MWAHA WOOSOMIYA 3
NCIPO 35 Citthuni citepale ukhala cofayita
Nlakele upanka citthu comaana cinhala untteeliha nrima Yehova
“Umoova Yehova unkhala ucuwelaca, ni Uncuwela Ule Ootepa Waarya unkhala wiiweeha.” — MIRU. 9:10.
ITTHU INHALEEHU WIITTHUCA
Nhina ula mwahoola, ninaahala woona manannani ninhaleehu uvarela nteko ucuwelaca, wiiweeha, wuupuwela wiira nilakele nimananna omaana itthu yoohala upanka.
1. Masakhani otheene cihu anaananeehu?
MAHUKU otheene nihaana nilakelaka itthu yoohala upanka. Citthu cikhwaawe cikhanle coohirika ulakela upanka, toko ulakela itthu yoohala ulya ni iwoora yoorupa. Masi citthu cikhwaawe cikhanle coorika ulakela upanka ni pooti uniphwanyiha masakha muukumini wihu, umaliha utteeliya wihu naatthu ninaafenteehu ni unswalela wihu Yehova. Nimpheela ulakela upanka itthu inhala unikavihera hiiva ni amuciihu. Ni itthu yuulupale cinene, nimpheela wiira citthu cinlakeleehu cihaana untteeliha nrima Yehova. —Aroo. 12:1, 2.
2. Isiyani inlamuliyeenyu upanka wiira nlakele nimananna oocuwelaca itthu yoohala upanka?
2 Unawoonannya wiira nyuuva nnohala ukhitiri ulakela itthu yoohala upanka nimananna oocuwelaca wakhalaka wiira (1) nnawaavyaavyaka ucuwela ikhweeli, (2) muupuwelaka mananna Yehova noweheraawe mwahooyo ni (3) uwehacera citthu cinlakeleenyu. Ula mwahoola, unhala wuuluma nnyo citthu tthaarunnyo cinlamuliyeehu upanka ni ciicammo unaahala unikavihera woona manannani ootthenkaca moopuwelelweehu.— Miru. 2:11.
WAAVYAAVYA UCUWELA IKHWEELI
3. Kontha isiyani inlamuliyeehu ucuwela ikhweeli nihinaaya ulakela itthu yoohala upanka? Ntaphulele.
3 Itthu yoopacera inlamuliyeenyu upanka nhinaaya ulakela itthu yoohala upanka ukhanle ucuwela ikhweeli. Kontha isiyani ikhanlayaaya itthu yofayita? Mmuupuwele ntthu noorwaa umoonanana meetiku nlattu woowerennya ireetta yuulupale. Niireke wiira meetiku naahala uthanla mananna ontafiti ntthuuyo woohinkohakoha mananna cinonweryaaya awula woohinwehaweha tokoni? Mena. Nyuuva ciicammo nnaahala ulakela nimananna omaana itthu yoohala upanka mwaacuwelaka ikhweeli nhina mwahooyo. Nnohala upanka cani iyo?
4. Manannani nnohaleenyu ucuwela ikhweeli? (Miruku 18:13) (Nwehe ciicammo ilatarato.)
4 Nyuuva nnaakhitiri ucuwela ikhweeli mwakohakohaka. Muupuwele wiira nyuuva nnaalattuliya ufestani. Niireke wiira nyuuva mwanhala urwaa? Hataa nhincuwelaka saana ntthu tthenkacile awula inhala wiirannya, nyuuva mwanhala ukoha: “Nipuroni ni ukatini unhalaaya ukhala ifesteeyo? Tapani alattuliye? Ankokhala atthu akavi? Tipani mwaneene ifesteeyo? Isiyani atthwaayo inrwaaya upanka? Kiireke ninaahala ukhala nipha?” Waakhuliya waya ala makohwaala unaahala wuukaviherani ulakela upanka itthu nimananna oocuwelaca. —Nsome Miruku 18:13. a
Mpanke makoho wiira ncuwele ikhweeli (Nwehe iparaagarafu 4.) e
5. Vano mwacuwelaka ikhweeli cotheene, isiyani inlamuliyeenyu upanka?
5 Vano nyuuva mwacuwela ikhweeli, mmananihe uthotokanihaca cotheene. Vano, nyuuva moonenelaka wiira atthu anhala ukhala ufestanyaayo khanhisima ikano co mbiibiliyani? Ni waakhalaka wiira khaavo ntthu noohala waakurumica atthwaayo uhiwurya cinene? Nyuuva nnoonela wiira iyo ifesteeyo khinhala umwaryaninnya saana? (1 Pet. 4:3) Nyuuva pooti uwehacera wakhalaka wiira iyo ifesteeyo inaahala uwinnyerani ukati woorwaa woona mikutthaano awula urwaa wuulalyeerani. Mwaamalihaka uwehacera, nyuuva nnaahala ukhitiri ulakela nimananna omaana itthu yoohala upanka. Masi ihaavo-tho itthu ikhwaawe yoohala upanka. Nyuuva nnaacuwela saana itthu nnoopuweleenyu nhina mwahooyo; masi manannani Yehova noonelaawe? — Miru. 2:6.
MUUPUWELE MANANNA YEHOVA NOWEHERAAWE MWAHOOYO
6. Kontha isiyani inlamuliyeehu unlompa Yehova nanlepelaka unikavihera? (Tiyaku 1:5)
6 Munlepele Yehova wuukavihera wiiweeha saana mananna cinoopuwelaawe. Yehova honikhuluveliha univaha ucuwelaca unhala unikavihera ucuwela wakhala wiira itthu inlakeleehu upanka inaahala awula mena uncivela. Yehova nawaavaha nwo ucuwelacannwo “atthu otheene woohimatthepwa ni woohaattekutta.” —Nsome Tiyaku 1:5. b
7. Nnohala ucuwela cani mananna Yehova nooweheraawe mwahooyo ni ninhala ulattanihera cani iyo?
7 Mwalompaka mwalepelaka ikano ca Yehova, nweheehe saana mananna cinwakhulaaweni. Muupuwele ila itthwiila: unaari wiira nyuuva mwaakhala utthawiyaru ukati woopanka nkwaha, nyuuva mwanhala ulepela ukaviheriya nintthu nkhala uyo ncokooyo. Masi, niireke mwanhala ukhuma ni upacera weetta hinaaya ntthuuyo uwaakhulani? Mena. Nyuuva mwanhala uviriyana saana citthu caahalaawe wuuhimeryani ntthuuyo. Inanna imocaaru, mwanlepelaka Yehova ucuwelaca, nweheehe saana mananna Yehova naakhulaawe ulompa winyu. Nyuuva pooti upanka iyo, mwatothaka mbiibiliyani ikano ni mattharelelo anvaranaca ni mwahooyo. Wootakihera, wiira nlakele waakhala wiira mwanhala urwaa ufestani awula mena, nyuuva pooti mwaahaleenyu wuupuwela mananna Ibiibiliya inweheraaya ifesta, atthu oohiloka ni uhoolelihera muukumini wihu Umwene wa Nluku. —Mat. 6:33; Aroo. 13:13; 1 Akor. 15:33.
8. Isiyani nyuuva inlamuliyeenyu upanka mwaapheelaka ukaviheriya wiira mphwanye ikano? (Nwehe ciicammo ilatarato.)
8 Atthunaka nyuuva nnaapheela ukaviheriya wiira mphwanye ikano cimpheeleenyu. Nyuuva pooti waalepela mayamunna awula mayaanuunu oocuwelaca. Masi ciicammo wanhala ureera mwaatothaka mwaaneneenyu.Cicannno mmalivuruni wihu Nnaahala uphwanya ikano cinhala wuukaviherani, khampa Guia de Pesquisa para Testemunhas de Jeová ni ilivuru Princípios Bíblicos para a Vida Cristã. Ihiliyale itthu impheeleenyu: ulakela upanka citthu cinhala untteeliha nrima Yehova.
Muupuwele mananna Yehova noweheraawe mwahooyo (Nwehe iparaagarafu 8.) f
9. Ninhala ucuwela cani wiira itthu ilakenleehu upanka inaahala untteeliha nrima Yehova? (Efesu 5:17)
9 Manannani ninhaleehu ukupaleeha wiira itthu inlakeleehu upanka inaahala untteeliha nrima Yehova? Itthu yoopacera, nihaana ucuwela sana-saana. Ni Ibiibiliya ineera wiira uncuwela “ule Ootepa Waarya ukhanle wiiweeha”. (Miru. 9:10) Uhiya commo, wiiweeha weekhweeli ukhanle ucuwela makhalelo a Yehova, itthu impheelaawe ni citthu cinoncivela ni cihinoncivela. Vano, mwiikohe co: ‘Ucuwela waka citthu cinonhimya Yehova, kiireke unaahala utteeliya nrima niitthu ilakenlyaaka?’ —Nsome Efesu 5:17. c
10. Kontha isiyani malakihero o mbiibiliyani akhanlyaaya itthu yofayita para hiiva?
10 Ikwaha cikhwaawe, wiira nintteelihe nrima Yehova, ninlamuliya upanka itthu inhala waariipiha nrima asipatthaniihu ni amuciihu. Wootakihera, ayari akhwaawe anawaakhanyereriha asaanaaya utheliya ni nlopwana namihakhu, hataa ukhalaka wiira khanakhala ntthu nkristau eekhweeli awula ookhomala nhina mminepani. Khweeliini ayari anaakhala niiwasiwaasi naasaaya ni ampheela wiira akhale nipuro nomaana. Masi niireke wiira uyo nlopwanooyo naahala ukhitiri unkavihera wiikurumica wuunuwa nhina mminepani ni ulipihaca upatthannyaawe ni Yehova? Manannani Yehova noweheraawe mwahooyo? Ninaaphwanya waakhuliya waya nhina Matewus 6:33. Iyo iveeruswiiyo, inawaakurumica makristau uhihiyerera ‘uhoolelihera Umwene wa Nluku muukumini waya.’ Khweeliini, hiiva ninaatthara malakihera anvahiyeehu naasithumwaaniihu ni naatthu ninooneehu ukhalana ifayita, masi itthu yuulupale impheeleehu ukhanle untteeliha nrima Yehova.
UWEHACERA CITTHU CINLAKELEENYU
11. Makhaleloni ahimiye nhina Afilipo 1:9, 10 anhala unikavihera uwehacera saana itthu ilakenleehu?
11 Mwaaphwanyaka ikano yo mbiibiliyani invarihana niitthu ilakenleenyu, nyuuva nnolamuliya uwehacera saana citthu cinlakeleenyu. (Nsome Afilipo 1:9, 10. d) Ucuwelaca unaahala wuukaviherani wuupuwela itthu inhala wiirannya mwaalakelaka nimananna omaana itthu yoohala upanka. Ikwaha cikhwaawe, ninaacuwela itthu yoohala upanka, masi kaahi ukati cotheene. Citthu cikhwaawe cikhanle coorika. Phimaana, ucuwelaca pooti wuukaviherani ulakela nimananna omaana itthu yoohala upanka hataa ikhalaka itthu yoorika.
12-13. Mwathanlaka nteko woohala uvara, manannani ucuwelaca unhalaaya wuukaviherani ulakela nimananna omaana itthu yoohala upanka?
12 Muupuwele ila itthwiila: nyuuva nnaatotha nteko wiira nkhitiri waalihera amuciinyu. Nyuuva nholakela inanna piili mananna oovara nteko ni inanna coopiili cinaavaranaca niikettelo co mbiibiliyani. Vano nyuuva nnaapacera wuupuwela itthu inhala wiirannya, khampa, ntekoni, ukatini, uttalivana uryaaya ni citthu cikhwaawe. Atthunaka nyuuva, nnaalakela uthanla kontha ukhanle nteko unoocivelani cinene awula kontha unaaliviya saana. Masi cihaavo citthu cikhwaawe nyuuva nnolamuliyeenyu wuupuwela nhinaaya ulakela itthu yoohala upanka.
13 Muupuwele co, kiireke nteko umpheelaaka uvara unaahala uhikikhitiriha woona mikutthaano ikwaha cinci? Kiireke unaahala uwinnyerani ukati mwaahaleenyu uvarela nteko wiira mwaawacere amuciinyu ni uwacera citthu cimpheelaaya? Waakhula ayo makohwaayo, unaahala wuukavihera weesa “citthu cofayita” nipuro noopacera muukumini winyu awula uhoolelihera unswalela Yehova ni waawacera amuciinyu uhiya citthu cinoocivelani awula nsurukhu mwaahaleenyu uliviya. Coo, nyuuva nnaahala ukhitiri ulakela nimananna omaana itthu yoohala upanka ni Yehova naahala wuucaalihani.
14. Manannani ucuwelaca ni nifento cinnikaviheraaya uhipanka itthu inhala waakwakwathula atthu?
14 Ucuwelaca ciicammo unaanikurumica wuupuwela mananna citthu cinlakeleehu upanka cinhalaaya uhaapanka pusya atthu akhwaawe. Naayo manannaayo, hi khaninhala upanka itthu inhala ‘waakwakwathula atthu.’ (Afili. 1:10) Iyo ikhanle itthu yofayita naalakelaka mananna oowara ni owiitthonkomaniha. Atthunaka hiiva ninaapheela uwara nimananna annicivela. Vano isiyani yaahala wiirannya wakhalaka wiira wanlokoni awula atthu akhwaawe, anaanuuluma pusya niitthu ithanlileehu? Ucuwelaca unaahala unikavihera uhisima moopuwelelwaaya ayo atthwaayo. Nifento ciicammo ninaahala unikurumica utotha itthu inomphwanyiha ifayita nkhunaniihu ni ciicammo ukhala atthu omaana. (1 Akor. 10:23, 24, 32; 1 Tim. 2:9, 10) Naayo manannaayo, ninaahala ukhitiri ulakela itthu yoohala upanka nimananna owoonihera nifeto ni ihisima atthu akhwaawe.
15. Isiyani nyuuva inlamuliyeenyu wuupuwela nhinaaya ulakela itthu yoohala upanka?
15 Vano wakhalaka wiira nyuuva nnaapheela upanka itthu yuulupale, muupuwele itthu yotheene inhela nhina itthu nlakeleenyu. Yesu hooniitthuciha mananna ‘oowehacera citthu cirineehu.’ (Luka 14:28) Vano, nwehacere ukati, nsurukhu ni wiikurumica unlamuliyeenyu upanka wiira iweetteleni saana. Ukati nkhwaawe, nyuuva nnaahala upheela woopana mwaha amuciinyu itthu inlamuliyeenyu upanka wiira iweetteleni saana. Kontha isiyani ikhanlyaaya itthu yomaana? Kontha pooti ukhalaka wiira nyuuva nnaapheela upanka marukunuso makhwaawe awula haavo ntthu rina moopuwelelo oovirikana naale nrineenyu anhala wuukaviherani. Ni mwaahelaka nhina amuciinyu ukati woolakela itthu yoohala upanka ni mwaaviriyanaka saana mananna cinoopuwelaaya, khunhala wuurikilani otheene cinyu wiiwanana ulakela itthu inhala wuukaviherani. —Miru. 15:22.
NLAKELE UPANKA CITTHU CINHALA WUUKAVIHERANI
16. Malakiheroni anhala wuukaviherani ulakela nimananna omaana itthu yoohala upanka? (Nwehe ciicammo ikwaaturu “ Manannani oolakela nimananna oocuwelaca itthu yoohala upanka?”.)
16 Wakhalaka wiira nhotthara malakihero yoonileehu nhina ula mwahoola, nyuuva nnaahala ukhitiri ulakela nimananna oocuwelaca itthu yoohala upanka. Nyuuva nhocuwela citthu cinhala wiirannya ni nhowehacera nvarelaka nteko ikano co mbiibiliyani wiira nlakele upanka itthu inhala untteeliha nrima Yehova. Vano, nyuuva pooti unlompa Yehova mwanlepelaka wuukavihera wiira iweetteleni saana.
17. Wiira nilakele nimananna omaana itthu yoohala upanka isiiryaaya isiyani?
17 Hataa ukhalaka wiira nyuuva mwaaholakela khalayiiru itthu yoohala upanka, muupuwele wiira itthu inhala wuukaviherani khunakala ukhuluvela ucuwelaca winyu awula citthu civirihileenyu muukumini winyu, masi ukhanle ucuwelaca wa Yehova. Uyo phinhala wuuvahani paahi ukhalana ucuwelaca weekhweeli ni wiiweeha —ikaruma cimphwanyiha ucuwelaca. (Miru. 2:1-5) Mwaapankaka commo, Yehova naahala wuukaviherani ulakela upanka itthu inhala untteeliha nrima. —Isaa. 23:2, 3.
NCIPO 28 Tipani nohala ukhala mpatthani a Yehova?
a Miruku 18:13 Waakuvela waakhula uhinatthi wiiweeha citthu cotheene unkhala ulolo ni unaamoonihaca ihaaya ntthu.
b Tiyaku 1:5 Wakhala wiira haavo ntthu hirina ucuwelaca, hihiye unlepela Nluku ni uyo ntthuuyo naahala uvahiya ucuwelaca, kontha Nluku nawaavaha atthu otheene woohimatthepwa ni woohaattekutta.
c Efesu 5:17 Phimaana, nhiye ukhala atthu oohankhili, masi ncuwele isiyani Yehova impheelaawe.
d Afilipo 1:9 Ila phi itthu kinlepelaaka kalompaka: wiira nifento ninyu nivire nitepaka winciva, nuucuwelaca weekhweeli ni nankhili; 10 wiira ncuweleehe citthuni citepale ukhala cofayita, wiira nkhale oolikana ni nhaakakathule akhunaninyu, mpaka nihuku na Kristu.
