MPHANTTE 6
Nluku Mpheela Upanka Isiyani Nlaponi?
NLUKU umpalee ila Ituniyeela wiira ikhale itthoko yoohipahuwa yaapinaatamu. Nuulumo nawe nineera coo: “Irimu cikhanlee ca Yehova, masi ituniya aavahale asaana aapinaatamu.”—Isaalimu 115:16.
Hinatthi umumpa pinaatamu oopacera, Atamu, Nluku ahothanla mphantte vakani wotuniya weehaniya Edeni ni ahopanka ijardim yoorera. Nuulumo na Nluku ninaahimya wiira miro Eufrates ni Tigre (Hidekel) caaphattuwale Uwedeni. * Unkupaliya wiira ijardim yo Edeni yaaphwanyannyaa ncoko unkhumaaya ncuwa mphantte ilelo uncuweliya ukhala uTurkiya. Khweeliini ijardim yo Edeni yahaavo!
Nluku ahomumpa Atamu ni ahomweesa ujardim yo Edeni “wiira alime ni utafiti.” (Uphattuwaca 2:15) Uhoolo Nluku ahomumpa mwaarawe Atamu, Hawa. Ni aheerela: “Nyaranace ni mwincivihane, ni ncarihe ituniya, nhisimaka” (Uphattuwaca 1:28) Phincuwanyaaya wiira Nluku “khumpale [ituniya] paahiru, [masi] luttenlee wiira ikhaliye.”—Isaiya 45:18.
Atamu ni Hawa, yaaholakela untthekela Nluku ivonyanihaka nlamulo Nawe. Phimaana, Nluku ahaahakha ujardim yo Edeni. Ipeephoni yahorimeelihiya. Masi masakha awile ni matampi a Atamu khayemelenle wakhiviru. Nuulumo na Nluku ninhimya coo: “Phimaana nlattu wa Nlopwana mmoca ahokela matampi ntuniyani, ni ukhwa nlattu wo itampi, coo ukhwa uhaamwareela apinaatamu oothene, nlattu oothene yahaana matampi.”—Arooma 5:12.
Niireke Yehova ahoolwaana yaapheenlyaawe wowancera, wenryaawe wiira Ituniya ikhale Ipeephoni yookhaliya ni atthu ootteeliya? Mena! Nluku nhimya coo: “Nuulumo ninkhuma wa malakuni waka . . . khaninhala ukihokoleela woohiitthu, masi ninaahala upanka ile ikicivenle ni upanka yaarumenlyaaka.” (Isaiya 55:11) Ipeephoni inaahala urehereraciya watuniyani!
Unhala ukhala cani ukumi upeephoni? Woone itthu inkhuluvelihaaya Nuulumo na Nluku mpaginani piili cowaakulela.
^ par. 4 Uphattuwaca 2:10-14 nhimya coo: “Waahaavo nnro waakhuma Uwedeni waamicera ijardim, ni vaava phaaphattuwacaaya myiro micese. Nnro woopacera weehaniya Pison . . . nnro wonayeeli uneehaniya Giom . . . ni nnro woneeraru uneehaniya Hidekel [awula Tigre]; phi yooyo unrwaa unkhuma ncuwa mphantte wo Asiriya. Ni nnro woneecese uneehaniya Eufrates.” Ilelo, khacincuweleliya ni khuncuwannyaa nipuro nimphwanyannyaaya myiro miili coopacera.
