MWAHA WOOSOMIYA 49
NCIPO 147 Ukumi woohimala ikhanle iparakha yooreera!
Isiyani inlamuliyeenyu upanka wiira mphwanye ukumi woohimala?
“Otheene ale anonkupali Mwanaya ni anthoonyera umwaamini akhalane ukumi woohimala, ni mi kinaahala uwunweleliha nihuku noomalela.”—JOAU 6:40.
ITTHU INHALEEHU WIITTHUCA
Ninaahala woona iparakha makristau oothanliya ni ikhontwaa cikhwaawe cinhalaaya waakhela nlattu wowiivaherera wa Yesu.
1. Isiyani atthu akhwaawe anoonelaaya nhina ukhalana ukumi woohimala?
ATTHU enci anaamananiha ulya citthu coocivaciva ni utthawatthawa wiira akhale saana mwiirutthuni waya ni akhale ukati mwinci wakhitiryaaka. Hataa ukhalaka commo, ayo khanweherera ukhala akumi mpaka woohikhwa. Ayo anoopuwela wiira khunkhitirya ukhala mpaka woohikhwa awula yaahala ukhala itthu yoorika waanana masakha nlattu wowuuluvala. Masi, iwarakha ya Joau 3:16 ni 5:24, Yesu enre wiira unaakhitirya ukhalana “ukumi woohimala.”
2. Isiyani iwarakha ya Joau ikapiitulu 6 inhimyaaya nhina ukumi woohimala? (Joau 6:39, 40)
2 Ikwaha imoca, Yesu ahopanka miiriirya ni aahaliha atthu imiliau niihopa piili ni iphaawu thanu. a Iyo yaari itthu yootteeliha nrima. Masi itthu Yesu aahimilyaawe-tho yaari yootepa utteeliha nrima cinene. Apoovu yahontthara Yesu mpaka u Cafarnaum isittatti yaaphwanyannya waattamela u Kalileeya ni nwo ahowiirela wiira atthu akhwile pooti wunwelelihiya ni ukhala akumi mpaka woohikhwa. (Nsome Joau 6:39, 40.) Moopuwele utteeliya unhaleenyu ukhalana mwawoonaka asipatthaniinyu ni amuciinyu akhwile anunwelelihiye. Itthu Yesu ihimilyaawe inaanikupaliha wiira atthu akhwile anaahala wunwelelihiya ni ukhalana ukumi woohimala mpaka ni wuuhelani nhina nyuuva. Masi ayuuta enci waanaarika wiiweeha itthu Yesu ihimilyaawe iveerusu cinttharanana nhina ikapiitulu 6. Ni mahukwaala, atthu enci khaneeweeha itthu yuulumilyaawe. Nttwee noone isiyani Yesu yuulumilyaawe.
3. Isiyani Yesu ihimilyaawe nhina Joau 6:51?
3 Yesu waaliha wawe atthu otheene yaari niitala, ayo yahoopuwela manaa Yehova aavahilyaawe asarayeli muuthakoni. Unawoonannya wiira yahaana isariya yuupuwelaka commo, kontha Ibiibiliya ineehana manaa “iphaawu yo wiirimu.” (Isaa. 105:40; Joau 6:31) Wiira awiitthucihe itthu yofayita, Yesu aahovarela nteko ntakihero no manaa. Hataa ukhalaka wiira manaa yaari iyoolya yo miiriirya ya Nluku, masi ale yaalilye khayaakhanle mpaka woohikhwa. (Joau 6:49) Ni Yesu aaheecihana “iphaawu yo wiirimu”, iphaawu ya Nluku ni “iphaawu yookumi.” (Joau 6:32, 33, 35) Yesu ahohimya mananna civirikannyaaya uyova ni manaa. Uyo enre co: “Mi kikhanle iphaawu ikumi inkhuma wiirimu. Ntthu alyaaka iyo iphaawiiyo naahala “uphwanya ukumi woohimala.” (Nsome Joau 6:51.) Ayuuta yaahokhala oorusiya. Ayo khayaacuwela kontha isiyani Yesu wenryaawe wiira aari “iphaawu yo wiirimu” ni manannani yaaryaaya iphaawu yomaana uvikana manaa. Yesu ahotaphulela iyo nimananna omaana. Uyo enre co: “Iphaawu invahaaka ikhanle irutthwaaka.” Maanaaya isiyani? Wiira niphwanye ukumi woohimala nkhayi naamuciihu, ninlamuliya ucuwela iyo itthwiiyo. Vano, nttwee noone itthu Yesu yaapheelaawe uhimya.
YEERIYAKA “IPHAAWU IKUMI” NI “IRUTTHWAAKA” MAANAAYA ISIYANI?
4. Kontha isiyani atthu akhwaawe yaatikhinihiyaaya nimoolumo a Yesu?
4 Atthu akhwaawe yanviriyana Yesu eeraka naavaha “ukumyaawe wiira awoopole apinaatamu”, yaahokhala ootikhinihiya. Atthunaka ayo yoopuwela wiira Yesu apheela wiira ayo yahaana akhuuraka inama yo rutthwaawe. (Joau 6:52) Nuuwakatyaaya, Yesu ahohimya itthu yaatepile waatikhiniha cinene: “Mwaahikhureke irutthwaaka ni mwaahiwuryeke iphomyaaka, nyuuva khannohala uphwanya ukumi woohimala.” —Joau 6:53.
5. Kontha isiyani ninkupaliihu wiira Yesu khaapheela uhimya wiira atthu ahaana yawuryaka iphomyaawe?
5 Ukati wa Nowee, Nluku aahaakhottiiha apinaatamu ulya iphome. (Upha. 9:3, 4) Nuukatyaaya, ciicammo Yehova aahaakhottiiha asarayeli ulya iphome. Khula ntthu aahala ulya iphome ‘anhala ukhwa.’ (Lev. 7:27, niwehero) Yesu anwiitthuciha atthu wiiwelela malamulo a Nluku. (Mat. 5:17-19) Khweeliini, uyo khaalamuliya waalepela ayuuta wiira yahaana ukhuura irutthwaawe ni uwurya iphomyaawe. Masi, Yesu aaneera wiitthuciha isiyani yaalamuliyaaya upanka wiira aphwanye “ukumi woohimala.” —Joau 6:54.
6. Nincuwela cani wiira Yesu nhina Joau 6:53 aahovarela nteko moolumo oolikanaca?
6 Isiyani Yesu aapheelaawe uhimya? Khweeliini, ukati waawuulumannyaawe ayo apoovwaayo, Yesu aahovarela nteko moolumo oolikanaca. Yesu ciicammo aahopanka iyo ukati waawiirenlyaawe athiyana o Samariya co: ‘Ule noohala uwurya maaci kinvahaaka khanhala uvoliya-tho ntthona, masi ayo maacyaayo anhala ukhala mwiirutthuni wawe khampa nipuro ninweela maaci anvaha ukumi woohimala.’ (Joau 4:7, 14) b Yesu khaapheela uhimya wiira athiyana o Samariya wiira aphwanye ukumi woohimala yahaana yawuryaka maaci ancuweleehu. Inanna imocaaru, Yesu khaapheela uhimya wiira apoovu o Cafarnaum yamalaru ukhuura irutthwaawe ni uwurya iphomyaawe yanhala uphwanya ukumi woohimala.
UKATI WOOVIRIKANA
7. Isiyani atthu akhwaawe inhimyaaya nhina moolumo a Yesu amphwanyannya Joau 6:53?
7 Nhina iwarakha ya Joau 6:53 atthu akhwaawe anoopuwela wiira Yesu aataphulela itthu atthu inlamuliyaaya upanka nhina Iyoolya yoohiyu Yaapwiiya. Ayo anoopuwela commo, kontha aavarenle nteko moolumo oolikanaca. (Mat. 26:26-28) Phimaana, atthu enci aneera wiira ale otheene ankhala ukati umpankiyaaya Iyoolya yoohiyu Yaapwiiya anlamuliya ukhuura iphaawu ni uwurya iviinyu. Niireke iyo ikhanle ikhweeli? Ikhanle itthu yomaana ucuwela waakhuliya waya nno nikohonno, kontha myaakha cotheene, atthu imiliau cene ntuninyani motheene anaathukumana wiira apanke uyo nkutthaano wofayitooyo. Vano, nttwee noone uvirikana waya Iyoolya yoohiyu Yaapwiiya ni itthu Yesu yaahimilyaawe nhina Joau 6:53.
8. Citthu cinthoonyera uvirikana nhina nnya citthu piilinnya? (Nwehe ciicammo ilatarato.)
8 Nttwee noone citthu piili coovirikana. Yoopacera, ukatini ni mapuroni Yesu ulumilyaawe moolumo amphwanya nhina Joau 6:53-56? Uyo oolumile ala moolumwaala mwaakha 32 nawile Kristu, u Kalileeya. Iyo yiirannyeele unamanle awula uhinaaya umala mwaakha mmoca hinaaya upanka Iyoolya yoohiyu Yaapwiiya u Yerusalemu. Yonayeeli, taapani aahimenryaawe ayo moolumwaayo? Aahimenrye ala moolumwaala atthu waacivela cinene paahi yaavyaavya iyoolya uhiya wiitthuca myaha ca Yehova ni co Muumweneni wawe. (Joau 6:26) Uhiya commo, ayo woona waya wiira waanaarika wiiweeha citthu cikhwaawe Yesu cuulumilyaawe, ayo yaahoohiya umwaamini. Ni hataa eetthucyaawe akhwaawe yaahoohiya untthara. (Joau 6:14, 36, 42, 60, 64, 66) Ayo atthwaayo yaahovirikana ni maapostolu 11 ookhuluvelya aarinaawe uvira waya mwaakha mmoca, ukati waapankaawe Iyoolya yoohiyu Yaapwiiya mwaakha wo 33 nawile Kristu. Ule ukatyuule, maapostolwaawe khayeeweeha itthu Yesu yeetthucihaawe. Masi woovirikanaca naatthu o Kalileeya, maapostolu yankupali wiira uyo aari mwaana aakhuluvelihiye aakhuma wiirimu. (Mat. 16:16) Yesu ahaattottopela maapostolwaawe, eeraka: “Nyuuva phaatthu nthanlile ukhala nimiiva ukati womasakha.” (Luka 22:28) Nwo uvirikananwo unawoonihera sana-saana wiira nhina Joau 6:53, Yesu khaapheela utaphulela itthu yaahala wiirannya Uyoolyani yoohiyu Yaapwiiya. Masi nanlelo uhaavo uvirikana.
Ikapiitulu 6 yo ivangeeliyu ya Joau, inooluma itthu Yesu aahimenryaawe apoovu ayuuta ni o Kalileeya (moono wonthiyana). Unavinre mwaakha mmoca, awuulumanaka ikhurupu yankaani yaattharyaawe u Yerusalemu (moono wonlopwana) (Nwehe iparaagarafu 8.)
ISIYANI MOOLUMO A YESU ANNIITTHUCIHAAYA?
9. Ikhurupuni Yesu yuulumilyaawe nhina Iyoolya yoohiyu Yaapwiiya?
9 Ukati wo Yoolya yoohiyu Yaapwiiya, Yesu aahoviriha iphaawu yoohiheliya iferementu iriyari yo maapostolwaawe ni aahahimerya wiira yaataphulela irutthwaawe. Nuuwakatyaaya, uyo aahoviriha iviinyu ni aahahimerya wiira iviinyu yaataphulela “iphomyaawe yonlehaano.” (Mark. 14:22-25; Luka 22:20; 1 Akor. 11:24) Itthu Yesu yaahimilyaawe nhina nleehano, eehannyaawe “nleehano nonaanaano”, nikhanle nofayita cinene. Nno nleehanonno naapankiye Yehova ni “apoovu o Sarayeli” awula ale anhala urwaa ulamulela nkhayi ni Yesu “Muumweneni wa Nluku.” (Mabere. 8:6, 10; 9:15) Ule ukatyuule, maapostolu khayaacuwela maanaaya nno nleehanonno, masi ayo yaahothanliya ni nnepa wowaarya ni yampanka mphantte wonno nleehanonno. Naayo manannaayo, ayo yahaana nipuro wiirimu nkhayi ni Yesu. —Joau 14:2, 3.
10. Isiyani itthu ikhwaawe-tho inthoonyera itthu Yesu aahimilyaawe ukati waapankaawe Iyoolya yoohiyu Yaapwiiya ni itthu yaahimilyaawe u Kalileeya? (Nwehe ciicammo ilatarato.)
10 Itthu Yesu yaahimilyaawe ukati waapankaawe Iyoolya yoohiyu Yaapwiiya inawaahela nhina “ikhurupu yankaani yo khontwa.” Maapostolu yaari nkhayi nuuyo phaari oopacera upanka mphantte iyo ikhurupwiiyo. (Luka 12:32) Ayo phaatthu Yesu aalepenlyaawe ukhuura iphaawu ni uwurya iviinyu. Akhwaawe yaahala upanka mphantte iyo ikhurupwiiyo ciicammo anaahala ukhuura iphaawu ni uwurya iviinyu ukati wo wuupuwelela Iyoolya yoohiyu Yaapwiiya. Phaatthu anhala urwaa ukhala nkhayi ni Yesu wiirimu. Vano, ila phiitthu ikhwaawe inoonihera uvirikana moolumo a Yesu ukati waapankaawe Iyoolya yoohiyu Yaapwiiya, inawaahela nhina ikhurupu yankaani yaatthu. Vano, itthu Yesu aahimilyaawe u Kalileeya inawaahela nhina ikhurupu yuulupale yaatthu.
Ale ankhuura iphaawu ni anwurya iviinyu anaapanka mphantte wo khurupu yankaani, masi ale otheene ammwaamini Yesu pooti uphwanya ukumi woohimala (Nwehe iparaagarafu 10.)
11. Isiyani inoonihera wiira itthu Yesu ulumilyaawe u Kalileeya aaca iparakha cinhalaaya waakhela atthu otheene?
11 Atthu enci Yesu aawuulumanaawe u Kalileeya, mwaakha 32, yaapheela paahi iyoolya. Masi Yesu aahomanani waakavihera wiira yiiweehe itthu yofayita cinene uvikana iyoolya —itthu yaahala waaphwanyiha ukumi woohimala. Mpaka Yesu aheera, atthu akhwile anaahala wunwelelihiya ni ukhala mpaka. Uvirikana Iyoolya yoohiyu Yaapwiiya, inhimiya nhina Joau 6, Yesu khaaca paahi iparakha caahalaaya waakhela atthu vakaani paasi. Masi uyo aaca iparakha atthu otheene yaahalaaya waakhela. Khweeliini, uyo enre co: “Ule noohala ukhuura ila iphaawiila, naahala uphwanya ukumi woohimala . . . Iphaawu inhalaaka uvaha ikhanle irutthwaaka wiira atthu aphwanye ukumi woohimala.” —Joau 6:51. c
12. Isiyani inlamuliyeehu upanka wiira niphwanye ukumi woohimala?
12 Niireke wiira Yesu aapheela uhimya wiira atthu otheene anaahala ukhalana ukumi woohimala? Mena. Masi atthu ankhuura iyo iphaawiiyo awula ale ammwaamini uyova phinhala uphwanya ukumi woohimala. Atthu enci aneecihana ukhala makristau anoopuwela wiira anaahala woopwa yamwaaminiki Yesu ni akupaliki wiira khanle moopoli. (Joau 6:29) Masi khunakhala commo. Atthu enci u Kalileeya yahaapicile umwiiwelela Yesu, nuuwakatyaaya yaahoohiya umwiiwelela. Kontha isiyani?
13. Isiyani inlamuliyeehu upanka wiira nikhale atthari ookhuluvelya a Yesu?
13 Atthu enci yantthara Yesu kontha aanaavaha itthu yaapheelaaya. Ayo yaapheela wiira Yesu aavonihe, aavahe iyoolya ni aahimerye citthu ayo caahalaaya wiiwa. Masi Yesu ahaathoonyera wiira ikhanle itthu yomaana cinene ukhala nttharyaawe. Yesu aahohimya sana-saana wiira uyo khaawile wiira aavahe atthu ile impheelaaya. Atthwaayo yahaana anviriyanaka ni yiiwelelaka itthu yotheene Yesu itthucihaawe. —Joau 5:40; 6:44.
14. Isiyani inlamuliyeehu upanka wiira niphwanyere ifayita wiivaherera wa Yesu?
14 Yesu heetthuciha wiira nlattu woovaherera irutthwaawe ni iphomyaawe unaahala ukhitirya atthu ukhala mpaka woohikhwa. Masi atthwaayo anlamuliyaaya ukhalana waamini. Iyo yaari itthu yofayita cinene ukati wa ayuuta ni ciicammo ala mahukwaala. (Joau 6:40) Vano, itthu Yesu ihimilyaawe nhina Joau 6:53 maanaaya wiira nihaana ukhalana waamini wiivaherera wawe wiira nikhitiri uphwanya ukumi woohimala. Ni iyo iparakheeyo ihokhitirya wiira aphwanye atthu otheene. —Efesu 1:7.
15-16. Citthuni cofayita ciitthucileehu nhina Joau ikapiitulu 6?
15 Itthu nhimyaaya ikapiitulu 6 yo ivangeeliyu ya Joau, ikhanle itthu yofayita cinene mahukwaala. Nwo niheetthuca wiira Yesu nawaafenta cinene atthu. U Kalileeya, Yesu ahaavoniha aretta, aheetthuciha myaha co Mwene ni ahaavaha iyoolya apoovu. (Luka 9:11; Joau 6:2, 11, 12) Masi, itthu yofayita cinene ukhalaka wiira Yesu aheetthuciha wiira kikhanle “iphaawu yookumi.” —Joau 6:35, 48.
16 Khweeliini, ale Yesu nowiihanaawe ukhala ikhontwaa cikhwaawe khanlamuliya ukhuura iphaawu ni uwurya iviinyu unuupuweleloni Iyoolya yoohiyu Yaapwiiya. (Joau 10:16) Hataa ukhalaka commo, ayo anaaphwanyera ifayita irutthu ni iphome ya Yesu Kristu. Manannani? Ayo anaaphwanyera ifayita nlattu wo mwaamini wiivaherera wa Yesu ni yotheene yiirihile ukhitirya. (Joau 6:53) Ale ankhuura iphaawu ni uwurya iviinyu anawoonihera wiira anaapanka mphantte wo nleehano nonaanaano ni haana niweherero noolamulela Muumweneni wo wiirimu. Vano, hataa nipankaka mphantte wo khurupu yo makristau oothanliya awula ikhontwaa cikhwaawe, iwarakha ya Joau ikapiitulu 6 ikhanle yofayita mahukwaala. Iyo inaaniitthuciha wiira otheene cihu nihaana nikhalanaka waamini woolipa woopoliya wihu wiira niphwanye ukumi woohimala.
NCIPO 150 Utothe woopoliya ni Yehova
a Joau 6:5-35 ihoopeliya mwaha nhina mwaha uvinre.
b Maaci oolumilyaawe Yesu cikhanle citthu Yehova cipankilyaawe ni cihinhiyereraawe upanka wiira niphwanye ukumi woohimala.
c Nhina Joau Ikapiitulu 6, akhanle moolumo aavareliye nteko khampa “tipani” awula “otheene ale”, anaaciya atthu anhala uphwanya ukumi woohimala. —Joau 6:35, 40, 47, 54, 56-58.
