MWAHA WOOSOMIYA 51
NCIPO 3 Yehova Onninivaha Ikuru, Nlipelelo, ni Nroromelo
Miithoriinyu ahaana ifayita uhoolo wa Nluku
“Sontte, nsunke minthoryaaka. Khayantikhiye minthoryaaka nlivuruni winyu?”—ISAA. 56:8.
ITTHU NHALEEHU WIITTHUCA
Wuupuwela wiira Yehova naacuwela nakhalaka ooriipiya nrima cinene ni uyo naahala univaha yotheene impheeleehu wiira niicoone ukhala saana.
1-2. Masakhani anhala uniiriha wunla?
OTHEENE cihu nihopaca wunla. Atthunaka ninaamorosa miithori nlattu wootteeliya. Wootakihera, nyuuva atthunaka nhopaca wunla ukati waakhumelenlyaaya itthu yofayita cinene khampa uyarya wo mwaana, atthunaka nnawuupuwela itthu yofayita yiirannyeele khalayi awula nnaamoona mpatthaniinyu mmonneenyu myaakha cinci uttuli.
2 Masi ikwaha cikhwaawe, miithoriihu nikhanle nthoonyero ninoonihera itthu inniwerya wanrimani wihu. Wootakihera, atthunaka ninawunla wakhalaka wiira ntthu honipanka itthu yooniriipiha nrima; kontha ninaahuva nlattu wo retta ipacenre uniwerya khalayi; awula nlattu wookhweliya ni ntthu nanfenteehu. Hiiva pooti wiicoona khampa porofeeta Jeremiya wiiconnyaawe ukati ababilooniya waakwanyulacilyaaya isittatti yo Yerusalemu. Uyo enre co: “Maaci menci anaakhuma mmiithoni waka . . . Miithwaaka anawunla woohihiyerera.”—Ucuk. 3:48, 49.
3. Manannani Yehova neecoonaawe amoonaka nswalyaawe ahuvaka? (Isaiya 63:9)
3 Yehova naacuwela ikwaha cotheene hiiva ninonleehu nlattu wo masakha annikhumelela. Ibiibiliya inaanikhuluveliha wiira Yehova nawoona khula masakha oorika aswalyaawe anaananaaya ni nawiiwa ulompa wihu. (Isaa. 34:15) Uhiya paahi univiriyana, uyo naapanka yotheene inkhitiryaawe. Khampa nyari onifento, uyo naakhala ooriipiya nrima amoonaka mwanaawe onlaka ni ciicammo ri owiitthenkaceene wiira ankavihere.—Nsome Isaiya 63:9. a
4. Matakiheroni o mbiibiliyani anhaleehu woopela mwaha ni inhaleehu wiitthuca?
4 Nuulumo na Yehova ninanoonihera mananna cineecoonaawe awoonaka aswalyaawe yamorihaka miithori. Wootakihera, hiiva pooti wiitthucera itthu yankhumelenle Ana, Davidi ni mwene Ezekiya. Ninaahala wiitthuca kontha isiyani ayo yaamorihilyaaya miithori ni manannani Yehova caakavihenryaawe. Ninaahala woona ciicammo manannani Yehova cinnimaalihaawe nakhalaka ooriipiya nrima, napankiyaka itthu yoonirusa awula nuupuwelaka wiira khanirina niweherero.
URIIPIYA NRIMA
5. Masakhani Ana aanannyaawe ni manannani uyo eecoonaawe?
5 Ana ahaanana masakha menci yaamwiiriha wunla. Itthu imoca yaamwiirannyenle ukati waathennyaawe naakhattyaawe yeehaniya Penina ayo khayaaciveliyani Ana. Uhiya commo, uyo khaarina hataa mwaana mmoca, Penina haarina asaana enci. (1 Sam. 1:1, 2) Penina ahooviriha ukati mwinci hinhisimaka Ana kontha uyo khaayara. Unari wiira yaahokhumelelani itthu khampa iyo, manannani caahaleenyu wiicoona? Ana ahookhala ooriipiya nrima cinene mpaka “wunla ni khaakhitiri ulya.”—1 Sam. 1:6, 7, 10.
6. Isiyani Ana yankavihenre umaalihiya?
6 Isiyani yankavihenre Ana wiicoona ukhala saana? Itthu yankavihenre waari urwaa mpaka nipuro naapankiya uswali weekhweeli, utabernaakulu. Nwo, atthunaka Ana eemenle wankhora wo tabernaakulu, uyo “ahopacera unlompa Yehova onlaka woohihiyerera.” Uyo ahonlompa Yehova wiira ‘oone masakha yaavirihaawe ni amuupuwele.’ (1 Sam. 1:10b, 11) Ana ahonlompa cinene Yehova. Ni Yehova umoona wawe onlaka, uyo aahokhala ooriipiya nrima ni khweeliini, ahonkavihera.
7. Manannani Ana eeconnyaawe ulompa wawe Yehova?
7 Vano unlompa wawe Yehova, nankuttho muulupale eehaniya Eli ahonkhuluveliha Ana wiira Yehova heewa ulompa wawe. Manannani Ana ceecoonnyaawe upanka wawe iyo? Ihantisi ineera: “Nthiyana aahokhuma ni ahopacera ulya, khakhanle-tho wanriipaka nrima.” (1 Sam. 1:17, 18) Khweeliini, hataa ukhalaka wiira masakha yaavirihaawe nanlelo yahaavo, uyo aahokhala oomalelya. Ana ahonkhuluvela Yehova ni aahonhiyera nrintti wanriipiha nrima. Yehova ahoona masakha Ana aavirihaawe, aaheewa ulompa wawe ni aahoncaaliha amwiirihaka ukhalana asaana.—1 Sam. 1:19, 20; 2:21.
8-9. Kontha isiyani ninlamuliyeehu upanka yotheene inkhitiriihu wiira nihicompe umikutthaanoni? (Maberewu 10:24, 25) (Nwehe ciicammo ilatarato.)
8 Itthu ineetthuceehu. Nyuuva nnaawaanana masakha oorika anwiirihani ukhala ooriipiya nrima ni mpaka wunla? Atthunaka nyuuva nnaahuvahuva nlattu wookhwa mmuciinyu awula mpatthaniinyu. Uyo ukatyuuyo, nyuuva pooti upheela ukhala veekha. Masi khampa Ana waamaalihiyaawe nlattu woorwaa utabernaakulu, nyuuva ciicammo pooti umaalihiya mwarwaaka woona mikutthaano—hataa ukhalaka wiira nyuuva nhowocaa awula nri ooriipiya nrima ni khannoopuwela urwaa umikutthaanoni. (Nsome Maberewu 10:24, 25. b) Umikutthaanoni, hi ninaasoma iveerusu yo mbiibiliyani innikavihera wuupuwela citthu cofayita, cinnilipiha. Naayo manannaayo, Yehova naanikavihera uhiya wuupuwela citthu cinhala uniriipiha nrima. Napankaka commo, hiiva phinhaleehu ukhitiri uweheeha saana moopuwelelweehu ni wiicoona ukhala saana, hataa ukhalaka wiira nanlelo ni naawaanana masakha oorika.
9 Umithukumanoni wihu, hiiva ciicammo ninaaviriha ukati nkhayi nimayamunneehu ni mayanuunwiihu annifenta cinene, annimaaliha ni annilipiha. Ninawiicoona saana nakhalaka naayova. (1 Atesal. 5:11, 14) Moone itthu yankhumelenle piyoneeru mmoca owiivaherera khweliye amwaarawe. Uyo neera: “Ikwaha ikhwaawe miiva kinaapheelaka ukhala veekha kontha akinkhitiri ukhala ukati mwinci woohunla. Mi kinawuupuwela cinene amwaaraka. Masi karwaaka umikutthaanoni, unaakitteela nrima cinene. Moolumo onifento o mayamunna ni o mayanuunu ni ikomentaariyu caya cinaakimaaliha cinene. Hataa kikhalaka niiwasiwaasi nno nihukunno, karwaaka umikutthaanoni, kinawiicoona ukhala saana. Ni umithukumanoni wihu, Yehova pooti waavarela nteko mayamunna wiira anikavihere.
Hiiva pooti wiicoona ukhala saana neewaka moolumo omaana o mayamunneehu ni o mayanuunwiihu (Nwehe iparaagarafu 8 ni 9.)
10. Manannani ninhaleehu utthara ntakihero na Ana waniriipaka nrima?
10 Ana ciicammo aaheecoona umaalihiya ukati wanlompilyaawe Yehova anhimeryaka itthu yaamwiira. Nyuuva ciicammo pooti unhimerya Yehova citthu cinwiirani ni ukhuluvela wiira uyo nawiiwa ulompa winyu. (1 Pet. 5:7) Arokorihu amoca yiiveliye awannyaya naanakhirini, aneera: “Mi keecoona khampa nrimaaka waarina miphantte cinci ni mpaka waahakhitiryaaka ukhala saana. Itthu imoca yaakimaalihile waari waalompela Apaapa, Yehova, khanle onifento. Ikwaha cikhwaawe, mi akaakhitiri uhimyaca itthu yaakiira. Masi uyo ahokiviriyana. Ukati keecoonaaka uhikhala saana mwiirutthuni waka, mi kanonlompa Yehova kanlepelaka nnema. Ni ukati yooyo, mi kahokhitiri ukhala ninnema ni uhihiyerera urwaa uhoolo.” Mwanlompaka Yehova ni mwanhimeryaka citthu cinooriipihani nrima, uyo ciicammo naakhala ooriipiya nrima ni naacuwela sana-saana mananna nyuuva cineecooneenyu. Hataa ukhalaka wiira citthu cinoocukulihani nanlelo cihaavo, Yehova pooti wuumaalihani ni wuukaviherani ukhalana nnema. (Isaa. 94:19; Afili. 4:6, 7) Yehova nawoona wiikurumica winyu wiira nhihiyerere ukhala ookhuluvelya ni naahala wuucaaliha nhina yotheene impankeenyu.—Mabere. 11:6.
CITTHU CAHAAWEHEREREEHU
11. Manannani Davidi ciiconnyaawe ukati waatumihiyaawe naatthu akhwaawe?
11 Muukumini wawe motheene, Davidi ahaana waanana masakha oorika yaamwiiriha wunla. Uyo ahaana waanana masakha menci aakumihereriyaawe naatthu akhwaawe ni mpaka aahotumihiya naale yaakhuluvelaawe. (1 Sam. 19:10, 11; 2 Sam. 15:10-14, 30) Uyo mpanka aheera co: “Kihoocya mwaha woomakelaka wunla; uhiyu wotheene kinlakela uttapwiha ikoryaaka nimiithori; ukati kinonlaaka, miithoryaaka kinaacarihaka wakhaterani waka toko maaci.” Kontha isiyani Davidi eeconnyaawe commo? Uyo neera: “Nlattu waatthu ampheela ukiiva.” (Isaa. 6:6, 7) Citthu atthu akhwaawe campankilyaaya Davidi caari coohinamaana. Uyo waanonwerya nrima cinene ni mpaka khakhitiri umala wunla.
12. Khampa cinthoonyeraaya Isaalimu 56:8, isiyani Davidi yaakupalyaawe?
12 Hataa ukhalaka wiira Davidi yaanonkhumelela masakha oorika muukumini wawe, uyo ankupali wiira Yehova aanonfenta. Uyo ahantikha co: “Yehova nawiiwa wunla waka.” (Isaa. 6:8) Ukati mmoca, Davidi ahantikha moolumo omaana amphwanyannya nhina Isaalimu 56:8. c (Nsome.) Itthu Davidi antikhilyaawe nhina ila Isaalimwiila, ikhanle yoovara nrima kontha inawoonihera mananna Yehova cinnifentaawe ni nniwaceraawe. Mpaka waakhala khampa Yehova howantikhila nlivuruni khula ukati Davidi wunlaawe. Davidi ankupali wiira Yehova aanonviriyana ni anoona citthu caamwiira. Ni uyo ankupali wiira Apaapaawe onifento, Yehova yancuwela masakha otheene yaavirihaawe ni mananna cankavihenryaaya.
13. Atthu yanipankaka itthu yahaaweherereehu, isiyani inlamuliyeehu wuupuwela? (Nwehe ciicammo ilatarato.)
13 Itthu ineetthuceehu. Nyuuva uhuuripani nrima kontha ntthu mwankhuluveleenyu hoopankani itthu mwaahaaweherereenyu? Atthunaka nyuuva unawuuripani nrima kontha ntthu mwancuweleenyu wiira nuuwakatyaaya munthele awula nhomwalanaca naamwaarinyu woohipica. Awula ntthu nyuuva mwanfenteenyu cinene naahiya unswalela Yehova. Amunna amoca yeetteliye uluva ni ahinnyaka naamwaaraya aneera: “Mi akaakupali wiira yanhala ukikhumelela iyo itthwiiyo. Mi wankiriipa nrima, kakhalaka ooviruwaca ni koopuwela wiira phimi kaapankile itthu yoohinamaana.” Wakhala wiira nyuuva nnawaanana citthu coohiloka caahaweherereenyu, muupuwele wiira Yehova khanhala wuunyanyalani. Yoole munnoole neera: “Mi kihoonenela wiira atthu khankhuluvelya mpaka, masi Yehova paahi phikhanle ookhuluvelya kontha uyo khanle Mwala. Hataa yiirannyaaka isiyani, Yehova khanhiya unikavihera. Uyo khanaanyanyala ale anonkhuluvela.” (Isaa. 37:28) Uhiya commo, nhiliyale wiira nifento na Yehova nikhanle nootepa wuunuwa uvikana nifento naatthu akhwaawe. Khweeliini, ikhanle itthu yoowerya weetteliya uluva awula upankiya itthu yaahaweherera, muupuwele wiira Yehova khanrukunusa itthu impheelaawe ni nawuuwacerani nyuuva. Nyuuva nkhanle owaarya uhoolo wawe. (Aroo. 8:38, 39) Itthu ineetthuceehu phiila: hataa ukhalaka wiira atthu khanniwacera ni mananna omaana, Apaapeenyu owiirimu, Yehova, nawuufentani cinene.
Ilivuru ya Isaalimu inaanikhuluveliha wiira Yehova ri wakhiviru naale ari nimasukhuli (Nwehe iparaagarafu 13.)
14. Nikhuluvelihoni Isaalimu 34:18 innivahaaya?
14 Cuukhumelelakani citthu coohinamaana caahaweherereenyu, nyuuva pooti umaalihiya mwasomaka moolumo omaana amphwanyannya nhina Isaalimu 34:18. d (Nsome.) Yuulumaka iyo Isaalimwiiyo, ireferensiya imoca inataphulela wiira atthu “ari nimasukhuli” pooti waaciya “atthu ahirina niweherero noohoolo.” Isiyani Yehova impankaawe wiira akavihere atthu aneecoona uhikhala saana nlattu wo waakhumelela citthu caahawehereraaya? Khampa nyari onifento nonkapatta mwanaawe wiira ammaalihe yankhumelelaka masakha, Yehova “ri wakhiviru” wo khula ntthu. Yehova khanhiya unoonihera unakiriryaawe ni ciicammo ri owiitthenkaca wiira anikavihere nakhalaka ooriipiya nrima. Yehova naapheela cinene unimaaliha nakhalaka canikhumelelaka citthu cooniriipiha nrima cahaaweherereehu. Ni uyo naanivaha citthu cinci comaana coohoolo ni cinnikavihera uvilela masakha anaananeehu mahukwaala.—Isai. 65:17.
UHIKHALANA NIWEHERERO
15. Isiyani yankhumelenle Ezekiya yaamwiirihile wunla?
15 Ukati waarinaawe myaakha 39, Ezekiya, mwene o Yuuta, ahoonenela wiira ahaana ireetta yoohivoniya. Yehova aahonlepela porofeeta Isaiya wiira anhimerye Ezekiya wiira anhala ukhwa nlattu wo iyo iretteeyo. (2 Mam. 20:1) Waakhala khampa Ezekiya khaarina niweherero itthu yoohala upanka. Uyo aahokhala ooriipiya nrima ni hataa wunla khamaala. Vano, uyo ahonlompa Yehova ikwaha cinci.—2 Mam. 20:2, 3.
16. Manannani Yehova aakhunlyaawe ulompa we Ezekiya?
16 Umoona wawe Ezekiya onlaka, Yehova aahomoonela uthunku uyova ni uyo aahomwiirela: “Kiheewa ulompa wa; kihoona wunla wa. Phimaana kinaahala wuuvoniha.” Yehova aahomoonela uthunku ni aahonkhuluveliha anvarelaka nteko porofeeta Isaiya, wiira anhala wuuncerera mahukwaawyaayo ni anhala unkhikicere Yerusalemu mmatatani waawanani oosiriya.—2 Mam. 20:4-6.
17. Yaniphwanyaka ireetta yuulupale, manannani ninhaleehu ukhuluvela wiira Yehova naahala unikavihera wiira nihihiyerere urwaa uhoolo? (Isaalimu 41:3) (Nwehe ciicammo ilatarato.)
17 Itthu ineetthuceehu. Nyuuva nnawaanana ireetta inuuweryaani ni khannoona itthu yoohala upanka? Munlompe Yehova hataa hataa munlaka. Ibiibiliya ihonikhuluveliha wiira “Apaapeehu oowinciva uthunku ni Nluku rina mamaalihero otheene” anaahala unimaaliha masakha otheene annikhumelela. (2 Akor. 1:3, 4) Khweeliini, hi khaninweherara wiira Yehova aamalamalihe masakha otheene mahukwaala. Masi hataa ukhalaka commo, hiiva pooti wankhuluveleehu wiira Yehova naahala unikavihera ni unimaaliha. (Nsome Isaalimu 41:3. e) Avarelaka nteko nnepaawe wowaarya, Yehova naanivaha ikuru, ucuwelaca ni nnema nuulupale wiira naanane masakha annikhumelela. (Miru. 18:14; Afili. 4:13) Inanna ikhwaawe Yehova innilipihaawe ukhanle nlattu wo niweherero noohoolo, khuluvelihilyaawe wiira woohipica naahala umaliha masakha otheene ni khaavo-tho noohala wiira kinaawerennya.—Isai. 33:24.
Yehova naahala waakhula mavekelweehu anivahaka ikuru, ucuwelaca ni nnema nuulupale (Nwehe iparaagarafu 17.)
18. Iveerusuni inoomaalihani mwaananaka masakha oorika? (Nwehe ikwaaturu “ Nuulumo na Yehova ninaanimaaliha nakhalaka ooriipiya nrima”.)
18 Ezekiya aahomaalihiya ni moolumo a Yehova. Hiiva ciicammo pooti wammaalihiyeehu Ninuulumo na Nluku. Yehova heeriha wantikhiya mbiibiliyani iveerusu cinci cinhala unimaaliha ni uniphwanyiha utteeliya ukati wo masakha. (Aroo. 15:4) Moone ntakihero naanuunu amoca o wa África yunla nlattu woretta yo câncro. Ayo aneera: “Iveerusu yaakilipihile cinene yaari Isaiya 26:3. Khweeliini, hiiva khaninkhitiri uweheeha masakha anaananeehu. Masi ila iveeruswiila inaakupusera wiira Yehova pooti ukivaha nnema nuulupale ninhala ukikavihera uweheeha mananna owaanana masakha anhala ukikhumelela.” Vano yuukhumelelakani? Ihaavo iveerusu inoomaalihani ukati nnaananeenyu masakha oorika anukhumelelani ni ankhala khampa khannoona mananna oohala utthema?
19. Niwehereroni nirineehu noohoolo?
19 Ninkhala ukati oorika cinene—wuukhiceroni mahuku. Nlattu wo iyo, hiiva ninaaweherera waanana masakha oorika ni mpaka wunla. Masi khampa noonileehu nintakihero na Ana, Davidi ni mwene Ezekiya, Yehova nawoona uriipiya wihu nrima ni nookhala ooriipiya nrima anoonaka nonlaka. Miithoriihu akhanle ofayita uhoolo wa Yehova kontha ayo anawoonihera wiira khaninhiya ukhala ookhuluvelya hataa anikhumelelaka masakhani. Vano, yookhumelelakani masakha oorika, munlompe Yehova ni mwiikurumice uviriha ukati nnari nkhayi nimayamunna ni mayanuunu o wanlokoni. Nsome Ibiibiliya wiira mphwanye umaalihiya nimoolumo omaana a Yehova ni nkupali wiira mwaahihiyerereke uvilela wookhuluvelya, Yehova naahala wuucaalihani. Nwo ucaalihiya nwo, unaahela nhina iparakha cowaarya cinhala wiirannya woohipica, ukati unhalaaya uhikhala-tho wunla nlattu ooriipiya nrima, upankiya citthu coohinamaana cahaaweherereehu ni uhikhalana niweherero noohoolo. Yehova naahala urwaa uvuta miithori otheene. (Apoka. 21:4) Waphiyaka uyo ukatyuuyo, hiiva ninaahala urwaa utteeliya venci ni mpaka wunla!
NCIPO 4 Yehova “ti Makampusi Aka”
a Isaiya 63:9 Ukati wotheene waaryaaya ni masukhuli, uyo ciicammo aakhala ni masukhuli. Ni nrumiyaawe ahowoopola. Nlattu wo waafenta ni woowoonela uthunku, uyo ahowoopola; uyo ahaavusa ni ahaateesa mahuku otheene okhalayi.
b Maberewu 10:24 Ni nihaana niwaceranaka wiira nikurumicane uthoonyera nifento ni upanka miteko comaana, 25 woohihiya uthukumana, toko cilamalenlyaaya atthu akiina, masi nilipihanaka, utepa wanooneehu waattamela nihuku.
c Isaalimu 56:8 Nyuuva nnaakiveleela mapuro otheene anviraaka. Sontte, nsunke minthoryaaka. Khayantikhiye minthoryaaka nlivuruni winyu?
d Isaalimu 34:18 Yehova ri wakhiviru ni ale arina nrima wooriipiya, uyo naawoopola ale ari ni masukhuli.
e Isaalimu 41:3 Yehova naahala ummaaliha wankorini woowerennya. Ukati unwerennyaawe, unaahala unwacera saana.
