ATTHU enci ilelo anawiihimya ukhalana waamini. Masi Yesu aheetthuciha wiira vakaani phanhala ukhalana waamini weekhweeli. Uyo enre coo: “Yowaatapuwa ni yokhato iphiro inrwaana wuutankanyiyani, ni enci phankelela; wiikina woophuryaa nkhora ni yoophunyaa iphiro impiiha wuukumini, ni vakani phanoonelela.”—Matewus 7:13, 14.

Ilelo atthu anthoonyera cani ukhalana waamini weekhweeli? Yesu himyalee coo: “Wo mihokorokho caya phinhaleenyu waacuwelela. Mwiri womaana woothene uneemiha nhokorokho womaana, masi mwiri wowuntta woothene uneemiha nhokorokho woohilokaloka.” (Matewus 7:16, 17) Coo, waamini weekhweeli uneemiha “nhokorokho womaana.” Waamini unaawiiriha atthu woonihera makhalelo anoncivela Nluku. Ampanka cani commo?

Atthu arina waamini weekhweeli, anaavarela nteko ikuru ni ukhulupale waya wiira anlemelihe Nluku ni yaavahe ifayita atthu. Yesu aheetthuciha: “Masi ule mpheela ukhala muulupale wariyari winyu, haana akhalaka nrumyeenyu.” (Markus 10:43) Wonnanna mmoca, alopwana owaamini khankhala toko namahuviha, pooti ukhala nhina awula vate wonluwani waya. Ayo anawaahisima asaaraya, anawaalemeliha, ni nnifentoni anawaahephela cimpheelaaya. Nuulumo na Nluku ninhimya: “Nyuuva alopwana oothela, nkhanyerere waafenta asaarinyu ni nhitepe waaviruwela.” (Akolosu 3:19) “Alopwana oothela, nhihiyerere waakhalana nnanna mmoca, toko cincuweleenyu, mwaanemaceraka khampa icaaru yoovevyaala, uthiyana, ukhala wiira ciicammo nhalanne naayova uleveleliya wooronya wookumi, wiira ulompa wiinyu uhikhottiyeni.”—1 Peturu 3:7.

Mphantte nkhwaawe, nthiyana ootheliya rina waamini weekhweeli “haana aahisimaka cinene awanuwawe.” (Efesu 5:33) Athiyana ootheliya “yaafenteke asiwanuwaya ni yaafenteke asaanaaya.” (Titu 2:4) Asinnapaapa ni asinnamaama arina waamini anawiivaha ukathi wookhala ni asaanaaya ni weetthuciha malamulo ni mattharelelo a Nluku. Wapuwani, untekoni ni mapuro makhwaawe, ayo anawaattittimiha ni waahisima akhunanaya. Ayo anttharihelela ikano yo Nuulumo na Nluku ineera: “Mwiihooleliheke waattittimiha akhwiinyu.”—Arooma 12:10.

Anoswalela Nluku, anawiiwelela nna nrumo nna niri mbiiblyani nihimya coo: “Uhitthune unyonkiya.” (Nkwaha 23:8) Ayo khanvarela unyala uhoolela waya wiira yiiciviherere. Uhiya commo, ayoca aneevaha ukathi wiira yaakavihereke akhunanaya, venci cinene ale oothwennya. Anawiiwelela ikano ineera: “Nhiliyale waapankela yoorera akhunaninyu ni uvahana, kontha Nluku unancivela wiivaherera toko coo.” (Maberewu 13:16) Coo, ayoca anaathoonyera ukhala okhweeli moolumo yaahimyalyaawe Yesu: “Unaatteeliha nrima cinene uvaha woovirikana ni waakhelela.”—Miteko 20:35.

Atthu owaamini waacivela wiiwelela malamulo a Nluku. Maweherwaaya, ‘cooruma cawe khacinlemela.’ (1 Joau 5:3) Anaacuwela wiira “Nlamulo na Yehova khanipahuwale . . . Cooruma ca Yehova cikhanlee cowookwaa, cikhalihaka nrima wootteeliyeene; nrumo na Yehona nikhanlee nowoonnyaa, nipankihaka meetho wooneela.”—Isaalimu 19:7, 8.

Ciicammo waamini weekhweeli unaawiiriha atthu ukhotta mananna oothene oothanyana. Ayova khanoonela, ikhapila, ilapo, thaciri, awula masikhini ukhala itthu yootepa uvikana ikhwaaya. Uhiya voo, anontakiha Nluku. “Nluku khanthanla ikhapila, masi, wokhula ilapo, pinaatamu mmoova ni mpanka yosariya naamwaakhelela.”—Miteko 10:34, 35.

Waamini weekhweeli unaawiiriha atthu “ukhalana meettelo ookhuluvelya nhina wo citthu coothene.” (Maberewu 13:18) Uhiya voo, ule rina waamini weekhweeli naanyema unamiima ni wootherya. Nhina wo makhalelo ampheelaawe Nluku, Nasaalimu Davidi hantikha: “Khootheryale ni nlimi nawe. Khampankale nkhunanawe hataa itthu yootakhala.”—Isaalimu 15:3.

Ale arina waamini weekhweeli, anlipiherera cookupali caya nhina mu Cowantikhiya Cowaarya. Anaakupali wiira “Cowantikhiya coothene ciphattuwalee wa Nluku ni cikhanlee co wiitthuciha, coovanyiha nuuhimerya, wookolela, weettiha nsariyani.” (2 Timotiyu 3:16) Nnoviraaya moothene anaathoonyera “ucuwelaca wo uculu”, ukhanlee “woohinnempa, toothotho wonnema,woohilipalipa wootthunnyaa, wootthunela, woocarana ulevelela ni mihokorokho comaana, khunthanya, khunootha.” (Tiyaku 3:17) Ayo anaanyema ukhwiri ni ilema cihinoncivela Nluku; ni ciicaammo ‘anawiinyemiha attontto.’—1 Joau 5:21.

Profeta Moses enre coo: “Uhaana unfentaka Yehova, Nlukwaa, ni nrimaa woothene, ni iroohwaa yoothene, ni ikuru yo ukumyaa woothene.” (Deuteronomiyu 6:5) Atthu owaamini anaathonyera mananna ala oonfenta Nluku. Anaahisima ncina na Nluku, Yehova. ‘Anansukhurwela Yehova’, ni ‘anaalalya ncina nawe’, yaaminelaka. (Isaalimu 105:1) Anonswalela Nluku ciicammo anavaresesa marumo aneera: “Uhaana unfentaka nkhwaa toko mwaaneenyaa.” (Levitiku 19:18) Anaanyema ikhirini, ni anamananiha ukhala “anannema ni atthu oothene.” (Arooma 12:18) Ukhala wiira ‘khaneetthuca-tho ikhotto’, mmalattaniheroni ayo ‘ankohana iyuuma cowiiva apankaka ihipa, ni mavakaaya, iheko.’ (Isaiya 2:4) Upanka commo unaawaanela ukhalana asunnaya owaafenta ntuniyani moothene, kontha ayova ‘anaafentana’. (Joau 13:35) Unaakhitiri waacuwelela atthu yaala mahuku olelo?