1. Manannani yaaweheriyaaya iphaawu khalayi?

 KHALAYI, iphaawu yaari iyoolya yuulupale. (Upha. 14:18; Luka 4:4) Mpaka ikwaha cikhwaawe, Ibiibiliya inawuuluma “iphaawu” yaacaka icoolya cotheene. (Mat. 6:11; Mite. 20:7) Miiriirya miili coocuwelaciya cinene Yesu caapankilyaawe, uyo apankile avarelaka nteko iphaawu. (Mat. 16:9, 10) Mwiiriirya mmoca umphwanyannya nhina Joau ikapiitulu 6. Nttwee noone iyo ihantisiiyo ni isiyani ineetthuceehu.

2. Ikwahani atthu enci yaaphenlyaaya ulihiya?

² Maapostolu a Yesu yanaaturuwaru wuulalyeerani. Wiira amumule, Yesu ahaarwaana mphantte nkhwaawe wopahari yo Kalileeya. (Mark. 6:7, 30-32; Luka 9:10) Ayo yahorwaa ncoko woomaalya waattamela isittatti yo Betsaida. Masi woohipica, atthu enci yahowa wiira amoone Yesu. Ni uyo khiipankihile khampa khawoonne, masi uhiya commo, ahancera uwiitthuciha myaha cinci co Umwene wa Nluku ni waavoniha aretta. Ukati waaviraaya wiilaka, maapostolu yahancera ukhala niiwasiwaasi ni mananna ale atthwaale yaahalaaya ukhitiri iyoolya. Atthu akhwaawe atthunaka yahaana iyoolya vakaani, masi encaayo yahaana arwaaka uthuma. (Mat. 14:15; Joau 6:4, 5) Manannani Yesu amalamalihilyaawe iyo itafaawutiiyo?

MWIIRIIRYA WOWUNCERERA IPHAAWU

3. Isiyani Yesu aawiirenlyaawe attharyaawe upanka? (Nwehe ciicammo ilatarato yo wakaapani.)

³ Yesu ahowiirela maapostolwaawe co: “Ayo khanlamuliya urwaa, nyuuva pooti waavaha itthu yoohala ulya.” (Mat. 14:16) Masi iyo itthwiiyo, yaakhala khampa khayaahala ukhitirya kontha yahaavo alopwana ookhalaka 5.000. Vano wakhalaka wiira ninaawaalikelela ciicammo athiyana ni amirawo, ayo atthwaayo pooti waaphiyaaya 15.000. (Mat. 14:21) Andre aheera: “Haavo va mwammirawo rina iphaawu thanu niihopa piili.  Masi niireke wiira cinaahala unitosera otheene va?” (Joau 6:9) Iphaawu co isevata caarinaawe uyo mwammirawooyo yaari iyoolya yaacuweliya cinene venci-venci naatthu oohuva. Ihopannyo atthunaka caari comaakha. Masi hataa ukhalaka commo, iphaawunnyo niihopannyo khacaahala waatosera hataa vakaani atthu otheene.

4. Isiyani ineetthuceehu ni Joau 6:11-13? (Nwehe ciicammo ilatarato.)

⁴ Yesu ahaawacera saana ale atthwaale. Phimaana, ahaalepela wiira apanke ikhurupu cankaani ni yookomace. (Mark. 6:39, 40; Nsome Joau 6:11-13.) Vano Ibiibiliya ineera wiira Yesu ahonsukhuru Yehova nlattu wo nnyo iphaawunyo ni ihopannyo. Ni upanka iyo itthwiiyo yaari itthu yofayita uhoolo wa Nluku, kontha uyo phaakumihenre ile iyoolyeele. Itthu yaapankilyaawe Yesu inaaniitthuciha itthu yofayita, hiiva ninlamuliya ulompa nihinaaya ulya hataa nikhalaka veekha awula waatthuni. Umaliha wawe ulompa, Yesu ahookawa iyo iyoolyeeyo ni yahaaphiyera atthu otheene mpaka uhala. Ni uyo khaaphenle wiira irihiye iyoolya yaahanle. Phimaana, uyo ahaalepela attharyaawe wiira atakanihace iyoolya yotheene yaahanle ni asunke. Iyo ikhanle itthu yofayita inlamuliyeehu wiitthuca, khanimpheela uwacera pusya citthu cirineehu, nimpheela uvarela naankhili. Wakhala wiira nyuuva nhaana asaana, nnoonela cani uvarela nteko ila ihantisiila wiira mwiitthucihe asaaneenyu ulompa ahinaaya ulya, waakhela saana aletto ni ukhala namavaha khampa Yesu caaryaawe?

5. Isiyani atthu yaapheelaaya umpanka Yesu ni isiyani yaapankilyaawe?

⁵ Ule ukatyuule, atthu yahokhala otikinihaciya nimananna Yesu eetthucihaawe ni miiriirya  caapankaawe. Khalayi, Moocesi ahohimya wiira Nluku anaahala unkumihera porofeeta muulupale ni ayo atthwaayo yancuwela iyo itthwiiyo. Vano, ayo atthunaka yaaneekoha co: ‘Niireke wiira Yesu phi porofeeta aaciya?’ (Deut. 18:15-18) Ayo yancuwela wiira Yesu aahala ukhala nhooleli omaana, kontha uyo anaahala waavaha iyoolya atthu otheene. Yuupuwelaka naayo manannaayo, ayo yaapheela “unvahacera umwene.” (Joau 6:14, 15) Unari wiira Yesu ahotthuna ukhala mwene, uyo anaahala wiikelakeliha nsiyaasani yaahooleli o Yuuta ni o Rooma. Masi Yesu, khaapheela wiikelakeliha nsiyaasani. Ibiibiliya inhimya wiira uyo ahokhuma ni ahorwaa umwaakoni. Hataa akhanyererihiyaka wiira eekelakelihe isiyaasa, uyo khaapankile iyo itthwiiyo. Itthu Yaapankilyaawe inaaniitthuciha itthu yofayita mahukweehwaala!

6. Ninhala untakiha cani Yesu? (Nwehe ciicammo ilatarato.)

⁶ Mahukweehwaala khaninlepeliya upanka mwiiriirya, ciicammo khaavo nhala unikhanyereriha ukhala mwene, masi pooti ukhalaka wiira haavo ntthu nonikhanyereriha unthanla ntthu wiira akhale nhooleli awula unkavihera ntthu nocuweliya ukhala omaana ni ooreera uhoolela. Masi ntakihero na Yesu, ninaathoonyera wiira uyo ahokhotta upankela mphantte isiyaasa. Ukati nkhwaawe uyo aheera co: “Umwennyaaka khunakhala wo ila ituninyeela.” (Joau 17:14; 18:36) Khampa makristau, hiiva nintakiha moopuwelelo a Yesu. Phimaana, ninkavihera Umwene wa Nluku.  Uyo phiri Umwene hiiva ninlalyeehu ni unlompeehu. (Mat. 6:10) Masi nttwee noone itthu ineetthuceehu ni mwiiriirya wo phaawu Yesu waapankilyaawe.

“ITTHU INTAPHULELAAYA IPHAAWU”

7. Isiyani Yesu yaapankilyaawe ni manannani maapostolu caakhanlyaaya? (Joau 6:16-20)

⁷ Yesu waaliha wawe atthu enci uyo aheerela maapostolwaawe wiira yahaana arwaaka o Cafarnaum nkalawani, masi uyo khaahala urwaa nkhayi naayo. Uyo ahokhuma veekhaawe arwaaka umwaakoni, upanka wawe commo ahokhitiri waatthawa atthu yaapheela unkhaliha mwene. (Nsome Joau 6:16-20.) Ukati maapostulwaayo waalapuwaaya ipahari yahancera iphyo yuulupale yaakumihera mawimpi. Vano Yesu ahorwaa mpaka waaryaaya maapostolu eettaka waculu maaci, vano ahonlattula ciicammo Peturu wiira nuuyo eette waculu maaci. (Mat. 14:22-31) Ukati Yesu waakenlyaawe nkalawani ipyoo yahomaala ni maapostolu yahokhala otikinihaciya mpaka yaheera: “Khweeliini nyuuva mwaana a Nluku.” a (Mat. 14:33) Moone wiira, maapostolu yuulumile ayo moolumwaayo umoona waya eettaka waculu maaci, uhiya ukati waapankilyaawe mwiiriirya wo phaawu. Moone itthu yofayita Markus yuulumilyaawe, uyo enre co: “Ayo yaahokhala ootikhinihiya venci kontha khayaakhitiri ucuwela itthu yiitthucihaaya mwiiriirya wo phaawu.” (Mark. 6:50-52) Maapostolu khayaakhitiri ucuwelela ikuru Yesu caavahiyaawe ni Yehova coopheela upanka mwiiriirya. Masi wahoolo, Yesu ahohokoleela wuuluma mwiiriirya wo phaawu, ni itthu yaahimilyaawe inaaniitthuciha itthu yofayita.

8-9. Kontha isiyani atthu yaarweelyaaya u Kafarnau umwaavya Yesu? (Joau 6:26, 27)

⁸ Usawaya, atthu otheene yahoturuwela-tho nipuro Yesu aavahilyaawe iyoolya. Masi Yesu nkhayi ni maapostolwaawe khayaarweele nno nipuronno. Vano ayo atthwaayo yahokela ikalawa caya ni yahorwaa u Tiberíades mpaka U Cafarnaum, anwehawehaka Yesu. (Joau 6:22-24) Niireke wiira ayo atthwaayo yanwehaweha Yesu kontha yaapheela wiiweeha myaha Coomwene? Mena. Khweeliini, ayo yanwehaweha Yesu wiira aalihe. Nincuwela cani?

⁹ Moone itthu yiirannyeele ukati ale atthwaale wamphwanyilyaaya Yesu ncoko waattamenle u Cafarnaum. Yesu ahaahimerya ale atthwaale wiira yaawenle ulya ni ahoncerera eeraka “nnaahala ukhuura iphaawu mpaka urupala.” Nuuwakatyaaya, ahooluma aacaka iyo iyoolyeeyo wiira “iyoolya immala.” Vano uyo ahaakurumica uvara nteko wiira aphwanye “iyoolya inhala waaphwanyiha ukumi woohimala.” (Nsome Joau 6:26, 27.) Yesu aheera wiira iyo iyoolyeeyo yaahala uvahiya naathumwaane. Muupuwele mananna attharyaawe ciicoonilyaaya ucuwela waya wiira pooti waakhalanaaya iyoolya yaahala waavaha ukumi woohimala. Yaari iyoolyani ni manannani yaahalaaya ukhitiri uphwanya?

10. Isiyani atthu yaalamuliyaaya upanka wiira aphwanye ukumi woohimala?

¹⁰ Ayo ayuutaayo yooniha wiira yapheelaka uvahiya iyo iyoolyeeyo yahaana upanka itthu. Watthunaka yuupuwela miteko malamulo a Moceesi caarumaaya. Masi Yesu aheerela: “Itthu inoncivela Nluku phiila: mmwaamini ule uyova nveleelihilyaawe.” (Joau 6:28, 29) Wiira aphwanye ukumi woohimala, ayo yaalamuliya umwaamini ule aaveleelihiye ni Nluku. Iyo yaari ikwaha yoopacera Yesu ulumilyaawe iyo itthwiiyo. (Joau 3:16-18, 36) Vano ikwaha cikhwaawennyo, Yesu ahohokoleela wuuluma itthu inlamuliyeehu upanka wiira niphanye ukumi woohimala. —Joau 17:3.

11. Isiyani inoonihera wiira ayuuta yoopuwela citthu co mwiirutthuni paahi? (Isaalimu 78:24, 25)

 ¹¹ Ale ayuutaale khayaapheela unkupali Yesu. Mpanka yahonkoha co: “Mwiiriiryani weeva unhalaa upanka wiira noone ni nuukupali?” (Joau 6:30) Vano ayo yaheera: Mahuku a Moceesi asarayeli yaanavahiya manaa wiira ikhale iyoolyaaya yuulupale. (Nem. 9:15; Nsome Isaalimu 78:24, 25.) b Unawoonannya wiira ayo yaapheela iyoolya yo mwiirutthuni paahi. Ukati Yesu wuulumilyaawe “iphaawu yeekhweeli yo wiirimu,” yaahala waavaha ukumi woohimala, ayo khayaakohile itthu yaathoonyiheraaya. (Joau 6:32) Ayo yaari niiwasiwaasi cinene yapheelaka iyoolya yo mwiirutthuni mpaka uhikhitiri ucuwele itthu yofayita Yesu aapheelaawe wiitthuciha. Vano isiyani hiiva ineetthuceehu?

ISIYANI INLAMULIYEEHU UVAHA IFAYITA?

12. Manannani Yesu oonihenryaawe itthu irina ifayita muukumini?

¹² Itthu yofayita ineetthuceehu nhina ikapiitulu 6 ya Joau, ukhanle uhoolelihera citthu co mminepani muukumini wihu. Yesu aheetthuciha iyo itthwiiyo ukati waattehattehiyaawe ni Sotwani. Ule ukatyuule, ahoonihera wiira umwiiwelela Yehova phaari itthu yofayita uvikana iyoolya. (Mat. 4:3, 4) Mwaha waataphulenlyaawe umwaakoni, Yesu ahohimya ifayita urinaaya uwacera makhalelweehu o mminepani. (Mat. 5:3) Phimaana, nihaana niikohaka co: ‘Kiireke makhalelwaaka anaathoonyihera wiira upatthani urinaaka ni Yehova phiri itthu yofayita uhiya citthu cinkicivela?’

13. a) Kontha isiyani ihikhanlyaaya itthu yootakhala uniciva ulya? b) Isiyani Paulu inuupusenryaawe? (1 Akorintu 10:6, 7, 11) (Nwehe ciicammo ilatarato.)

¹³ Khinakhala itthu yootakhala wiilawa ni citthu cirineehu awula ulompa nihimyaka citthu cinnithwa khula nihuku. (Luka 11:3) Ibiibiliya ineera wiira unaareera ‘ulya, uwurya ni utteeliya nintekweehu.’ Iyo mpaka ineera wiira “cinkhuma wa Nluku.” (Ekles. 2:24; 8:15; Tiya. 1:17) Masi, khaninlamuliya uhiyerera wiira citthu cimpheeleehu co mwiirutthuni cikhale cootepa ukhalana ifayita muukumini wihu. Hiiva pooti uneetthucereehu niitthu apostolu Paulu aawantikhenlyaawe makristau o Korintu. Uyo ahooluma ntakihero noohinamaana apoovu o Sarayeeli noonihenryaaya ukati weettaaya muuthakoni uhela nhina itthu yaapankilyaaya waattamela mwaako Sinai. Vano Paulu ahohimya wiira khaninlamuliya ‘upheela citthu coohinamaana khampa apoovu o Sarayeeli.’ (Nsome 1 Akorintu 10:6, 7, 11.) c Yehova ahopanka mwiiriirya wiira aalihe asarayeli. Masi nlattu wo waacivela cinene ulya, wahaapanka pusya. (Manu. 11:4-6, 31-34) Uhiya commo, ukati wanswalenlyaaya ttontto, yaahoonihera wiira itthu yaacivela cinene waari ulya, uwurya ni uthuka, uhiya umwiiwelela Yehova. (Nkw. 32:4-6) Paulu ahovarela nteko nno ntakiheronno wiira awiitthucihe makristau o ule ukatyuule ukhala wiira waahattamela ukati waahalaaya ukwanyulaciya isittatti yo Yerusalemu. Hiiva ciicammo ninkhala mahuku ookhicera o ila ituninyeela. Phimaana, ninlamuliya wiiwelela ikano ya Paulu wiira nihipanke itthu yoohinamaana yaapankilyaaya asarayeli.

14. Isiyani Ibiibiliya inhimyaaya nhina icoolya ninhaleehu ukhalana upeephoni?

¹⁴ Ukati Yesu niitthucihilyaawe ulompa wiira “nnivahe ileelo iyoolya yo nna nihukunna,”  uyo ciicammo honisovenriha ulompa wiira ipankiye impheelaawe “wiirimu ciicammo va watuninyani va.” (Mat. 6:9-11) Nyuuva nnaakhitiri wuupuwela mananna cinhalaaya ukhala ituninya naakhuliyaka nna nivekelonna? Ibiibiliya inhimya wiira itthu impheelaawe Nluku upanka va watuninyani va, inaahela nhina iyoolya yomaana. Isaiya 25:6-8 inawoonihera wiira atthu otheene anahala ukhalana iyoolya yinci ni yoociva. Isaalimu 72:16 inaakhuluveliha wiira: “Khacinhala uthwaa icoolya ntuninyani motheene ni unaahala uruweriya cinene mpaka mmamyaakoni.” Nyuuva unawuutteelani nrima muupuwelaka nvarelaka nteko nnyo icoolyannyo wiira mpanke nkatthe, awula iyoolya yowuucivani cinene? Nhiliyale wiira nyuuva nnaahala uphattya miri cinyu ni ulya mihokorokho caya. (Isai. 65:21, 22) Apinaatamu otheene anaahala uphwanyera ifayita citthu cotheene.

15. Manannani anhalaaya wiitthucihiya atthu anhala wunwelelihiya? (Joau 6:35)

¹⁵ Nsome Joau 6:35. Moopuwele atthu yaakhunre iphaawu ni ihopa Yesu cuncerenryaawe ni mwiiriirya. Ule ukatyuule, ale atthwaale khayankupanli Yesu. Unookhalaru commo, pooti ukhalaka wiira ayo atthwaayo anaahala wunwelelihiya ni nyuuva nnaahala ukhalana iparakha yo waacuwela. (Joau 5:28, 29) Ayo atthwaayo anaahala wiitthuca moolumo a Yesu aneera: “Mi kikhanle iphaawu ikumi. Ule nokitthara, khinhala unvola-tho itala.” Ayo anlamuliya urwaa waamini wiivaherera wa Yesu. Ni uyo ukatyuuyo inaahala ukhala iporokaraama yoosomihiya atthu anhala wunwelelihiya ni ale anhala uyaryaa yo ukatyuuyo. Inrwaa ukhala itthu yootteeliha nrima waakavihera atthu akhwaawe wiitthuca ikhweeli! Upanka iyo itthwiiyo, inrwaa ukhala itthu yootepa uciva uvikana uciva wocoolya ninhaleehu ukhalana. Khweeliini, uvaresesa citthu co mminepani phinhala ukhala itthu yofayita muukumini wihu motheene.

16. Isiyani inhaleehu woona nhina mwaha unttharanana?

¹⁶ Nhina ula mwahoola, nihoona mphantte wo itthu inhimyaaya Joau ikapiitulu 6. Masi Yesu aheetthuciha citthu cinci cookumi woohimala. Ayuuta Yesu awuulumanyaawe yaalamuliya wiiweeha itthu yaahimyaawe ni hiiva ciicammo ninlamuliya wiiweeha. Phimaana, nhina yoosomiya inttharanana, ninaahala urweehela uhoolo usoma ikapiitulu 6 yo ivangeeliyu ya Joau.