MPANTTA 53
Nnohala ukhitiri cani uthanla mathukelo omaana?
Yehova khanle “Nluku ootteeliya.” (1 Timotiyu 1:11) Uyo nopheela wiira nikhaleke ootteeliya ni nilaweke ukumi ni uyo unancivela unoona nivirihaka ukati wiira nimumule. Nhina ula mpanttoola, ninaahala woona mananna oophwanyera ifayita ukati unkhaleehu woohivara itthu, nihiliyalaka untteeliha nrima Yehova uyo ukatyuuyo.
1. Isiyani ninlamuliyeehu uhiliyala ukati woothanla mathukelo?
Isiyani inoocivelani uvara ukati ummumuleenyu? Atthu akhwaawe unaacivelaka wonkoma uwaani yasomaka ilivuru, yaviriyanaka macipo, yoonaka ividiyu awula ukela mwinternetini. Akhwaawe khunaacivela ukhala nipuro nimoca. Unaacivelaka weetta, urampela awula uttikha ijoogo naasimpwanaaya. Hataa nithanlaka itthu phi itthu, nihaana niwehaceraka ayo mathukelwaayo wakhala wiira khweeliini ‘anawaacivela Apwiiya.’ (Efesu 5:10) Unaareera wuupuwela iyo itthwiiyo kontha citthu cinci cinthukelelaaya atthu cinkhala citthu cinonrusa Yehova. Toko citthu cootakhala, urupihana woohiloka ni ukhwiri. (Nsome Isaalimu 11:5.) Isiyani inhala unikavihera uthanla mathukelo omaana?
Asipatthaniihu yakhalaka atthu anonfenta Yehova, ayo anaanikavihera uthanla saana mathukelweehu. Khampa conneehu nhina mpantta 48, “ntthu neetta naatthu ankhili omaana, nuuyo nhala ukhala ntthu ankhili omaana.” Masi, neettaka naatthu ahineettela malamulo a Yehova, ‘ninaahala uttharuwa.’—Miruku 13:20.
2. Kontha isiyani unaareera uwehacera ukati unviriheehu nithukaka?
Hataa ukhalaka wiira mathukelweehu akhanle omaana, nihaana niivaracaka wiira nihivirihe ukati mwinci nithukaka, kontha iyo itthwiiyo pooti uniiriha uhikhalana ukati woopanka citthu cootepa ukhalana ifayita. Ibiiblya inaanikurumica ‘uvarela nteko saana ukatiihu.’—Nsome Efesu 5:15, 16.
MUNCERERE WIITTHUCA WINYU
Moone mananna oothanla mathukelo omaana.
3. Nnyeme mathukelo anonrusa Yehova
Kontha isiyani nihaana nithanlaka saana mathukelweehu? Moone IVIDIYU, ni mwamalihaka woona, moopele mwaha ala makohwaala.
-
Manannani masinttaano owaattakaniya yaattikhiyaka u Roma khalayi anlikanacaaya nimathukelo makhwaawe o mahukweehwaala?
-
Nvidiyuni yonneehu, isiyani Daniel yiitthucilyaawe nhina mathukelo?
Nsome Arooma 12:9, ni mwamalihaka usoma, moopele mwaha nna nikohonna:
-
Ila iveeruswiila inhala wuukaviherani cani uthanla mathukelo omaana?
Citthuni cikhwaawe cinonrusa Yehova? Nsome Miruku 6:16, 17 ni Akalasiya 5:19-21. Mwamalihaka usoma iveerusu cotheenennya, moopele mwaha nna nikohonna:
-
Citthuni cinttonkiya nhina nnya iveerusunnya cimpankiya nhina mathukelo menci o mahukwaala?
Manannani nnolamuliyeenyu uthanla saana mathukelweenyu?
Mweemele ni muupuwele:
-
Isiyani? Ala mathukelwaala anaavaranaca niitthu inonrusa Yehova?
-
Ukatini? Ala mathukelwaala anaahala ukihiiha uvara itthu yootepa ukhalana ifayita?
-
Tipani? Ala mathukelwaala anaahala ukiiriha uviriha ukati mwinci kinari naatthu ahinonfenta Yehova?
Itthu yooreera upanka ukhanle unyema citthu caahala uniwaanela masakha. Paasi, wakhala wiira ihaavo inanna yo mathukelo inaanyihacereehu wakhala wiira yomaana awula mena, itthu yooreera upanka ukhanle unyema ayo mathukelwaayo.
4. Nvarele nteko saana ukatiinyu
Moone IVIDIYU, ni mwamalihaka woona, moopele mwaha nna nikohonna:
-
Munneehu o nvidiyuni, ividiyu yoonaawe khayaari yoohinamaana, masi masakhani yeewaanenlyaawe?
Nsome Afilipo 1:10, ni mwamalihaka usoma, moopele mwaha nna nikohonna:
-
Ila iveeruswiila inhala unikavihera cani ulakela ukati unlamuliyeehu uviriha nithukaka?
5. Nthanle saana mathukelweenyu
Khweeliini ahaavo mathukelo anonrusa Yehova. Masi cihaavo citthu cinci comaana cinlamuliyeehu upanka wiira nithuke. Nsome Eklesyaste 8:15 ni Afilipo 4:8. Mwamalihaka usoma, moopele mwaha nna nikohonna:
-
Inannani yoothuka inoocivelani nyuuva?
Cihaavo citthu cinci cooreera hiiva uthukelela
ATTHU AKIINA ANEERA: “Khinakhala itthu yootakhala miiva woona ifiilime awula usoma ilivuru inthoonyera waattakana, urupihana woohiloka awula ukhwiri. Itthu yofayita cinene ukhanle miiva uhipanka nnyo citthunnyo.”
-
Nyuuva mwaahala wiira cani?
UTHIKILELA
Yehova nopheela wiira nithanle saana mathukelweehu ni nihithukelele citthu cinhala unipanka pusya.
Wuupuwela
-
Inannani yoothuka makristau anlamuliyaaya unyema?
-
Kontha isiyani nihaana niwehaceraka ukati unviriheehu nithukaka?
-
Kontha isiyani nyuuva nnopheeleenyu uthanla mathukelo anoncivela Yehova?
MWAPHEELAKA UCUWELA CITTHU CIKIINA
Moone tipani rina nrintti woothanla mathukelweenyu
Moone mananna oothanla saana citthu cinlamuliyeenyu upanka ukati woothuka.
“Mathukelweenyu akhanle omaana?” (Ukhalenla, 15 yo Outubro yo 2011)
Wiira moone kontha isiyani nlopwana mmoca rukunusilyaawe mathukelwaawe, nsome ihantisi ineera “Mpaka kihohiya waathanya akhunanaka.”
“Ibiiblya inaarukunusa makhalelo aatthu” (Ukhalenla, 1 yo Fevereiro yo 2010)
Moone mananna ayari amoca cikhitinryaaya ulakela itthu yomaana nhina ividiyu coonaaya coonihera ukhwiri.
