MWAHA WOOSOMIYA 43
Yehova ri moohoolela mphwinkwaawe woothotokanihiya
“‘Woohikhala naanatoropa awula niikuru, masi ninnepaaka,’ neera Yehova, nhooleli aanatoropa.”—ZAKAR. 4:6
NCIPO 40 Weeva uhonthanla?
NINHALA WIITTHUCANI? *
1. Isiyani inlamuliyaaya uhihiya upanka makristau oopattisiya?
NYUUVA nhopattisiya? Wakhala wiira nhopattisiya, nyuuva nhothoonyera waatthuni wiira nnaamwaamini Yehova ni nheevaherera wiira nkavihere mphwinkwaawe. * Masi waamini winyu uhaana nanlelo utepaka wuunuwa. Ni nanlelo nhaana nlipihacaka waamini winyu wiira Yehova ri moohoolela mphwinkwaawe ilelo.
2-3. Yehova nohoolela cani mphwinkwaawe woothotokanihiya ilelo? Ntaphulele.
2 Inanna Yehova cinhoolelaawe mphwinkwaawe woothotokanihiya ilelo, inaathoonyera makhalelwaawe, citthu cimpheelaawe upanka ni meettelo anoncivela. Nttwee noone makhalelo mararu a Yehova anooneehu mumphwinkoni wawe woothotokanihiya.
3 Ikhalelo yoopacera: “Nluku khaavo nonthanlaawe.” (Mite. 10:34) Nifento nihomwiiriha Yehova unvaherera Mwanawe wiira ‘awoopole atthu otheene.’ (1 Tim. 2:6; Joau 3:16) Yehova haavahacera apoovwaawe waalayeera ihapari comaana atthu otheene ampheela wiiwa, wiira ayo atthwaayo aphwanyere ifayita woopoliya wihu. Yonayeeli, Yehova khanle Nluku owiithotokaniha ni nannema. (1 Akor. 14:33, 40) Phimaana, nihaana nikhalaka atthu owiithotokaniha ni onnema. Yoneeraru, Yehova khanle “Mwiitthucihi Muulupale.” (Isai. 30:20, 21) Phimaana, mphwinkwaawe woothotokanihiya unhoolelihera wiitthuciha Nuulumo nawe, wanlokoni ni wuulalyeerani. Ala makhalelo a Yehova mararwaala yoonannya cani wanlokoni no makristau noopacera? Ilelo, isiyani apoovu a Yehova impankaaya wiira atakihe ayo makhalelwaayo? Ni isiyani inlamuliyeenyu upanka wiira nnepa wowaarya wa Yehova wuukavihereni uvara nteko mumphwinkoni wa Yehova?
NLUKU KHAAVO NONTHANLAAWE
4. Toko cantikhiyaaya nhina Miteko 1:8, isiyani Yesu yaarumalyaawe attharyaawe, ni manannani caahalaaya ukaviheriya?
4 Ukati wo makristau oopacera. Ihapari Yesu caalalyeeraawe cinawaavaha apinaatamu otheene niweherero. (Luka 4:43) Uyo ahaaruma attharyaawe wiira arweehele uhoolo nteko uyova waapacenryaawe uvara, wiira ayo alalyeere “mpaka micoko coottayi nviralyaaya ituninya.” (Nsome Miteko 1:8. *) Unawoonannya wiira khayaahala ukhitiri uvara uyo ntekooyo niikuru caya. Wiira akhitiri uvara, ayo yahaana yakaviheriyaka ni nnepa wowaarya Yesu wenryaawe wiira anhala waavaha.—Joau 14:26; Zakar. 4:6.
5-6. Nnepa wowaarya waakavihenre cani atthari a Yesu?
5 Atthari a Yesu yahaakhela nnepa wowaarya nihuku no Pentekositi, mwaakha wo 33. Nlattu wookaviheriya nuuyo nnepooyo, wowaakuvya yahancera ulalyeera, ni woohivira ukati mwinci atthu enci yahotthuna ihapari comaana. (Mite. 2:41; 4:4) Ukati wancenryaaya ulupatthiya, ayo khayoovale, masi yahonlepela Nluku wiira aakavihere. Ayo yaholompa yiiraka: “Unilipihe nrima wiira nihihiyerere ulalya moolumwaa.” Umaliha waya ulompa, wahaacara nnepa wowaarya wa Nluku ni khayaahiile “ulalya nuulumo na Nluku yalipaka nrima.”—Mite. 4:18-20, 29, 31.
6 Atthari a Yesu yahaana marikariko makiina. Wootakihera, ayo khayaarina cowantikhiya cowaarya coolikana. Khayaarina ikaruma coosomasomela toko cirineehu ilelo. Ni yahaana yaalalyeeraka atthu yooluma iluuka coovirikanaca. Hataa yakhalanaka marikariko otheene ayo, ale atthari owiikurumicaale yahopanka itthu atthunaka yoopuwelaaya wiira khayaahala ukhitiri: cihinavira myaakha cinci, ayo yahokhitiri ulalyeera ihapari comaana “cowumpiya cotheene cimphwanyannya vathi waya irimu.”—Akol. 1:6, 23.
7. Myaakha coopwaha 100 uttuli, apoovu a Yehova yaacuwenle cani itthu Nluku yaapheelelaawe, ni isiyani yaapankilyaaya?
7 Ukati wolelo. Yehova nanlelo nawaahoolela apoovwaawe ni nawaavaha ikuru wiira akhitiri upanka impheelaawe. Venci-venci uyo naahoolela avarela nteko Ibiiblya, yantikhiye naatthu yeettiheriya niikuru co nnepa wowaarya. Mbiiblyani, hiiva ninaaphwanya ihantisi cinttonka nteko Yesu uvanryaawe ni nrumo naavahalyaawe attharyaawe wiira arweehele uhoolo nteko uyova upacerihalyaawe. (Mat. 28:19, 20) Mwaakha wo 1881, mweeri wo Julho, irevista Ukhalenla yaheera: “Yehova khaniihanne awula khanithanlale wiira nittitthimihiye naapinaatamu awula wiira nithaciri, masi uyo nithanlile wiira nivarele nteko citthu cotheene cirineehu nikaviheraka nteko woolalyeera ihapari comaana.” Ilivuru imoca yo 1919, yantikhiye niiluuka Inglês yeehaniya Tipani Vahaceriye Nteko, yaheera: “Nteko unlamuliyeehu uvara uri mwinci, masi ukhanle nteko wa Apwiiya; ayo anaahala univaha ikuru wiira nikhitiri uvara.” Khweeliini, ayo mayamunnaayo yaheekurumica uvara uyo ntekooyo yalipaka nrima ni yakhuluvelaka wiira nnepa wowaarya wanhala waakavihera waalalyeera atthu o khula ikhapila. Ni ilelo, hiiva ciicammo ninaakhuluvela nnepa wowaarya wiira unaahala unikavihera.
Mphwinko woothotokanihiya wa Yehova unaavarela nteko ikaruma cinci wiira ulalyeere ihapari comaana (Nwehe iparaagarafu 8-9)
8-9. Inannani ikiina mphwinko woothotokanihiya wa Yehova cinlalyeeraaya wiira atthu otheene yiiwe ihapari comaana?
8 Mphwinko woothotokanihiya wa Yehova unaavarela nteko ikaruma cinci wiira ulalyeere ihapari comaana. Nnyo ikarumannyo cikhanle ilivuru, ividiyu yeehaniya “Fotodrama da Criação,” ifonoogarafu, ikaaro cooheliya atifulanti, iraatiyu ni ikaruma conaanaano cinvareliya nteko ala mahukwaala. Mphwinko woothotokanihiya wa Yehova ciicammo unawiikurumica utaphulela myaha co mbiiblyani niiluuka cinci cihinatoko thanku utaphuleliya! Nlattuni? Kontha nimpheela wiira atthu otheene yiiwe ihapari co Umwene niiluukaaya. Yehova khaavo nonthanyaawe; uyo hohimya wiira ihapari comaana anaahala ulalyeeriya atthu “olapo cotheene, maloko, iluuka, ni apoovu.” (Apoka. 14:6, 7) Uyo nopheela atthu otheene aviriyane ihapari co Umwene.
9 Vano manannani caahalaaya ulalyeeriya atthu ankhala mapuro oorika uphinnya, toko ipereetiyu cootepa ukhalenliya awula cootthukiya? Wiira alalyeeriye ayo atthwaayo, mphwinko woothotokanihiya wa Yehova uhowehera mananna menci oolalyeera mapuro ankhala atthu enci. Wootakihera, mwaakha wo 2001, Mphwinko wo Mahumu Unhoolela wahaatthunihera mayamunna ni asirokorihu u França ulalyeera yavarelaka nteko ikariinyu. Nuukatyaaya, mayamunna olapo cikiina ciicammo yahotthuniheriya ulalyeera ayo manannaayo, ni nteko waavanryaaya wahaakhumela saana. Mwaakha wo 2011, wahanceriya uvariya nteko u Estados Unidos wasittatti inviravira atthu enci, u Nova York. Mwaakha waapacenryaaya uvariya nteko, cahokawiya ilivuru 102.129 ni irevista 68.911. Ni atthu 4.701 yaholepela usomihiya Ibiiblya! Khweeliini, nnepa wowaarya wahokavihera uyo ntekooyo. Phimaana, Mphwinko wo Mahumu Unhoolela uholakela wiira ntuninyani motheene pooti ulalyeeriya civareliyaka nteko ikariinyu.
10. Isiyani ninlamuliyeehu upanka wiira niitthuce ulalyeera saana?
10 Itthu inlamuliyeenyu upanka. Umikutthaanoni, Yehova naaniitthuciha mananna oolalyeera. Nvarele nteko citthu cineetthuceenyu umikutthaanoni. Nhilove urwaa wuulalyeerani wamoca niikhurupu yo wuulalyeerani iriinyu. Mayamunna ni asirokorinyu ari ikhurupwiinyu yo wuulalyeerani anaahala wuukaviherani ucuwela ulalyeera ni wiitthuciha saana, ni anaahala wuukurumicani ukati unhaleenyu woona citthu comaana cimpankaaya cinreera utakihiya. Nhihiye urwaa wuulalyeerani. Toko cineeraaya iveerusu inlipihera ula mwahoola, hiiva ninkhitiri upanka impheelaawe Nluku, kahi niikuru cihu, masi niikuru co nnepa wowaarya. (Zakar. 4:6) Ni iyo ikhanle ikhweeli kontha Yehova phimwaneene uyo ntekooyo.
YEHOVA KHANLE NLUKU OWIITHOTOKANIHA NI NANNEMA
11. Mphwinko wo mahumu waahoolela ukati wo makristau oopacera, waavanre nteko cani wiira apoovu a Nluku akhale oothotokanihiya?
11 Ukati wo makristau oopacera. Mphwinko wo mahumu waahoolela ukati wo makristau oopacera, waakhala u Yerusalemu, wahovara nteko venci wiira apoovu a Nluku akhale oothotokanihiya ni akhalakhale ni nnema. (Mite. 2:42) Wootakihera, ukati waakhumelenlyaawe nanrokottole nlattu wo wuulihaniya, mphwinko wo mahumu waahoolela, weettiheriyaka ni nnepa wowaarya, wahothukumana wiira uwacere uyo mwahooyo. Unari wiira nloko no makristau nahohiya wiiwanana nlattu wo uyo mwahooyo, nteko woolalyeera khawaahala uvariya saana. Unookhalaru wiira mapostolu ni mahumu yaari ayuuta, ayo khayaatthanre ilema ca ayuuta ni khayaawiiwelenle ale yeetthuciha nnyo ilemannyo. Uhiya commo, ayo yahototha ucuwela isiyani yaahimyaaya Nuulumo na Nluku ni yaholepela nnepa wowaarya wiira waakavihere ucuwela itthu yooreera upanka. (Mite. 15:1, 2, 5-20, 28) Upanka waya commo, yaakhumelenle isiyani? Yehova ahaacaaliha nlattu wo itthu yaalakenlyaaya, wanlokoni nahokhala nnema ni wiiwananiya ni nteko woolalyeera wahorwaa uhoolo.—Mite. 15:30, 31; 16:4, 5.
12. Isiyani inthoonyera wiira apoovu a Yehova ilelo ari oothotokanihiya ni anaakhalakhala ni nnema?
12 Ukati wolelo. Mphwinko woothotokanihiya wa Yehova uri moovara nteko wiira nikhale oothotokanihiya ni wiira nikhalakhale ni nnema. Irevista Ukhalenla 15 yo Novembro yo 1895 niiluuka Inglês, yahaana mwaha weera co: “Citthu Cotheene Cipankiye Niihisima ni Cithotokanihiye Ratta.” Uyo mwahooyo waakumihiye nhina 1 Akorintu 14:40 ni weera co: “Mapostolu yahantikhela nloko no makristau oopacera citthu cinci nhina . . . Nihaana neettelaka ratta-ratta citthu cantikhiye khalayi wiira ciniitthucihe.” (Aroo. 15:4) Toko makristau oopacera caapheelaaya ukhalakhala ni nnema ni oothotokanihiya, apoovu a Yehova ciicammo iyo phi itthu impheelaaya. Muupuwele ila itthwiila: Nyuuva nrwaale woona nkutthaano nloko nikiina—pooti ukhala ilapo iriinyu awula ilapo ikhwaawe. Waphiyaka ukati woosomiya irevista Ukhalenla, nyuuva mwanhala ucuwela mananna cinhalaaya usomiya ni mwaha waahala usomiya. Nyuuva mwaahala wiicoona khampa uwannyu! Nnepa wowaarya phinkhitiriha iyo inanna yowiiwananeeyo.—Sof. 3:9, niwehero.
13. Nuupuwelaka inhimyaaya Tiyaku 3:17, isiyani ninlamuliyeehu wiikoha?
13 Itthu inlamuliyeenyu upanka. Yehova nopheela wiira apoovwaawe ahihiye wiiwanana urinaaya “unwaana nnema.” (Efesu 4:1-3) Mwiikohe co: ‘Kinneekurumica uwaana nnema ni wiiwananiya wanlokoni waka? Kinaawiiwelela ale anhoolela miteko co wanlokoni? Kiireke kikhanle ntthu ookhuluvelya, venci-venci wakhalaka wiira cihaavo miteko co wanlokoni cinwaceraaka? Kincuweliya ukhala ntthu oohicerewa, owaakavihera ni owaapankela citthu akhunanaka?’ (Nsome Tiyaku 3:17. *) Moona wiira ahaavo marukunuso anlamuliyeenyu upanka wiira nkhale ntthu omaana, munlompe Nluku munlepelaka nnepaawe wowaarya. Mwahiyaka nnepa wowaarya urukunusaka makhalelweenyu, mayamunneenyu ni asirokorinyu o wanlokoni anaahala utepa wuufentani ni wuuhisimani.
YEHOVA NAANIITTHCIHA NI NAANIVAHA IMPHEELEEHU
14. Toko cinthoonyeraaya Akolosu 1:9, 10, manannani Yehova caawiitthucihaawe apoovwaawe ukati wo makristau oopacera?
14 Ukati wo makristau oopacera. Yehova unancivela cinene uwiitthuciha apoovwaawe. (Isaa. 32:8) Uyo nopheela wiira ancuwele, anfente, ni akhale asaanaawe mpaka. Ni iyo khayaahala ukhitirya uhikhanle wiira naaniitthuciha. (Joau 17:3) Yehova ahovahacera nloko no makristau oopacera wiira niwiitthucihe apoovwaawe. (Nsome Akolosu 1:9, 10. *) Nnepa wowaarya Yesu waakhuluvelihalyaawe wanhala waakavihera venci. (Joau 14:16) Nnepa wowaarya wahaakavihera atthari a Yesu wiiweeha myaha ciri nhina Nuulumo na Nluku, ni uyo nnepooyo waanaawuupusera citthu cinci Yesu cuulumalyaawe ni caapankalyaawe cantihiye nhina nvangeeliyuni. Ucuwela nnyo myahannyo waholipihaca waamini wo makristau oopacera, ni wahaakavihera utepa unfenta Nluku, Mwanawe ni ufentana ayaayoru.
15. Manannani nyuuva cimmooneenyu Yehova eerannyeehaka inatiri iri nhina Isaiya 2:2, 3?
15 Ukati wolelo. Yehova ahohimya wiira “mphantte wo mahuku ookhicera,” atthu olapo cotheene yanhala uthukumana umwaakoni wawe wiira yiitthucihiye iphiro cawe. (Nsome Isaiya 2:2, 3. *) Ilelo, ninkhala ukati uneerannyaaya iyo inatiriiyo. Hiiva ninaakhitiri woona wiira uswali weekhweeli phiri wooreera uvikana khula inanna yooswali woohikhweeli. Ni Yehova nawaavaha apoovwaawe iyoolya yoominepani yinci! (Isai. 25:6) Yehova hovahacera “ipottha yookhuluvelya ni yankhili” wiira inivahe iyoolya yoominepani yinci, masi ciicammo yoovirikanaca, toko myaha cinlamuliyeehu usoma, myaha cinlamuliyeehu uviriyana, ividiyu caattontto ni ividiyu cikiina. (Mat. 24:45) Hiiva nineecoona toko Eliwu, mpatthannyaawe Jó. Uyo ahaana isariya ukati wenryaawe co: “Mwiitthucihini nonlikanana [Nluku]?”—Jó 36:22.
Mweese wanrimani ni mweettele ikhweeli cineetthuceenyu (Nwehe iparaagarafu 16) *
16. Isiyani nyuuva inlamuliyeenyu upanka wiira cuukavihereni citthu cineetthucihiyeehu ni Yehova?
16 Itthu inlamuliyeenyu upanka. Nnepa wowaarya unaahala wuukaviherani weettela citthu cinsomeenyu nnuulumoni na Nluku. Munlompe Yehova toko nasaalimu enre: “Yehova, ukiitthucihe iphiro caa. Kinaahala weettela ikhweelyaa. Ukivahe nrima mmoca wiira koove ncina naa.” (Isaa. 86:11) Phimaana, nhihiye uvarela nteko iyoolya yoominepani Yehova innivahaawe nnuulumoni nawe ni mumphwinkoni wawe. Khweeliini, nyuuva khannapheela paahi ucuwela myaha. Nyuuva ciicammo nnopheela weesa wanrimani ni weettela citthu cinhaleenyu wiitthuca. Nnepa wowaarya wa Yehova unaahala wuukaviherani upanka iyo. Nyuuva ciicammo nnopheela waakurumica mayamunneenyu ni asirokorinyu o wanlokoni. (Mabere. 10:24, 25) Nlattuni? Kontha ayo akhanle amuciinyu. Munlompe Yehova ni munlepele nnepaawe wowaarya wiira wuukavihereni uvaha ikomentaariyu cowaalipiha akhwiinyu ni wuukavihereni upanka saana miphantte cinyu umikutthaanoni. Mwapankaka commo, nnaahala unthoonyera Yehova ni Mwanawe wiira nyuuva nnaafenta “ikhontwaa” caya.—Joau 21:15-17.
17. Nnohala uthoonyera cani wiira nnaakavihera mphwinko woothotokanihiya wa Yehova?
17 Woohipica, mphwinko woothotokanihiya wa Yehova paahi phinhala uhala watuninyani. Mwiikurumice uvara nteko nkhayi nuuyo mphwinkooyo. Toko Nluku, mwaafente atthu otheene, nlalyeeraka ihapari comaana woohinthanla ntthu. Muntakihe mwiikurumicaka wiira nwaane nnema ni wiiwananiya wanlokoni. Munviriyane Mwiitthucihiinyu Muulupale, mwiikurumicaka uvarela nteko iyoolya yoominepani innivahaawe. Mwapankaka commo, nyuuva khannohala ukhala ni masukhuli waphiyaka ukati woohala umalamalihiya ituninya ya Sotwani. Uhiya commo, nyuuva nnaahala ilipa nrima ni nnaahala ukhala wamoca naatthu ookhuluvelya anonswalela Yehova.
NCIPO 3 Jeová, Minha Força e Esperança
^ par. 5 Nyuuva nnaakupali wiira Yehova ri moohoolela mphwinkwaawe ilelo? Nhina ula mwahoola, ninaahala woona mananna Yehova caahoolenlyaawe nloko no makristau noopacera ni ninaahala woona mananna cinaahoolelaawe apoovwaawe ilelo.
^ par. 1 NUULUMO NOOTAPHULELIYA: Mphwinko woothotokanihiya wotheene wa Yehova urina miphantte miili: wo wiirimu ni wo watuninyani. Nhina ula mwahoola, weeriyaka mphwinko woothotokanihiya unaaciya paahi mphantte wo watuninyani.
^ par. 4 Miteko 1:8 Masi, ukati unhaleenyu uveleeliheriya nnepa wowaarya, nnaahala waakhela ikuru ni nnaahala ukhala masaahityaaka u Yerusalemu, u Yuuta wotheene ni u Samariya, ni mpaka micoko coottayi nviralyaaya ituninya.
^ par. 13 Tiyaku 3:17 Ucuwelaca wo uculu woopacera ukhanle woohinnempa, ciicammo ukhanle wonnema, woohilipalipa, wootthunela, woocarana ulevelela ni mihokorokho comaana, khunthanya, khunootha.
^ par. 14 Akolosu 1:9 Hataa phimaana, ukhuma nihuku niiwaleehu iyo, khanihiile wuulompelani ni ulepela wiira ntepe ucuwela ikhweeli nhina itthu impheelaawe, nthoonyeraka ucuwelaca ni wiiweeha myaha coominepani, 10 wiira nkhalane meettelo oophwanela uhoolo wa Yehova, wiira muntteelihe nrima ratta-raatta, ukati uhinhiyeenyu wiimiha mihokorokho nhina miteko comaana cotheene ni wuncerera ucuwela ikhweeli ya Nluku.
^ par. 15 Isaiya 2:2 Mphantte wo mahuku ookhicera, mwaako wo inupa ya Yehova unaahala ukhala woolipa uculuwaya myaako, ni unaahala ukhala muulupale uvikana myaako cotheene, ni maloko otheene anaahala utthawelela. 3 Ni apoovu enci anaahala urwaa ni wiira: “Nwaace, niwele mwaako wa Yehova, unupani wa Nluku a Yakopi. Uyo naahala uniitthuciha mittala cawe, ni hiivano ninaahala utthara miphito cawe.” U Siyau phinhala ukhuma nlamulo, ni u Yerusalemu nuulumo na Yehova.
^ par. 56 ILATARATO: Nrokorihu nvara nteko weepiyoneeru oona ividiyu inaathoonyera atthu ankavihera mapuro ahirivo anamalalyeera enci. Umaliha wawe woona, uyo naalakela waatakiha ni wahoolo naarwa ukavihera ncoko ahirivo anamalalyeera enci.
