NEESOMAKA Cowantikhiya Cowaarya, ninawiitthuca makhalelo menci omaana a Nluku, annikavihera uncuwela. Wootakihera, niheetthuca wiira Nluku haana makhalelo macese ootepa wiithoonyera: ikuru, isariya, ucuwelaca ni nifento. Nttwee noone khula nikhalelo.

Yehova honhimerya Abrahamu wiira: “Miiva ki Nluku Okuru-Coothene.” (Uphattuwaca 17:1) Ikurwaawe ikhanlee yoohilikananiya, yoohimalela utaphuleliya ni khimmala. Nikurwaawe, Nluku humpa Ituniya yoothene.

Nluku khanvarela pusya ikurwaawe. Uyova novarela nteko ukathi woothene toko cinlakelaawe ni cinweheraawe. Uyova naalikanihaca wooratteene ikurwaawe ni isariya cawe, ucuwelaca ni nifento.

Yehova nawaavahera ifayita ni ikurwaawe ale anonvarela nteko antthunelaka. “Meetho a Yehova aheetaphulela uweha ituniya yoothene, wiira athoonyihere waakhalihera ale anciveliya ni uyova ni nrima woothene.” (2 Ikoronika 16:9) Niireke wiira weeva khanoocivela Nluku khampa ula okuru ni noniwacera hiivano?

“Yehova uncivela isariya.” (Isaalimu 37:28) Uyo naapanka uwakathi woothene ile ikhanle yomaana ni yosariya nhina wo meettelwaawe oohipahuwa.

Nluku unrusa uhuvihana. Uyova “khanonthanla ntthu ontafiti, hataa khanaamini unyoonkiya.” (Deuteronomiyu 10:17) Uyo naaweesera ittuli ale anaatulumu akhwaaya ni nawaawacera ale ahirina owaakaviherera, ciico “anankhweli ni asinamwane ikhwaacuni coohaathumwanaya.” (Nkwaha 22:22) Nluku kharina uthanya; maaweherwaawe atthu oothene anaalikana. “Nluku khanthanla ikhapila, masi, wokhula ilapo, pinaatamu mmoova ni mpanka yosariya naamwaakhelela.”—Miteko 10:34, 35.

Isariya ya Yehova khipahuwale ni ikhanlee yowookwa. Uyova khahimwena ntthu oohiyerera; masi ciicammo khanlipalipa wootepa. Uyova nawaattarusa anamattheka ahinrukunusa nrima, masi naawoonela ithunku anrukunusa nrima. “Yehova nakiriri ni namaana, khanaakuva uviruwa ni unoomwiinciva uleva. Khankhala asipaka ukathi woothene, hataa khansunka nruukwa ukathi woothene Uyova khanipankale ni matampi; hataa khaniwaanenle yaahala uniphwanela woottheka wihu.” (Isaalimu 103:8-10) Nluku ciicammo nawuupuwela miteko caale antthuna unswalela ni nawaavaha iparakha. Nluku osariya khampa ula, khawaareera unkhuluvela weeva?

Yehova phi nnro wo ucuwelaca woothene. “Owiisyeheeha maali, ni ankhili, ni ucuwelaca wa Nluku!” (Arooma 11:33) Ucuwelaca wawe khunlikananiya ni khunamwiiswaaya.

Ucuwelaca wa Nluku unawoonannyaa nhina wo citthu cowumpiya. Nasaalimu aheera coo: “Ciri kavi miteko caa, oo Yehova! Coothene upankalee nu ucuwelaca.”—Isaalimu 104:24.

Ucuwelaca wa Nluku ciicammo ninawoona nasomaka Cowantikhiya Cowaarya. Mwene Davidi ahantikha coo: “Moopusero a Nluku ookhuluvelyaa, anamphwanyiha ankhili ntthu hincuwela.” (Isaalimu 19:7) Wuupuwelele ila: ucuwelaca woohimala urinaawe Nluku, pooti wuuphwanyiha ifayita! Weeva unaahaleela ula ukathyuula?

Ekhalelo yooverihela ya Yehova, nikhanlee nifento. Cowantikhiya Cowaarya Cinhimya coo: “Nluku nifento.” (1 Joau 4:8) Ila ekhalelo ila phinonkurumiciha ni phineettiherera citthu cimpankaawe.

 Nluku naanithoonyihera ufenta wawe ni mananna oovirikanaca. Uyova naanivaha citthu cinci comaana. ‘Naapanka saana, wannivahaawe ipula cowiirimu ni milaala comihokhorokho, acarihaka icoolya ni utteeliya wanrimani winyu.’ (Miteko 14:17) Khweeliini, “Cootthuviya coothene comaana ni coovahiya coothene coohipahuwa cinkhuma uculu, kontha cinkhuruwa waathumwanaya cinmwaleela co wiirimu”. (Tiyaku 1:17) Ni Nuulumo na Nluku, nikhanlee ntthuvo nuulupale na Nluku, uyova naahimya ikhweelyaawe ni naaniitthuciha malamulo awe ni mattharelelwaawe onifento. Yesu waalompaawe enre coo: “Moolumwaa akhanlee ikhweeli.”—Joau 17:17.

Nluku ciicammo naanikavihera uvilela masankihweehu. “Unrihele nrinttyaa Yehova, ni uyova naarwaa uwaakhela. Khanhala unhiyerera nasariya ahuvaka.” (Isaalimu 55:22) Uyo naalevelela matampiihu. “Kontha weeva, oo Yehova, ukhanlee namaana ni unkhala upheelaka ulevelela; ni unoowinciva unamaana ni atthu oothene anwiihana.” (Isaalimu 86:5) Hataa uyo naavaha ukumi woohimala: “Ni naarwaa uwuta minthori, khunhala ukhala-tho ukhwa, ikuttho, isontte-sontte, ni hataa yoowerya.” (Moonihero 21:4) Waanoocivela ni weeva ciico unfenta Nluku?

Nluku mpheela wiira weeva uncuweleehe. Nuulumo nawe nnawuulattula: ‘Umwaattamele Nluku, ni uyova naahala uwaattamela.’ (Tiyaku 4:8) Nluku ahomwiihana profeta Abrahamu “mpwanaaka.” (Isaiya 41:8) Yehova naapheela wiira weeva ciicammo ukhaleke mpwanaawe.

Wankowiira wiitthucaka ca Nluku, upatthanyaa ni uyova unkoolipa ni weeva unaahala utteeliya cinene. “Ootteeliya ntthu” ule “ninoncivela nlamulo na Yehova, ni munlamuloni wawe uyo naasoma uthana ni uhiyu ni isoothi yoomaalyaa.” (Isaalimu 1:1, 2) Coo, ukhanyerere wiitthuca Cowantikhiya Cowaarya. Wuupuwelele makhalelo a Nluku ni miteko cawe. Uthoonyere wiira unanfenta, weettelaka ineetthucaa. “Nifento na Nluku maanaaya coo: niweheehe cooruma cawe; ni nnya cooruma cawe nnya khacinlemela.” (1 Joau 5:3) Coo, ulompe toko nasaalimu: “Ukicuwelihe iphiro caa, oo Yehova; ukiitthucihe mittala caa. Ukeettihe mwiikhweelini waa.” (Isaalimu 25:4, 5) Unaahala woona wiira Nluku “kharii uttayi wo khula ntthu.”—Miteko 17:27.