Nyuuva nhosoma mwaha co irevista Ukhalenla yo ula mwaakhoola? Vano, mwaakhule ala makohwaala:

Ntakiheroni Yehova nivahilyaawe nhina mananna o waawacera athiyana?

Uyo kanaawacera pusya athiyana ni khanwoona ukhalana ifayita paahi alopwana uvikana athiyana. Uyo nawaaviriya athiyana ni unancivela ucuwela mananna aneecoonaaya ni iwasiwaasi caya. Ni uyo naakupali wiira ayo pooti uwacera khula nrintti unkhalanaaya. —w24.01, pp. 15-16.

Manannani ninhaleehu weette ikano imphwanyannya nhina Efesu 5:7, ineera: “Nhikhala apatthani naayo”?

Apostolu Paulu aahimya wiira khaninlamuliya waakhalakhalana akhayi atthu anhala uniiriha uhiya umwiiwelela Yehova. Iyo nhela nhina uviriha ukati naatthu akhwaawe uhiya paahi co ni co, masi ciicammo naavarelaka nteko redes sociais.—w24.03, pp. 22-23.

Ihantisini cowoothiya cinlamuliyeehu wiikhikicera?

Khaninlamuliya uviriyana ihantisi cinhimyaaya mayamunna awula asipatthaniihu cikhanle cowoothiya, e-mail cinenviyaryaaya atthu ahinaacuweleehu ni atthu anvannyiha itthu ineetthucihaaya Ibiibiliya ankhala khampa unawaacivela wiitthuca ikhweeli. —w24.04, p. 12.

Isiyani incuweleehu ni ihincuweleehu nhina mananna Yehova cinhalaawe urwaa unhukhumu mwene Salomau ni atthu akhwile o Sodoma ni u Gomorra ni ucara wo maaci?

Hi khanincuwela sana-saana waakhala wiira Yehova khanhala wonweleliha-tho. Masi nincuwela wiira uyo phincuwela citthu cotheene cipankilyaaya ni uyo khanle naakiriri. —w24.05, pp. 3-4.

Kontha isiyani ninlamuliyeehu unkhuluvela Nluku nlattu wookhala “Mwaala”? (Deut. 32:4)

Hiiva pooti umpanka Yehova ntthawelweehu. Uyo khanle ookhuluvelya ni khanhiya wiirannyeeha itthu ikhuluvelihilyaawe. Ni uyo khanrukunusa makhalelwaawe ni ile yaakhuluvelihilyaawe apinaatamu. —w24.06, pp. 26-28.

Isiyani inhala unikavihera ulamalela nloko nophiyaaru?

Nkhuluvele wiira Yehova naahala wuukaviherani nyuuva khampa caakavihenryaaya aswalyaawe okhalayi. Nhilattanihe nloko mwaariinyu khalayi. Mwiikurumice uvara miteko co wanlokoni nthamenleenyu phiyaaru ni ciicammo mwiikurumice waapanka apatthani. —w24.07, pp. 26-28.

Isiyani ineetthuceehu nimatakihero mararu amphwanyannya ni Matewus ikapiitulu 25?

Ntakihero nopuri ni nokhontwaa ninaaniitthuciha ifayita urinaaya ukhala atthu ookhuluvelya. Ntakihero naasimwaarusi ankhili ni oohankhili ninaaniitthuciha wiira nihaana nikhalaka owiitthenkaca ni oohiitthaala. Ni ntakihero no talento ninawoonihera ifayita urinaaya wiikurumica uvara nteko cinene ni upanka yotheene inkhitiriihu. —w24.09, pp. 20-24.

Manannani caarekamilyaaya nkhora wo itempulu yaatekilyaawe Salomau?

Nhina iwarakha 2 Ikoronika 3:4, coowontikhiya cookhalayi cikhwaawe irekamelwaaya caari ikoovadu “120” awula imeeturu 53. Masi iveerusu cikhwaawe cookhuluvelya irekamelwaaya caari ikoovadu “20” awula imeeturu 9, yoonihera sana-saana ulikanaca niiciri yo itempulwiiyo. —w24.10, p. 31.

‘Ukhalana athiyana amoca’ maanaaya isiyani para ale akhanle anamakavihera o wanlokoni? (1 Tim. 3:12)

Maanaaya wiira haana waathela athiyana amoca ni khanlamuliya uraruwa. Uhiya commo, uyo khanlamuliya uciveliya naathiyana akhwaawe. —w24.11, p. 19.

Kontha isiyani atthunaka ninlamuliyeehu wiira Joau 6:53 khinhimya Iyoolya Yaapwiiya?

Joau 6:53 inooluma ukhura inama ya Yesu ni uwuurya iphomyaawe. Yesu oolumilyaaya mwoolumwaala mwaakha 32 naawile Kristu, u Kalileeya, awuulumelaka Ayuuta yahaamwamini. Masi Iyoolya Yaapwiiya yaatthenkaciye unavinre mwaakha mmoca, u Yerusalemu. Nwo, Yesu aahowuulumana ale aahalaawe waavarana nteko woolamulela wiirimu. —w24.12, pp. 10-11.