NLUKU ahottonka wiira aanaahala unthanla Mesiya wiira akhale Nhooleli omaloko oothene. Nluku nancuwela nhooleli ninompheeleehu ni honthanla khweeliini omaana. Mesiya aarii Nhoolelini? Nkhulupale okuru? Nasiyasa omaana? Nafilosofiya oocuwelaca? Toko cinhimyaaya Cowantikhiya Cowaarya, Mesiya aarii profeta oohilikananiya—Yesu Kristu.—Matewus 23:10.

Nluku ahopanka wiira Yesu ayariye woohipahuwa ni owaaryeene. Uhiya voo, Yesu aholipiherera uvilela wikurumica woothene waapankaawe sotwani wiira anvonyanihe. Mmuulumaceroni ni makhalelo, Yesu ahontakihera Nluku woolikaneene ni mananna yaavarelaawe nteko ikuru ni mananna yaathoonyiheraawe isariya, ucuwelaca ni nifento. Woone inhaleehu wiitthucera ntakihero na Yesu.

Ikuru yaakhenlyaawe wa Nluku aavarenle nteko wowaakavihera atthu. Yesu khweeli aanaawacera atthu ni ahovarela wooreerene ikuru cawe wiira atafiti coopheela caya. Nkwaha nkhwaawe, eenre coo: “Kinoonela ithunku mphwinko ula vaa, kontha . . . kharina itthu yoolya.” (Markus 8:2) Wowaakulela, Yesu aholiha ni miiriirya mphwinko wanthukumanenle umwiiwa eetthucihaka.

Yesu aaneettaka ciicammo eetthucihaka atthu ni “avonihaka coopahula coothene, ni iretta coothene mwaatthuni.” (Matewus 4:23) Inawoonannyaa itthu yanttharelelaaya miphwinko ni ‘yantothelaaya unkwanya, kontha yanaankhuma ikuru mwiirutthuni wawe ni yaanaavoniha oothene waya.’ (Luka 6:19) Wokhweeli, Yesu ‘khaweenle uvareliya nteko, masi waalee uvarela nteko ni uvaha iroohwaawe toko moopoli aatthu enci.’ (Matewus 20:28) * Ahooleli akavi eepinaatamu apacale uthoonyera makhalelo omaana toko coo?

Hotakiherera isariya ya Nluku: Yesu aanavaresesa nlamulo na Nluku ni aanaweettela mattharelelwaaya. Nuulumo na Nluku nahopacerera uhimya nimwaacaka uyova: “Ihokicivela upanka itthu impheelaa, oo Nlukwaaka, ni nlamulo naa nirii mmiphantteni conhina waka.” (Isaalimu 40:8) Yesu aanaatafiti oothene—mathaaciri ni amasikhini, alopwana ni athiyana, asinamwane ni oolupale—aalemelihaka, aahisimaka ni haathanlaka, khampa cimpankaawe Nluku. Nkwaha nkina, eetthuci a Yesu yahaacaceraca asinnapaapa yaacisa asaanaaya uhoolo wawe. Masi Yesu eenre coo: “Mwaahiye akiphiyeere asinamwannyaayo; nhimananihe waakhottiha, kontha Umwene wa Nluku phi wawaya.”—Markus 10:14.

Hoonihera ucuwelaca wo wiilukuni. Yesu aanaacuwela sana-saana apinaatamu. “Uyova mwaaneennyaawe aanaacuwela iri nhina mwa apinaatamu.” (Joau 2:25) Uwakathi alupatthi a Yesu waarumalyaaya atoropa wiira yantthuke, hataa ala yahokupaleela wiira: “Khanapaca thanku woonannyaa nlopwana owuuluma toko ula.” Yesu aaphwanyale cani ucuwelaca? Uyova hohimyaca: “Itthu ineetthucihaaka khinakhala yawaka, masi yawawe ule kiveleelihale.”—Joau 7:16, 46.

 Hotakiherera nifento na Nluku. Yesu ciicammo aanaawoonela ikiriri atthu. Nkwaha nkina, nlopwana mmoca “oncara makuttula” ahonlepela isontte eeraka: “Pwiiya, watthunavale, pooti ukireeriha.” Amoonelaka ithunku, Yesu ‘ahotaphula ntata, ahonkwanya ni ahomwiirela: “Miiva kinaatthuna. Ukhaleke ooreereene.” Ni makuttula yahorimyaa wowaakuvyaaca.’ (Luka 5:12, 13; Markus 1:41, 42) Yesu khweeli anaapheela uwukula uhuva wa nlopwana yoole masikhini.

Niireke wiira Yesu nawuuwacera ciicammo? Uyova naacipwa: “Mmwe woono, oothene cinyu nyuuva nnovara nteko ni nri oolemeliyeene, ni miiva kinaahala wuuciviherani. Mwiicisihe nivanko naka ni nkiitthucere, kontha kintthu oomaala ni owiiyeviha wanrimani, ni nnaahala upwaanya utteeliya waroohoni winyu.”—Matewus 11:28, 29.

Yesu khanlee Nhooleli omaana nlamuliyeehu ukhalana. Phimaana, uyova nonilipihereraawe eeraka coo: ‘Nkitthucere miiva.’ Weeva unaahala uttharenla nna nlattulo nomaana nna? Upanka iyo inaahala wuuwiihera utteeliya ukumyaa.