MWAHA WOOSOMIYA 30
NCIPO 36 Nikhapeleleke Murima Ahu
Isiyani nineetthuceehu ni mamwene o Sarayeli?
“Nyuuva nnaahala woona-tho uvirikana wantthu neettela isariya ni ntthu ohinamaana, ntthu nonswalela Nluku ni hinonswalela.”—MAL. 3:18.
ITTHU INHALEEHU WIITTHUCA
Nhina ula mwahoola ninaahala woona mananna Yehova caawoonelaawe mamwene o Sarayeli ni itthu inwehereraawe wiira aswalyaawe omahukwaala apanke.
1-2. Isiyani Ibiibiliya inhimyaaya yawaacaka mamwene akhwaawe o Isarayeli?
MBIIBILIYANI anawuulumiya macina alopwana oovikana 40 yaari mamwene o Sarayeli. a Myaha co mbiibiliyani cinwuuluma ayo alopwanaayo ni nimakhalelo yaarinaaya cikhanle cokhweeli. Wootakihera, hataa mamwene ooreera nrima yahopanka citthu cootakhala. Hiitthu yeerannyeele ni mwene Davidi. Yehova aheera co: “Davidi hotthara ikano caka ninrimaawe wotheene, apankaka paahi citthu caakicivela.” (1 Mam. 14:8) Masi muupuwele wiira Davidi aheetta uluva naathiyana ootheliya ni ahoruma wiiviya awannyaya ukhottoni.—2 Sam. 11:4, 14, 15.
2 Itthu ikhwaawe, mamwene menci ootakhala nrima yahopanka citthu comaana. Moone ntakihero na Roboau, moonelo wa Yehova uyo “ahopanka itthu yootakhala.” (2 Ikor. 12:14) Waahookhalaru commo, Roboau aheewelela ikano ca Yehova cowiira khaalamuliya waana ni mwene o maloko 10 o Isarayeli ni ahaana waahiya anthanlaka mwene nkhwaawe. Uyo ciicammo, ahoncerera ukhikiceriya wo isittatti cinci, aakaviheraka apoovu a Nluku wiikhikicera mmatatani waawanannyaaya.—1 Mam. 12:21-24; 2 Ikor. 11:5-12.
3. Isiyani atthunaka hiiva inhaleehu utikhinaca ni isiyani inhaleehu woona nhina ula mwahoola?
3 Nasomaka ihantisi co mamwene o Isarayeli, hiiva pooti ukhala otikinihinya: Vano ayo mamwennyaayo yahopanka citthu comaana ni coohinamaana, manannani Yehova caalakelaawe wakhala wiira uyo mwennyeeyo aari ooreera nrima awula ootakhala nrima? Waakhuliya wonna nikohonna unaahala unikavihera wookuta mmoca hiivano ucuwele isiyani inlamuliyeehu upanka wiira nintteelihe nrima Yehova. Nhina ula mwahoola, ninaahala woona citthu tthaaru Yehova caavarenlyaawe nteko wiira awehacere mamwene o Isarayeli tipani aari ooreera nrima ni ootakhala nrima. Itthu yoopuwelaaya wanrimani waya, waakhala wiira yahoonihera uttharuwa ni waakhala wiira yaananswalela ni mananna omaana.
UFENTA YEHOVA NINRIMA WOTHEENE
4. Manannani caavirikanaaya mamwene ookhuluvelya ni oohikhuluvelya?
4 Mamwene yantteelihile nrima Yehova yaananswalela ninrimaaya wotheene. b Mwene Yehosafa, aari mwene omaana “ahonvarela nteko Yehova ninrimaawe wotheene.” (2 Ikor. 22:9) Nimuulumaka Yosiya, Ibiibiliya ineera wiira: “Hinaaya ukhumelela Yosiya, khaarivo-tho mwene anlikanana uyova aaturuwenle unswalela Yehova ninrimaawe wotheene.” (2 Mam. 23:25) Vano, mwene Salomau, aapankile citthu cootakhala mahuku ookhicera hinaaya ukhwa, Ibiibiliya ineera wiira khanswalela Yehova “ninrimaawe wotheene.” (1 Mam. 11:4) Nimuulumaka Abiyau, mwene nkhwaawe oohikhuluvelya, Ibiibiliya ciicammo inaahimya wiira: “khanswalela Yehova ninrimaawe wotheene.”—1 Mam. 15:3.
5. Unvarela nteko Yehova ninrima wotheene, maanaaya isiyani?
5 Vano, unswalela Yehova ninrimeehu wotheene maanaaya isiyani? Ntthu nonswalela Yehova ninrimaawe wotheene khampanka iyo itthwiiyo nlattu wookhanyererihiya. Uhiya commo, uyo ntthuuyo nonswalela nlattu wonifento ni unhisima. Khanhiya umuupuwela Yehova muukumini wawe motheene.
6. Manannani ninhaleehu woonihera wiira ninanswalela Yehova wookhuluvelya ninrimeehu wotheene? (Miruku 4:23; Matewus 5:29, 30)
6 Manannani ninhaleehu waatakiha mamwene ookhuluvelya o Isarayeli ni unswalela Yehova ninrimeehu wotheene? Nihaana unnyema moopuwelelo oohinamaana, awula, wookhula itthu inhala uniiriha ulolovaca unfenta wihu Yehova. Wootakihera, nihaana uwehera ratta citthu cinooneehu awula cimpankeehu ukati ninthweleehu. Ciicammo, ninlamuliya waathanla saana apatthani ninaathukaneehu, ni uhiya paahi wuupuwela wiira nsurukhu awula uthaciri hiri itthu yofayita cinene muukumini wihu. Nacuwelelaka wiira ihaavo itthu inloloviha unfenta wihu Yehova, nihaana upanka itthu woohipicapica wiira niikhikicere ayo moopuwelelwaayo.—Nsome Miruku 4:23 c; Matewus 5:29, 30. d
7. Kontha isiyani ikhanlyaaya itthu yofayita unyema citthu coohinamaana?
7 Khaninlamuliya uhiyerera nrimeehu ukhala wookawannyaaca. Nahiweheeheke saana, pooti upacera wiithepya nuupuwelaka wiira nlattu woovara miteko cinci co mminepani, moopuwelelo oohinamaana khanhala unipanka pusya. Muupuwele nna ntakiheronna: Muupuwele wiira nihuku nooririya nyuuva nnaakhuma nluwani winyu, vano nyuuva naakhela mpaani nnaaparihela mooro, niireke uririya nwo unaahala wuumalani nnaahiile nkhorooyo woohulyeene? Mena. Wanhala utepa wuuririyani. Isiyani nineetthuceehu? Nkhalelo wo munnepani, ninlamuliya upanka itthu uhiya paahi wiilihera nhina mminepani wiira nikhalane upatthani woolipiha ni Yehova, masi ciicammo, ninlamuliya utthuka mikhora co moopuwelelo oohiloka. Wiira uririya wo ila ituninyeela ni moopuwelelo oohiloka Yehova ahinoncivela ahiirihe nrimeehu ukhala wookawannyaaca.—Efesu 2:2.
WOONIHERA UTTHARUWA ITAMPI CIHU WEEKHWEELI
8-9. Isiyani mwene Davidi ni mwene Ezekiya yaapankilyaaya ukati waacuwenlyaaya wiira Yehova ahorusiya ni citthu caapankilyaaya? (Nwehe yo wakaapani.)
8 Khampa coonileehu, mwene Davidi ahovara itampi cuulupale. Masi ukati porofeeta Nataa wanhimenryaawe Davidi mananna Yehova ceecoonaawe, Davidi ahoonihera uttharuwa weekhweeli. (2 Sam. 12:13) Moolumo a Davidi amphwanyannya nhina Isaalimu 51, anawoonihera wiira khweeliini Davidi ahottharuwa ni citthu caapankilyaawe. Davidi khothererihile uttharuwa wiira anthepace Nataa ni hittarusiye.—Isaa. 51:3, 4, 17.
9 Mwene Ezekiya ciicammo ahontthekela Yehova. Ibiibiliya ineera wiira: “Wanrimani wawe ahopacera wiicoona, nlattu wo iyo itthwiiyo uyo aheewaneela masakha, ciicammo Ayuuta ni a Yerusalemu.” (2 Ikor. 32:25) Masi kontha isiyani Ezekiya apacenryaawe wiicoona? Atthunaka uyo ahopacera wiicoona nlattu womihakhu, nlattu wowaatthema Asiiriya awula nlattu woovonihinya iretta nimananna otikiniha. Ni atthunaka nlattu wowiicoona wawe, uyo wahomwiiriha woonihera mihakhu cawe ababiloninya. Nlattu wo iyo itthwiiyo porofeeta Isaiya ahomwiirela wiira Yehova naahala wuuviruwela. (2 Mam. 20:12-18) Masi khampa Davidi, Ezekiya ciicammo ahoonihera wiiyeviha. (2 Ikor. 32:26) Himaana moonelo wa Yehova, Ezekiya aari mwene ooreera nrima ni “aapanka citthu comaana uhoolo wa Yehova.”—2 Mam. 18:3.
Mwene Davidi ni mwene Ezekiya yahoonihera uttharuwa weekhweeli, ukati waacuwenlyaaya mananna Yehova caakhanlyaawe nlttu wo itampi yaavanryaaya (Nwehe iparaagarafu 8-9.)
10. Isiyani Amasiya yaapankilyaawe ukati waalakiyaawe?
10 Ciicammo Amasiya mwene o Yuuta, ahopanka itthu yomaana uhoolo wa Yehova, “masi kahi ninrimaawe wotheene.” (2 Ikor. 25:2) Isiyani yootakhala yaapankilyaawe? Ukati Yehova ankaviheryaawe waatthema Mahetomita, Amasiya ahaswalela a nlukwaaya ayo apoovwaayo. e Ukati porofeeta a Yehova waarweelyaawe umuulumana nlattu wo itthu yaapankilyaawe, uyo mwennyeeyo khamwiwelenle ni ahomomola.—2 Ikor. 25:14-16.
11. Khampa cinthoonyeraaya 2 Akorintu 7:9, 11, isiyani inlamuliyeehu upanka wiira nileveleliye ni Yehova? (Nwehe ciicammo ilatarato.)
11 Isiyani ineetthuceehu naala matakiherwaala? Ninlamuliya uttharuwa itampi cihu ni upanka khula itthu inkhitiriihu wiira nihituruwele-tho uvara. Waakhala wiira mahumu owanlokoni anaanivaha ikano hataa cikhalaka citthu cankaani, khaninlamuliya wuupuwela wiira Yehova khannifenta awula wuupuwela wiira mahumu anaanirama. Hataa mamwene ookhuluvelya o Isarayeli ikwaha cikiina yanvahiyaka ikano ni ciicammo yaaneetthucihiya. (Mabere. 12:6) Ukati nineetthucihiyeehu, hiiva ninlamuliya (1) utthuna nooniheraka wiiyeviha, (2) upanka marukunuso woohipica, ni (3) urweehela uhoolo unswalela wihu Yehova ninrimeehu wotheene. Nattharuwaka itampi cihu, wohanyihacera Yehova naahala unilevelela.—Nsome 2 Akorintu 7:9, 11. f
Ukati unlakiyeehu nihaana (1) utthuna nithoonyeraka wiiyeviha, (2) upanka marukunuso woohipicapica (3) uhihiya urweehela uhoolo unswalela wihu Yehova ninrimeehu wotheene (Nwehe iparaagarafu 11) i
UNSWALELA YEHOVA NIMANANNA CIMPHEELAAWE
12. Makhaleloni mamwene ookhuluvelya yoonihenryaaya?
12 Mamwene Yehova aawonnyaawe ukhala ookhuluvelya, khayaamala uvaresesa uswali weekhweeli ni ayo yaanaakavihera apoovu a Yehova upanka itthu imocaaru. Hataa ukhalaka wiira cahaavo citthu caavonyaaya khampa noonileehu, ayo yahovaherera ukumyaaya wa Yehova ni wiikurumica venci wiira amalihe uswali woohikhweeli. g
13. Kontha isiyani Yehova waamonnyaawe Akaape ukhala oohikhuluvelya?
13 Kontha isiyani Yehova aawonnnyaawe mamwene makhwaawaayo ukhala oohikhuluvelya? Khweeliini, khunakhala wiira citthu cotheene caapankilyaaya caari cootakhala. Hataa mpaka mwene Akaape aari ootakhala ahoonihera wiiyeviha vakaani ni uttharuwa ukati amwiivilyaawe Napoti. (1 Mam. 21:27-29) Uyo ciicammo, ahoteka isittatti ni ahotthema ikhotto aakaviheraka a apoovo o Isarayeli. (1 Mam. 20:21, 29; 22:39) Masi, Akaape ahopanka itthu yootepa utakhala nlattu wo moopuwelelo aamwaarawe, uyo ahokurumica uswaleliya anluku oohikhweeli ni ilatarato. Masi uyo khattharuwile.—1 Mam. 21:25, 26.
14. a) Kontha isiyani Yehova waamonnyaawe mwene Roboau ukhala oohikhuluvelya? b) Makhaleloni mamwene oohikhuluvelya yoonihenryaaya?
14 Moone ntakihero nikhwaawe na mwene oohikhuluvelya eehaniya Roboau, khampa nonneehu, uyo khamala upanka citthu comaana ukati aalamulelaawe. Masi, ukati citthu cawe caamwettelaaya saana, uyo ahookhala okuru, ahohiya weettela ikano ca Yehova ni ahopacera waaswalela anluku oohikhweeli. (2 Ikor. 12:1) Ikhumelo vaava, ukati nkiina answalela Yehova ni ukati nkiina anluku oohikhweeli. (1 Mam. 14:21-24) Masi, khunakhala paahi mwene Roboau ni Akaape yaahiile uswali weekhweeli. Masi ciicammo, mamwene menci oohikhuluvelya yahokavihera uswali woohikhweeli. Unawoonannya wiira uswali weekhweeli yaari itthu yofayita para Yehova, wiira oone wakhala wiira mwene aari ookhuluvelya awula mena.
15. Kontha isiyani uswali weekhweeli ikhanlyaaya itthu yofayita para Yehova?
15 Kontha isiyani Yehova oonaawe ukhala itthu yofayita uswali weekhweeli? Yoopacera, kontha mamwene haarina nrintti wowaahoolela apoovu a Nluku ni uswali weekhweeli. Uhiya commo, uswali woohikhweeli wanwiiriha atthu akhwaawe uvara itampi cuulupale ni upanka citthu cootakhala. (Ose. 4:1, 2) Yonayeeli, mamwene ni apoovu otheene yaheevaherera wa Yehova. Phimaana Ibiibiliya inlattanihaaya uswali woohikhweeli khampa ntthu neetta uluva. (Jer. 3:8, 9) Kontha watthokoni, ntthu eettaka uluva, khankhala-tho okhuluvelya. Uluva unanwereeha nrima venci ntthu neetteliyooyo. Mananna mamocaaru, ntthu eevahereraka wa Yehova, masi, ukati nkiina apankaka citthu cinthoonyera uswali woohikhweeli, uyo naavara itampi ni nanriipiha nrima Yehova. h—Deut. 4:23, 24.
16. Moonelo wa Yehova, manannani unvirikanaaya ntthu omaana ni ntthu oohinamaana?
16 Isiyani inlamuliyeehu wiitthuca? Ninlamuliya ulakela uhitakaneela nicitthu cinvaranaca nuswali woohikhweeli. Masi ciicammo, nihaana uvaresesa uswali weekhweeli ni uhihiya ulalyeera ninswalelaka Yehova. Porofeeta Malakiya ahotaphulela uvirikana wantthu omaana ni ootakhala uhoolo wa Yehova. Uyo ahantikha co: “Nyuuva nnaahala woona-tho uvirikana wantthu neettela isariya ni ntthu oohinamaana, ntthu nonswalela Nluku ni hinonswalela.” (Mal. 3:18) Phimaana khaninlamuliya uhiyerera upahuwa wihu ni coovonya cihu cinilolovihaka ni uhiya unswalela Yehova. Ulakela Uhiya uswalela Yehova inhala ukhala itampi yuulupale cinene.
17. Kontha isiyani nyuuva nnolamuliyeenyu unweheeha saana ntthu nnopheeleenyu unthela awula wuuthelani?
17 Wakhala wiira nyuuva khanthenle ni khantheliye ni nnompheelaca ntthu wiira munthele awula ootheleni, nnaakhitiri woona mananna moolumo a Malakiya anvarihanaaya nuuthelanaaca? Ntthu pooti ukhalana makhalelo omaana masi wakhala wiira khaanonswalela Nluku eekhweeli, niireke uyo khanle ntthu omaana uhoolo wa Yehova? (2 Akor. 6:14) Wakhala wiira nyuuva nnaatheliya ni nnanthela uyo ntthuuyo, niireke naahala wuukaviherani nhina mminepani? Muupuwele ila: Asaarawe Salomau yaarina makhalelo omaana, masi, ukhala wiira khayanswalela Yehova, vakaani-vakaani ayo yahopacera uhapusa nrima wa Salomau, mpaka uphiya ukati wancenryaawe waaswalela anluku oohikhweeli.—1 Mam. 11:1, 4.
18. Isiyani ayari inlamuliyaaya wiitthuciha asaanaaya?
18 Ayari pooti wansomaaya ihantisi co mamwene o Isarayeli wiira mwaakavihere asaaneenyu wuncerera upheela unswalela Yehova. Mwaakavihere asaaneenyu woona wiira ntthu nooninnya ukhala omaana awula oohinamaana ni Yehova aweehaceriyaka mananna cinvaresesaawe uswali weekhweeli. Moonihere nimoolumacerweenyu, nsomaka Ibiibiliya, urwaa umikutthaanoni ni uvara nteko woolalyeera wiira ikhanle itthu yofayita muukumini winyu. (Mat. 6:33) Mwahipankeke iyo, asaaneenyu pooti wuupuwela wiira ukhala Saahiti a Yehova ukhanle paahi waatthara mayaapapeehu Usalau yo Umwene, nlattu wo iyo, ayo pooti weesa uswali weekhweeli nipuro nonayeeli awula mpaka uhiya unswalela Yehova.
19. Kontha isiyani ntthu hiile unswalela Yehova hirimenlyaawe? (Nwehe ikwaaturu “ Nyuuva pooti uturuwela unswalela Yehova!”)
19 Ntthu ahiyaka unswalela Yehova, niireke uyo hoorimela? Mena. Uyo pooti woonihera uttharuwa ni uturuwela unswalela Yehova khampa cimpheelaawe. Wiira apanke iyo, ntthuuyo haana ahiyaka nttima ni waamini ukaviheriya ni mahumu owanlokoni. (Tiya. 5:14) Unawoonannya wiira khula itthu inhalaawe upanka inaahala unkavihera unturuwela Yehova!
20. Naatakihaka mamwene ookhuluvelya o Isarayeli, manannani Yehova cinhalaawe unoonela?
20 Woothikilela, isiyani ineetthuceehu ni mamwene o Isarayeli? Hiiva pooti wiitthuca ni mamwene ookhuluvelya yahaahiile uvara miteko ca Yehova, ninrima wotheene. Nihaana wiitthucera ni citthu cinvonyeehu, uttharuwa ni upanka marukunuso woohipica ni wuupuwela wiira itthu yofayita cinene ukhanle uswali weekhweeli. Naayo manannaayo, naahihiyeke ukhala ookhuluvelya wa Yehova, naahala unoona ukhala ntthu nopanka itthu yomaana uhoolo wawe.
NCIPO 45 Nivekelo na Mutthu Oxankale
a Nhina ula mwahoola, noolumaka “mamwene o Isarayeli” ninaaca mamwene otheene yaalamulela apoovu a Yehova, ulamuleliya wo maloko meeli o Yutaa, ciicammo ulamuleliya wo maloko 10 o Isarayeli ni mpaka ukati apoovu waaryaaya ahinakawannyaaca.
b NUULUMO NOOTAPHULELIYA: Ikwaha cikiina Ibiibiliya inaavarelaka nteko nuulumo “nrima” yaacaka moopuwelelo ntthuuyo rinaawe. Iyo inhela nhina citthu ntthuuyo cinoncivela, cinoopuwelaawe, makhalelwaawe, citthu cinonkurumica upanka itthu ni mpanka citthu cinlakelaawe upanke.
c Miruku 4:23 Venci-venci, ukhikicere nrimaa, kontha wanrimani phinkhumakhumaaya ukumi.
d Matewus 5:29 Vano, wakhalaka wiira niitho ninyu nomoono wonlopwana ninawuutthekihani, nkumihe ni nvonyere uttayi. Kontha phataari uhikhalana mphantte mmoca worutthwiinyu, uhiya irutthwiinyu yotheene uriheliya Ncehena. 30 Ciicammo, wakhalaka wiira ntata ninyu nomoono wonthiyana ninawuutthekihani, nthikile ni nrihele uttayi. Kontha phataari uhikhalana mphantte mmoca worutthwiinyu uhiya irutthwiinyu yotheene uriheliya Ncehena.
e Khalayi, unkhala toko wiira mamwene menci yaanaswalela anluku oohikhweeli o mapuro yaatthemilyaaya.
f 2 Akorintu 7:9 vano kinaatteeliya, kahi nlattu woocukulihiya winyu, masi nlattu wiira ucukula winyu uhowiirihani uttharuwa. Maana nhocukulaca khampa Nluku cimpheelaawe, ni khamphwanyile ihasara nlattu waawiihu. 11 Uriipiya nrima woncivela Nluku ukhalanneenyu uhookhitirihani urehererya makhalelweenyu, uhiciveliya ni citthu coohiloka, umoova Nluku, upheela urukunusa nrima, wiikurumica unswalela Nluku ni ulokiha itthu yoohinamaana ipankiye! Nyuuva nhothoonyera naayo mananna otheenennyaayo wiira nkhanle atthu omaana.
g Mwene Aasa ahovara itampi yuulupale. (2 Ikor. 16:7, 10) Uhookhalaru commo, Ibiibiliya ineera wiira Aasa ahopanka itthu yomaana uhoolo wa Yehova. Hataa ukhalaka wiira wiipaceroni khaatthunne uhimeriya, unawoonannya wiira nuuwakatyaaya uyo ahottharuwa. Ayo manannaayo, Yehova ahoona citthu comaana caapankilyaawe uhiya citthu cootakhala. Itthu yofayita cinene ukhalaka wiira Aasa answalela paahi Yehova ni aheekurumica venci wiira amalamalihe uswali woohikhweeli ukati waalamulelaawe.—1 Mam. 15:11-13; 2 Ikor. 14:2-5.
h Unawoonannya wiira Yehova naavaha ifayita cinene uswali weekhweeli, kontha maalamulo meeli oopacera a Moceesi, yankhottiha uswaleliya wokhula itthu uhikhanle paasi Yehova.—Nkw. 20:1-6.
i ILATARATO: Humu mmoca mmirawo amoopalanaka mwaha munna, amooniheraka wiira ri niiwasiwaasi nimananna cinwuryaawe nipha. Vano, uyo munnooyo naatthuna ikano ivahiyaawe ooniheraka wiiyeviha, naapanka marukunuso woohipica ni khanhiyerera unswalela Yehova wookhuluvelya.
