MPANTTA 57
Wakhalaka wiira yuuva nhovara matampi moolupale isiyani inlamuliyeenyu upanka?
Hataa ukhalaka wiira nyuuva nnanfenta cinene Yehova ni nnawiikurumica upanka citthu cinoncivela, ikwaha ikhwaawe nyuuva nnahala uvara matampi. Masi ahaavo matampi nkhalaka moolupale uvikana makhwaawe. (1 Akorintu 6:9, 10) Mwavaraka matampi moolupale, nhiliyale wiira Yehova nanlelo nawuufentani. Uyo naapheela wuulevelelani nyuuva ni wuukaviherani.
1. Isiyani inlamuliyeehu upanka wiira Yehova anilevelele?
Ntthu nonfenta Yehova nokhala ooriipiya nrima cinene oonaaka wiira hovara matampi moolupale. Masi itthu Yehova yaakhuluvelihilyaawe apoovwaawe inaanimaaliha: “Hataa matampiinyu yakhalaka khampa ikoore yookhwiila cinene, anaahala ukhalihiya ootteela khampa [ntthoce].” (Isaiya 1:18) Nattharuwaka ninrimeehu wotheene, Yehova naahala unilevelela. Manannani ninlamuliyeehu woonihera wiira nihottharuwa? Wakhalaka wiira khweeliini nihottharuwa, hiiva ninaahala uhiya upanka itthu yootakhala ni unlepela Yehova wiira anilevelele. Vano, nihaana niikurumicaka uhiya moopuwelelo ni citthu caanirihile uvara ayo matampyaayo. Uhiya commo, nihaana niimananihaka upanka ile ineerawe Yehova wiira phiri yomaana.—Nsome Isaiya 55:6, 7.
2. Manannani Yehova naavarelaawe nteko mahumu wiira anikavihere wakhalaka wiira nihovara matampi?
Navaraka matampi moolupale, Yehova noniirela wiira ‘niwiihane mahumu o wanlokoni.’ (Nsome Tiyaku 5:14, 15.) Mahumu ananfenta Yehova ni ciicammo ikhontwaa cawe. Ayo anaavarela nteko ucuwelaca urinaaya wo mbiiblyani wiira anikavihere uturuwela-tho ukhalana upatthani woolipa ni Yehova.—Akalasiya 6:1.
Manannani mahumu cinnikaviheraaya navaraka matampi moolupale? Mahumu meeli awula mararu anaahala uvarela nteko Ibiiblya wiira anoonihere kontha isiyani itthu ipankileehu ikhanlyaaya yootakhala. Ayo ciicammo anaahala univaha miruku ni ikano wiira anikavihere uhituruwela-tho uvara yaale matampyaale. Mahumu atthunaka anaahala ulakela wiira uhaana uviraka ukati nihivaraka miteko cikhwaawe co wanlokoni, mpanka wanhaleehu ukhala saana nhina mminepani. Vano wakhalaka wiira ntthu naavara matampi moolupale ni khanttharuwa, isiyani mahumu inhalaaya upanka? Yeerannyaaka iyo itthwiiyo, mahumu anaahala unkumiha uyo ntthuuyo wanlokoni wiira atthu akhwaawe o wanlokoni ahintakihe itthu ipankilyaawe.
MUNCERERE WIITTHUCA WINYU
Moone isiyani inlamuliyeehu upanka navaraka matampi moolupale wiira Yehova anikavihere.
3. Uhimyaca wiira nihovonya unaanikavihera
Navaraka matampi ninanriipiha nrima Yehova. Phimaana, nihaana ninhimyaceraka wiira nihovonya. Nsome Isaalimu 32:1-5, ni mwamalihaka usoma, moopele mwaha nna nikohonna:
-
Uhiya umananiha uvithavitha itthu ipankileehu, kontha isiyani unaareera unhimyacera Yehova wiira nihovara matampi?
Uhiya paasi unhimyacera Yehova matampi avanreehu, hiiva ninhala wiicoona saana wakhalaka wiira ninawaalepela mahumu wiira anikavihere. Moone IVIDIYU, ni mwamalihaka woona, moopele mwaha nna nikohonna:
-
Ividiyu yonneehu, manannani mahumu yankavihenryaaya Canon unturuwela Yehova?
Khaninlamuliya waavithavitha mahumu itthu ipankileehu; ayo ampheela unikavihera. Nsome Tiyaku 5:16, ni mwamalihaka usoma, moopele mwaha nna nikohonna:
-
Naahaavithavitheke mahumu itthu ipankileehu, kontha isiyani khunhala waarikela unikavihera?
Nhimyace matampi avanreenyu, nhaavithavithe mahumu itthu yiirannyeele ni nkupali ukaviheriya ni Yehova
4. Ukumihiya wanlokoni nikhanle nikavihero ninkhuma wa Yehova
Wakhalaka wiira ntthu naavara matampi moolupale ni naakhotta upanka ile ineeraawe Yehova wiira phiitthu yomaana, uyo ntthuuyo naakumihiya wanlokoni, ni hiiva ninaahiya umuulumana. Nsome 1 Akorintu 5:6, 11 ni 2 Joau 9-11. Mwamalihaka usoma, moopele mwaha nna nikohonna:
-
Ifermentu inawinciviha itiriku impheela upankeliya iphaawu. Manannani umuulumiha ntthu vanre matampi ni himpheela uttharuwa unhononaaya nloko notheene?
Enci yaakumihiye wanlokoni wahoolo waya, yahoturuwela. Iyo itthwiiyo yiirannyeele kontha ulakiya hataa ukhalaka wiira unaawerya, unaamwiiriha ntthu urukunusa meettelwaawe. (Isaalimu 141:5) Moone IVIDIYU, ni mwamalihaka woona, moopele mwaha ala makohwaala:
-
Ividiyu yonneehu, manannani ukumihiya wanlokoni waakavihenryaa arokorihu Sónia?
Manannani ukumihiya wanlokoni . . .
-
unttitthimihaaya ncina na Yehova?
-
unooniheraaya wiira Yehova nasariya ni nanifento?
5. Yehova naanilevelela nattharuwaka vale
Yesu ahopanka ntakihero ninnikavihera ucuwela mananna Yehova cinkhalaawe wakhalaka wiira ntthu vanre matampi nawoonihera uttharuwa. Nsome Luka 15:1-7, ni mwamalihaka usoma, moopele mwaha nna nikohonna:
-
Nnya iveerusunnya cinniitthuciha isiyani nhina makhalelo a Yehova?
Nsome Ezekiyeli 33:11, ni mwamalihaka usoma, moopele mwaha nna nikohonna:
-
Itthuni yofayita inlamuliyeehu upanka napheelaka uthoonyihera wiira khweeliini nihottharuwa?
Khampa makampuci, Yehova naawacera cinene ikhontwaa cawe
ATTHU AKIINA ANEERA: “Mi kaahimyeeraka mahumu itthu ipankilyaaka ayo anaahala ukikumiha wanlokoni.”
-
Isiyani nyuuva yaahaleenyu umwiirela ntthu noopuwela commo?
UTHIKILELA
Navaraka matampi moolupale, Yehova pooti unilevelela. Phimaana, nihaana nittharuwaka ninrimeehu wotheene ni ulakela uhipanka citthu coohinamaana.
Wuupuwela
-
Kontha isiyani unaareera unhimyacera Yehova matampi avanreehu?
-
Isiyani inlamuliyeehu upanka wiira nileveleliye matampiihu?
-
Navaraka matampi moolupale, kontha isiyani ninlamuliyeehu waalepela mahumu unikavihera?
MWAPHEELAKA UCUWELA CITTHU CIKIINA
Moone mananna nlopwana mmoca wonnyaawe wiira Yehova khanle Nluku oothunku toko cinhimiyaaya nhina Isaiya 1:18.
Ukumihiya wanlokoni unonkavihera cani ntthu kumihiyooyo ni atthu otheene o wanlokoni?
Moone mananna onttonkacera ntthu hikhanle Saahiti a Yehova isiyani ineeriha ntthu ukumihiya wanlokoni.
Wiira moone kontha isiyani nlopwana mmoca aakumihiye wanlokoni wonnyaawe wiira Yehova aanompheela-tho, nsome ihantisi irina muru uneera: “Mi kampheela unturuwela Yehova.”
“Ibiiblya inaarukunusa makhalelo aatthu” (Ukhalenla, 1 yo Abril yo 2012)
