MPANTTA 50
Isiyani inaakavihera amuci ukhala ootteeliya?—Mphantte 2
Asaana akhanle itthuvo inkhuma wa Yehova. Ni uyo nowehererya wiira ayari atafiti saana iyo itthuvweeyo. Yehova nawaavaha ayari ikano comaana wiira aakavihere upanka iyo itthwiiyo. Ikano co mbiiblyani ciicammo cinawaakavihera asaana upanka citthu cinhala uwiiriha amuci otheene ukhala ootteeliya.
1. Ikanoni Yehova cinaavahaawe ayari?
Yehova nopheela wiira ayari yaafente asaanaaya ni avirihe ukati nkhayi ni ayo. Ciicammo uyo nopheela wiira ayari yaakhikice asaanaaya ni avarele nteko mattharelelo o mbiiblyani ukati woowiitthuciha. (Miruku 1:8) Uyo nowiirela ayari co: ‘Nhihiyerere uwuunuwiha mwaalakiheraka ni mwawiitthucihaka malakihero a Yehova.’ (Nsome Efesu 6:4.) Yehova nokhala ootteeliya cinene ayari yeewelelaka ala moolumwaala. Ciicammo uyo nokhala ootteeliya cinene awoonaka ayari yawaceraka nrintti urinaaya wowaatafiti asaanaaya, kahi unhiyera ntthu nkhwaawe uyo nrinttyuuyo.
2. Ikanoni Yehova cinaavahaawe asaana?
Yehova nowiirela asaana co: “Nwiiwelele miyaapaapeenyu.” (Nsome Akolosu 3:20.) Asaana yawiiwelelaka ni yaahisimaka miyaapaapaaya, ayo anantteeliha nrima Yehova. Ni ciicammo anawaatteeliha nrima miyaapaapaaya. (Miruku 23:22-25) Yesu ahovaha ntakihero nomaana ukati waaryaawe mwaana. Uyo ari oohipahuwa. Hataa ukhalaka commo, khaahiile uwiiwelela ni waahisimu miyaapaapaawe, yaahookhalaru oopahuwa. —Luka 2:51, 52.
3. Amuci anhala ukhitiri cani ulipihaca upatthani urinaaya ni Nluku?
Wakhala wiira nyuuva nhaana asaana, khweeliini nnopheela wiira asaaneenyu anfente Yehova cinene khampa nyuuva cinonfenteenyu. Manannani anhalaaya ukhitiri upanka iyo? Mwapankaka itthu inhimyaaya Ibiiblya, iyo ineera: “Nhaana mwalipiheraka uwiitthuciha [moolumo a Yehova] asaaneenyu ni waahimerya nnonkomale wapuwani winyu, mweettaka niiparapaara.” (Deuteronomiyu 6:7) “Waalipiherera uwiitthuciha” maanaaya waakulelihaca uwiitthucihanwo. Atthunaka nyuuva nnaacuwela wiira, asaaneenyu ankhitiri uhela itthu mmuru, mwaakulelihaka ikwaha cinci waahimerya itthwiiyo. Paasi, ila iveeruswiila inhimya wiira nyuuva nhaana mwaavereryaka ukati wowaahimyeera asaaneenyu myaha ca Yehova. Inanna imoca yoopanka iyo ukhanle khula isumana waavererya ukati wiira munswalele Yehova wamoca naamuciinyu. Wakhala wiira nyuuva khanrina asaana, ciicammo unaareera nyuuva utthenkaca ukati wiira nsome Ibiiblya khula isumana.
MUNCERERE WIITTHUCA WINYU
Moone citthu cinhala waakavihera amuci ukhala ootteeliya ni ukhala ookhikicerya.
4. Mwaahimerye asaaneenyu ninifento
Waahimerya asaana unaarika. Manannani Ibiiblya cinhalaaya wuukaviherani? Nsome Tiyaku 1:19, 20, ni mwamalihaka usoma, moopele mwaha ala makohwaala:
-
Manannani ayari cinlamuliyaaya uthoonyihera nifento okati unwuulumanaaya asaanaaya?
-
Kontha isiyani ayari khanlamuliya waalaka asaanaaya anaviruwile? a —Moone niwehero.
5. Mwaakhikicere asaaneenyu
Wiira mwaakhikicere asaaneenyu, unaareera uwuulumana asaaneenyu nhina urupihana, hataa ukhalaka wiira khunoocivelani wuuluma uyo mwahooyo. Moone IVIDIYU, ni mwamalihaka woona, moopele mwaha nna nikohonna:
-
Kontha isiyani ayari akhwaawe unawaarikarikela uwuulumana asaanaaya nhina urupihana?
-
Manannani ayari akhwaawe yaakhitinryaaya uwuulumana asaanaaya nhina urupihana?
Khampa Ibiiblya inhimyaaya ikhumelo yokhalayi, ila ituninya inhooleliya ni Sotwaniila invira itepaka ukhala yoohinamaana. Nsome 2 Timotiyu 3:1, 13, ni mwamalihaka usoma, moopele mwaha nna nikohonna:
-
Iveerusu 13 inaawuuluma atthu oohinamaana, ni hiiva ninaacuwela wiira iriyari yo ayo atthwaayo akhwaawe anawaapankaka citthu coosece asinamwane. Vano ukhala wiira iyo itthwiiyo inawiirannyaaka, kontha isiyani ikhanlyaaya itthu yofayita ayari uwuulumana asaanaaya nhina urupihana ni uwiitthuciha mananna owaanyema atthu yaahala upheela waarupanaca?
Mwaanaacuwela?
Masaahiti a Yehova ahaana ilivuru cinci cinaakavihera ayari uwuulumana asaanaaya nhina urupihana ni uwiitthuciha mananna owaanyema atthu yaahala upheela waarupanaca. Moone matakihero:
-
Mwaakhikicere asaaneenyu (ividiyu)
-
“Mananna oowuulumana asaaneenyu nhina urupihana” (Despertai!, n.º 5 yo 2016)
6. Waahisimu athumwana ni anumwana
Anamwane ni amirawo anthoonyera waahisimu miyaapaapaaya nhina mananna cinwuulumanaaya. Moone IVIDIYU, ni mwamalihaka woona, moopele mwaha ala makohwaala:
-
Kontha isiyani unaareera amirawo wiikurumica wiira awoopane mwaha miyaapaapaawe?
-
Manannani mmirawo cinlamuliyaaya uwuulumana miyaapaapaawe niihisima?
Nsome Miruku 1:8, ni mwamalihaka usoma, moopele mwaha nna nikohonna:
-
Manannani mmirawo cinlamuliyaawe ukhala ahimeriyaka naasithumwaane itthu inlamuliyaawe upanka?
7. Mpanke Uswali Waamuci
Masaahiti a Yehova khula isumana anaathukumana watthokoni waya wiira asome Ibiiblya nkhayi. Uyo nthukumanooyo uneehaniya Uswali Waamuci. Nwo Uswali Waamucinwo unlamuliya upankiya manannani? Moone IVIDIYU, ni mwamalihaka woona, moopele mwaha ala makohwaala:
-
Manannani amuci anlamuliyaaya wiitthenkaca wiira ahihiye upanka uswali waamuci khula isumana?
-
Isiyani ayari inlamuliyaaya upanka wiira uswali waamuci ukhale wootteeliha nrima ni waakavihere asaana? —Moone ilatarato iri wuupaceroni ula mpanttoola.
-
Isiyani yaahala wuurikarikihelani nyuuva upanka Uswali Waamuci?
Khalayi, Yehova ahaaruma Asarayeli, woopela mwaha Cowantikhiya Cowaarya mmapuwani waya. Nsome Deuteronomiyu 6:6, 7, ni mwamalihaka usoma, moopele mwaha nna nikohonna:
-
Manannani nyuuva ciicammo nnolamuliyeenyu upanka iyo itthwiiyo?
Malakihero nhina mananna oopanka uswali waamuci:
-
Utthenkaca mikutthaano co wanlokoni.
-
Usoma mphantte wo mbiiblyani ni woopela mwaha.
-
Wakhala wiira nhaana asaana ooyevaca, mbaxari awula mwimpirimiri myaha cintthenkaceriya anamwane cimphwanyannya nsayitini jw.org.
-
Wakhala wiira nhaana asaana amirawo, moopele mwaha wo nsayitini jw.org unwuuluma amirawo.
-
Mpanke idrama yo ihantisi inttonkaciya mbiiblyani wamoca naasaaneenyu.
-
Moone ividiyu yo nsayitini jw.org ni moopele mwaha.
ATTHU AKIINA ANEERA: “Ibiiblya urikarika wiiweeha wahinsomiyaaya naanamwane.”
-
Nyuuva mwaahala wiira cani?
UTHIKILELA
Yehova nopheela (1) ayari yaafente, awiitthucihe ni yaakhikicere asaanaaya, (2) asaana awiiwelele ni yaahisimu miyaapaapaaya ni (3) amuci answalele Yehova wamoca.
Wuupuwela
-
Manannani ayari cinlamuliyaaya uwiitthuciha ni waakhikicera asaanaaya?
-
Manannani asaana anlamuliyaaya woonihera waahisimu miyaapaapaaya?
- Kontha isiyani unaareera upanka Uswali Waamuci khula isumana?
MWAPHEELAKA UCUWELA CITTHU CIKIINA
Citthuni cinlamuliyeenyu uwiitthuciha asaaneenyu cinhala waakavihera yonnuwaka vale?
“Citthu siita cinlamuliyeenyu uwiitthuciha asaaneenyu” (Despertai!, n.º 2 yo 2019)
Moone mbiiblyani ikano cinvahiyaaya ale anaawacera asithumwanaya owuuluvala.
“Ibiiblya inooluma isiyani nhina waawacera ayari owuuluvala?” (Mwaha umphwanyannya nsayitini jw.org)
Moone manannani nlopwana ahaacuwela mawuunuwihero asaanaawe cikhanlyaawe nyari omaana.
Moono inanna nyari wookhalana upatthani woolipa ni mwanawe.
a Niwehero: Mbiiblyani, “Nuulumo ulaka” ninaaca wiitthuciha, ulakihera ni unkavihera ntthuuyo urukunusa moopuwelelwaawe awula meettelwaawe oohinamaana. Nno nuulumonno khaninaaca umpankaca ntthuuyo citthu coohiloka awula unhuviha. —Miruku 4:1.
