MWAHA WOOSOMIYA 1
NCIPO 2 Nsina Nanyu ti Yehova
Munttitthimihe Yehova
IVEERUSU YO MWAAKHA WO 2025: “Munttitthimihe Yehova khampa ncina nawe cimphwanelaaya uttitthimihiya.” —ISAA. 96:8.
ITTHU INHALEEHU WIITTHUCA
Ninaahala wiitthuca manannani ninhaleehu unttitthimiha Yehova khampa cinomphwanelaaya.
1. Isiyani atthu enci antepaaya uweheeha mahukwaala?
NYUUVA nnaakhitiri woona wiira atthu enci ileelo anawiittitthimiha? Wootakihera, nnye cineehaniya redes sociais atthu enci anaapanka cinkhitiryaaya wiira yiiconihere ni yoonihere citthu cinkhitiryaaya upanka. Phimaana, atthu vakaani phinonttitthimiha Nluku. Nhina ula mwahoola, ninaahala woona unttitthimiha Yehova maanaaya isiyani ni isiyani inhala unikurumica upanka iyo. Ciicammo, ninaahala woona manannani ninhaleehu unttitthimiha Yehova khampa cinomphwanelaaya ni manannani nohalaawe uttitthimiha ncinanawe uhoolo.
UNTTITTHIMIHA YEHOVA MAANAAYA ISIYANI?
2. Manannani Yehova oonihenryaawe uttitthima wawe umwaakoni Sinai? (Nwehe ciicammo ilatarato yo wakaapani.)
2 Uttitthima isiyani? Mbiibiliyani, nuulumo uttitthima pooti waaca itthu immwiiriha ntthu uttitthimihiya. Uvira waya ukati vakaani asarayeli anakumihiye Wiicipitu, Yehova ahopanka itthu yoonihenre uttitthima wawe. Muupuwele, asarayeli imiliyau cene yaahothukumana umwaakoni Sinai wiira aviriyane itthu Nluku aapheelaawe waahimerya. Nihutte nimoca nooripela nahokhuneela mwaakooyo ni woohipica itthaya yaahopacera uttettemelaca ni uphwyaakaca. Ukati yooyo, ayo yaahopacera woona uverunya ni unyakula wo nipalapatta.(Nkw. 19:16-18; 24:17; Isaa. 68:8) Khweeliini, asarayeli yaahokhala ootikhinihiya ni uttitthima Yehova wa woonihenryaawe.
Yehova hopanka nthoonyera nokuru wiira awoonihere asarayeli uttitthima wawe umwaakoni Sinai (Nwehe iparaagarafu 2)
3. Uttitthima wa Yehova maanaaya isiyani?
3 Niireke wiira apinaatamu pooti unttitthimiha Yehova? Iyee. Inanna imoca yonttitthimiha Yehova ukhanle waalalyeera atthu akhwaawe citthu cipankilyaawe ni makhalelo ootikhiniha arinaawe. Inanna ikhwaawe ukhanle unsukhurweela wo citthu cotheene cinnikaviheraawe upanka. (Isai. 26:12) Mwene Davidi ari ntthu anttitthimiha Yehova. Nivekelo nimoca naapankilyaawe uhoolo wa asarayeli, uyo enre co: “Miteko cinyu oo Yehova cikhanle cuulupale, cokuru, coottitthima, corera ni cinoonihera ukhulupaleenyu, citthu cootheene ciri wiirimu ni watuninyani thi nyu mpankile. Vano umaliha wawe ulompa, apoovu otheene yaahonttottopela Yehova.” —1 Ikor. 29:11, 20.
4. Manannani Yesu anttitthimihilyaawe Yehova?
4 Ukati waaryaawe watuninyani Yesu ahonttottopela Yehova ukati werawe Yehova phanvaha ikuru wiira apanke mwiiriirya. (Mark. 5:18-20) Yesu anawaakavihera atthu umoona Yehova ukhala Nluku omaana ni mananna caamuulumaawe ni caakaviheraawe atthu. Ikwaha imoca Yesu anawiitthuciha nsinakooka, iriyari yaatthu Yesu awiithucihaawe ahaavo nthiyana aavirihile mwaakha 18 ahuvihiyaka ni nciini, nlattu wo nno nciininno irutthwaawe yahopahuwa ni uyo khaakhitiri wiilokihera, Yesu ahoona mananna uyo nthiyanooyo caahuvaawe ni amooniheraka unamaana aahomwiirela “nthiyana iretta ihovonihiya” vano Yesu ahonvara ni uyo nthiyanooyo aheemela woohipica ni “ahopacera unttottopela Nluku.” Uyo nthiyanooyo ahonsukhuru venci Yehova nlattu woovonihiya! (Luka 13:10-13) Uyo nthiyanooyo ahaana isariya yonttittimiha Yehova, ni hiiva ciicammo nihaana.
ISIYANI INNIKURUMICA UNTTITTIIMIHA YEHOVA?
5. Isiyani inniiriha unttitthimiha Yehova?
5 Hiiva ninaanttitthimiha Yehova kontha ninanhisima cinene. Cihaavo citthu cinci cinniiriha hiiva unttittimiha Yehova. Uyo khanle nkhulupale ni ikuru cawe khacimmala. (Isaa. 96:4-7) Hiiva ninawoona ucuwelaca wawe ni citthu cumpilyaawe. Uyo phinumpile ni naanivaha yotheene impheeleehu wiira nikhale akumi. (Apoka. 4:11) Khanle ookhuluvelya. (Apoka. 15:4) Citthu cootheene cimpankaawe cikhanle cookhuluvelya ni uyo khanhiya wiiraneeha citthu coottheene cikhuluvelihilyaawe. (Josuwe 23:14) Khampa porofeeta Jeremiya wenryaawe co, amwaacaka Yehova: “Atthu oocuwelaca otheene ni mamwene otheene khaavo nolikaca ni nyuuva”!(Jer. 10:6, 7) Khweeliini cihaavo citthu cinci cinniiriha unttitthimiha Paapeehu owiirimu. Masi Yehova khanweherera paahi unhisima wihu, masi ciicammo nifento nihu.
6. Kontha isiyani ninonfenteehu Yehova?
6 Ninanttittimiha Yehova, kontha ninanfenta cinene. Muupuwele makhalelo rinaawe anniiriha unfenta. Uyo khanle nakiriri ni nawoona uthunku. (Isaa. 103:13; Isai. 49:15) Uyo naaniwacera ni nawoona citthu cootheene cinniira. (Zakar. 2:8) Uyo naanikavihera uncuwela ni ukhala asipatthannyaawe. (Isaa. 25:14; Mite. 17:27) Uyo khanle owiiyeviha ni “naaweha citthu cinkhumelela wiirimu ni watuninyani. Ni naamyiiriha ntthu owiiyeviha wunwa muntthupini.” (Isaa. 113:6, 7) Hi unaanicivela cinene uttitthimiha Nluku phanka uyo. —Isaa. 86:12.
7. Ukatini womaana nirineehu wiira ninttitthimihe Yehova?
7 Ninanttittimiha Yehova kontha nimpheela wiira atthu akhwaawe ancuwele. Atthu enci khancuwela ikhweeli ca Yehova. Kontha isiyani? Kontha Sotwani horipeliha moopuwelelo atthu amootherihaka Yehova nkhayi naaswalyaawe upanka citthu cootakhala. (2 Akor. 4:4) Sotwani nawaathepaca atthu wiira Yehova nawaattarusa ale ahimwiiwelele, khanaawacera atthu ni ciicammo uhuva wootheene phinkumihera. Masi hi ninaacuwela ikhweeli ca Yehova ni nihaana ukati wiira nakavihere atthu akhwaawe woona mananna Nluku khanlyaawe omaana. (Isai. 43:10) Isaalimu 96 inaahimya mananna onttitthimiha Yehova. Vano nthwe noopele mwaha khula iveerusu ni noone mananna ninhaleehu unttitthimiha Yehova khampa cinompwanelaaya.
MANANNANI NINHALEEHU UNTTITTHIMIHA YEHOVA PHANKA CINOMPWANELAAAYA?
8. Manannani ninhaleehu unttitthimiha Yehova? (Isaalimu 96:1-3)
8 Nsome Isaalimu 96:1-3. a Hiiva pooti unonttitthimiheehu Yehova ni citthu cinoolumeehu. Nnyo iveersunnyu cineera ‘mmwiipele Yehova’ ‘ntthapele ncina nawe,’ ‘nlalyeere ihapari comaana cinoopola ni cinweela mphanttyaawe’ ni ‘mwaalalyeere atthu uttitthima wawe.’ Othene ayo akhanle mananna owaattitthimiha apaapeehu owiirimu Yehova. Khalayi aswali a Yehova khayoova ukati waawuulumanaaya atthu ihapari comaana ca Yehova citthu caapankelawe ni wakiha ncina nawe. (Dan. 3:16-18; Mite. 4:29) Ninhala utakiha cani?
9-10. Isiyani ineetthuceehu nintakihero naanuunu Angelena? (Nwehe ciicammo ilatarato.)
9 Moone itthu imoca yaawiiranyeenle anuunu Angelina b, ankhala u Esdados unidos. Ayo yahoonihera ulipa nrima ukati waakihenryaaya ncina na Nluku nipuro ninvaraaya nteko. Ukati wancenryaaya uvara nteko ayo nkhayi naatthu yaavaraanaaya nteko yaholattuliya unkutthaanoni waahala upankiya untekoni waya. Nwo khula ntthu ankhalana iparakha yoohimyaca citthu civinryaawe muukumini wawe. Anuunu Angelina yahotthenkaca mwaha waahalaaya wuuluma, woonihera mananna ciryaaya otteeliya nlattu wookhala Saahiti a Yehova. Masi uhinaaya uphiya ukatyaaya woopheela wuuluma nlopwana mmoca yanvaranaaya nteko ahohimya eeraka wiira uunuwihiye ni Masaahiti a Yehova. Ni uyo ahancera uwuuluma pusya masaahiti a Yehova ni citthu cinkupaliihu. Anuunu Angelina aneera: “Mi kahoova cinene. Masi kahoopuwela kiireke kinlamuliya unhiya ntthu amuulumaka pusya Yehova? Mi nkinlamuliya umaala, kihaana waahimeerya ala atthwaala mananna Yehova ciryaawe.”
10 Umaliha wawe wuulumaca uyo nlopwanooyo anuunu Angelina yahopanka nivekelo wowaakuvyaaca. Yooniheraka unamaana ayo yahonwehanana ni yaheera Ihantisyaa inaalikanaca ni yawaka, Mi Kunnuwihiye ni masaahiti a Yehova ni mpaka nna co Kisaahiti a Yehova. Unawoonannya wiira waahala ukhala mwaha muulupale. Masi hataa ukhalaka commo anuunu Angelina khayaahiyerenre ukhala omala. Ukati waataphulelaaya ayo yahoonihera ilatarato caya anaryeene otteeliya nkhayi ni mayanuunu mmamikutthaanoni wihu ni yahaakiha itthu yaakupalyaaya niihisima. (1 Pet. 3:15) Vano isiyani yiirannyeele? Ukati anuunu Angelina waamalihilyaaya wuulumaca, nlopwana awuuluma pusya masaahiti a Yehova ahorukunusa moopuwelelwaawe. Uyo mpaka aheera wiira anawuupuwela citthu comaana coonaawe ukati asithumwaane wantthukananaaya umikutthaanoni. Anuunu Angelina aneera ikhanle iparakha yuulupale waakihera ncina na Yehova, uyo inaampwanela iyo. Hataa ukhalaka wiira anawuuluma pusya ncina na Yehova ikhanle iparakha yuulupale unttottopela ni unttitthimiha.
Hiiva pooti wanonttitthimiheehu Yehova nimoolumacerweehu, citthu cirineehu ni makhalelweehu (Nwehe iparaagarafu 9-10) f
11. Manannani aswali a Yehova anettelaaya itthu inhimyaaya Isaalimu 96:8?
11 Hiiva pooti unttitthimiha Yehova nivahaka citthu cirineehu. (Nsome Isaalimu 96:8. c) Ikhumelo yo khalayi apoovu a Yehova khanhiya unttitthimiha ayo manannaayo. (Miru. 3:9) Wootakihera asarayeli yaanakumiha ncanko wiira itekiye itempulu ni ciicammo iwaceriye. (2 Mam. 12:4, 5; 1 Ikor. 29:3-9) Atthari akhwaawe a Yesu yaankumiha ncanko wiira Yesu nkhayi ni maapostolwaawe akhalane citthu caapheelaaya (Luka 8:1-3) Makristau o iseekulu yoopacera yaanakumiha ncanko wiira yaakavihere mayamunnaaya ni mayanuunwaaya. (Mite. 11:27-29) Hiiva ciicammo ninaanttittimiha Yehova nivahaka micanko woohikhanyererihiya.
12. Manannani micanko cihu cinonttitthimihaaya Yehova? (Nwehe ciicammo ilatarato.)
12 Moone itthu yirannyeele inoonihera wiira micanko cihu cinaanttittimiha Yehova. Irelatoorio yo 2020, inawuuluma itthu yiiranyeele u Zimbabwe waavinryaaya ukati mwinci ihirupaka ipula. Nlattu woohirupa ipula atthu imiliyawu cene khayaarina iyoolya, waahela nhina anuunu amoca aneehaniya Prisca. Ayo anuunwaayo khayaahiyerenre urwaa wuulalyeerani mahuku yaathanlilyaaya hataa mahuku waakuttiyaaya. Atthu yaattamanannyaaya yanawaatarawaca nlattu woorwaa wuulalyeerani uhiya urwa umattani. Ayo atthwaayo yaawiirela co: “Nnyu inaahala wuuvolani itala.” Masi anuunu Prisca yanaakupaleela wiira Yehova anaahala waawacera. Phimaana, ayo yaanaakhula yeeraka “Yehova khaanhala unhiya nswalyaawe ahuvaka.” Unavinreene ukati anuunu Prisca yahaakhela citthu caapheelaaya nlattu wo micanko cihu. Atthu yaawuuluma pusya anuunu Prisca woona waya iyo, yahokhala otikinihiya ni mpaka yaheera “Nluku khuunyanyanleni, nihiiva ciicammo ninaapheela uncuwela uyo Nlukuuyo. Ikhumelo vaava atthu 7 yaattamanannyaaya yahancera woona mikutthaano.
Hiiva pooti wanonttitthimiheehu Yehova ni citthu cirineehu (Nwehe iparaagarafu 12) g
13. Manannani makhalelweehu anonttitthimihaaya Yehova? (Isaalimu 96:9)
13 Nsome Isaalimu 96:9. d Hiiva ninaanttittimiha Yehova nimeettelweehu. Wiira nankuttho avare nteko ntempulu, aalamuliya wiirattela. (Nkw. 40:30-32) Nihiiva ciicammo ninlamuliya wiirattela, kahi paahi mwiirutthuni. Masi ninlamuliya ukhalana meettelo omaana ni unyema citthu cihinoncivela Yehova. (Isaa. 24:3, 4; 1 Pet. 1:15, 16) Ninlamuliya upanka inkhitiriihu wiira ninyeme moopuwelelweehu okhalayi, iyo inaahela nhina upanka citthu coohiloka cihinontteeliha nrima Yehova. Vano ninlamuliya uwara makhalelo ophiyaaru awula wiitthuca wuupuwela nimananna anoonihera wiira ninaatakiha makhalelo omaana a Yehova. (Akol. 3:9, 10) Nikaviheriyaka ni Yehova hataa nikhalaka ntthu oohiloka pooti upanka marukunuso ni ukhalana makhalelo ophiyaaru.
14. Isiyani mwiitthucileenyu ni ihantisi ya Jack? (Nwehe ciicammo ilatarato.)
14 Moone itthu imoca yaamwiirannyeenle Jack, nlopwana mmoca nakhirini ni owoopiha. Mpaka atthu yaamwiihana ‘Sotwani.’ Nlattu wo ikhirini caapankaawe Jack ahohukhumwiya wiiviya. Masi nihinaphiya nihuku naahalaawe wiiviya, Jack ahancera usoma Ibiibiliya ni munna mmoca aalalyeera ikhattya yaatthukeliyaawe. Hataa apankaka citthu cinci cootakhala, Jack ahorukunusa moopuwelelwaawe. Nuuwakatyaaya uyo ahopattisiya khampa Saahiti a Yehova. Jack ahopanka marukunuso moolupale muukumini wawe, mpaka nihuku niiviyaawe makwaarta makhwaawe yahonleeha yunlaka. Ciicammo natoropa mmoca ahiile uvara nteko ile ikhattyeele aheera: “Jack ari peresu ootakhala nrima. Masi horukunusa makhalelwaawe ni ari ooreera nrima.” Uvira waya isumana Jack neeviye, mayamunna yaarwaaka ukhattyaa wiira yapanke mikutthaano, yahoncuwela peresu awile woona mikutthaano ikwaha yoopacera. Kontha isiyani alakenlyaawe woona mikutthaano? Kontha uyo ahootikhinihiya ni mananna Jack aapankilyaawe marukunuso muukumini wawe ni uyo ciicammo ampheela ucuwela isiyani yaalamuliyaawe upanka wiira answalele Yehova. Unawoonannya wiira makhalelweehu pooti unttitthimiha Paapeehu o wiirimu!—1 Pet. 2:12.
Hiiva pooti wanonttitthimiheehu Yehova ni makhalelweehu (Nwehe iparaagarafu 14) h
MANANNANI YEHOVA NOHALAAWE UREERIHA NCINANAWE WOHIPICA?
15. Manannani Yehova nohalaawe ureeriha ncina nawe woohipica? (Isaalimu 96:10-13)
15 Nsome Isaalimu 96:10-13. e Iveerusu coomalela nhina ikapiitulu 96, inanhimya Yehova ukhala khampa suwiisi ni Mwene osariya. Manannani Yehova nohalaawe ureeriha ncinanawe woohipica? Uyo naahala upanka iyo amalamalihaka citthu cinnanariha ncina nawe. Woohipica Yehova naahala umalamaliha ittiini cootheene cowootha, nlattu woopanka citthu coohiloka ni nlattu wowiitthuciha citthu cowoothiya. (Apoka. 17:5, 16; 19:1, 2) Yiirannyaaka iyo, atthunaka atthu akhwaawe anaahala ukhala nkhayi ni hiiva wiira answalele Yehova. Wiikhiceroni, ukati wo ikhotto yo Armageton Yehova naahala ukwanyulaca ila ituninya ya Sotwaniila ni waakwanyulaca atthu annanariha ncina nawe. Masi uyo naahala uwoopola ale anonfenta, ammwiiwelela ni anonttittimiha. (Mark. 8:38; 2 Atesal. 1:6-10) Wiikhiceroni wo myaakha 1000 nohalaawe ulamulela Kristu, Yehova naahala ureeriha woomalela ncina nawe. (Apoka. 20:7-10) Yiirannyaaka iyo watuninyani unaahala ucara ucuwelaca ni uttitthima wa Yehova khampa “maaci ancaraaya mpahari.” —Habak. 2:14.
16. Isiyani nyuuva nlakenleenyu upanka? (Nwehe ciicammo ilatarato.)
16 Inhala ukhala itthu yootteeliha nrima uwoona atthu otheene watuninyani anttittimihaka Yehova khampa unompwanelaaya. Masi niwehereraka uphiya nno nihukunno, hiiva ninlamuliya upanka itthu wiira ninttittimihe Yehova ukati wootheene. Phimaana, wiira anikavihere upanka iyo Mphwinko wo Mahumu Unhoolela uhothanla Isaalimu 96:8 wiira ikhale iveerusu yo mwaakha wo 2025 iyo ineera: “Munttitthimihe Yehova ni nttottopele ncina nawe khampa cinompwanelaaya.”
Upeephoni, atthu otheene anaarwaa uttitthimiha ncina na Yehova khampa cimphwanelaaya! (Nwehe iparaagarafu 16)
NCIPO 12 Yehova ti Muluku Muulupale
a Isaalimu 96:1 Mmwiipele Yehova ncipo nonaanaano, mmwiipele Yehova, ntuninyani motheene. 2 Mmwiipele Yehova; ntthapele ncina nawe. Nlalye ihapari comaana cinoopola cinkhuma mphanttyaawe, khula mahuku. 3 Mwaalalyeere atthu olapo cotheene uttitthima wawe, iriyari yaapoovu otheene nlalye citthu comaana cipankilyaawe
b Macina makhwaawe ahaakakhanihiya.
c Isaalimu 96:8 Munttitthimihe Yehova khampa ncina nawe cimphwanelaaya uttitthimihiya; Nwaane citthu cinhaleenyu unvaha ni nkele wapuwani wawe.
d Isaalimu 96:9 Nkhorome uhoolo wa Yehova niikuwo cooreera; Moove uhoolo wawe atthu otheene nnokhala va watuninyani va
e Isaalimu 96:10 Nlalyeere iriyari yo atthu olapo cootheene; Yehova hokhala Mwene Ituninya khimala ulipihiya, khinlamuliya weenyeenyihiya, uyo naahala waahukhumu apoovu niisariya. 11 Ntteeliyeke owiirimu vaa, ni nyuuva owatuninyani vaa. Yoope itari ipahari ni citthu cootheene cirivo 12 ntteeliye imatta ni citthu cootheene cirivo. Ukati yooyo, ntteeliye miri cootheene co ntakhwani. 13 Uhoolo wa Yehova, uyo naawa; uyo naawa uhukhumu ituninya. Uyo naahala uhukhumu ituninya yotheene niisariya. Uhoolo waapoovwaawe uyo ri ookhuluvelya.
