MWAHA WOOSOMIYA 17
NCIPO 111 Citthu cinnitteeliha nrima
Nhikhume ipeephoni yo mminepani
“Ntteeliye ni ntthape nlattu wo citthu cumpilyaaka.”—ISAI. 65:18.
ITTHU INHALEEHU WIITTHUCA
Ninaahala woona ifayita irineehu nlattu wookhala upeephoni yo mminepani ni mananna ninhaleehu waakavihera atthu ukela iyo ipeephoniiyo.
1. Ipeephoni yo mminepani isiyani, ni isiyani inlamuliyeehu ulakela upanka?
MAHUKWEEHWAALA, ntuninyani motheene ihaavo ipeephoni atthu oophiyaka imiliau cene ankhalaaya ninnema ni arinaaya miteko cinci coovara. Atthu ankhala iyo ipeephoniiyo, anaalakela uhikhuma ni ciicammo anaawikurumica upanka ile inkhitiryaaya wiira yaakavihere atthu utakaneela nhina iyo ipeephoniiyo. Ipeephonini yeeyo? Ikhanle ipeephoni yo mminepani! a
2. Isiyani ikhanle yootikiniha nuulumaka ipeephoni yo mminepani?
2 Ikhanle itthu yootikiniha woona mananna Yehova cikhitinryaawe utthenkaca nipuro nomaana, noomalelyaa iriyari wo ila ituninya Sotwani tatusilyaawe nipuro noocara citthu cootakhala, noothanyanaciya ni nowoopiha. (1 Jo. 5:19; Apoka. 12:12) Nlukwiihu onifento naacuwela sana-saana mananna cikhanlyaaya oorika ukhala ala mahuku okhiceraala. Phimaana iyo inaanivaha nkhikicero wiira nikhitiri urwehela uhoolo makhalelo o mminepani, ni ciicammo wiira nikhitiri unswalela woohihiyerera nitteeliyaka nrima. Ibiibiliya inawuuluma ipeephoni yo mminepani ukhala “ntthawelo nihu” ni “Ijardim yoomiceriya saana.” (Isai. 4:6; 58:11) Niiparakha ca Yehova, atthu ampanka mphantte wo ila ipeephoni yo mminepaniila pooti wiicoona ukhala otteeliya ni okhikicerya hataa akhalaka ala mahuku okhiceraala ni oorika ukhalaala.—Isai. 54:14; 2 Tim. 3:1.
3. Isiyani yaapacenre wiirannya nhina moolumo Isaiya ikapiitulu 65?
3 Yehova ahonvarela nteko porofeeta Isaiya wiira antikhe mananna caahalaaya ukhala ipeephoni yo mminepani. Nyuuva pooti usoma nnyo myahannyo nhina ikapiitulu 65 ya Isaiya. Iyo ihantisiiyo yirannyeele wuupaceroni mwaakha 537 hinawa Kristu. Ukati ayutaa waataphuliyaaya uBabilooniya wiira aturuweele ilapwaaya. Yehova aahacaliha apoovwaawe ni aahakavihera ayutaa uturuwela uteka isittattyaaya yo Yerusalemu, yaakwanyulaciye. Ayutaa yanhala ukhaliha isittatti yo Yerusalemu nipuro nooreera ukhaliya ni ciicammo uturuwela uteka inupa ya Nluku para ukhala nipuro nofayita cinene nooswaleliya Yehova u Sarayeeli.—Isai. 51:11; Zakar. 8:3.
4. Isiyani ineerannya mahukweehwaala moolumo ari nhina Isaiya ikapiitulu 65?
4 Inatiri yo nayeeli ya Isaiya ipacenre wiirannya mwaakha wo 1919. Uyo mwaakhooyo, aswali a Yehova o mahukweehwaala ahokhala otaphuliya nhina ittiini cowootha. Ala manannaala, ipeephoni yo mminepani phancenryaaya urwaa uhoolo, ni ntuninyani motheene yaahancera ukhala maloko menci. Alopwana ni athiyana yaarupihana woohiloka ni yaapanka citthu cootakhala yaahancera woonihera makhalelo omaana eekristau ni ‘aawaraka meettelo ophiyaaru, yumpiye khampa cimpheelaawe Nluku’. (Efesu 4:24) Unawoonannya wiira iparakha cinci Isaiya cantikhilyaawe cinhala wiirannya uhoolo paahi, upeephoni. Masi nna co ale ari ipeephoni yo mminepani anaaphwanyera ifayita. Vano, nrwee noone kontha isiyani ikhanlyaaya itthu yomaana ukhala iyo ipeephoni yo mminepaniiyo ni nlattuni nihinlamuliyeehu ukhuma.
MANANNANI NNEECOONEENYU MPEEPHONI YO MMINEPANI?
5. Toko cinhimyaaya Isaiya 65:13, iparakhani cinaakheleehu nlattu wookhala ipeephoni yo mminepani?
5 Ukhala saana ni ulya saana. Inatiri ya Isaiya inaawonihera wiira uhaavo uvirikana makhalelo aale ankhala ipeephoni yo mminepani naale ahinkhala iyo ipeephoniiyo. (Nsome Isaiya 65:13. b) Yehova nawaavaha aswalyaawe citthu cotheene cimpheelaaya hataa ni citthu cihimpheelaaya wiira ahihiyerere unswalela. Uyo naanivaha nnepaawe wowaarya, nuulumo nawe ni iyoolya yinci yo mminepani, wiira ‘nilye. . . niwurye, . . . [ni] nitteeliye.’ (Nwehe ciicammo Apokalipise 22:17.) Makhalelweehu anavirikhana ni makhalelo aale ahiri mpeephoni yo mminepani. Ayo atthwaayo ‘inawaavola itala . . . , ntthona . . . , [ni] anawoona ihaaya.’ Ayo anawiicoona waahaleela itthu muukumini waya, kontha khaarina upatthani ni Nluku.—Amos 8:11.
6. Toko cinhimyaaya Joweli 2:21-24 nooluma citthu Yehova cinnivahaawe, manannani ninlamuliyeehu uphwanyera ifayita?
6 Porofeeta nkhwaawe Joweli, anvarela nteko citthu cokhula nihuku toko ipyoo, iviinyu ni makhura para oonihere wiira Yehova khanle namavaha. Phimaana uyo naanivaha citthu cimpheeleehu nhina makhalelo o mminepani. (Jow. 2:21-24) Yehova naapanka iyo avarelaka nteko Ibiibiliya, ilivuru cihu, ividiyu cihu ni isayiti jw.org ni ciicammo mikutthaano, Nthukumano wo Isirikwiitu ni ikonkereesu. Nakumiheraka ifayita citthu cotheene Yehova cinnivahaawe, hiiva ninawiicoona ukhala saana ni ulihiya nhina mminepani.
7. Isiyani innitteeliha nrima? (Isaiya 65:14)
7 Utteeliya. Apoovu a Yehova ‘anakhuwela atteeliyaka’ nlattu wonsukhuru Yehova nhina citthu cotheene cinaapankelaawe. (Nsome Isaiya 65:14. c) Hiiva ‘ninaatteeliya’ nlattu wookhweeli co mbiibiliyani cinnilipiha ni ciicammo wo niweherero Yesu ninivahilyaawe. Uhiya commo, woopana mwaha mayamunneehu ni mayanuunwiihu nhina nnyo citthu cootikhinihannyo ninaatepa ukhala ootteeliya nrima!—Isaa. 34:8; 133:1-3.
8. Citthuni cofayita cinene ciri ipeephoni yo mminepani?
8 Ipeephoni yo mminepani inaawoonannya mananna meeli ofayita cinene. Nifento ni wataana wa apoovu a Yehova. Ayo mananna owiiraana yataanakaayo, anawoonihera mananna cinhalaaya ukhala upeephoni, uwakati apoovu a Yehova unhalaaya ukhala afentanaka ni yataanaka venci uvikana nnaco. (Akol. 3:14) Anuunwiihu amoca, anaahimya itthu yonnyaaya mkwaha woopacera waacuwenlyaaya Masaahiti a Yehova. Ayo aneera: “Miiva akoopuwelela mananna oopheela ukhala ootteeliya, hataa wamucyaaka.” Nkwaaha woopacera konnyaaka atthu yaawacerana, ni yaatafitana ni nifento yaari Masaahiti a Yehova. Wookhula ntthu noopheela wiicoona khweeliini ukhala ootteeliya nolamuliya ucuwela ipeephoni yo mminepani. Atthwaayo pooti wuuluma pusya Masaahiti a Yehova, masi hiiva ninaacuwela wiira nihaana ncina nomaana, ni Yehova naanoona ukhala omaana wamoca ni mayamunneehu ni mayanuunwiihu ntuninyani motheene.—Isai. 65:15.
9. Toko cinhimyaaya Isaiya 65:16, 17 isiyani inhala wiirannya ni citthu cinnikumihera masakha?
9 Ukhala ninnema ni woohimasukhuli. Nhina Isaiya 65:14, hi ninaasoma mananna cinhalaaya ukhala ale anthanla ukhala vate ipeephoni yo mminepani. ‘Ayo atthwaayo anakhuwela nlattu wowoona uwerya nrima ni anaawunla nlattu woohikhala saana nhina mminepani.’ Khweeliini, apoovu Nluku anawaanana masakha. Masi nnyo citthuunyo vakaani-vakaani ‘cinaahala uliyaliya ni cinaahala Yehova naahala umaliha.’ (Nsome Isaiya 65:16, 17. d) Yehova naahala wiiriha masankihweehu umala-mala, nuuwakatyaaya mpaka citthu coohinamaana ninoopuweleehu cinniiriha woona uweryaa, khacinhala ukhala-tho mpaka.
10. Kontha isiyani ninooneehu ukhala iparakha ukhala nkhayi ni mayamunna ni mayanuunu? (Nwehe ciicammo ilatarato.)
10 Mahukweehwaala, ikhanle itthu yomaana urwaa umikutthaanoni. Kontha nwo ninaalipihiya ni ninaaliyala citthu cootakhala co ila ituninyeela, nooniheraka mikhalelo cimpanka mphantte wonhokorokho wo nnepa wowaarya wa Nluku, toko nifento, utteeliya, nnema, unamaana ni ureera nrima. Hiiva ninaakavihera ukhala ninnema ni woohimasukhuli nhina ipeephoni yo mminepani. (Akalas. 5:22, 23) Otheene cihu ninoona ukhala iparakha yuulupale ukhala nkhayi mumphwinkoni wa Nluku. Ni ale ahinhala uhiya ipeephoni yo mminepani, woohipica anaahala woona yiirannyaaka inatiri ya Nluku yoopanka “irimu yo naanaano ni ituninya yo naanaano.”
Ikhanle iparakha yuulupale ni yootteeliha cinene ukhala mpeephoni yo mminepani ni upanka mphantte waamuci a Yehova (Nwehe iparaagarafu 10) h
11. Toko cinhimyaaya Isaiya 65:18, 19, manannani nyuuva cineecooneenyu, ucuwela winyu wiira Yehova hopattusa ipeephoni yo mminepani ni nlattuni?
11 Usukhuru ni utteeliya. Isaiya naanithoonyera-tho mananna otteeliya ni ootthapa nlattu wopeephoni yo mminepani. Ukhala wiira iyo ipeephoniiyo ipankiye ni Yehova. (Nsome Isaiya 65:18, 19. e) Miphwinko citthenkaciye ila ituninyeela khacinwiitthuciha atthu ikhweeli ca Nluku. Phimaana, ihaavo isariya Yehova yoonivarela nteko wiira naakumihe atthu nnyo miphwinkonnyo ni wiira apanke mphantte wo ila ipeephoni yo mminepani yootikiniheela! Hi ninaakhala otteeliya nhina iparakha ninaakheleehu nlattu woocuwela ikhweeli. Phimaana, nimpheela waahimerya atthu ontuninyani otheene nnyo iparakha cootikhinihannyo.—Jer. 31:12.
12. Manannani nyuuva cineecooneenyu mwaasomaka inatiri cantikiye nhina Isaiya 65:20-24 ni nlattuni?
12 Nyuuva khannokhala otteeliya ni oosukhuru moopuwelaka niweherero nirineehu noopanka mphantte ila ipeephoni yo mminepaniila? Muupuwele vakaani mananna ukumiihu cinhalaaya ukhala upeephoni. Ibiibiliya inaakhuluveliha, yiiraka co: “Khanhala ukhala-tho mwaana noohala ukhala mahuku vakaani paahi . . . Hataa atthu owuuluvala anaahala ukhala mahuku otheene.” Hiiva ciicammo “ninkooteka inupa ni ninkookhala mommo; ninkoophattya miri co uva ni ulya mihokorokho caya.” Hiiva ciicammo Khaninrwaa “uvara nteko mwinci mahala,” kontha ninhala ukhala “ipyoo yoovahiya iparakha ni Yehova”. Uyo honikhuluveliha hiiva ukumi wookhweeli, ukumi wookhikicerya, ni ukumi wootteeliha nrima. “Hataa nihinaaya umwiihana,” Yehova naahala ucuwela wookhula ntthu itthu impheelaawe ni naahala waavaha “itthu impheelaawe ale atthu ari akumi.”—Isai. 65:20-24; Isaa. 145:16.
13. khampa Isaiya 65:25 cinhimyaaya, marukunusoni ampankaya atthu aneetthuca ikhweeli?
13 Ukhala ninnema ni ukhikicerya. Akaviheriyaka ni nnepa wowaarya wa Yehova, atthu enci khalayi yaarina makhalelo ootakhala, okhirini ni oohikhuluvelya ahopanka marukunuso otikiniha muukumini waya. (Nsome Isaiya 65:25. f) Anavirihileene ukati mwinci yiikurumicaka, ahokhitiri uhiya moopuwelelo oohiloka. (Aroo. 12:2; Efesu 4:22-24) Khweeliini, nlattu woopahuwa wihu, hiiva nanlelo ninaavonya. Masi, Yehova nawaataniha “atthu okhapila cootheene” anonfenta ni ayo anaafentana. Itthu inkhumelela phiila, hiiva ninaakhala ninnema ni owaataana. (Titu 2:11) Iyo inkhala itthu yootikiniha inkhitiryaawe upanka paahi Nlukwiihu okuru cootheene!
14. Khampa ntakihero namunneehu ninooniheraaya moolumo Isaiya 65:25 akhanle eekhweeli?
14 Niireke ntthu naakhitiri upanka marukunuso muukumini wawe? Moone itthu yamwirannyeele mmirawo aarina myaakha 20, ahotthukiya ikwaha cinci ni ukumyaawe waari woohiloka ni wootakhala. Uyo ahotthukiya nlattu ahoowinnya Ikaaro, waaka inupa nikhirini cikhwaawe. Uyo anonviruwela khula ntthu. Ukati weewilyaawe ikhweeli co mbiibiliyani ahopacera urwaa umikutthaanoni co Masaahiti a Yehova, ni uyo ahokupali wiira ahophwanya itthu yaamwiira wiicoona ukhalana ifayita—ipeephoni yo mminepani. Ukati waapattisiyaawe, anoopuwela moolumo ari nhina Isaiya 65:25 mananna cinvaranacaaya nuuyova. Uyo ahohiya ukhala ntthu owoopiha ni ootakhala khampa kharamu, ni ahookhala ntthu oomaala khampa mwakhontwaa.
15. Nlattuni nimpheeleehu walattula atthu akhwaawe wiira atakaneele nihiiva nhina ipeephoni yo mminepani, ni ninhala upanka cani?
15 Isaiya 65:13 Moolumo oopacera aneera co: “Coo phineeraawe nkhulupale Pwiiya Yehova.” Iveerusu 25 inamalihera yiiraka co: “Neera Yehova.” Hi ninaacuwela wiira citthu Yehova khuluvelihilyaawe cinawiirannya. (Isai. 55:10, 11) Awula ipeephoni yo mminepani ikhanle ikhweeli. Yehova hathukumaniha aswalyaawe ahinlikananinya. Hiiva apoovu a Yehova ninawiicoona ukhala ninnema khampa khaniri ila ituninya yomasakheela. (Isaa. 72:7) Nlattu wo iyo itthwiiyo nimpheela waakavihera atthu upanka mphantte wo iyo ipeephoni yo mminepaniiyo atthu ntuninyani mootheene. Ninhala upanka iyo itthwiiyo nihihiyereraka uvara nteko woolalyeera.—Mat. 28:19, 20.
MWAAKAVIHERE ATTHU UPANKA MPHANTTE NHINA IPEEPHONI YO MMINEPANI
16. Isiyani inhala waakhavihera atthu akhwaawe upheela upanka mphantte nhina ipeephoni yo mminepani?
16 Hiiva nihaana nteko muulupale wofayita cinene, waakavihera atthu upanka mphantte nhina ipeephoni yo mminepani. Hiiva ninaapanka iyo nantakihaka Yehova. Uyo khanaakhanyereriha atthu wiira apanke mphantte wo mphwinkwaawe. Uhiya commo, uyo naawiihana atthwaayo nimananna omaana. (Joau 6:44; Jer. 31:3) Phimaana neetthucaka makhalelo ni moopuwelelo a Yehova, khunhala uhikhitirya atthu ooreera nrima uhipheela ukhala mpatthannyaawe. Manannani meettelweehu anhalaaya wiiriha atthu upheela ukela ipeephoni yo mminepani?
17. Manannani ninhaleehu waakeliha atthu akhwaawe mpeephoni yo mminepani?
17 Inanna imoca yoowiiriha atthu upheela ukela ipeephoni yo mminepani, ukhanle waafenta mayamunna ni mayanuunu ni ciicammo niwooniheraka unamaana. Ukati ntthu umpaceraawe uphiya Usalau wo Mweene, hi ninaapheela wiira uyo eecooneeke khampa yeeconnyaaya ale yonne mikutthaano khalayi nloko Nookorintu. Ayo wahaacivela ni yaheera: “Mwaanene Nluku ri ninyuuva ca.” (1 Akor. 14:24, 25; Zakar. 8:23) Phimaana ninlamuliyeehu uhihiya utthara ikano ineera: “Nkhale ninnema nakhunaniinyu.”—1 Atesal. 5:13.
18. Isiyani inhala uwiiriha atthwaayo ukela mumphwinkoni wihu?
18 Hiiva nihaana naweeheraka mayamunneehu ni mayanuunwiihu khampa Yehova cinaaweheraawe. Ninhala upanka iyo itthwiiyo niweheehaka makhalelo omaana o mayamunneehu uhiya citthu cinvonyihaya, kontha woowakuvya nnyo citthunyo khacinhala ukhala-tho. Nihaana nimmalihaka khula nanrokottole ninkhalaneehu ni mayamunneehu ni mananna onifento, nooniheranaka “unamaana, uthunku ni nilevelelanaka ninrimeehu wotheene.” (Efesu 4:32) Upanka commo, unaahala wiiriha ale ampheela uwaceriya ni mananna omaana, upheela ukela ipeephoni yo mminepani. g
NHIKHUME IPEEPHONI YO MMINEPANI
19. a) Toko cinthonyeraaya ikwaaturu “ Akhwaawe ahokhuma ni ahoturuwela,” isiyani atthu akhwaawe yaahimilyaaya uturuwela waya mpeephoni yo mminepani? b) Isiyani inlamuliyeehu ulakela upanka? (Nwehe ciicammo ilatarato.)
19 Hi ninaatteeliya nlattu woopanka mphantte ipeephoni yo mminepani. Mahukweehwaala woovirikana khalayi, ahoocara atthu ampanka mphantte iyo ipeephoni yo mminepaniiyo. Hi ninansukhuru Yehova nlattu woonitthenkhacera iyo ipeephoni yo mminepaniiyo. Wakhala wiira ntthu noopheela wiicoona uhikhala ni masukhuli ni ukhala ninnema haana apankaka mphantte iyo ipeephoni yo mminepaniiyo ni ulakela uhikhuma. Masi ratta kontha Sotwani naapanka wokhula itthu inkhitiryaawe wiira anithepye ni anikumihe iyo ipeephoni yo mminepaniiyo (1 Pet. 5:8; Apoka. 12:9) Nihinhiye Sotwani apheelaka unikumiha ipeephoni yo mminepani. Nipanke ile nkhitiriihu wiira niikhikicere ureera ni nnema nirineehu mpeephoni yo mminepani.
Ale ampanka mphantte mpeephoni yo mminepani nna co anaakhala ootteeliya aweehereraka ukhala upeephoni va watuninyani va (Nwehe iparaagarafu 19)
MWAAHALA WAAHULA CANI?
-
Ipeephoni yo mminepani isiyani?
-
Iparakhani nirineehu nlattu wookhala mpeephoni yo mminepani?
-
Ninhala waakavihera cani atthu akhwaawe wiira akele mpeephoni yo mminepani?
NCIPO 144 Nuupuweleke Etthuvo ya Muhoolo!
a NUULUMO NOOTAPHULELIYA: Nuulumo “Ipeephoni yo mminepani” ninhimya makhalelo okhikicerya nirineehu onswalela Yehova. Nhina iyo ipeephoni yo mminepaniiyo, hiiva ninaatteeliya ni ciicammo ninkhala ninnema ni Yehova ni naakhunanihu.
b Isaiya 65:13 Phimaana, coo phineeraawe Nkhulupale Pwiiya Yehova: Moone! Apoovwaaka anaahala ulya, masi nyuuva nnaahala uvoliya itala. Apoovwaaka anaahala uwurya, masi nyuuva nnaahala uvoliya ntthona. Apoovwaaka anaahala utteeliya nrima, masi nyuuva nnaahala woona ihaaya.
c Isaiya 65:14 Ale ankiswalela anaahala ukhuwela anatteeliye nlattu wookhalana ineema wanrimani waya, Masi nyuuva nnokoowunla ikuttho nlattu wo wuuweryaani nrima Ni nnaahala wunla nlattu wookhala ni masukhuli.
d Isaiya 65:16 Ule neepheelacera iparakha watuninyani, Naahala uvahiya iparakha ni Nluku eekhweeli, Ni ule nolapha watuninyani, Nohala unlaphela Nluku eekhweeli. Kontha masukhuli menci okhalayi anaahala uliyaliya, Mi akinhala woona-tho. 17 Vano moone! Kinawumpa irimu yo phiyaaru ni itthaya yo phiyaaru; Ni citthu cokhalayi khacinhala wuupuweliya-tho, Ni khacinhala uturuwela wanrimani.
e Isaiya 65:18 Phimaana, cuutteeliheni ni ntthapelele mpaka wattayi cithu cimpankaaka. Moone! Kinawiiriha isittatti yo Yerusalemu waatteeliha nrima atthu ni uwiiriha apovwaaya utthapeleliya. 19 Ni kinaahala utteeliya nlattu wosittatti yo Yerusalemu ni nlattu waapovwaaka; Khunhala wiiwiya-tho mmo ncu naatthu anonla ni hataa mena ukhuwaca waatthu osanka.
f Isaiya 65:25 Mwiici ni ikhontwa yankaani cinaahala ulya nkhayi, Kharamu nohala ulya malasi toko imope, Ni inwaa inhala ulya itthaya. Khacinhala wooniha yoowerya ni khacinhala uhonona itthu wamwaakoni waka wowaarya wotheene, neera Yehova.
g Moone ividiyu nhina isayiti jw.org Vano Ari Woowi? Alena Žitníková: Etthu Kaaphavelaka Yaahiiraneya, ni moone iparakha anuunwiihu amoca yaakhenlyaaya nlattu woopanka mphantte wopeephoni yo mminepani.
h UTTONKACIYA WO ILATARATO: Mayamunna yoopanaka mwaha mayamunna makhwaawe umikutthaanoni, munna mmoca nookomile veekha.
