TOKO cihimiyaaya Nnuulumoni na Nluku, anasariya anaahala ukhala akumi ‘ni waamini waya.’ (Arooma 1:17) Ala moolumo ala ahaana inatiri yoorera yoowaaca weeva. Manannani?

Waamalihalyaawe ntekwaawe watuniyani, Yesu, Mesiya, ahorwaa wiirimu, ukhala nkhayi ni Nluku. Eetthucyaawe yanwehakoono, uyova “ahoteesiya, ni nihutte nahonkhuneela ninrwaanaka uculu, wahimoonalyaaya-tho.” (Miteko 1:9) Wiirimu Nluku honthanla ukhala Mwene okuru owiirimu. Woohipica, Yesu, “Mwaana a ntthu” naahala uphiya “weekiittini wawe yoottitthima. Ni maloko oothene anaahala uthukumanihiya uhoolo wawe, ni uyova naahala waawanyaniha ni akhunanaya vaavale toko makampuci wanaawanyanihaawe ikhontwaa ni ipuri.” (Matewus 25:31, 32) Cinhala wiirannyaa yaakhani nnya?

Cowantikhiya Cowaarya cahottonkaca wiira unaahala uwa ukathi wo masankiho ntuniyani moothene. Ula ukathyuula waakookhala nthoonyero wo wiira Mesiya wowaakuvyaaca naarwa uhukhumu ilapo coothene. Yesu ahotaphulela nna nthoonyero nna wiira waahala ukhala coo: “Ilapo inaahala uwanihana ni ilapo ikhwaaya, umwene ni umwene ukhwaaya; ni unaahala ukhala uttettemelaca wo tthaya, wo khula nipuro, iretta, uthwaa wo yoolya; ni cinaahala woonannyaa cowoopiha ni mathoonyero moolupale wiirimu.”—Luka 21:7, 10, 11.

Ala moolumo a Yesu, khweeli ilelo ninawoona yiirannyaaka. Woohipica, uyo naawa waatankanya atthu ootakhala nrima. Ni woomalihera, Sotwani ciicammo naahala utankanyiya. Ituniya yoothene inkookhala Ipeephoni. Atthu oothene anhala ukhala wannemani, ni enama ciicammo. “Mwiici, khweeli, unaahala ukhala wamoca ni ikhontwaa mahuku menci, havara nhala urupa wamoca ni mwaapuri, ni mwaamope, ni mwaakharamu, ni enama yowiittivala, coothene nkhayi; ni mwanhima phinhala uhakhela. Khinhala ukhumelela-tho yootakhala, hataa khinhala ukhala ihasara.” (Isaiya 11:6, 9) “Khaavo nhala ukhala eeraka: ‘Kinaawerennya.’ . . . Yoole ukathyuule anaahala utthukuwa meetho aatthu oohoona ni anaahala uttinwa maaru aatthu oohiiwa.” (Isaiya 33:24; 35:5) Mpaka atthu ookhwa anaahala wunwelelihiya. “Uyova khweeli naahala umalamaliha ukhwa mpaka, ni Pwiiya Ooverihela Yehova, khweeliini naarwa uwuta minthori uwiitho wo atthu oothene,” ni “khunhala ukhala-tho ukhwa, ikuttho, isontte-sontte, ni hataa yoowerya.” (Isaiya 25:8; Apokalipise 21:4) Nluku itthu yalakelenlyaawe upanka ntuniyani wiipaceroni, inaahala wiirannyaa. Ila itthu yomaana cinene inreera uweherera!

Atthuni nhalaawe Nluku waaphwanyiha ukumi upeephoni? Atthu arina waamini—waamini weekhweeli!

Uhiliyale wiira waamini weekhweeli unlipihereriya ni ucuwela ikhweeli yo Nuulumo na Nluku. Phimaana, uhihiyerere umwiitthucera Nluku ni Yesu.

Waamini weekhweeli unooniheriya upankaka miteko comaana. Nuulumo na Nluku ninhimya wiira: “Waamini woohivareliya nteko unkhala wookhweene.”  (Tiyaku 2:26) Wapanka miteko comaana, weeva unaahala utakiherera makhalelo a Nluku: ikuru, isariya, ucuwelaca ni nifento. Uhihiyerere wiikurumica ukhalana ala makhalelo ala anontteeliha nrima Nluku!

Ukhalana waamini weekhweeli, unaahala wuuphwanyiha citthu comaana. Khawantikhinnyaa, waamini inkhala isiiri yo ukumi wootteeliya—ukhuma nnava ni mpaka.