MPANTTA 55
Nkavihere nloko ninyu
Ntuninyani motheene, ahaavo atthu imiliyau cene anonswalela Yehova mmalokoni menci. Ayo atthwaayo anaavaha ifayita malakihero anaakhelaaya ni anaapheela cinene ukavihera nloko naya. Nyuuva phinooneleenyu commo nloko ninyu?
1. Manannani cinlamuliyeenyu uvarela nteko ukatiinyu ni ikuru cinyu wiira nkavihere nloko ninyu?
Otheene cihu pooti ukavihera wanlokoni. Wootakihera, nyuuva nnoonela cani waarwaana umikutthaanoni atthu owuuluvala awula atthu akhwaawe ampheela ukaviheriya o wanlokoni winyu? Awula, nyuuva pooti waakavihera ayo atthwaayo nimananna makhwaawe, toko urwaa waathumathumela citthu ni ukwecakweca wapuwani waya. (Nsome Tiyaku 1:27.) Hiiva ciicammo pooti waneevaherereehu ukwecakweca ni ulokihaca Isalau yo Umwene. Khaavo nokhanyererihiya upanka nnya citthunnya. Unfenta wihu Yehova ni mayamunneehu phinnikurumica “wiivaherera woohikhanyererihiya.”—Isaalimu 110:3.
Masaahiti a Yehova oopattisiya pooti ukavihera wanlokoni nimananna makhwaawe. Wootakihera, mayamunna pooti wiikurumica wiira akhale arumiya awula mahumu o wanlokoni. Mayamunneehu ni asirokorihu ciicammo pooti ukavihera wanlokoni yakhalaka mapiyoneeru. Masaahiti a Yehova akhwaawe anaakhitiri ukavihera mapuro antekatekiya inupa cinonswaleleehu Yehova. Akinaku anaathamelaka maloko makhwaawe anthwaa anamalalyeera.
2. Manannani ninlamuliyeehu uvarela nteko nsurukhwiihu ni mihakhu cihu wiira nikavihere nloko nihu?
Hi pooti ‘wanonttitthimiheehu Yehova ni citthu cirineehu cofayita.’ (Miruku 3:9) Hi ninoona ukhala iparakha yuulupale uvaha micanko wiira nikavihere wanlokoni wihu ni wiira nikavihere nteko woolalyeera unvariya ntuninyani motheene. (Nsome 2 Akorintu 9:7.) Micanko cinvaheehu ciicammo cinaavareliya nteko wiira akaviheriye mayamunneehu cinaakhumelela ihasara. Mayamunneehu enci anaalakelaka weesa itthu mphanttyaayaru. Nimoolumacero makhwaawe, khula isumana awula khula mweeri anaasunkaka mwansurukhu wiira avahe ncanko. (Nsome 1 Akorintu 16:2.) Hi pooti wanvaheehu ncanko mmakaaxani cimphwanyannya mmasalauni co Umwene awula pooti ucanka nhina isayiti donate.pr418.com. Mananna cinvareleehu nteko mihakhu cihu anaanikavihera umoonihera Yehova wiira hiivano ninanfenta.
MUNCERERE WIITTHUCA WINYU
Moone mananna ookavihera wanlokoni winyu.
3. Nkavihere wanlokoni winyu nvahaka ncanko
Yehova ni Yesu anawaafenta cinene ale anvaha ncanko ninrimaaya wotheene. Wootakihera, Yesu ahowoona anankhweli amoca ahuvi waavahilyaaya ncanko. Nsome Luka 21:1-4, ni mwamalihaka usoma, moopele mwaha ala makohwaala:
-
Niireke nihaana nivahaka nsurukhu mwinci wiira nintteelihe nrima Yehova?
-
Yehova ni Yesu ankhala cani yanoonaka nivahaka ncanko ninrimeehu wotheene?
Wiira moone mananna cinvareliyaaya nteko micanko ninvaheehu, moone IVIDIYU, ni mwamalihaka woona, moopele mwaha nna nikohonna.
-
Manannani micanko cinvaheehu cinvareliyaaya nteko wiira akaviheriye maloko amphwanyannya ntuninyani motheene?
4. Niivaherere wiira nikavihere
Aswali a Yehova okhalayi waanaacivela cinene utafiti mapuro yanswalelaaya Yehova. Masi wiira apanke iyo, ayo kahi paahi yaavaha nsurukhu. Nsome 2 Ikoronika 34:9-11, ni mwamalihaka usoma, moopele mwaha nna nikohonna:
-
Manannani asarayeli caakaviheraaya utafitiya itempulu?
Wiira moone mananna Masaahiti a Yehova cinaatakihaaya ayo aswali okhalayaayo, moone IVIDIYU, ni mwamalihaka woona, moopele mwaha ala makohwaala.
-
Kontha isiyani unaareera ukati wotheene urattela Isalau yo Umwene ni ulokihaca?
-
Manannani nyuuva cinlamuliyeenyu ukavihera?
5. Mayamunna pooti wiikurumica wiira yaakhele mirintti wanlokoni
Ibiiblya inaawiirela makristau alopwana wiira yiikurumice ukavihera wanlokoni. Wiira moone ntakihero nimoca, moone IVIDIYU, ni mwamalihaka woona, moopele mwaha nna nikohonna.
-
Nvidiyuni, isiyani munna Pedro yaapankilyaawe wiira akavihere wanlokoni?
Ibiiblya inaahimyaca makhalelo mayamunna anlamuliyaaya ukhalana wiira akhale arumiya awula mahumu o wanlokoni. Nsome 1 Timotiyu 3:1-13, ni mwamalihaka usoma, moopele mwaha ala makohwaala:
-
Makhaleloni anlamuliyaaya ukhalana mayamunneehu ampheela ukhala arumiya o wanlokoni awula mahumu?
-
Makhaleloni amucyaaya anlamuliyaaya ukhalana?—Moone iveerusu 4 ni 11.
-
Mayamunna yeekurumicaka ukhalana ala makhalelwaala, manannani atthu otheene o wanlokoni cimphwanyeraaya ifayita?
NTTHU AKOHAKA: “Nsurukhu unvarelaaya nteko Masaahiti a Yehova unkhuma vayi?”
-
Nyuuva mwaahala waakhula cani?
UTHIKILELA
Yehova naavaha ifayita cinene wiikurumica wihu wiira nikavihere wanlokoni navarelaka nteko ukatiihu, ikuru cihu ni mihakhu cihu.
Wuupuwela
-
Manannani cinlamuliyeehu uvarela nteko ukatiihu ni ikuru cihu wiira nikavihere wanlokoni?
-
Manannani cinlamuliyeehu uvarela nteko mihakhu cihu wiira nikavihere wanlokoni?
-
Manannani nyuuva woocivenlyaayani ukavihera wanlokoni?
MWAPHEELAKA UCUWELA CITTHU CIKIINA
Moone kontha isiyani Nluku khanaakhanyereriha-tho aswalyaawe uvaha idiizimu.
“Ibiiblya inooluma isiyani nhina idiizimu?” (Mwaha umphwanyannya nsayitini jw.org)
Ibiiblya inawuuluma miteko cowanlokoni cinlamuliyaaya uvara alopwana oopattisiya. Vano wakhalaka wiira ahaavo arokorihu oopattisiya ampheela uvara nnyo mitekonnyo apankekeni?
“Ncuweleehe ukhulupale urinaaya mahumu wanlokoni” (Ukhalenla, yo Fevereiro yo 2021)
Mwaacuwele Masaahiti a Yehova oolipa nrima yeekurumicile cinene wiira yaarwaanele mayamunnaaya ilivuru.
Ilivuru cinooluma myaha co mbiiblyani cinaarwaaniya ncoko woottayi wo Congo (4:25)
Woovirikana niittiini cikhwaawe, nsurukhu unvarelaaya nteko Masaahiti a Yehova unkhuma vayi?
“Nsurukhu unvarelaaya nteko Masaahiti a Yehova unkhuma vayi?” (Mwaha umphwanyannya nsayitini jw.org)
