Mwasomaka ijornaali, moonaka itelevisau awula mweewelelaka iraatiyu, nyuuva nnawoonaka ni nnawiiwaka ihapari cinooluma ikhirini ni ikhotto. Atthunaka nyuuva nnaahuva nlattu wo iretta awula nlattu wookhwa ntthu mwanfenteenyu.

Pooti nnawiikohaka co:

• Ila phiitthu Nluku inkipheelelaawe miiva ni amucyaaka?

• Isiyani inhala ukikavihera waanana masankiho ankiphwanya?

• Kiireke wiira wanihukuni ntuninyani ninaahala ukhala nnema neekhweeli?

Ibiiblya inawaakhula ala makohwaala.

• Atthu khanhala-tho uwerennya, wuuluvala ni ukhwa.—Apokalipise 21:4

• Ntthu hinoorya weetta, naahala woorya weetta mpaka naahala ukhitiri utthawa.—Isaiya 35:6

• Ntthu hinoona naahala ukhitiri woona.—Isaiya 35:5

•  Atthu akhwile anaahala wunwelelihiya.—Joau 5:28, 29

• Khaavo nohala uwerennya.—Isaiya 33:24

• Atthu otheene anaahala ukhalana iyoolya yowaatosera.—Isaalimu 72:16

Pooti ukhala toko wiira inatiri ciri mbiiblyani, cikhanle citthu coohimyahimiya paasi. Masi, Nluku neera wiira citthu cotheene cikhuluvelihilyaawe cinaaha wiirannya woohipica, watuninyani vaava. Ibiiblya inaahimya mananna cinhalaawe wiirannyeeha.

Uhiya paasi wuuluma citthu comaana cinhala wiirannya uhoolo, Ibiiblya ciicammo inaanikavihera ukhala ootteeliya nenna va. Muupuwele citthu cinookhalihani isukhuli. Atthunaka nyuuva nnawaanana masakha nlattu wowuuthwaani nsurukhu awula nnawaanana masakha watthokoni winyu, iretta awula nlattu wookhwa mpatthaniinyu awula mmuciinyu. Ibiiblya pooti wuukaviherani waanana ayo masakhaayo. Ni ciicammo nyuuva unaahala wuucivelani ucuwela mananna Ibiiblya cinaakhulaaya ala makohwaala:

• Kontha isiyani ninaahuva?

• Ninhala ukhitiri cani waanana masakha annikhumelela?

• Itthokweenyu inhala ukhala cani yootteeliya?

• Immwiirannyeela isiyani ntthu akhwaaka?

• Niireke wanihukuni ninaahala uwoona-tho asimuciihu ni asipatthaniihu akhwile?

• Isiyani inhala unikavihera ukupaleela wiira Nluku naahala upanka citthu cotheene cikhuluvelihilyaawe?

 Wakhala wiira nneera nsomaka ila ilivurwiila, iyo inoonihera wiira nnaapheela wiiweeha itthu inhimyaaya Ibiiblya. Ila ilivurwiila inaahala wuukaviherani. Iparaagrafu cimphwanyannya nhina ila ilivurwiila, cihaana makoho anhala wuukaviherani wiiweeha saana Ibiiblya. Atthu enci uhaacivela venci ukaviheriya waya ni Masaahiti a Yehova wiiweeha Ibiiblya. Ninaaweherera wiira nyuuva unaahala ciicammo wuucivela ukaviheriya. Ninlompa wiira Nluku avahe iparakha wiikurumica winyu wiira mwiiweehe itthu inhimyaaya Ibiiblya!