1, 2. Atthu yoonaka cikhumelelaka citthu cinaahuviha apinaatamu isiyani impheelaaya ucuwela?

MAHUKWAALA cinaakhumelela citthu cinci cinaahuviha apinaatamu. Imaara ikhwaawe ninawiiwaka ihapari cinci coohinamaana, toko nnya: “Ucara wo maaci uhaakwanyulaca aliteeya amoca. Nlopwana mmoca ahokela nipuro naatthu enci ni khamala uwiivakaca atthu. Athiyana amoca ahokhwa nlattu wo iretta yowiipa ni ahaahiya asaanaaya.”

² Atthu enci anaapheela ucuwela kontha isiyani cinkhumelelaaya ihasara toko nnyo. Ayo anawiikohaka kontha isiyani ntuninyani uhoocara uthanyanaciya ni uhuva. Niireke nyuuva nhotoko wiikoha commo?

3, 4. a) Isiyani Habakuki yankohilyaawe Yehova? b) Yehova aakhunle cani?

³ Ibiiblya inawoonihera wiira atthu ookhuluvelya yanswalela Yehova khalayi, yaheekoha commo. Wootakihera, porofeeta Habakuki ahonkoha Yehova co: “Nlattuni unkihiyaa koonaka citthu cootakhala? Ni nlattuni unaahiyereraa atthu yahuvihanaka? Nlattuni uryaaya utankanyanaciya ni inttewo uhoola waka? Ni nlattuni uhaavo waattakanaciya ni unyakulihanaciya?.”—Habakuki 1:3.

⁴ Yehova aakhunle cani ayo makohwaayo? Nhina ilivuru ya Habakuki 2:2, 3 Yehova ahokhuluveliha wiira aanaahala umalamaliha masakha yaakhumelela. Iyo inoonihera wiira Yehova naawaafenta cinene apinaatamu. Ibiiblya ineera wiira uyo naaniwacera otheene cihu. (1 Peturu 5:7) Khweeliini, Nluku unanrusa cinene oonaka ukhumelelaka uhuva, uvikana inanna cinnirusaaya. (Isaiya 55:8, 9) Vano, kontha isiyani atthu anaahuva? Nttwee noone inanna Ibiiblya cinaakhulaaya.

5. a) Ahooleli ottiini enci aneera wiira uhuva unkhumelela nlattu wosiyani? b) Masi Ibiiblya ineera cani?

⁵ Imaara cinci mapaatere, mapastore ni ahooleli ottiini akhwaawe aneera wiira khula itthu inkhumelela mwaneene Nluku phitthunne. Atthu akiina aneera wiira hataa ihasara cinkhumelela, mwaneene Nluku phinkhumeleliha ni aneera wiira ihaavo itthu imwiiriha upanka commo. Akhwaaka mwaana, ahaavo aneera wiira uyo khwile kontha Nluku ampheela nlayikha nankaani wiirimu. Masi nnyo citthu cowoothiya. Yehova khankhumeleliha citthu cootakhala. Ibiiblya ineera: “Nluku eekhweeli khaalamuliya upanka itthu yoohinamaana, ni Nakuru-Cotheene khaahala thanku upanka itthu yoohiloka!”—Jó 34:10.

6. Kontha isiyani atthu enci anonromolaaya Nluku wiira phinkhumeleliha uhuva ntuninyani?

⁶ Atthu enci anonromola Nluku wiira uyo phinkhumeleliha uhuva kontha anoona wiira Nluku phinlamulela ituninya. Masi khampa hiiva niitthucileehu nhina ikapiitulu 3, Sotwani phinlamulela ituninya.

7, 8. Citthuni tthaaru cineerihiiha ukhumelela uhuva ntuninyani?

⁷ Itthu imoca ineerihiiha ukhumelela uhuva, ukhalaka wiira “ituninya yotheene irii mmatatani wa Ntakhali.” (1 Joau 5:19) Sotwani khanle nhooleli ootakhala nrima ni oohoonela uthunku. Uyo neera ‘ahapusaka ituninya yotheene inkhaliya.’ (Apokalipise 12:9) Atthu enci arii khampa uyova. Phimaana, ila ituninyeela ihoocara uthanyanaciya, woothiya ni citthu cootakhala.

⁸ Itthu yonayeeli ineerihiiha ukhumelela uhuva ntuninyani, ikhanle itampi. Atamu ni Hawa ahoniphwanyiha matampi otheene cihu. Phimaana, atthu enci anawiithenca ni anooniha wiira ayo phitepile ukhalana ifayita waavikana akhwaaya. Iyo inaakumihera ikhotto, unyakulihanaciya ni utulumyanaciya. Citthu cotheene nnyo cinaawaana uhuva. (Eklesyaste 4:1;  8:9)  Itthu ikhwaawe ineerihiiha ukhumelela citthu coohinamaana ukhalaka wiira imaara cikhwaawe atthu anaakhalaka nipuro ni ukati woohiloka. Iyo itthwiiyo Ibiiblya ineehanaaya “uwakati ni cookhumelela coohiwehereriya.”—Eklesyaste 9:11

9. Kontha isiyani ninlamuliyeehu ukupali wiira Nluku naahala umaliha uhuva?

⁹ Khanakhala Yehova phinkhumeleliha uhuva. Uyo khanakhala phineerihiiha ukhumelela ikhotto, ihasara ni utulumwanaciya. Kahi Nluku phinkhumeleliha ihasara, toko uttettemelaca ni uparuwaca wotthaya, sikolooni awula uttimpa. Masi nyuuva atthunaka nnawiikoha co: ‘Ukhala wiira Yehova phiri Nakuru-Cotheene, vano kontha isiyani himmalihaawe citthu cootakhala?’ Ihaavo itthu immwiiriha Yehova nanlelo uhimaliha uhuva. Masi ninaacuwela wiira uyo naahala umalamaliha uhuva, kontha naaniwacera ni naanifenta otheene cihu.—1 Joau 4:8.

10. Isiyani Sotwani yoolumilyaawe unlavani no Eeteni amwaacaka Nluku?

¹⁰ Unlavani no Eeteni, Sotwani ahaatheperya Atamu ni Hawa uhiya umwiiwelela Nluku. Sotwani enre wiira Nluku khaalamulela saana ni khaavaha Atamu ni Hawa citthu cotheene caalamuliyaaya ukhalana. Sotwani aapheela ayo yaaminiki wiira uyo phaahala ulamulela saana unvikana Nluku ni wiira ayo pooti waahalaaya wiihoolela veekha caya kahi uhooleliya ni Nluku. *—Uphattuwaca 3:2-5

11. Nikohoni ninlamuliyeehu waakhula?

¹¹ Atamu ni Hawa uhiya waya umwiiwelela Nluku, ayo yahonrukunuwela. Ayo yooniha wiira yanhala ukhitiri ulakela veekha caya itthu yomaana ni yoohinamaana. Masi Yehova phincuwela itthu inniphwanyiha ifayita. Nluku aahala woonihera cani wiira Atamu ni Hawa yaapankile itthu yoohiloka?

12, 13. a) Kontha isiyani Yehova khaawiivile Atamu ni Hawa uvara waya matampi? b) Kontha isiyani Yehova nhiilyaawe Sotwani ni apinaatamu yakumiheraka ikuvernu caya?

 ¹² Yehova khaawiivile Atamu ni Hawa uvara waya matampi. Kontha isiyani? Kontha Yehova aheera wiira ayo yaalamuliya ukhalana asaana ni ucariha ituninya. Itthu Yehova impheelaawe wiira yiirannye inawiirannya, hataa Sotwani amananihaka upanka isiyani wiira ihiirannye. (Uphattuwaca 1:28; Isaiya 55:10, 11) Phimaana, Yehova ahaahiya Atamu ni Hawa wiira yaayare asaana. Ayo asaanaayo pooti waahalaaya ulakela umwiiwelela Yehova awula Sotwani.

¹³ Masi uyo ukatyuuvo khayaari Atamu ni Hawa paasi. Sotwani aamoothenrye Yehova uhoolo wo malayikha imiliyau cene. (Jó 38:7; Daniele 7:10) Phimaana, Yehova honhiya Sotwani alamulelaka ituninya ni haahiya apinaatamu yakumiheraka ikuvernu caya. Yehova pankile commo, kontha aapheela woonihera wiira Sotwani moothi.

14. Ukati wotheene uvinre apinaatamu yakumiheraka ikuvernu caya, isiyani yoonannyeele?

¹⁴ Ikuvernu cotheene caapinaatamu cikumiheriye ukati wotheene uvinre, khiivo ikuvernu ilamulenle saana. Uhoonannya wiira Sotwani moothi. Khweeliini apinaatamu anlamuliya ukaviheriya ni Nluku. Porofeeta Jeremiya koothile wiirawawe: “Oo Yehova, kinaacuwela sana-saana wiira nttala waapinaatamu khunakhala wawawe. Khanakhala pinaatamu phineettihera inyaa cawe.”—Jeremiya 10:23.

15, 16. a) Kontha isiyani Yehova unhiyaawe uviraka ukati mwinci woohimaliha uhuva? b) Kontha isiyani himmalamalihaawe citthu coohinamaana?

¹⁵ Masi kontha isiyani Yehova unhiyaawe uviraka ukati mwinci woohimaliha uhuva? Wiira ikuvernu yooneneliye wakhala wiira inaakhitiri ulamulela saana awula mena, uhaana uviraka ukati mwinci. Ukati unvira uneera wooniheraka wiira ikuvernu  ya Sotwani khinlamulela saana. Isiyensiya ni itekonologia khacikhitinri umalamaliha citthu coohinamaana, umasikhiini, ikhirini ni ikhotto. Uhiya umala nnyo citthu nnyo, cinawaaca wuncererya. Unawoonannya wiira apinaatamu ahaana yakaviheriyaka ni Nluku. Masi kontha isiyani Nluku himmalihaawe nankaa ihasara cuulupalennyo?

¹⁶ Nluku khammalamaliha citthu coohinamaana kontha upanka commo waahala ukhala ukavihera ikuvernu ya Sotwani. Ni iyo itthwiiyo yanhala uwiiriha apinaatamu wuupuwela wiira ayo anaakhitiri ulamulela saana. Masi iyo yaahala ukhala itthu yowoothiya. Yehova pooti ihiminye khaahala upanka itthu yaahala uwiiriha atthu ukupali iyo itthu yowoothiyeeyo, kontha uyo khanootha.—Maberewu 6:18.

17, 18. Yehova nohala umaliha cani citthu coohinamaana cotheene cinkhumelela?

¹⁷ Niireke Yehova naahala ukhitiri umaliha masakha otheene akhumelelihilyaawe Sotwani ni apinaatamu? Iyee. Nluku khiivo itthu inoocyelaawe upanka. Yehova naacuwela ukati unhalaaya utepa woonannya wiira Sotwani moothi. Yeerannyaaka iyo, vano Yehova phinhalaawe ituninya ukhaliha ipeephoni, toko caapheelaawe ikhumelo wuupaceroni. Atthu ookhwa anaahala wunwelelihiya. (Joau 5:28, 29) Khacinhala ukhala-tho iretta ni hataa ukhwa. Citthu coohinamaana cotheene cikhumelelihilyaawe Sotwani cinaahala umala. Yehova nohala unruma Yesu wiira “atankanye miteko ca Sotwani.” (1 Joau 3:8) Nihaana nikhalaka ootteeliya nrima nlattu Yehova woovilela ni woohiya uviraka ukati. Kontha iyo itthwiiyo inaanivaha iparakha wiira nincuwele ni nilakele wakhala wiira ninaahala umwiiwelela awula mena. (Joau 4:23; Nsome 2 Peturu 3:9, 10.) Khweeliini, mahukwaala ninaahuva. Masi Yehova naanivaha ikuru wiira nivilele masakha ninaananeehu.—Nsome 1 Akorintu 10:13.

¹⁸ Yehova khanonkhanyereriha ntthu umwiiwelele. Uyo naanihiya nilakelaka naasineeneehu itthu inhaleehu upanka.  Nttwee niiweehe sana-saana kontha isiyani iyo ikhanlyaaya itthuvo yomaana.

19. a) Itthuvoni Yehova inivahilyaawe? b) Kontha isiyani ninlamuliyeehu uvaha ifayita iyo itthuvweeyo?

¹⁹ Hiivano ninaavirikana ni inama, nnye cimpanka citthu woohipaca wuupuwela. Nnyo khacinkhitiri ulakela isiyani ikhanle itthu yomaana ni yoohinamaana. (Miruku 30:24-28) Ciicammo, hiivano khaniri toko maakina, ankhitiri upanka paasi ile ipankeliyaaya. Yehova honivaha utaphuwa wiira nithanleke upanka itthu impheeleehu. Kontha isiyani ninlamuliyeehu uvaha ifayita iyo itthwiiyo? Kontha hiivano unaanicivela uthanla makhalelo ampheeleehu ukhalana, taapani anlamuliya ukhala apatthaniihu ni isiyani impheeleehu muukumini wihu.Yehova naacuwela wiira nwo utaphuwanwo unaanitteeliha nrima.

20, 21. Itthuni itepile ukhala yomaana inlamuliyeenyu ulakela upanka?

²⁰ Yehova nopheela wiira ninfenteke. (Matewus 22:37, 38) Uyo khampheela wiira ninswalele nlattu wookhanyererihiya. Uyo honivaha utaphuwa. Khula nyari nokhala ootteeliya nrima amwiiwaka mwanamwe eeraka ninrima wotheene: “Paapa, mi kinawuufentani.” Yehova ciicammo nokhala ootteeliya nrima nalakelaka unfenta ni unswalela. Masi woocukuliha nrima, Sotwani, Atamu ni Hawa yahothanla uhimwiiwelela Nluku. Vano nyuuva isiyani nnohaleenyu ulakela?

²¹ Itthu yomaana nyuuva inlamuliyeenyu upanka, ukhanle ulakela unswalela Yehova. Atthu imiliyau cene aholakela upanka ile inoncivela Yehova ni aholakela wiira khanhala untthara Sotwani. (Miruku 27:11) Toko ciitthucileehu, Nluku naahala umaliha uhuva wotheene ni naahala ukhaliha ituninya ipeephoni. Isiyani nyuuva inlamuliyeenyu upanka nna co wiira mwakhale upeephoni? Nhina ikapiitulu ikiina inhaleehu usoma, ninaahala wiitthuca iyo.

[Mawehero o vathi]