Apostolu Paulu ahoomwantikhe mpatthannyaawe Timotiyu co: “Kinooruma uhoolo wa Nluku ni wa Yesu Kristu ni wo malayikha oothanliya, wiira utthare malakiherwaala yoohinthannya hataa ntthu.” —1Tim. 5:21.

Yoopacera, nttwee noone tapani akhanle ayo malayikha oothanliyaayo. Khanaakhala ale aathanliye 144.000. paulu umwantikhela wawe Timotiyu, wunwelelihiya wo makristau oothanliya wiira yaakhale wiirimu khaawaari uhinaaphiya ukati. Mapostolu ni makristau oothanliya akhwaawe khanaaya ukhala malayikha, vano ayo khayalamuliya ukhala “malayikha oothanliya.” —1 Akor. 15:50-54; 1 Atesal. 4:13-17; 1 Jo. 3:2.

Uhiya commo, malayikha oothanliya khanlamuliya ukhala malayikha oohinamaana yaahunnya maaru ukati woocara maaci. Ayo malayikhaayo yaahokhala mphantte wa Sotwani, yaakhalaka maciini ni awanani a Yesu. (Upha. 6:2; Luka 8:30, 31; 2 Pet. 2:4) Uhoolo, ayo anrwaa utthukeliya mpaka myaakha 1000 ni anaahala urwaa umalamalihiya nkhayi ni Sotwani. —Yuda 6; Apok. 20:1-3, 10.

Vano, “malayikha oothenliya” Paulu himilyaawe akhanle malayikha anvara nteko nkhayi ni “[Yehova] ni Yesu Kristu” wiirimu, ni ciicammo ahimiye nhina ila iveeruswiila.

Ahaavo malayikha ookhuluvelya imiliau cine. (Mabere. 12:22, 23) Anoonihera wiira Yehova khanvaha nrintti mmocaaru malayikha otheene. (Apok. 14:17, 18) Wootakihera, ikwaha imoca, Yehova aahoruma nlayikha nimoca wiira naatankanye anatoropa 185.000 asiriya. (2 Mam. 19:35) Vano malayikha makhwaawe pooti urumiya wiira ‘akhale nkhayi no Mwene [wa Yesu] wiira yaakumihe ale anaatthekiha akhwaaya ni ampanka citthu cootakhala.’ (Mat. 13:39-41) Makhwaawe atthunaka anvahaceriya ‘waathotokaniha makristau oothanliya’ wiira yaakhale wiirimu. (Mat. 24:31) ni makhwaawe anvaheciriya ‘unikhikicera mapuro otheene.’ —Isaa. 91:11; Mat. 18:10; 4:11; Luka 22:43.

“Malayikha oothanliya”, ahimiye nhina iwarakha 1 Timotiyu 5:21, yaari malayikha yaavahaceriye ukavihera uwacera maloko. Murwaaya ila iveeruswiila, Paulu hoovaha ikano mananna mahumu anhalaay uwacera nloko ni utafiti niihisima. Ikwaha cikhwaawe, mahumu, ahaana uwacera mirintti caya ‘woohithanla’ ni khanlamuliya ulakela itthu yoohala upanka nimananna anaacivela. Itthu yuulupale inaakurumica mahumu utthara ikano ya Paulu ukhalaka wiira ayo anawuupuwela “uhoolo wa Nluku, wa Yesu Kristu ni wo malayikha oothanliya.” Naala manannaala, unawoonannya wiira malayikha makhwaawe avahaceriye uwacera maloko. Ni ayo anawaakhikicera apoovu a Nluku, anaawehaweha nteko woolalyeeriya ni ananhimerya Yehova citthu cinoonaaya.—Mat. 18:10; Apok. 14:6.