Atamu aari nlopwana oohipahuwa, masi nlattu womatampyaawe, apinaatamu otheene anaavara matampi ni anaakhwa. Yesu ciicammo aari nlopwana oohipahuwa khampa Atamu. Masi isiyani Yesu ikhitinryaawe unipankela?
5. Woopoliya ikhanle itthuvo inivahilyaawe Yehova
Apatthani a Yehova otheene, woopoliya anoona ukhala itthuvo yuulupale ivahiyaaya. Wootakihera, nsome Akalasiya 2:20, ni mwamalihaka usoma, moopele mwaha nna nikohonna:
-
Manannani apostolu Paulu caathoonyenryaawe wiira woopoliya oona ukhala itthuvo ivahiyaawe ni Nluku?
Nlattu Atamu woovara matampi, apinaatamu anaakhwa. Masi Yehova hovaha ukumi wa mwanawe wiira nyuuva nkhalane iparakha yoohala ukhala mpaka.
Nsome Joau 19:1-7, 16-18, ukati unsomeenyu, muupuwele mananna Yehova caakhanlyaawe ukati waamoonaawe mwanawe ahuvihiyaka. Mwamalihaka usoma, moopele mwa nna nikohonna:
-
Nyuuva nneecoona cani moopuwelaka itthu yuupankenlyaaweni Yehova ni Yesu?
NTTHU AKOHAKA: “Manannani ukhwa wa nlopwana mmoca paasi cinwaaya uwoopolaka atthu otheene?”
-
Nyuuva mwaahala waakhula cani?
UTHIKILELA
Nlattu wookhwa Yesu, Yehova pooti unilevelela matampiihu. Ciicammo ukhwa wa Yesu unaanivaha iparakha yoohala ukhala mpaka.
Wuupuwela
-
Yesu khwenleni?
-
Manannani ukumi woohipahuwa wa Yesu cinwaaya uwoopolaka apinaatamu otheene?
-
Ukhwa wa Yesu Kristu unhala wuukaviherani cani?
MWAPHEELAKA UCUWELA CITTHU CIKIINA
Mwiitthuce kontha isiyani ukumi woohipahuwa wa Yesu uneehaniyaaya woopola.
“Manannani ukhwa wa Yesu cinwaaya ‘uwoopolaka atthu enci’?” (Mwaha umphwanyannya nsayitini jw.org)
Moonenele isiyani inlamuliyeehu upanka wiira noopwee.
“Moolumo ‘Yesu nawoopola’ —Maanaaya isiyani?” (Mwaha umphwanyannya nsayitini jw.org)
Niireke Yehova naalevelela itampi cuulupale?
“Makoho Anaakhuliya Mbiiblyani” (Ukhalenla, 1 yo Maio yo 2013)
Moone manannani nlopwana mmoca cirukunusalyaawe makhalelwaawe ucuwela wawe wiivaherera wa Yesu.
“Nna co mi kihihiya ukhala ipottha yokhirini” (Mwaha umphwanyannya nsayitini jw.org)
a Niwehero: Itampi khinakhala paasi itthu yootakhala impankaawe ntthu. Ciicammo unaaciya upahuwa unihiyenraawe Atamu ni Hawa unniiriha hiiva upheela upanka citthu coohinamaana.
