1, 2. a) Niireke nyuuva pooti waneereenyu wiira nnancuwela sana-saana ntthu rina ifaama nlattu woocuwela ncina nawe paasi? Ntaphulele. b) Atthu akiina, aneera wiira Yesu tipani?

AHAAVO atthu enci ntuninyani arina ifaama. Mmuupuwele ntthu mmoca rina ifaama. Niireke nyuuva pooti waneereenyu wiira nnancuwela sana-saana uyo ntthuuyo nlattu woocuwela ncina nawe paasi? Unawoonannya wiira mena. Mwacuwelaka makhalelwaawe uyo ntthuuyo ni citthu cikhwaawe co mukumini wawe phinlamuliyeenyu wiira nnancuwela sana-saana.

² Yesu Kristu khanle watuninyani myaakha cookhalaka 2.000 uttuli. Atthunaka nyuuva nhopaca wiiwa oopeliyaka mwaha. Masi khula ntthu nohimya yawawe woohimya ca Yesu. Ahaavo aneera wiira uyo aari nlopwana ooreera nrima paasi, akiina aneera wiira uyo aari Porofeeta ni akiina anooniha wiira uyo Nluku. Vano nyuuva woonela winyu, Yesu Kristu tipani?—Nwehe Niwehero n.° 12.

3. Kontha isiyani iryaaya itthu yuulupale nyuuva uncuwela Yehova Nluku ni Yesu Kristu?

³ Ucuwela Yesu aari tipani itthu yofayita cinene. Kontha isiyani? Kontha wiira niphwanye ukumi woohimala nihaana nincuwelaka Yehova Nluku ni Yesu Kristu. Ibiiblya ineera: “Ukumi woohimala phuula, ahaana yuucuwelakani nyuuva nkhanle Nluku mmoca eekhweeli, ni ule nveleelihaleenyu, Yesu Kristu.” (Joau 17:3) Nhina ikapiitulu 1, niheetthuca ikhweeli ca Yehova Nluku. Masi, ciicammo nyuuva nhaana mwiitthucaka ikhweeli ca Yesu wiira mwaphwanye ukumi woohimala Upeephoni. (Joau 14:6) Wiitthuca myaha ca Yesu ciicammo unaahala wuukaviherani mananna makhwaawe. Uyo ahovaha ntakihero nomaana, nhina maatafitelo akhunanihu ni makhalelo  anlamuliyeehu ukhalana. (Joau 13:34, 35) Vano, nttwee niitthuce citthu cinhimyaaya Ibiiblya woohimya ca Yesu.

4. Moolumo Kristu ni Mesiya maanaaya isiyani?

⁴ Yesu ciicammo nawiihaniya Kristu. Moolumo Kristu ni Mesiya anhimya itthu imocaaru. Kristu nuulumo neeluuka ikereeku ni Mesiya nuulumo neeluuka iheperewu. Moolumo oomeeli maanaaya wiira ntthu oothanliya ni Nluku wiira avare ntekwaawe wootepa ukhalana ifayita. Yesu thanliye wiira apanke isiyani? Uyo thanliye wiira eerannyeehe inatiri ca Nluku cotheene. Masi ciicammo mahukwaala uyo pooti unikavihera. Ibiiblya inaahimya wiira Yehova ahokhuluveliha wiira aanaahala unveleeliha Mesiya. Phimaana, Yesu hinaaya uyariya, atthu enci yaaneekohaka tipani aahala ukhala Mesiya.

5. Atthari a Yesu yaanaakupali wiira uyo aari Mesiya?

⁵ Atthari a Yesu yaanaakupali wiira uyo aari Mesiya, awula Kristu, aakhuluvelihiye wiira aanaahala uwa. (Joau 1:41) Wootakihera, Simawu Peturu ahomwiirela Yesu: “Pwiiya, thinyu nkhanle Kristu.” (Matewus 16:16) Vano hiivano, isiyani inhala unikupaliha wiira Yesu phithanliye ni Nluku?

6. Yehova aakavihenre cani atthu uncuwelela Mesiya?

⁶ Khalayi-khalayi Yesu hinaaya uyariya, Nluku ahaaruma maporofeeta wantikha citthu canhimya Mesiya. Nnyo citthunnyo caanaahala waakavihera atthu uncuwelela Mesiya. Toko cani? Muupuwele co: nyuuva nnaarumiya unrweela ntthu hinoncuweleenyu nipuro cineemelacaaya ikaaro cinci. Ukhala wiira nno nipuro naatthu enci, nnohala uncuwelela cani? Wakhala wiira nnaahimyeeriya inanna ciryaawe uyo ntthuuyo ni ikuwo ciwanryaawe, khunhala wuurikelani uncuwelela. Inanna imocaaru, Yehova ahaaruma maporofeeta wiira anihimyeere citthu caahalaawe upanka Mesiya ni citthu caahala unkhumelela. Atthu unaacivela ucuwela ikhweeli pooti wanlikanihaaya citthu caahimilyaaya maporofeeta ni citthu cankhumelenle  Yesu. Upanka commo, unawoorannya ucuwela wiira Yesu Mesiya.

7. Nttonkace inatiri piili cinoonihera wiira Yesu phi Mesiya.

⁷ Moone citthu piili Yehova caarumilyaawe maporofeeta wantikha. Yoopacera, myaakha 700 uttuli Yesu hinaaya uyariya, Mikeya ahorumiya wantikha wiira Mesiya aahala uyariya isittatti yankaani, uPetelehemu. (Mikeya 5:2) Ni khweeliini Yesu aayaryeele iyo isittattiiyo! ( Matewus 2:1, 3-9) Yonayeeli, inatiri yaarumiyaawe wantikha porofeeta Daniele, yahohimya wiira Mesiya aahala ukhumelela mwaakha wo 29 E.C. (Daniele 9:25) Iyo inatiriiyo ciicammo yaheerannya. Cihaavo-tho inatiri cinci cinoonihera wiira Yesu phi Mesiya aakhuluvelihiye uwa.—Nwehe Niwehero n.° 13.

8, 9. Isiyani yeerannyeele ukati waapattisiyaawe Yesu yoonihenre wiira uyo phaari Mesiya?

⁸ Itthu ikhwaawe inoonihera wiira Yesu phi Mesiya, phiitthu yeerannyeele ukati waapattisiyaawe. Nluku ahonkhuluveliha Joau Mpattisa wiira aanaahala woona itthu yaahala unthoonyera tipani aari Mesiya. Isiyani yeerannyeele mwaakha wo 29 E.C, ukati Yesu waarweelyaawe umoolokoni Yortani wiira apattisiye ni Joau? Ibiiblya inaahimya itthu yeeranyeele ukati Yesu waakhumilyaawe mmaacini: “Uyo ahoona nnepa wa Nluku wakhuruwaka khampa ikhuntta ni inweelaka nipuro naaryaawe. Ciicammo, ncu naakhuma wiirimu naheera: ‘Ula phiri Mwanaka, kinonfentaaka, kimmwaaminnyaaka.’” (Matewus 3:16, 17) Iyo phiitthu yaahala unkavihera Joau uncuwelela Mesiya. Joau ciicammo ahoona ikhuntta ni aheewa ncu na Nluku. Vano, Joau ahokupali wiira Yesu phaari Mesiya. (Joau 1:32-34) Yesu  khanle Mesiya ukati waakhenlyaawe nnepa wowaarya wa Yehova. Uyo phaathanliye ni Nluku wiira akhale Nhooleli ni Mwene.—Isaiya 55:4.

⁹ Woothikilela, citthu tthaaru cinoonihera wiira Yesu phi Mesiya phinnya: (1) inatiri combiiblyani, (2) itthu yoolumacilyaawe Yehova ni (3) itthu yaapankilyaawe Yehova ukati Yesu waapattusiyaawe. Masi Yesu aakhala vayi hinaaya uwa watuninyani? Aarina makhaleloni? Nttwee noone itthu ineetthucihaaya Ibiiblya.

10. Ibiiblya ineetthuciha wiira Yesu aakhala vayi hinaaya uyariya watuninyani?

¹⁰ Ibiilbya inaahimya wiira Yesu hinaaya uwa watuninyani,  ahokhala wiirimu myaakha cinci. Porofeeta Mikeya ahorumiya wantikha wiira Mesiya aahala ukhala ntthu aari ikhumelo “ukati wo khalayi” (Mikeya 5:2) Yesu mwaneene, ciicammo ahohimya ikwaha cinci wiira aakhala wiirimu hinaaya uyariya watuninyani niirutthu yeepinaatamu. (Nsome Joau 3:13; 6:38, 62; 17:4, 5.) Ikhumelo khalayi Yesu hinaaya uwa watuninyani, uyo ni Yehova yaanawiiwanana sana-saana.

11. Kontha isiyani Yehova nanfenta cinene Yesu?

¹¹ Yesu naafentiya cinene ni Yehova. Kontha isiyani? Yoopacera, kontha uyo ‘phipaceriye wumpiya cihinatthi wumpiya cotheene.’ Yehova mumpile Yesu hinaaya umumpa ntthu awula hinaaya wumpa hataa itthu. * (Akolosu 1:15) Yonayeeli, Yehova nanfenta cinene Yesu kontha uyo phiri “Mwanawe mmoca.” Iyo itthwiiyo maanaaya isiyani? Maanaaya wiira uyo phumpiye ni Yehova paasi. (Joau 3:16) Yoneeraru, Yesu ahonkavihera Yehova wumpa citthu cikiina cotheene. (Akolosu 1:16) Yoneecese, Yehova aanonrumaka ciicammo Yesu wiira avahe malakihero ni ihapari malayikha ni apinaatamu. Phimaana, Yesu nawiihaniya “Nuulumo.”—Joau 1:14.

12. Nincuwela cani wiira Yesu ni Nluku khaanakhala ntthu mmoca?

¹² Ahaavo atthu anaamini wiira Yesu ni Nluku akhanle ntthu mmoca, masi iyo kahi itthu Ibiiblya ineetthucihaaya. * Ibiiblya ineera wiira Yesu howumpiya. Coo, Yesu khunakhala wiira ikhumelo yo khalayi ahaavo. Masi, Yehova umpile citthu cotheene, ikhumelo yo khalayi ahaavo. (Isaalimu 90:2) Yesu khanatoko wuupuwela ukhala Nluku kontha uyo Mwaana a Nluku. Ibiiblya inaahimya sana-saana wiira Mwaana khanaalikanana Athumwaane. (Nsome Joau 14:28; 1 Akorintu 11:3.)  Yehova paasi phiri “Nluku Okuru Cotheene.” (Uphattuwaca 17:1) Yehova phiri ntthu ootepa ukhalana ifayita ni ikuru, ntuninyani motheene.

13. Kontha isiyani Ibiiblya ineeraaya wiira Yesu “nthoonyero no makhalelo a Nluku hinoonnya”?

¹³ Yehova ni mwanawe, Yesu, ahovaraca nteko nkhayi myaakha cinci yumpacaka malayikha, itthoottwa, ncuwa ni citthu cikhwaawe. Muupuwele inanna yaalipihacilyaaya ufentana waya ukati wotheene waavinre yakhalaka nkhayi! (Joau 3:35; 14:31) Yesu ahotakiha sana-saana makhalelo aathumwaane. Phimaana, Ibiiblya immwiirela wiira “uyo nthoonyero no makhalelo a Nluku hinoonnya.”—Akolosu 1:15.

14. Waakhitiryeele cani Mwaana oofentiya a Nluku uyaryaa ni irutthu yeepinaatamu?

¹⁴ Uyo Mwaana a Yehova oofentiyooyo, ahaamini ukhuma wiirimu uwa watuninyani. Wiira yiirannye iyo, uyo ahaana ayaryaaka ni irutthu yeepinaatamu. Yaakhitiryeele cani iyo? Yehova aapankile mwiiriirya. Uyo ahoveleeliha ukumi wa Mwanawe munthuukwani wa mwaaruusi mmoca eehaniya Mariya. Ala manannaala, Mariya ahorupala irukulu uhookhalaru wiira aari hinapaca urupa ni nlopwana. Ukhala wiira athumwaane mwaanooyo khayaari pinaatamu, uyo aayariye woohipahuwa. Ncina nanvahilyaawe Mariya uyo mwaanooyo naari Yesu.—Luka 1:30-35.

15. Isiyani inlamuliyeehu upanka wiira nincuwele Yehova sana-saana?

¹⁵ Yesu aheera: “Konne mi ciicammo howoona Apaapa.” (Joau 14:9) Yesu naalikanaca ni Athumwaane. Phimaana, napheelaka uncuwela Yehova sana-saana nihaana nisomaka myaha ca Yesu. Vano, wiira mwiitthuce citthu cipankilyaawe Yesu ni makhalelo yaarinaawe nhaana nsomaka ilivuru yo mbiibliyani ya Matewus, Markus, Luka ni Joau. Nnya ilivurunnya cineehaniya Ivangeeliyu.

16. a) Itthuni yootepa ukhalana ifayita yancivela Yesu woopela mwaha? b) Tipani aamwiitthucihile Yesu myaha co Umwene wa Nluku?

 ¹⁶ Atthu enci khalayi yaamwiihana Yesu “Mwiitthucihi” kontha uyo aanaawiitthuciha atthu. (Joau 1:38; 13:13) Yesu waanoncivela woopela mwaha Umwene wa Nluku ukati wotheene. Iyo phiitthu yuulupale yaatepa uncivela wiitthuciha. Masi Umwene wa Nluku isiyani? Ikhanle ikuvernu ya Nluku iri wiirimu, ikhumelo woowu inaahala ulamulela nlaponi motheene. Uyo umwennyooyo unaahala waavaha iparakha ale ammwiiwelela Nluku. Tipani aamwiitthucihile Yesu myaha co Umwene wa Nluku? Nluku phaamwiitthucihile. Yesu aheera: “Itthu ineetthucihaaka khinakhala yawaka, masi yawawe ule kiveleelihale.” (Joau 7:16) Yesu eetthuciha myaha co Umwene wa Nluku kontha ancuwela wiira Yehova nopheela wiira atthu acuwele “ihapari comaana co Umwene”, awula, ihapari comaana cineera wiira Umwene wa Nluku unaahala ulamulela Ituninya.— Matewus 4:23.

17. a) Nipuroni Yesu eetthucihaawe? b) Kontha isiyani Yesu wiikurumicilyaawe uwiitthuciha atthu?

¹⁷ Nipuroni Yesu eetthucihaawe? Khula nipuro naaphwanyannyaaya atthu. Uyo aaneetthuciha mmittalani, mmasittatti, mmapacari, mapuro yaathukumanaaya atthu wiira answalele Nluku ni hataa mmaluwani waya atthu. Uyo khaaweherera atthu uwa nipuro niryaawe. Ikwaha cinci uyo phaawaavya atthwaayo. (Markus 6:56; Luka 19:5, 6) Yesu aheekurumica venci uwiitthuciha atthu. Kontha isiyani? Kontha ancuwela wiira iyo phiitthu Nluku yaapheelaawe wiira uyo apanke. Yesu khaahiyerera uwiiwelela Athumwaane. (Joau 8:28, 29) Yesu ciicammo aanaalalyeera atthwaayo nlattu woowoonela uthunku. (Nsome Matewus 9:35, 36.) Uyo aanoona wiira ahooleli ommattiinini khayeetthuciha ikhweeli ca Nluku ni ikhweeli co Umwene. Phimaana, uyo aapheela waahimyeera atthu otheene ihapari comaana co Umwene wa Nluku.

18. Makhaleloni yaarinaawe Yesu anoocivelani venci?

 ¹⁸ Yesu aanaafenta ni aanaawacera atthu. Uyo aari namaana, phimaana atthu khayaamoova umoopana mwaha. Hataa asaana waanaacivela ukhala wamoca ni Yesu. (Markus 10:13-16) Yesu khaahiyerera weettela isariya. Uyo waanonrusa awoonaka atthu yoothaka ni aheettelaka isariya. (Matewus 21:12, 13) Uwakati wa Yesu, athiyana khayaahisimiya ni khayaattitthimihiya. Masi Yesu khaahiyerera waahisimu. (Joau 4:9, 27) Yesu ciicammo aari ntthu owiiyeviha cinene. Wootakihera, ikwaha imoca uyo ahorapiha inyaa caattharyaawe. Iyo itthwiiyo yaapankesiya ni nanteko o wapuwani.—Joau 13:2-5, 12-17.

19. Ntakiheroni ninoonihera wiira Yesu ancuwela citthu caapheelaaya atthu ni waanoncivela waakavihera?

¹⁹ Yesu ancuwela citthu caapheelaaya atthu ni waanoncivela waakavihera. Iyo itthwiiyo yahoonannya ukati waapankaawe miiriirya niikuru ca Nluku, aavonihaka aretta. (Matewus 14:14) Wootakihera, nlopwana mmoca aarina makuttula aaholepela wiira avonihiye. Uyo ahomwiirela Yesu: “Pwiiya mwapheelaka, pooti ukireeriha.” Ule ukatyuule khaavo aamwaattamanana namakuttula kontha iyo iretta yoohiirya ni inaaravihaniya. Masi Yesu wahonwerya nrima ukhala wiira ancuwela wiira ule nlopwanoole anhuvahuva ni aanoona uweryaa. Uyo ahomoonela uthunku ni ahopheela unkavihera. Phimaana, Yesu ahonkwanya ule nlopwanoole ni ahomwiirela: “Kinaatthuna! Ukhaleke ooreereene.” Ni nlopwanooyo ahovona. (Markus 1:40-42) Woohaanyihacera, ule nlopwanoole ahotteeliya cinene!

20, 21. Kontha isiyani Yesu khanlyaawe ntakihero nomaana nantthu oomwiiwelela Nluku?

²⁰ Yesu khanle ntakihero nomaana nantthu aamwiiwelenle Nluku. Pooti yankhumelelaka isiyani awula pooti alupatthyaawe yapankaka itthu-phiitthu, Yesu khaahiyerera uwiiwelela Athumwaane. Wotakihera, ikwaha yaattehiyaawe ni Sotwani  Yesu khaavanre matampi. (Matewus 4:1-11) Nuuwakatyaaya, yahaavo amucyaawe yahaamwaamini wiira uyo aari Mesiya ni yaamwiirela wiira ahoovahuwa. Unookhalaru commo, Yesu khaahiyerenre uvara itthu yancivela Nluku. (Markus 3:21) Ciicammo alupatthyaawe yahontafiti ni makhuce, masi Yesu khaahiyerenre umwiiwelela Nluku ni khaapankile alupatthyaawe itthu yootakhala mena vakaani.—1 Peturu 2:21-23.

²¹ Inanna yeeviyaawe Yesu yaari yoowerya cinene. Masi Yesu khaahiyerenre umwiiwelela Yehova mpaka waakhwilyaawe. (Nsome Afilipo 2:8.) Muupuwele citthu cankhumelenle Yesu nihuku naakhwilyaawe. Yesu ahotthukiya, nihuku naahukhumwiyaawe, yahaavo atthu yeera wiira uyo anonthweela inaasi Nluku, masuwiisi owootha yahoruma wiira eeviye, atthu yaananthya ni uyo ahohuvihiya ni anatoropa ni ahokhomeliya wanipottoni. Hinaaya ukhwa, uyo aheera: “Wahomalela!” Isiyani  yaapheelaawe uhimya? Uyo aahimya wiira ahopanka citthu cotheene caapheelaawe Nluku. (Joau 19:30) Uvira waya mahuku mararu, Yehova ahomunweleliha Yesu ni irutthu yo nnepa. (1 Peturu 3:18) Anavinreene mahuku 40, Yesu ahohokoleela wiirimu. Uyo ‘ahonkoma moono wonlopwana wa Nluku’, awehereraka ukati woohala ukhala Mwene.—Maberewu 10:12, 13.

22. Iparakhani irineehu nlattu wookhwa Yesu?

²² Uhoreera Yesu uhihiyerera wawe uwiiwelela Athumwaane. Nlattu wo iyo, nihaana iparakha yoohala ukhala upeephoni watuninya mpaka, toko Yehova caapheelaawe ikhumelo yokhalayi. Nhina ikapiitulu ikiina inhaleehu usoma, ninaahala wiitthuca inannani ukhwa wa Yesu unnivahaaya iyo iparakheeyo.