MPHANTTE 4
Nluku Tipani?
ATTHU anawaaswalela anluku enci. Masi Cowantikhiya Cowaarya cineetthuciha wiira Nluku okhweeli rii mmoca paahi. Uyo khanlikananiya, nkhulupaale ni khankhwa. Phunpale cimphwanyannyaa wiiluku ni vathi, ni phinivahale ukumi. Coo, haana uswaleliya uyova paahi.
Malamulo yavahereriye wariyari wa profeta Moses khampa “nuulumo naahimiye wariyari minepa”
Nluku haana meehaneliyo menci, masi rinaa ncina nimoca paahi—YEHOVA. Nluku ahonhimerya-tho Moses: “Ila phi itthu yoohala waahimerya asaana a Israyeli: ‘Yehova, Nluku anhataateenyu, Nluku a Abrahamu, Nluku a Isaki ni Nluku a Jako hookiveleeliha wuuhimeryani nyuuva.’ Nna phi ncinanaka mpaka, niila phiyoopheela ukuupuwelela annyariya naayo anhala uyariya.” (Nkwaha 3:15) Ncina na Yehova ninaaphwanyannyaa imaaracene 7.000 nhina waya Cowantikhiya Cowaarya. Isaalimu 83:18 inaamuuluma Nluku yeeraka: “Atthu ahaana ucuwela wiira we, uneehaniya Yehova, ukhanlee Nkhulupale otuniya yoothene.”
Iroolu yowantikhiya yokhalayi yo Mar Morto, irina itextu yo mbiiblyani umphwanyannyaaya ncina na Nluku
Khaavo pinaatamu moonne Nluku. Uyo ahonhimerya Moses: “Khunlamuliya woona ikhovyaaka, kontha khaavo pinaatamu nhala ukoona phukhala nkumi.” (Nkwaha 33:20) Nluku nkhala wiirimu ni apinaatamu khammoona. Itthu yoohiloka umpanka ttontto, ilataratho yonlattanihera Nluku awula ulompela. Yehova Nluku ahonhimerya profeta Moses: “Uhiipankele ttontto oohemiya, ulattaniheraka itthu iri wiirimu, awula watuniyani vaa, awula iri mmaacini. Uhikhoromele uhoolo waya, ni uhitheperiye uswalela, kontha miiva Yehova, Nluku awaa, kikhanlee Nluku mmoca mpheela uswaleliya veekhaawe, kaawaanelaka nttaruso, nlattu woottheka asithumwanaya, asaana, ucuulu woneeraru ni woneecese waale ahinkipheela.” (Nkwaha 20:2-5) Uhoolo, Nluku ahonhimerya profeta Isaiya: “Miiva ki Yehova. Nna phi ncinanaka; uttitthima waka akinonvaha ntthu nkina, hataa mena uttottopeliya waka citthu cowuupiya.”—Isaiya 42:8.
Atthu akhwaawe anaakupali wiira Nluku haavo, masi pooti wooniha wiira khawankhitiryaa uncuwela ni umphiyeerera, ciicammo wiira uyova khanlee ntthu oopheela wooviya, kahi ufentiya. Weeva unoonela cani? Nluku nawuuwacera toko pinaatamu? Niireke wiira unaakhitiryaa uncuwela awula umphiyeerera Nluku? Nttwee noone itthu inhimyaaya Nuulumo na Nluku nhina wo makhalelwaawe.
