IKAPIITULU 2
Ibiiblya—Ilivuru ya Nluku
1, 2. Kontha isiyani Ibiiblya ikhanle itthuvo yomaana inivahalyaawe Nluku?
MUUPUWELE wiira mpwaniinyu nawuuvahani itthu ukati wahaaweherereenyu. Mwaahala wiicoona cani? Khweeliini waanaahala wuutteelani nrima kontha uyo howuupuwelani! Nyuuva mwaanaahala unsukhuru mpwaniinyu, ni itthu yuuvahalyaaweni yaanaahala wuutteelihani nrima cinene.
2 Ibiiblya ikhanle itthuvo yomaana inivahalyaawe Nluku. Kontha isiyani? Kontha citthu cinhimyaaya khacimphwanyannya mapuro makiina. Wootakihera, Ibiiblya inaahimya wiira Nluku humpa irimu, ituninya ni homumpa nlompwana ni nthiyana oopacera. Ibiiblya ciicammo inaanikavihera uvilela masakha annikhumelela muukumini wihu. Ni inawiitthuciha wiira Nluku mpheela wiira ituninya ikhale nipuro nomaana ni inaathoonyera mananna Nluku cinhalaawe upanka iyo.
3. Isiyani inhaleenyu woonenela mwaahihiyeke usoma Ibiiblya?
3 Mwaahihiyeke usoma Ibiiblya, nnaahala woona wiira Nluku mpheela wiira nyuuva nkhale mpatthannyaawe. Mwancuwelaka Nluku, upatthaniinyu nuuyova unaahala utepa ulipa.
4. Isiyani inootikhinihani nhina mananna Ibiiblya cinkawiyaaya?
4 Ibiiblya ihotaphuleliya niiluka coopwaha 3.000 ni Ibiiblya cinci cihempirimiriya. Atthu enci ntuninyani anaakhitiri usoma Ibiiblya niilukaaya. Ni khula isumana, atthu oopwaha imiliyawu imoca anaakhitiri uphwanya Ibiiblya! Khweeliini, khiivo ilivuru yoolikanana Ibiiblya!
5. Nlattuni uneereehu wiira Ibiiblya ikhanle ilivuru ya Nluku?
5 Ibiiblya ‘iphattuwale wa Nluku.’ (Nsome 2 Timotiyu 3:16.) Masi atthu akhwaawe pooti wuupuwela co: ‘Ibiiblya yantikhiye naatthu, vano inwa cani ikhalaka ilivuru ya Nluku?’ Ibiiblya imwaneennyaaya inawaakhula: “Apinaatamu yuulumale citthu ca Nluku toko yeettihereriyaaya [awula yaahooleliyaaya] ni nnepa wowaarya.” (2 Peturu 1:21) Muupuwele ila: Apwaapwaawe ananlepela mwanculaya wantikha iwarakha ni ananhimyera itthu yoohala wantikha. Mwaneene iwarakha tipani? Niireke mwaneene iwarakha akhanle apwaapwaawe awula mwanculaya? Mwaneene iwarakha akhanle apwaapwaawe. Inanna imoca, mwaneene Ibiiblya khanle Nluku, kahi atthu yaarumalyaawe wantikha. Ayo atthwaayo yantikhale moopuwelelo a Nluku. Khweeliini, Ibiiblya ikhanle “nuulumo na Nluku.”—1 Atesalonika 2:13; nwehe Niwehero n.° 2.
Ibiiblya Tradução do Novo Mundo da Bíblia Sagrada inaaphwanyannya niiluka cinci
IBIIBLYA KHINVONYA
6, 7. Nlattuni uneereehu wiira miphantte cotheene co mbiiblyani khacinvaanyihana?
6 Cahovira myaakha coopwahaka 1.600 wiira imalihiye wantikhiya Ibiiblya. Atthu yantikhale yaakhala ukati woovirikanaca. Akhwaawe yahosoma cinene, masi akiina khayaasomale cinene. Wootakihera, ntthu mmoca aari meetiku. Akhwaawe yaari anamalima, anakhavoko awula mayoomencera, makampuci, maporofeeta, masuwiisi ni mamwene. Waahookhalaru commo, miphantte cotheene co mbiiblyani khacinvaanyihana. Nineerelani commo? Kontha, hataa atthu yantikhile Ibiiblya yakhalaka oovirikanaca, ikapiitulu co mbiiblyani khacinvaanyihana. *
7 Ikapiitulu coopacera co mbiiblyani cinaattonka mananna masakha o ntuninyani yancenryaaya. Ni ikapiitulu coomalela cinaahimya mananna Nluku cinrwaawe umaliha ayo masakhaayo ni ukhaliha ituninya ipeephoni. Ibiiblya inawuuluma myaakha cinci cohantisi ya apinaatamu ni inaathoonyera wiira Nluku naapanka impheelaawe khula ukati.
8. Matakiheroni anthoonyera wiira Ibiiblya khinvonya yoolumaka myaha cosiyensiya?
8 Ibiiblya khinakhala ilivuru yosiyensiya ni khinakhala ilivuru yoocikolani. Masi yoolumaka myaha cosiyensiya, iyo khinvonya. Hiiva phaaweherereehu wiira ilivuru ya Nluku ikhaleke commo. Wootakihera, nhina ilivuru yo Levitiku, Nluku ahowiitthuciha asarayeli itthu yaalamuliyaaya upanka wiira ahihiyerere iretta cimwaryeelaka. Iyo yantikhiye khalayi cinene, uhinaaya ucuweliya mananna ntthu cinonkelaaya iretta. Itthu ikiina inthoonyera wiira Ibiiblya khinvonya yoolumaka myaha cosiyensiya, ukhanle ukati unoopelaaya mwaha ituninya. Iyo ineera wiira ituninya khivareleliye niitthu. (Jó 26:7) Ni Ibiiblya yahohimya khalayiiru wiira ituninya ikhanle yoorukurerya, ukati atthu enci yahaacuwelaaya iyo itthwiiyo.—Isaiya 40:22
9. Ukhuluvelya wa atthu yantikhale Ibiiblya unthoonyera isiyani?
9 Ciicammo, Ibiiblya yattonkacaka ihantisi, iyo inaahimya ikhweeli. Masi ilivuru cohantisi cinci cantikhalyaaya atthu khacinhimya ikhweeli kontha ale yantikhale ahovitha citthu cikiina. Ukati nkhwaawe, ayo khayaahimya apoovwaaya yatthemiyaka ukhottoni. Masi anamantikha Ibiiblya khiivo ivithalyaaya, hataa wakhalaka wiira apoovwaaya, asarayeli, yaanaatthemiya ukhottoni. Ayo ahantikha ciicammo citthu caavonyaaya. Wootakihera, Moocesi, namantikha Ibiiblya mmoca, khaavithile itthu yootakhala cinene yaapankilyaawe ni hottonka mananna Nluku canttarusalyaawe nlattu wo iyo. (Manummeru 20:2-12) Ukhuluvelya wa atthu yantikhile Ibiiblya unaathoonyera wiira khweeliini Ibiiblya ikhanle ilivuru ya Nluku. Phimaana pooti wankhuluveleehu.
ILIVURU YOOCARANA IKANO COMAANA
10. Kontha isiyani ikano co mbiiblyani pooti unikavihera mpaka ilelo?
10 Ibiiblya ‘iphattuwale wa Nluku ni ikhanle yowiitthuciha, yoovaanyiha, yowookolela citthu.’ (2 Timotiyu 3:16) Ni mpaka ilelo ikano co mbiiblyani pooti unikavihera. Kontha isiyani? Kontha cikhanle ikano cinnivahaawe Yehova, Mpattusiihu. Uyo naacuwela itthu inoopuweleehu ni citthu cinniira wanrimani wihu. Uyo naanicuwela sana-saana uvikana mananna hiivano cineecuweleehu ni uyo mpheela wiira nikhale ootteeliya. Uyo naacuwela itthu yoohala unipanka ratta ni itthu yoohala uniwaanela masakha.
11, 12. a) Nhina ilivuru ya Matewus ikapiitulu 5 mpaka 7, ikanoni ca Yesu cimphwanyeehu? b) Isiyani-tho nineetthuceehu mbiiblyani?
11 Nhina ilivuru ya Matewus ikapiitulu 5 mpaka 7, ninaaphwanya ikano comaana ca Yesu, cinttonka mananna ootteeliya, mananna owaawacera akhwiihu, mananna oolompa, awula ooswali, ni mananna cinlamuliyeehu uwehera nsurukhu. Unookhalaru wiira Yesu vahale nnya ikanonnya myaakha 2.000 uttuli, nanlelo cihaana ifayita ni cinaanikavihera cinene ilelo.
12 Mbiiblyani, Yehova ciicammo naaniitthuciha mattharelelo annikavihera ukhala saana naamuciihu, ukhala nanteko omaana ni ukhala ni nnema naatthu. Mattharelelo o mbiiblyani anaanikavihera khula ukati, hataa nikhalaka pani, hataa nikhalaka nipuroni awula hataa nikhalanaka masakhani.—Nsome Isaiya 48:17; nwehe Niwehero n.° 3.
NYUUVA POOTI UKHULUVELA INATIRI CO MBIIBLYANI
Isaiya, namantikha mmoca Ibiiblya, aheera wiira Babilooniya aanaahala ukwanyulaciya
13. Isaiya aahimile wiira isittatti yooBabilooniya yaanaahala wiirihiya isiyani?
13 Mbiiblyani ninaaphwanya inatiri cinci ciirannyeele. Wootakihera, Isaiya ahohimya wiira isittatti yooBabilooniya yaanaahala ukwanyulaciya. (Isaiya 13:19) Uyo ahohimya caahalaaya ukwanyulaciya. Isittatti yooBabilooniya yaari yookhikhiceriya niisiri cuulupale, mikhora cuulupale, ciicammo nimooloko. Masi Isaiya aheera wiira mooloko waanaahala uwelela ni mikhora caahala ukhala woohitthennya. Alupatthi yaahala ukela woohiwana ikhotto. Isaiya mpaka ahohimya ncina na nlopwana ahaala ukwanyulaca isittatti yooBabilooniya. Ncina nawe naahala ukhala Siiru.—Nsome Isaiya 44:27–45:2; nwehe Niwehero n.° 4.
14, 15. Inatiri ya Isaiya yiirannyeele cani?
14 Uvira waya myaakha 200 Isaiya nantikhaleene ila inatiriila, anatoropa yahophiyeera uBabilooniya wiira yaane ikhotto. Tipani aahoolela ayo anatoropaayo? Aari mwene ooPersiya, nlopwana eehaniya Siiru, khampa inatiri caahimyalyaaya. Vano wahophiya ukati wowiirannya citthu cikiina caahimyaaya iyo inatiriiyo.
15 Uhiyu waakenlyaaya anatoropa, atthu ooBabilooniya yaapanka isukuhuulu. Ayo yiicoona ukhikiceriya niisiri cuulupale, ciicammo nimooloko waarukurerya isittatti. Vate waya isittatti, Siiru ni anatoropaawe yaanaathipa wiira ahapuse maaci o ule moolokoole. Ukati waawukuwilyaaya maaci, anatoropa ooPersiya yaahokhitiri ulapuwa mooloko. Masi yaahala ukhitiri cani ukela nsittatti? Mikhora co wasittatti khacaatthukiye, toko caahimyaaya inatiri. Phimaana, anatoropa yaahokhitiri ukela woohiwana ikhotto.
16. a) Inatiri ya Isaiya yaahimyale isiyani nhina itthu yaahala ukhumelela uBabiloniya uhoolo? b) Isiyani inthoonyera wiira inatiri ya Isaiya iheerannya?
16 Isaiya aheera wiira waanaahala uphiya ukati wahaahalaaya ukhaliya-tho isittatti yooBabilooniya. Uyo hantikha: “Khunhala ukhaliya-tho, ni khaninhala ukhala nipuro noopheela ukhaliya naatthu, mahuku otheene.” (Isaiya 13:20) Niireke iyo inatiriiyo iheerannya? Iyee. Khaavo-tho nokhala nipuro naari Babilooniya. Nno nipuronno ninkhala ikilomeeturu 80 uhitto waya u Bagdá, u Iraque, ni ilelo khimphwanyannya itthu, amphwanyannya maluku paasi. Yehova honkweca Babilooniya “nimmelo wookwanyulaca.”—Isaiya 14:22, 23. *
Ihalahala co Babilooniya
17. Nlattuni ninlamuliyeehu ukhuluvela inatiri ca Nluku cotheene?
17 Pooti wankupaliihu wiira citthu coohoolo cihimiye mbiiblyani cinaahala wiirannya, kontha inatiri cinci co mbiiblyani ciheerannya. Iyo inaanikupaliha wiira Yehova naahala ukhaliha ituninya ipeephoni. (Nsome Manummeru 23:19.) Hiiva nihaana niweherero noorwaa ukhalana ukumi woohimala “mwaneene Nluku hinlamuliya wootha, ukhuluvelihalyaawe khalayi-khalayi.”—Titu 1:2. *
IBIIBLYA POOTI URUKUNUSA MAKHALELWEENYU
18. Paulu antikhile isiyani aacaka “nuulumo na Nluku”?
18 Hiiva niheetthuca wiira khiivo ilivuru ikiina inlikanana Ibiiblya. Myaha ciri mbiiblyani khacinvaanyihana, ni iyo khinvonya yoolumaka myaha cosiyensiya awula yattonkacaka ihantisi. Uhiya commo, Ibiiblya inaavaha ikano comaana ni ihaana inatiri cinci ciirannyaale. Masi kahi iyo paahi. Apostulu Paulu hantikha: “Nuulumo na Nluku nikumi ni nihaana ikuru.” Iyo maanaaya isiyani?—Nsome Maberewu 4:12.
19, 20. a) Ibiiblya inookaviherani cani nyuuva wiicuwela mananna ciriinyu? b) Manannani nyuuva cinhaleenyu uthoonyera wiira nnaavaha ifayita Ibiiblya?
19 Iyo maanaaya wiira Ibiiblya pooti urukunusa makhalelweenyu ni wuukaviherani wiicuwela mananna ciriinyu. Manannani? Iyo pooti wuukaviherani nyuuva ucuwela moopuwelelweenyu ni itthu iri wanrimani winyu. Wootakihera, atthunaka hiiva ninawuulumaka wiira ninanfenta Nluku. Masi neettelaka itthu inhimyaaya Ibiiblya, phinhaleehu uthoonyera wiira ninanfenta Nluku.
20 Khweeliini, Ibiiblya ikhanle ilivuru ya Nluku. Uyo mpheela wiira nyuuva nsome ni nfente Ibiiblya. Nthoonyere wiira nyuuva nnavaha ifayita itthuvo ya Nluku. Manannani? Mwaahihiyeke wiitthuca Ibiiblya. Mwapanka commo, nyuuva nnaahala wiitthuca itthu Nluku inaapheelelaawe apinaatamu. Nhina ikapiitulu ikiina inhaleehu ukela, ninaahala wiitthuca cinene iyo.
^ par. 6 Atthu akhwaawe aneera wiira cihaavo miphantte co mbiiblyani cinvaanyihana, masi iyo khinakhala ikhweeli. Nwehe ikapiitulu 7 nhina ilivuru A Bíblia—Palavra de Deus ou de Homem?, ikumiheriye ni Masaahiti a Yehova.
^ par. 16 Mwapheelaka ucuwela inatiri cikhwaawe co mbiiblyani, nsome ipaagina 27-29 mbroxuurani Um Livro para Todas as Pessoas, ikumiheriye ni Masaahiti a Yehova.
^ par. 17 Ukwanyulaciya wosittatti yooBabilooniya ikhanle paasi inatiri imoca yo mbiiblyani yiirannyeele. Nyuuva pooti usoma inatiri cimmuuluma Yesu Kristu mphantte wo Niwehero n.° 5.
