MWAHA WOOSOMIYA 29
NCIPO 121 Nikhaleke Oowiihiiha
Nkhale oohiitthaala mwattehiyaka
“Nhiitthaale ni nlompe woohihiyerera wiira nhikhitiriye uttehiya.”—MAT. 26:41.
ITTHU INHALEEHU WIITTHUCA
Nhina ula mwahoola ninaahala wiiweeha saana ifayita irinaaya unyema uvara itampi ni citthu caahala uniiriha uvara iyo.
1-2. a) Isiyani Yesu aawiirenlyaawe attharyaawe? b) Kontha isiyani atthari a Yesu yanhilyaaya? (Nwehe ciicammo ilatarato.)
YESU enre co: “Nrima unaatthuna, masi irutthu khinlipa.” a (Mat. 26:41b) Ala moolumwaala, anawoonihera wiira Yesu ancuwela sana-saana wiira hi naatthu oopahuwa ni nanhala uvonya. Ala moolumwaala ciicammo anaahimya wiira: Nihaana nikhalaka owiiwehaweha wiira nihitepe wiikhuluvela naasineeneehu. Ule uhiyuule, Yesu hinaaya uhimya ala moolumwaala, attharyaawe yaheera khayaahala unkhotta Yesu (Mat. 26:35) Ayo yaari moopuwelelo omaana, masi nlattu woottehiya, ayo khayaapankile khampa calakenlyaaya. Phimaana Yesu ahowiirela co: “Nhiitthaale ni nlompe woohihiyerera wiira nhikhitiriye uttehiya.”—Mat. 26:41a.
2 Khweeliini, ayo khayaakhitinri ukhala oohiitthaala. Yesu uvariya wawe, niireke ayo yaahokhala mphantte wa Yesu khampa cahimilyaaya awula yahotthawa nlattu wowoova? Nlattu wookhala owiitthaala, attharyaawe yahopanka ile yenryaaya khayaahala upanka. Ayo yaahonhiya Yesu.—Mat. 26:56.
Yesu ahowiirela attharyaawe wiira nhiitthaale ni wiira nhikhitiriye uttehiya, masi ayo yaahonhiya Yesu (Nwehe iparaagarafu 1-2)
3. a) Wiira nilipihace unkhuluvela wihu Yehova, kontha isiyani ninlamuliyeehu uweheeha saana wiikhuluvela naasineeneehu? b) Isiyani inhaleehu woona nhina ula mwahoola?
3 Hi khaninlamuliya woonihera wiira ninawiikhuluvela. Khweeliini, hi nimpheela upanka yotheene inkhitiriihu wiira nintteelihe nrima Yehova. Nlattu woopahuwa hiiva pooti uttehiya wiira nipanke itthu yoonanara. (Aroo. 5:12; 7:21-23) Woohirikarika, hiiva pooti uttehiya wiira nipanke itthu yoonanara. Wiira nikhale ookhuluvelya ni Yehova ni mwanaawe Yesu Kristu, nihaana nittharaka ikano ya Yesu ineera wiira nihaana nikhalaka oohiitthaala naattehiyaka. Ula mwahoola unaahala unikavihera mananna oopanka iyo. Yoopacera, citthuni hiiva ninlamuliyeehu ukhala oohiitthaala. Ciicammo ninaahala woona manannani ninlamuliyeehu wiikhikicera wiira nihikhitiriye naattehiyaka. Yookhicera, manannani ninhaleehu uhihiyerera ukhala oohiitthaala.
NKHALE OOHIITTHAALA NI CITTHU CAAHALA WUVARIHANI ITAMPI
4-5. Kontha isiyani ninlamuliyeehu uweheeha saana itampi cihu hataa cikhalaka cacikaani?
4 Hataa cikhalaka itampi cacikaani, nnyo pooti uvololiha upatthani urineehu ni Yehova. Uhiya commo, nnyo pooti uniiriha uvara itampi cuulupale.
5 Otheene cihu ninaattehattehiya wiira nivare itampi. Masi, wookhula ntthu cihaavo citthu cinonvololiha, akiinaayo cihaavo cinwiiriha uvara itampi cuulupale, akiinaayo pooti wiiriha uttharelela moopuwelelo ohinamana o ila ituninyeela. Atthu akhwaawe anawaanana uttehattehiya woorupihana woohiloka. Akiinaayo atthunaka anaanana uttehattehiya wiira akhalane moopuwelelo oohinamaana toko wiikeha, awula woona ipornografiya. Ni atthunaka akhwaawe anaanana uwoova atthu akhwaawe, uhiicoona ukhala ootaphuwa, upheela paahi citthu cinaacivela hataa yoonaka wiira cinawaakumihera masakha akhunanaya ni citthu cikhwaawe. Khampa Tiyaku wenryaawe “Khula ntthu nottehattehiya nuupheela wawe citthu cootakhala. Vano upheela wawe nnyo citthunnyo wantepelaka winciva, unanhapusa.”—Tiya. 1:14.
6. Kontha isiyani ikhanlyaaya itthu yowoopiha wuupuwela wiira khiivo itthu inhala unilolovihaca?
6 Nyuuva nnaacuwela citthuni cinoorikelani unyema upanka? Ikhanle itthu yowoopiha uhiwacera citthu cinnirekela unyema upanka ni wuupuwela wiira niri oolipa cinene ni ninaahala ukhitiri utthema naattehiyaka. (1 Jo. 1:8) Masi nhiliyale wiira Paulu hohimya wiira hataa “ale oolipa nhina mminepani” pooti uvara matampi yaahikhikicereke. (Akalas. 6:1) Phimaana hiiva nihaana naamineelaka naasineneehu wiira cihaavo cinnirikela unyema upanka.—2 Akor. 13:5.
7. Isiyani hiiva inlamuliyeehu uweheeha? Ntakihere.
7 Vano noonelelaka nnyo citthunnyo, isiyani inlamuliyeehu upanka? Toko cilakenleehu, nihaana wiilipihaca wiira nihikhitiriye naattehiyaka. Wootakihera, imuuru caatekiya khalayi wiira cikhikicere isittatti, canrika ukwanyulaciya. Uhikhanle paahi mikhora caya. Phimaana yaaneesiya makwaarata menci wiira aweheehe mikhora. Inanna imocaaru, hiiva ninlamuliya uwehacera saana citthu cinnirikela unyema upanka wiira nihivare itampi.—1 Akor. 9:27.
MANANNA OOKHALA WOOHIITTHAALA
8-9. Mmirawo himiye nlivuruni ya Miruku ikapiitulu 7, manannani caahalaawe ukhitiri unyema uvara itampi yuulupale? (Miruku 7:8, 9, 13, 14, 21)
8 Manannani ninhaleehu ukhala oohiitthaala ni unyema uttehattehiya wiira nipanke citthu cootakhala? Hiiva pooti wiitthucera ntakihero nammirawo mmoca nantikhiye nhina ilivuru ya Miruku ikapiitulu 7. Uyo ahopanka urupihana woohiloka ninthiyana mmoca namararuwa. Iveerusu 22 ineera wiira uyo mmirawooyo ahaatthara ayo athiyanaayo. Masi, mwahooyo unawoonihera wiira uyo mmirawooyo vakaani-vakaani ahopanka itthu yaamwiirihile uvara itampi yuulupale.
9 Isiyani yaamwiirihile uyo mmirawooyo uvara itampi? Yoopacera, ukati waakelaaya ncuwa, uyo mmirawooyo ahovira uwannyawe uyo nthiyanooyo. Vano, uyo ahopacera weetta nttala waavira nipuro naakhalaawe uyo nthiyanooyo. (Nsome Miruku 7:8, 9. b) Ukati waamonnyaawe uyo nthiyanooyo, uyo khanhuluwile, uhiya commo uyo ahonhiyerera uyo nthiyanooyo ampecariki ni anviriyanaka citthu cahimyaawe. Uyo nthiyanooyo ahohimya wiira ahovaha nkuttho wooleveleliya itampi, atthunaka aapheela wiira uyo mmirawo oopuwele wiira uyo nthiyanooyo khaari namararuwa. (Nsome Miruku 7:13, 14, 21. c) Unari wiira uyo mmirawo khapankile nnyo citthunnyo, uyo khahala uttehattehiya upanka itampi yuulupale.
10. Manannani ntthu waahalaawe uvara itampi khampa yaavanryaawe mmirawo himiye nlivuruni ya Miruku 7?
10 Uyo mwahooyo unawoonihera itthu atthunaka inhala unirannyeela otheene cihu. Atthunaka, pooti uvara itampi yuulupale ni wuupuwela wiira yiirannyeele “wowaakuvyaaca” awula, yiirannyeele hiiva woohicuwelala. Masi, neemelaka ni nuupuwelaka itthu ikhumelenle, atthunaka ninaahala ucuwelela wiira iyo itampiiyo yiirannyeele nlattu woolakela upanka citthu coohinamaana. Atthunaka ntthuuyo vanre ayo matampyaayo nlattu wo waathanla apatthani oohiloka, uthanla mathukelo anoonihera makhalelo o ntuninyani awula wiikelakeliha mapuro oohinamaana, atthunaka mwaaneeneehu awula nivarelaka nteko interneti. Pooti ukhalaka wiira ntthuuyo hohiya ulompa, usoma Ibiibiliya, woona mikutthaano awula urwaa wuulalyeerani. Khampa itthu yamwirannyeele mmirawo nooluminya nlivuruni ya Miruku, atthunaka iyo itampiiyo khayiirannyeele “wowaakuvyaaca.”
11. Wiira nihivare itampi, isiyani inlamuliyeehu unyema?
11 Isiyani hiiva iniitthuceehu? Hiiva khaninlamuliya paahi unnyema uvara itampi, masi ciicammo, ninlamuliya unnyema itthu yaahala uniiriha uvara itampi. Salomau hoonihera iyo itthwiiyo ukati woolumilyaawe itthu yaamwiirannyenle mmirawo ni nthiyana namararuwa. Amuulumaka nthiyana namararuwa, uyo ahohiya ila ikanweela: “Nhuluwe mapuro anviraaya.” (Miru. 7:25) Uyo ciicammo aheera: “Mwaavire uttayi ayo athiyanaayo; nhattamele iphiro invira uwannyaya.” (Miru. 5:3, 8) Khweeliini, wiira niikhikicere nhina itampi ninlamuliya uhuluwa citthu cinhala uniiriha upanka itthu yaahala unriipiha nrima Yehova. d iyo inhela nhina unyema upanka citthu cinkhala toko coohinanara para nkristau, masi caahala uniiriha upanka itthu yoonanara.—Mat. 5:29, 30.
12. Isiyani Jó yaalakenlyaawe upanka ni manannani iyo itthwiiyo yankavihenryaaya unyema uvara itampi? (Jó 31:1)
12 Wiira ninyeme uvara itampi, nihaana ulakela upanka citthu comaana. Phiitthu Jó yaapankilyaawe. Uyo ahopanka nleehano ni mithwaawe wiira hinwehe nthiyana ni wanrimani wawe upheela unrupana. (Nsome Jó 31:1. e) Wiira Jó akhitiri ukhala khampa caalakenlyaawe wanrimani wawe, uyo ahookhala uttayi nurupihana woohiloka. Hiiva ciicammo, pooti wanlakeleehu unyema wokhula itthu yaahala unittehatteha upanka iyo.
13. Kontha isiyani nihaana ukhikicera moopuwelelweehu? (Nwehe ciicammo ilatarato.)
13 Hiiva ninlamuliya ukhikicera moopuwelelweehu. (Nkw. 20:17) Atthu akhwaawe ankupali wiira khinaakhala itthu yoonanara wuupuwelela mananna oovara itampi, masi ntthuuyo aahivareru itampi. Masi, ayo mananna owuupuwelaayo akhanle owoopiha. Ntthu nookhala oopuwelaka mananna caahalaaya ukhala aapankile itthu yootakhala, khweeliini noncerera upheela wawe uvara itampi. Woohanyihacera, uyo ntthuuyo nawiittehatteha niitthu aahalaawe upheela ukhotta. Khweeliini, khula ikwaha anaahala ukhumelela moopuwelelo oohiloka. Isiiryaaya ukhanle ukhotta wowaakuvyaaca ayo moopuwelelo oohilokaayo ni urukunusa ni moopuwelelo omaana. Napankaka iyo ninaahala ukhotta ukhalana moopuwelelo oohinamaana wiira yuunuwe ni unikurumica upheela uvara itampi ni inhala ukhala itthu yoorika waanana.—Afili. 4:8; Akol. 3:2; Tiya. 1:13-15.
Nihaana unyema citthu cinhala unikurumica uvara itampi (Nwehe iparaagarafu 13)
14. Isiyani inhala unikavihera unyema uvara itampi?
14 Isiyani inlamuliyeehu upanka wiira ninyeme uttehattehiya wiira nivare itampi? Hiiva ninlamuliyaaya ucuweleeha wiira wiiwelela ikano ca Yehova phiitthu yofayita muukumini wihu. Pooti ukhalaka wiira ikwaha cikhwaawe unaanirikela wuupuwelela citthu cimpankeehu, cinlakeleehu wiira civarihane niitthu impheelaawe Yehova. Masi niimananihaka upanka iyo ninaahala ukhalana moopuwelelo omaana ni wiimananiha wihu wotheene unaahala unikavihera.
15. Kontha isiyani ikhanlyaaya itthu yofayita uhihiyerera upheela wihu upanka citthu comaana?
15 Hiiva nihaana uhihiyerera upanka itthu yomaana. Vano hiiva neetthucaka “ukhotta citthu cootakhala ni ufenta citthu comaana,” ninaahala ulipihaca ulakela wihu upheela upanka citthu comaana ni unyema citthu caahala uniiriha uvara itampi. (Amos 5:15) Ulakela upanka citthu comaana ciicammo unaahala unikavihera unyema uttehattehiya ni citthu cihincuweleehu.
16. Manannani uvara miteko co mminepa cinhalaaya unikavihera ukhala oohiitthaala? (Nwehe ciicammo ilatarato.)
16 Isiyani inhala unikavihera upanka citthu comaana? Hi ninaapanka iyo, neekurumicaka uvara miteko coominepani. Narwaaka umikutthaanoni ni uvara nteko woolalyeera, hiiva ninaalipihaca upheela wihu untteeliha nrima Yehova ni khaninhala uhiyerera wiira uttehattehiya wihu wiira nipanke itthu yoonanara unikhitiri. (Mat. 28:19, 20; Mabere. 10:24, 25) Nasomaka Ibiibiliya ni nuupuwelelaka itthu insomeehu, ninaalipihaca ufenta wihu citthu comaana ni ukhotta wihu upanka citthu cootakhala. (Jos. 1:8; Isaa. 1:2, 3; 119:97, 101) Muupuwele itthu Yesu ahimenryaawe attharyaawe: “Nhiitthaale ni nlompe woohihiyerera wiira nhikhitiriye uttehiya.” (Mat. 26:41) Navirihaka ukati naalompaka, hiiva Yehova naakhalana ukati woonikavihera ni ninaalipihaca itthu ilakenleehu wiira nintteelihe nrima.—Tiya. 4:8.
Uvara miteko co mminepani unaahala unikavihera ukhalana ikuru cimpheeleehu wiira nikhitiri utthema naattehiyaka (Nwehe iparaagarafu 16) g
NHIHIYERERE UKHALA OOHIITTHAALA
17. Isiyani Peturu anaananaawe?
17 Khweeliini, cihaavo citthu cikhwaawe cikhitinriihu unyema upanka, masi civaaho atthunaka nanlelo cinvireehu naananaka unyema upanka. Nwehe itthu yaamwiirannyenle apostolu Peturu. Ukati wankhottilyaawe Yesu ikwaha tthaaru, uyo ahoonihera wiira anwoova apinaatamu. (Mat. 26:69-75) Masi nuukatyaaya, ahoonihera ulipa nrima ukati waalalyaawe u Sinetriyu ni atthunaka uyo ahokhitiri utthema uwoova wawe apinaatamu. (Mite. 5:27-29) Masi uvira waya myaakha, “awoovaka atthu oosoma cinene,” Peturu ahohiya waatakaneelana makristau yahaari ayuuta. (Akalas. 2:11, 12) Peturu ahokhala-tho awoovaka apinaatamu. Phimaana uyo khaakhitinri utthema iyo itthwiiyo.
18. Yanikhumelelaka itthu inhala uniloloviha, isiyani inlamuliyeehu upanka?
18 Hiiva pooti unikhumelela itthu khampa iyo. Manannani? Atthunaka hi pooti woonaka wiira nihokhitiri utthema itthu yaanirikela unyema upanka, masi nuuwakatyaaya inawancera-tho unirikela. Wootakihera, munna mmoca heera: “Myaakha 10, mi kahokhitiri uhiya woona ipornografiya ni kahokupali wiira kahokhitiri utthema iyo itthwiiyo. Masi iyo yaaweherera ukati waapheela wiira kituruwele-tho woona.” Khweeliini, uyo munnooyo khahiile waanana ayo moopuwelelwaayo. Uyo aahocuwelela wiira ahaana hihiyereraka waanana ayo moopuwelelwaayo khula nihuku, wootepacawene ala mahuku ookhiceraala. Akaviheriyaka naamwaarawe ni mahumu o wanlokoni, uyo ahokhitiri ukhala oohiitthaala ni uhiya ukhalana ayo moopuwelelwaayo.
19. Isiyani inlamuliyeehu upanka noonaka wiira ihaavo itthu innirika unyema upanka nihinkhitiriihu utthema?
19 Vano, wakhala wiira ihaavo itthu nanlelo innirikela unyema upanka, isiyani inlamuliyeehu upanka wiira ihinikurumice uvara itampi? Pooti wantthareehu ikano ya Yesu: “Nkhale oohiitthaala.” Hataa noonaka wiira nikhanle oolipa nhina mminepani, nnyeme citthu cowoopiha. (1 Akor. 10:12) Muupuwele nyuuva itthu ipankileenyu wiira nkhitiri unyema uttehiya ni nhihiyerere upanka iyo. Miruku 28: 14 “Ootteeliya aale ahineetthaala mpaka”—2 Pet. 3:14.
IFAYITA URINAAYA UKHALA OOHIITTHAALA
20-21. a) Iparakhani ninhaleehu uphwannya naahihiyerereke ukhala oohiitthaala? b) Manannani Yehova cinhalaawe unikavihera naahihiyerereke upanka ile ilakenleehu? (2 Akorintu 4:7)
20 Nihaana ukupali wiira ukhala oohiitthaala wiira nihittehiye nivaraka itampi, nihaana wiikurumica venci. Hataa nivaraka itampi, noonaka wiira “khinhala unipanka itthu”, hi ninaacuwela wiira nikhale ootteeliya, nihaana utthara malakihero a Yehova. (Mabere. 11:25; Isaa. 19:8) Iyo kontha Yehova numpile wiira nihaana nittharaka malamulwaawe. (Upha. 1:27) Ayo manannaayo, hiiva ninaahala ukhalana moopuwelelo omaana ni ukhalana iparakha yookhalana ukumi woohimala mpaka.—1 Tim. 6:12; 2 Tim. 1:3; Yuda 20, 21.
21 Khweeliini, “irutthu ikhanle yohilipa,” masi iyo khintaphulela wiira hiiva khaninhala ukhitiri upanka itthu wiira ninyeme citthu cinhala uniloloviha. Yehova ri owiitthenkaceene wiira anivahe ikuru cimpheeleehu. (Nsome 2 Akorintu 4:7. f) Masi nhiliyale wiira Yehova novaha ikuru coovikana ikuru ca ntthu. Masi ikuru cantthunnyo, awula, wiikurumica wiira nikhitiri utthema naattehiyaka, ukhanle nrinttiihu. Napankaka iyo, pooti wankupaliihu wiira Yehova naahala waakhula ulompa wihu wiira nikhitiri waanana citthu cinnirika unyema upanka. (1 Akor. 10:13) Nikaviheriyaka ni Yehova, pooti wankhitiriihu ukhala oohiitthaala ni utthema naattehiyaka.
NCIPO 47 Ninvekeleke Yehova Okathi Wotheene
a NUULUMO NOOTAPHULELIYA: Nuulumo “nrima” niromoliye nhina Matewus 26:41, cinaaciya ikuru cinkhuma wanrima waatthu ni cinonkurumica wuuluma ni upanka citthu comaana. Nuulumo “Irutthu,” anaaciya makhalelweehu eepinaatamu ukhanle upahuwa ni uavara matampi. Naayo manannaayo, hiiva pooti upheela upanka itthu yomaana, masi naahiweheheke saana, pooti wankhitiriyeehu naattehiyaka wiira nipanke itthu Ibiibiliya inkhottihaaya.
b Miruku 7:8 Uyo ahovira nttala wowaattamela nipuro neemelasaawe, ni uyo ahorwaa mphantte woowannyawe ntiyanooyo. 9 Ucoocilo upheelaka wiinla, waattaamelaka uhiyu ni uripela.
c Miruku 7:13 Athiyana ananvara ni anampexari; anweehehaka, anaamwiirala uyova: 14 Miiva kihovaha nkuttho wiira atthu otheene aleveleliye itampi caya; ilelo kihopanka ile kaakhuluvelihilyaaka, 21 Ayo ananthepya nimoolumo acivacivihaka cinene. Ayo ananthepya nimoolumo omaana.
d Ntthu vanre itampi yuulupale pooti uphwannya ukaviheriya nlivuruni Mphwanye Utteeliya Uhimmala! Mwaha 57 ipontu 1-3 ni mwaha “‘Nweheehe uhoolo,’” irevista Ukhalenla yo novembro 2020, ipaagina 27-29, iparaagarafu 12-17.
e Jó 31:1 Kihopanka nleehano nimithwaaka. Vano, kontha isiyani miiva kaahalaka unweheeha mwaaruusi?
f 2 Akorintu 4:7 Masi, nihaana ula nhakhuula uheliye mmyaapuni cooloko, wiira ikuru coovikana ikuru ca ntthu cikhale cinkhuma wa Nluku, kahi cinnikhumakhuma hiivano.
g ILATARATO: Munna asomaka iveerusu yo nihuku, asomaka Ibiibiliya ukati ummumulaawe, ni oonaka mikutthaano ceeriyari isumana ucoocilo.
