MPANTTA 49
Isiyani inaakavihera amuci ukhala ootteeliya?—Mphantte1
Ale athelanne naanaano ampheela wiira utteeliya waakhalannyaaya nihuku naathelanaaya akhalane mpanka. Ni iyo pooti wiirannya. Makristau athelanne khalayi ni aneekurumica weettela ikano co mbiiblyani anaacuwela wiira iyo itthwiiyo wanaakhitirya wiirannya.
1. Ikanoni Ibiiblya inaavahaaya alopwana oothela?
Yehova nthanlile nlopwana wiira akhale nhooleli owatthokoni. (Nsome Efesu 5:23.) Uyo nopheela wiira citthu cinlakelaaya alopwana caakavihere amuci otheene. Ibiiblya inwiirela alopwana oothela co: “Uhihiye waafenta amwaaraa.” (Efesu 5:25) Iyo itthwiiyo maanaaya isiyani? Ntheli oofenta nawaatafiti saana amwaarawe, pooti ukhala uwaani ni hataa uhoolo waatthu akiina. Uyo nawaakhikicera amwaarawe ni naapanka yotheene inkhitiryaawe wiira aavahe citthu cinaathwa ni aakavihere ukhala ootteeliya. (1 Timotiyu 5:8) Ni uhiya commo, uyo nawiikurumica wiira amwaarawe akhalane upatthani woolipa ni Yehova. (Matewus 4:4) Wootakihera, uyo pooti ulompa ni usoma Ibiiblya wamoca naamwaarawe. Ntheli naawacera amwaarawe ni nifento uyo naalipihaca upatthannyaawe ni Yehova.—Nsome 1 Peturu 3:7.
2. Ikanoni Ibiiblya cinaavahaaya athiyana ootheliya?
Nuulumo na Nluku ni neera wiira athiyana ootheliya ‘ahaana yaahisimaka cinene awanuwaya.’ (Efesu 5:33) Manannani ayo anlamuliyaaya upanka iyo itthwiiyo? Ayo pooti upanka iyo itthwiiyo yaavahaka ifayita makhalelo omaana arinaaya awanuwaya ni wiikurumica waya wiira yaawacere ayova wamoca naasaanaaya. Athiyana ciicammo pooti woonihera waahisima awanuwaya yakupaliki citthu cinlakelaaya ni yawuulumanaka ni mananna omaana, hataa ukhala wiira awanuwayaayo khaanonswalela Yehova. Athiyana ciicammo pooti uthoonyihera waahisima awanuwaya yahiwuulumaka pusya yakhalaka naatthu akiina.
3. Manannani anamathelana cinlamuliyaaya ulipihaca uthelana waya?
Ibiiblya yawaacaka anamathelana iyo ineera co: “Ayoca anhala ukhala irutthu imoca.” (Matewus 19:5) Iyo maanaaya wiira anamathelana anlamuliya upanka yotheene inkhitiryaaya wiira ufentana waya uhivololace. Ayo ankhitiri upanka iyo itthwiiyo wakhalaka wiira anaaviriha ukati nkhayi yoopelaka mwaha mananna khula ntthu cinoopuwelaawe ni cineecoonaawe ahivithavithanaka hataa itthu ninifento. Yehova ayo phintepaaya unvaha ifayita. Masi unhiya paasi Yehova, khiivo-tho itthu ikhwaawe intepaaya uvaha ifayita ahikhanle awannyaya awula amwaaraya. Ni ayo anawiikurumica wiira ahiciveliye ni ntthu nkhwaawe.
MUNCERERE WIITTHUCA WINYU
Moone mattharelelo o mbiiblyani anhala wuukaviherani ulipihaca uthelanaca winyu.
4. Nlopwana oothela haana aafentaka amwaarawe ni waawacera
Ibiiblya ineera wiira “nlopwana oothela haana aafentaka amwaarawe khampa cinfentaawe irutthwaawe.” (Efesu 5:28, 29) Iyo itthwiiyo maanaaya isiyani? Moone IVIDIYU, ni mwamalihaka woona, moopele mwaha nna nikohonna:
-
Manannani nlopwana oothela cinthoonyiheraawe wiira nawaafenta amwaarawe ni nawaawacera?
Nsome Akolosu 3:12, ni mwamalihaka usoma, moopele mwaha nna nikohonna:
-
Manannani nlopwana oothela cinlamuliyaawe uthoonyihera ala makhalelwaala?
5. Nthiyana ootheliya haana aafentaka ni waahisima awannyawe
Ibiiblya inawaakurumica athiyana waahisima awannyaya, hataa ittiini inttharaaya ivirikanaka ni yawaya. Nsome 1 Peturu 3:1, 2, ni mwamalihaka usoma, moopele mwaha nna nikohonna:
-
Wakhala wiira awannyinyu khanaaya wancera unswalela Yehova, khweeliini nyuuva nnaapheela wiira ayo answalele. Nyuuva woonela winyu isiyani inreera upanka: waalalyeera ukati wotheene awula ukhala nthiyana oofenta, namaana ni oohisimu? Kontha isiyani?
Nlopwana ni nthiyana, pooti ulakela upanka itthu yomaana. Masi aathiyana pooti ikwaha ikhwaawe uhikupaliki itthu ilakenlyaaya awannyaya. Ni wakhalaka commo khweeliini athiyana pooti uhimyaca itthu inoopuwelaaya, masi anlamuliya uhimyaca sana-saana ni yooniheraka ihisima, yathoonyeraka wiira anaakupaleela wiira Yehova haavaha nrintti alopwana woolakela itthu inoonaaya wiira inaahala waakavihera amucyaaya otheene. Athiyana ahaana yiikurumicaka uthoonyihera wiira anaakupaleela citthu cinlakelaaya awannyaya, coo athiyana anaahala ukavihera wiira ooyeeli waya akhalakhale yatteeliyaka nrima. Nsome 1 Peturu 3:3-5, ni mwamalihaka usoma, moopele mwaha nna nikohonna:
-
Yehova nokhala cani awoonaka athiyana yaahisimaka awannyaya?
6. Wanaakhitirya waamalihaca ananrokottole ankhumelela watthokoni
Khiivo itthoko ihinkhumelela masankiho. Phimaana, anamathelana ahaana yiikurumicaka nkhayi wiira yaamalihace ananrokottole. Moone IVIDIYU, ni mwamalihaka woona, moopele mwaha ala makohwaala:
-
Ividiyu imalihileehu woona, isiyani ithoonyenre wiira anamathelanaayo yaahanca uhaataana?
-
Isiyani yaapankilyaaya wiira alipihace uthelanaca waya?
Nsome 1 Akorintu 10:24 ni Akolosu 3:13. Mwamalihaka usoma iveerusu cotheene nnya, moopele mwaha nna nikohonna:
-
Manannani nnya ikanonnya cinhalaaya ulipihaca uthelanaca winyu?
Ibiiblya ineera wiira nihaana nittitthimihanaka. Unttitthimiha ntthu unhela nhina untafiti nimananna omaana ni unhisimu. Nsome Arooma 12:10, ni mwamalihaka usoma, moopele mwaha nna nikohonna:
-
Niireke anamathelana ahaana yathoonyiheranaka uhisimana nlattu nkiinooyo nanhisimu nkhunanawe? Kontha isiyani nneereenyu commo?
ATTHU AKIINA ANEERA: “Makhalelweehu mahukwaala ahovirikana cinene, nna co khaninaataana toko khalayi.”
-
Manannani caahaleenyu unhimyera uyo ntthuuyo wiira Ibiiblya pooti unkavihera?
UTHIKILELA
Anamathelana anhala ukhala ootteeliya wakhalaka wiira anaafentana, anaahisimana ni anaweettela ikano co mbiiblyani.
Wuupuwela
-
Alopwana oothela isiyani inlamuliyaaya upanka wiira akhalakhale ootteeliya wamoca naamwaaraya?
-
Athiyana ootheliya isiyani inlamuliyaaya upanka wiira akhalakhale ootteeliya wamoca naawannyaya?
-
Wakhala wiira nyuuva nhothela awula nhotheliya, ntthareleloni no mbiiblyani naahala ulipihaca uthelanaca winyu?
MWAPHEELAKA UCUWELA CITTHU CIKIINA
Moone miruku cinhala wuukaviherani nyuuva ukhalana itthoko yootteeliya.
Moone ividiyu yo ncipo inttonkaca iparakha cimphwanyaaya anamathelana aneettela ikano ca Nluku.
Moone maanaaya isiyani uhisimu ukhulupale urinaawe ntheli.
Moone manannani ikano co mbiiblyani cinooluma uthelanaca cinhalaaya waakavihera ale athelanne anaanana marikariko watthokoni waya.
