MWAHA WOOSOMIYA 5
NCIPO 108 Ophenta wa Muluku Khonimala
Iparakha cirineehu nlattu wo nifento na Yehova
“Yesu Kristu howa watuninyani wiira awoopole anamatampi.” —1 TIM. 1:15.
ITTHU INHALEEHU WIITTHUCA
Nhina ula mwahoola, ninaahala woona iparakha cikhwaawe cirineehu nlattu wo woopoliya ni manannani ninhaleehu woonihera unsukhuru Yehova.
1. Manannani ninhaleehu untteeliha nrima Yehova?
MUUPUWELE wiira nyuuva nnanvaha ntthu nnofenteenyu itthuvo yomaana. Uhiya ukhala yomaana paahi, ciicammo ikhanle yofayita. Vano ntthuuyo naasunka itthuvweeyo ni naaliyala. Khweeliini nyuuva wanhala wuuriipani nrima cinene! Masi unari wiira ntthuuyo anvarela nteko iyo itthuvweeyo ni wuuhimeryani wiira inancivela, khweeliini nyuuva wanhala wuutteelani nrima. Kontha isiyani nno ntakiheronno ninvaranacaaya nuwoopoliya? Yehova onvaherera mwanawe wiira anoopole. Khweeliini, uyo unantteela nrima cinene acuwelaka wiira ninaasukhuru iyo itthuvo yofayiteeyo ni nifento ninoonihenryaawe unvaherera wawe mwanawe wiira alive iteeni yaarineehu! — Joau 3:16; Aroo. 5:7, 8.
2. Isiyani inhaleehu woona nhina ula mwahoola?
2 Masi ukati nkhwaawe, pooti ukhalaka wiira ninaaliyala ifayita urinaaya woopoliya wihu. Nimoolumacero makhwaawe, nikhalaka khampa nisunkile iyo itthuvweeyo nkaaxani. Hiiva ninaacuwela upuro iryaaya iyo itthuvweeyo, masi khaninwacera. Wiira iyo itthwiiyo ihiirannye, ninlamuliya khula ukati woonihera unsukhuru wihu Yehova ni Yesu niitthu inipankenlyaaya. Ula mwahoola, unaahala unikavihera upanka iyo. Ninaahala woona iparakha cirineehu nna co ni cinhaleehu ukhalana uhoolo nlattu wo woopoliya. Ninaahala woona ciicammo, isiyani ilamuliyeehu upanka wiira noonihere usukhuru nifento na Yehova, venci-venci ukati wo Nuupuwelelo.
IPARAKHA CIRINEEHU NNA CO
3. Iparakhani irineehu nna co nlattu wo woopoliya wihu?
3 Nna co, hi nihaana iparakha cinci nlattu wowiivaherera wawe Yesu. Wootakihera, Yehova naanilevelela itampi cihu nlattu wo woopoliya. Khampanka iyo nlattu wookhannyererihiya nintthu. Kontha Yehova nopheela unilevelela. Nasaalimu ansukhurweela ulevelela wa Yehova, phimaana aheera co: “Kontha nyuuva, Yehova, nkhanle namaana ni khula ukati nnaatthuna ulevelela.” —Isaa. 86:5; 103:3, 10-13.
4. Taapani Yehova alivelyaawe iteeni? (Luka 5:32; 1 Timotiyu 1:15)
4 Atthu akhwaawe, atthunaka anoopuwela wiira khunaaphwanela uleveleliya ni Yehova. Masi khweeliini khunniphwanela. Apastolu Paulu ancuwela wiira ‘khawamphwanela wiihaninya apostolu.’ Hataa ukhala commo, uyo enre co: “Masi unamaana woonironya wa Nluku uhokiiriha ukhala ntthu kiryaaka nna co.” (1 Akor. 15:9, 10) Nooniheraka uttharuwa nlattu wo matampiihu, Yehova naanilevelela. Kontha isiyani? Kahi nlattu wooniphwanela, kontha uyo naanifenta cinene. Vano, wakhalaka wiira unawuuriipani nrima muupuwelaka wiira khunoophwanelani uleveleliya ni Yehova, muupuwele wiira uyo honvaherera mwanawe kahi para apinaatamu oohipahuwa, masi ale akhanle oopahuwa yooniheraka uttharuwa. —Nsome Luka 5:32; 1 Timotiyu 1:15. a
5. Niireke nihaana wuupuwela wiira nihaana isariya yooleveleliya ni Yehova? Ntaphulele.
5 Khaavo ntthu nolamuliya wuupuwela wiira nihaana isariya yooleveleliya ni Yehova hataa ukhalaka wiira nihoviriha myaakha cinci nanswalelaka. Khweeliini, Yehova naavaha ifayita ni khanliyala yotheene ipankileehu. (Mabere. 6:10) Masi uyo honvaherera mwanawe khampa itthuvo, uhiya unvaherera khampa wiira nooniliva nteko unonvareleehu. Yaahala ukhala itthu yoothakhala wuupuwela wiira wanniphwanela uleveleliya hataa hinvaherenre mwanawe. Wuupuwela commo, waahala ukhala khampa wiira phataari Kristu hikhwile.—Nwehe ciicammo Akalasiya 2:21.
6. Kontha isiyani Paulu eekurumicaawe unvarela nteko Yehova?
6 Paulu ancuwela wiira khawamphwanela uleveleliya ni Nluku. Vano, kontha isiyani uyo eekurumicaawe unvarela nteko Yehova? Aapanka iyo wiira oonihere usukhurweela unamaana wonronya wooniheriyaawe ni Yehova. (Efesu 3:7) Khampa Paulu, hi khaninhiyerera wiikurumica unswalela Nluku kahi nlattu wooniphwanela uleveleliya nuuyo, masi wiira noonihere usukhurweela wihu wo citthu cotheene cinnivahaawe.
7. Iparakhani irineehu-tho nlattu wo woopoliya wihu? (Arooma 5:1; Tiyaku 2:23)
7 Iparakha ikhwaawe irineehu nna co nlattu wo woopoliya wihu, ukhanle umpatthanana Yehova. b Khampa noonileehu mwaha uvinre, hiiva khaninnyaryaana napankaka mphantte waamucyaawe. Masi, nlattu wo wiivaherera wawe Yesu, hiiva pooti ukhalana nnema ni Nluku ni ciicammo umpatthanana. —Nsome Arooma 5:1; Tiyaku 2:23. c
8. Kontha isiyani ninlamuliyeehu unsukhuru Yehova nlattu wo nivaha iparakha yoolompa?
8 Nttwee nuupuwele paahi itthu imoca nhina upatthaniihu ni Yehova: Ulompa. Yehova nawiiwa nlompa wihu uhiya paahi umpankeehu umikutthanooni, masi ciicammo ninari veekha. Ulompa pooti unimaaliha ni uniphwanyiha nnema mwiirutthuni uvikana unhimerya nkhunanihu citthu cinniira. Ulompa unaanikavihera ulipihaca upatthaniihu ni Yehova. (Isaa. 65:2; Tiya. 4:8; 1 Jo. 5:14) Ukati Yesu waaryaawe va watuninyani va, uyo khaahiyerera ulompa kontha ancuwela wiira Yehova anviriyana ulompa wawe. Ciicammo ancuwela wiira ulompa wanlipihaca upatthanyaawe ni Yehova. (Luka 5:16) Ninaasukhuru nlattu wookhitiri ukhala apatthani a Yehova ni ciicammo umuulumana ni niivekelo nlattu wo wiivaherera wawe Yesu!
IPARAKHA CINHALEEHU UKHALANA UHOOLO
9. Iparakhani aswali a Yehova cinhalaaya ukhalana uhoolo nlattu wo woopoliya?
9 Iparakhani aswali a Yehova cinhalaaya ukhalana uhoolo nlattu wo wiivaherera wawe Yesu? Anaahala urwaa waakhela ukumi woohimala. Atthu enci anoona wiira khunhala ukhitirya kontha ukhwa khunhiyerera wiirannya. Masi ukhuma nenne wiipaceroni, itthu yaapheelaawe Yehova waari apinaatamu ukhala akumi woohikhwa. Unari wiira Atamu khaavanre itampi, khaavo aahala wuupuwela wiira ukhala akumi woohikhwa khunhala wiirannya. Pooti ukhalaka wiira ayo moopuwelelwaayo, nanlelo ahaavo mahukhwaala, masi itthu Yehova ikhumihilyaawe wiira alive iteeni ikhanle yuulupale —uyo honvaha mwanawe anfentaawe. —Aroo. 8:32.
10. Isiyani makristau oothanliya ni ikhontwa cikhwaawe cinwehereraaya waakhela?
10 Ukumi woohimala ikhanle iparakha yo uhoolo. Masi, ukhuma nenna co, hiiva pooti wanuupuweleehu mananna cinhalaaya urwaa ukhala ni Yehova nopheela wiira nipanke iyo. Makristau oothanliya anweherera urwaa ukhala wiirimu, ahaana iparakha yoolamulela va watuninyani va nkhayi ni Kristu. (Apoka. 20:6) Ikhontwaa cikhwaawe, cinaaweherera citteeliyaka ukhala upeephoni va watuninyani va uhinhalaaya ukhala-tho iretta, uhuva ni ucukulaca. (Apoka. 21:3, 4) Nyuuva ciicammo nkhale ikhontwaa irina niweherero noophwanya ukumi woohimala va watuninyani va? Nno niwehereronno khaninaakhala niweherero ninnimaaliha paahi woohiirannya. Iyo phiitthu Yehova aapheelaawe wumpa wawe apinaatamu. Ukumi unhala unitteeliha nrima.
11-12. Iparakhani cimpheeleehu cinene ukhalana upeephoni? (Nwehe ciicammo ilatarato.)
11 Muupuwele mananna caahalaaya ukhala ukumiinyu upeephoni. Nyuuva khannohala urwaa woova-tho uwerennya ni ukhwa. (Isai. 25:8; 33:24) Yehova naahala urwaa wuuvahani citthu cotheene comaana nyuuva cimpheeleenyu. Isiyani nyuuva nnopheeleenyu wiitthuca? Nnopheela wiitthuca venci nhina inama? Nnaapheela umwiitthuca umoopa viyola? Nnopheela wiitthuca upintari? Upeephoni ninaahala urwaa waapheela anamatekateka, anamatesenyari ni anamalima. Ni ciicammo ninaahala urwaa waapheela atthu owaapyaaca, oopanka ikaruma ni uwacera ijardim inhaleehu ukhalana. (Isai. 35:1; 65:21) Nyuuva nnaahala urwaa ukhitiri ukhalana ukati wiira mwiitthuci khula itthu nnopheeleenyu upanka.
12 Muupuwele utteeliya unhaleehu ukhala nawoonaka atthu akhwile yunwelelihiyaka! (Mite. 24:15) Muupuwele ciicammo, mananna cinhalaaya urwaa ukhala itthu yomaana usoma citthu cinci Yehova cumpilyaawe ni wiitthuca-tho cinene myaha cawe. (Isaa. 104:24; Isai. 11:9) Ni itthu yootepaca cinene, mananna cinhalaaya urwaa ukhala itthu yomaana unswalela Yehova woohihuvihiya! Niireke phataari waakakhaniha nnya iparakha comaana coohoolonnya ni mihakhu cinhala umala?” (Mabere. 11:25) Mena vakaani! Khula wiikurumica umpankeehu mahukwaala khunlikana niiparakha cinhaleehu waakhela uhoolo. Muupuwele co: ipeephoni khinhala ukhala-tho niweherero ninhaleehu ukhalana uhoolo. Unaahala uphiya ukati unhalaaya wiirannya weekhweeli. Inhala ukhitirya kontha Yehova naanifenta mpaka unvaherera mwanawe wiira akhwe!
Muupuwelaka iparakha cinhaleenyu waakhela upeephoni, isiyani inookurumicani? (Nwehe iparaagarafu 11-12.)
NSUKHURU NIFENTO NA YEHOVA
13. Manannani ninhaleehu woonihera unsukhuru Yehova nlattu woonoopola? (2 Akorintu 6:1)
13 Ninhala uthoonyera cani wiira ninansukhuru Yehova nlattu woonoopola? Nahooleliheraka miteko cawe muukumini wihu. (Mat. 6:33) Khweeliini Yesu, “khwile nlattu waatthu otheene, wiira ale ari akumi ahiicivelihe imwaneennyaaya, masi ancivelihe ule khwile wiira awoopole, ni onwelelihiye.” (2 Akor. 5:15) Yehova khanle namaana ni naanilevelela. Napankaka yotheene inkhitiriihu wiira ninswalele, hiiva ninawoonihera usukhurweela cotheene cinipankelyaawe. — Nsome 2 Akorintu 6:1. d
14. Manannani ninhaleehu woonihera wiira ninaakhuluvela malakihero a Yehova?
14 Inanna ikhwaawe yowoonihera usukhuru nifento na Yehova ukhanle ukhuluvela malakiherwaawe ni utthara. Manannani ninhaleehu upanka iyo? Woolakela itthu yoohala upanka mwaaneneehu, khampa, ninaahala upheela usoma icikola cuulupale awula mena, ntekoni ninhaleehu uvara, ninlamuliya weettela itthu Yehova impheelaawe. (1 Akor. 10:31; 2 Akor. 5:7) Nalakelaka nittharaka malakihero a Yehova, cinaniirannyeele citthu comaana cinene —waamini wihu, niweherero nihu noohoolo ni upatthaniihu ni Yehova unaatepa ukhala woolipa. —Aroo. 5:3-5; Tiya. 2:21, 22.
15. Manannani ninhaleehu woonihera usukhuru ukati wo Nuupuwelelo?
15 Ihaavo-tho itthu yoneeraru inlamuliyeehu upanka wiira nisukhurweele nifento na Yehova: ukhanle uvarela nteko ukati wo Nuupuwelelo wiira nimoonihere Yehova wiira iteeni ilivilyaawe ikhanle yofayita cinene para hiiva. Uhiya paahi ukhala Unuupuweleloni, nihaana ciicammo nihaana waalattula atthu akhwaawe. (1 Tim. 2:4) Mwaahimeerye isiyani inhala wiirannya Unuupuweleloni. Atthunaka pooti wanwonihereenyu ividiyu Yesu khwenleni? ni Muupuwelele ukhwa wa Yesu nsayitini jw.org. Mahumu pooti upanka iprokaraama wiira yaalattule ale ahiile urwaa umikutthaanoni ni wuulalyeerani wiira ya Wuupuwelele ukhwa wa Yesu. Muupuwele utteeliya unkhala wiirimu ni watuninyani woona ikhontwaa ya Yehova ihokoleelaka utakaneela niikhontwaa cikhwaawe! (Luka 15:4-7) Phimaana, Unuupuwelelo nimpheela waasalamiha uhiya paahi mayamunneehu, masi venci-venci ale anwa unithotola awula ale avirihile ukati mwinci ahirwaaka umikutthaanoni. Nimpheela wiira yiicoone ukhala saana! — Aroo. 12:13.
16. Kontha isiyani waahalaaya ureera wuupuwela wiikurumica uvara nteko wa Yehova ukati wo Nuupuwelelo?
16 Niireke wiira nyuuva pooti waneekurumiceenyu wuulalyeerani ukati wo Nuupuwelelo? Iyo ikhanle inanna imoca yowoonihera usukhuru yotheene Yehova ni Yesu yuupankenlyaaya. Neekurumicaka unvarela nteko Yehova, ninawoona ukaviheriya nuuyo ni unkhuluvela wihu uyova unaatepa ukhala woolipa. (1 Akor. 3:9) Uhiya commo, nhiliyale upanka usoma wo Ibiibiliya ukati wo Nuupuwelelo unkhumela nrevistani Nsome Cowantikhiya Cowaarya Khula Nihuku awula Mmwaalivuruni o Mikutthaano ceeriyari usumana. Pooti uvarela nteko nnyo ihantisinnyo ukati woopanka usoma wo veekha.
17. Isiyani immwiiriha Yehova ukhala ootteeliya? (Nwehe ciicammo ikwaaturu “ Manannani ninhaleehu woonihera usukhuru nifento na Yehova?”.)
17 Atthunaka nlattu woowerennya awula makhalelo, nyuuva khannokhitiri weesa nipuro noopacera muukumini winyu ikano co ula mwahoola. Masi muupuwele co: Yehova khanweheeha itthu nyuuva nnopankeenyu ni khanlattaniha niitthu impankaaya atthu akhwaawe; uyo noona paahi ile iri wanrimani winyu. Uyo naakhala ootteeliya oonaka wiikurumica winyu ni usukhurweela itthuvo yofayita inivahilyaawe — woopoliya. —1 Sam. 16:7; Mark. 12:41-44.
18. Kontha isiyani ninonsukhurwiihu Yehova ni Yesu?
18 Uleveleliya wo matampiihu, upatthaniihu ni Yehova ni niwehereroni nihu noophwanya ukumi woohimala cinkhitirya nlattu wo wiivaherera wa Yesu. Phimaana, khanimpheela uhiyerera woonihera usukhuru nifento na Yehova ninkurumicile univaha nnya iparakhannya. (1 Jo. 4:19) Ciicammo nimpheela unsukhuru Yesu nifentile mpaka uleva ukumyaawe wiira anoopole! —Joau 15:13.
NCIPO 154 Ophenta Khonimala
a 1 Timotiyu 1:15 Ala moolumwaala akhanle ookhuluvelya ni anlamuliya ukupaliya: Yesu Kristu howa watuninyani wiira awoopole anamatampi. Iriyaryaaya ayo, thi mi kitepile ukhala namatampi.
b Niireke Yehova aanaalevelela aswalyaawe ookhalayi hataa Yesu nhinaaya uwa? Iye. Ayo yahaana yaleveleliyaka kontha Yehova ankupali wiira mwanawe anhala ukhala ookhuluvelya mpaka ukhwa. Vano, para Yehova, waakhala khampa iteeni iholiviya, hataa mpaka Yesu hinaaya ukhwa. —Aroo. 3:25.
c Arooma 5:1 Vano, nihimiyeehu ukhala anasariya nlattu wo waamini wihu, nihokhalana nnema ni Nluku nlattu Waapwiyeehu Yesu Kristu. Tiyaku 2:23 Ni iheerannya itthu yantikhiye, yeeraka co: “Aparahaamu ahoonihera umwaamini Yehova, ni nwo waamininwo wahomwiiriha wooniya ukhala nasariya,” mpaka uyo aheehaniya mpatthani a Yehova.
d 2 Akorintu 6:1 Nivaraka nteko nkhayi nuuyo, ninawuuhimeryani ciicammo wiira nhitthune maana oonironya a Nluku nuukela uvyaavyeehaca.
