MWAHA WOOSOMIYA 27
NCIPO 73 Munikhaliherye Wira Nilipeke Murima!
Nkhale oolipa nrima khampa Satoki
“Satoki aari mmirawo mmoca ofayita ni oolipa nrima.” —1 IKOR. 12:28.
ITTHU INHALEEHU WIITTHUCA
Nhina ula mwahoola ninaahala woona mananna ntakihero na Satoki ninhalaaya unikavihera ukhala oolipa nrima.
1-2. Satoki aari tipani? (1 Ikoronika 12:22, 26-28)
MUUPUWELE ila itthwiila, ikhurupu yaalopwana oopwahaka 340.000 yaahokhala wiira ankhalihe Davidi mwene o Isarayeli. Mahuku mararu ayo alopwanaayo yaahokhala umwaakoni wowaattamela ilapo yo Hebrom. Ayo yaahokhala ootteeliya cinene, yoopaka mwaha nkhayi, yateehanaka ni yeepaka icipo conttottopelaka Yehova. (1 Ikor. 12:39) Iriyari yo ayo alopwanaayo ahaavo mmirawo mmoca eehaniya Satoki, pooti ukhalaka wiira khaavo aacuwela. Masi Yehova hopanka mananna oopheela unicuweliha wiira Satoki aari iyo ikhurupwiiyo. (Nsome 1 Ikoronika 12:22, 26-28. a) Masi Satoki aari tipani?
2 Satoki aari nankuttho aavara nteko nkhayi ni nankuttho muulupale eehaniya Apiyatari. Yehova aahonvaha Satoki ucuwelaca ni ikuru wiira acuwele itthu Yehova yaapheelaawe. (2 Sam. 15:27) Atthu yapheelaka ikano wiira akhalane ucuwelaca, ayo yankohaka Satoki. Uhiya commo, Satoki aari nlopwana oolipa nrima. Nhina ula mwahoola ninaahala woopela mwaha ikhalelo ya Satoki, ukhanle ulipa nrima.
3. a) Kontha isiyani ninlamulyeehu ukhala oolipa nrima? b) Isiyani inhaleehu woona nhina ula mwahoola?
3 Ala mahuku ookhiceraala, Sotwani naapanka yotheene inkhitiryaawe wiira awaanane apoovu a Yehova. (1 Pet. 5:8) Ukati hiiva ninonweherereehu Yehova wiira ammalamalihe Sotwani wamoca niila ituninya yoohinamaneela, hiiva nihaana ukhala oolipa nrima. (Isaa. 31:24) Nttwee noone mananna mararu anhala unikavihera utakiha ulipa nrima wa Satoki.
NKAVIHERE UMWENE WA NLUKU
4. Kontha isiyani apoovu anluku anlamuliyaaya ulipa nrima wiira akavihere umwene wa nluku? (Nwehe ciicammo ilatarato.)
4 Khampa apoovu a Yehova, hiiva ninaakavihera Umwene wa Nluku ninrimeehu wotheene. Masi ikwaha cinci hiiva ninlamuliya ukhala oolipa nrima wiira nikhitiri ukavihere Umwene wa Nluku. (Mat. 6:33) Wootakihera, ila ituninya yo masakheela, hi ninlamuliya ukhala oolipa nrima cinene wiira nimwiiwelele Yehova ni wiira nilalyeere ihapari comaana co Umwene. (1 Atesal. 2:2) Ciicammo, hiiva ninaapheela ukhala oolipa nrima wiira nihipanke mphantte wo ila ituninya yomasakheela. (Joau 18:36) Aswali a Yehova enci, ahaakhaciya citthu caya, anaahuva nlattu woothanyiya, anaatthukiya nlattu woohipanka mphantte wosiyaasa ni ukhotta waana ikhotto co ila ituninyeela.
Isiyani nyuuva nnohaleenyu upanka akhunaninyu yoolumaka isiyaasa? (Nwehe iparaagarafu 4)
5. Kontha isiyani Satoki aalamuliyaawe ulipa nrima wiira ankavihere Davidi?
5 Satoki khaarweele u Hebrom wiira avirihe paahi ifesta yaapankiye nlattu Davidi wookhala mwene. Masi uyo aarweele owiitthenkaceene wiira yakhumelela ikhotto, akhitiri ukavihera. (1 Ikor. 12:38) Uyo ahokhala owiitthenkaceene wiira ankavihere Davidi wiira awaakihe Asarayeeli mmatatani waawanannyaaya. Atthunaka Satoki khaari nakhotto aarina ucuwelaca cinene, masi uyo aari oolipa nrima.
6. Manannani Davidi aakhanlyaawe ntakihero nomaana nhina ulipa nrima para Satoki? (Isaalimu 138:3)
6 Manannani Satoki eetthucilyaawe ukhala oolipa nrima? Uyo aakhala naalopwana enci okuru ni yoonihera ulipa nrima, phimaana uyo aheetthuca matakiherwaaya. Wootakihera, Davidi aari nhooleli ni nakhotto oolipa nrima, phimaana apoovu o Isarayeeli yahonkavihera wiira akhale mwene. (1 Ikor. 11:1, 2) Davidi ahonkhuluvela Yehova wiira anhala unkavhiera uwaanana awanannyaawe. (Isaa. 28:7; Nsome Isaalimu 138:3. b) Uhiya commo, Satoki ciicammo ahaana matakihero makhwaawe omaana. Alopwana khampa Yehowata ni mwanawe eehaniya Penaaya, ciicammo aari anakhotto, uhiya commo, yahaavo-tho ahooleli 22 o Isarayeeli yankavihenre Davidi. (1 Ikor. 11:22-25; 12:26-28) Nlattu wookaviheriya naalopwana ookhuluvelya, Davidi ahokhala mwene, ni ayo yahopanka yotheene yaakhitiryaaya wiira ankhikicere.
7. a) Matakiheroni omahukweehwaala anhala unikavihera ukhala oolipa nrima? b) Isiyani nyuuva mwiitthucileenyu nintakihero na munna Nsilu?
7 Hiiva ciicammo pooti wankhaleehu oolipa nrima, nasomaka matakihero aaswali a Yehova akhwaawe yaari ookhuluvelya ni oolipa nrima yaakavihenre umwene wa Davidi. Mweneehu, Yesu Kristu, ahokhotta upanka mphantte wo ila ituninya inhooleliya ni Sotwaniila. (Mat. 4:8-11; Joau 6:14, 15) Uyo khaahiya unkhuluvela Yehova wiira akhale oolipa nrima ni ukhalana ikuru caahala umwiiriha upanka itthu yomaana. Mahukwaala, hiiva ciicammo nihaana matakihero aamirawo ankhotta urwaa utoropani awula upanka citthu cinvaranaca niisiyaasa. Nnoonela cani upacera usoma ayo matakiherwaayo nhina isayiti jw.org? c
MWAAKAVIHERE MAYAMUNNEENYU
8. Ukatini atthunaka mahumu anlamuliyaaya woonihera ulipa nrima?
8 Hiiva apoovu a Yehova unaanicivela waakavihera akhunanihu. (2 Akor. 8:4) Masi ikwaha cikiina wiira nipanke iyo, hiiva nihaana ulipa nrima. Wootakihera, ukati wokhotto, mahumu ahaana yaalipihaka mayamunna o wanlokoni, yaakaviheraka nhina mminepani awula yaawaceraka ni waavaha citthu cinaathwa. Mahumu anaafenta ikhontwaa ca Yehova, phimaana ayo ari oolikaneene wiira apanke khula itthu inkhitiryaaya wiira yaakavihere mayamunna nhina citthu cinaasankiha. (Joau 15:12, 13) Ukati mahumu ampankaaya iyo, anawoonihera wiira anaatakiha ulipa nrima wa Satoki.
9. Khampa cinhimyaaya 2 Samuweli 15:27-29, isiyani Davidi yanlepenlyaawe Satoki wiira apanke? (Nwehe ciicammo ilatarato.)
9 Davidi yaahonkhumelela masakha muukumini wawe, mwanawe Apisalau aapheela umwiiva wiira akhale mwene. (2 Sam. 15:12, 13) Davidi ahaana atthawaka u Yerusalemu woohipicapica. Uyo ahowiirela anantekwaawe: “Nrwee nitthawe, kontha khaavo nohala woopwa mmatatani wa Apisalau!” (2 Sam. 15:14) Ukati ananteko a Davidi waatthawaaya, Davidi ahoona wiira aalamuliya uhala ntthu u Yerusalemu wiira acuwele itthu Apisalau yaahalaawe upanka ni wiira anhimerye Davidi. Phimaana, uyo ahonruma Satoki ni anankuttho akhwaawe aturuwele u Yerusalemu, wiira yakhale anamawehaweha. (Nsome 2 Samuweli 15:27-29. d) Masi ayo yahaana yakhalaka oohiitthaala, kontha nteko Davidi waalepenlyaawe uvara waari wowoopiha cinene. Apisalau ari nlopwana onciva ulivyaanihera ni oohikhuluvelya, ni oopuwela citthu caapheelaawe paahi. Muupuwele mananna caahalaawe umwiiriha Satoki ni anankuttho akhwaawe, waakhanle wiira uyo ahocuwelela wiira ayo yaari anamawehaweha ni yaanonkhikicera Davidi!
Davidi aahonveleeliha Satoki wiira avare nteko wowoopiha (Nwehe iparaagarafu 9)
10. Manannani Satoki naakhunanawe yankhikicenryaaya Davidi?
10 Davidi ahaana nruku, masi wiira akhitiri uvarela nteko uyo nrukuuyo, ahaana ukaviheriya ni Satoki ni mpatthannyaawe nkhwaawe ookhuluvelya, eehaniya Husayi. (2 Sam. 15:32-37) Husayi ahaana wiikhaliha toko nonkavihera Apisalau, anvahaka ikano mananna oovara Davidi. Masi, aapheela unvaha Davidi ukati wowiitthenkaca wiira akhitiri waana ikhotto. Ukati Apisalau waapacenryaawe utthara ikano ca Husayi, Husayi ahonhimerya Satoki ni Apiyatari itthu Apisalau yaalakenlyaawe upanka. (2 Sam. 17:8-16) Naayo manannaayo, ayo yaahokhitiri uveleeliha moolumo wa Davidi, anhimeryaka citthu Apisalau caalakenlyaawe upanka. (2 Sam. 17:17) Akaviheriyaka ni Yehova, Satoki ni anankuttho akhwaawe yaahokhitiri ukhikicera ukumi wa Davidi.—2 Sam. 17:21, 22.
11. Manannani ninhaleehu utakiha ulipa nrima wa Satoki ukati wo waakavihera mayamunnehu?
11 Vano wakhala wiira mayamunneehu o wanlokoni inawaakhumelela itthu yowoopiha ni ampheela ukaviheriya, manannani ninhaleehu utthara ntakihero na Satoki ni woonihera ulipa nrima? (1) Ntthare malakihero. Ukati womasakha, nihaana utthara malakihero ninvahiyeehu wiira nhihiyerere ukhala owaataana. Ciicammo unaareera wiiwelela malakihero ankhuma Upeteli. (Mabere. 13:17) Mahumu ahaana uhihiya wuupusera malakihero ankhuma Upeteli, ankavihera ucuwela mananna owiitthenkaca cihinaaya ukhumelela ihasara. (1 Akor. 14:33, 40) (2) Nkhale oolipa nrima, masi mwiikhikicer. (Miru. 22:3) Muupuwele nhinaaya upanka khula itthu, ni ukati woopanka, mwiikurumice upanka nimananna ookhikiceryaa. (3) Munkhuluvele Yehova. Nhiliyale wiira Yehova nawuuwacerani, ni nawaawacera mayamunneenyu. Yehova pooti wuukaviherani nyuuva ni waakavihera mayamunna ni mananna ookhikiceerya.
12-13. Isiyani nyuuva mwiitthucileenyu niitthu yamwiiranenle munna Viktor ni Vitalli? (Nwehe ciicammo ilatarato.)
12 Moone ntakihero na munna Viktor ni munna Vitalli, mayamunna akavihenre ukawiya iyoolya para mayamunna o Ucrânia ukati wokhotto. Viktor neera: “Hiiva naanaavya iyoolya khula nipuro. Ikwaha cinci mapuro naavireehu naaneewa ikaputthi cirumaka. Munna mmoca aarina ilooca, aahovaha icoolya ni nnyo icoolyannyo caahaakavihera mayamunna enci. Ukati naapakhiryeehu icoolya nkaaroni, yaahomorela ibomba waattamela nipuro naariihu. Nne nihukunne khanlopa ukati wotheene wiira Yehova akikavihere ukhala oolipa nrima, wiira kikhitiri waakavihera mayaamunna.”
13 Ni munna Vitalii khiyaari itthu yoovirikana, uyo ciicammo ahaana alipaka nrima ni upanka citthunnyo nimananna ookhikiceryaa: Uyo hoolumaca eeraka: “Nahaana ulipa nrima. Ikwaha yoopacera naahoviriha iwoora 12 neettaka. Miiva kaanonlompa Yehova ukati wotheene. Vitalii aahonihera ulipa nrima, masi ciicammo aahokhala oomaalelya. Uyo neera: “Miiva kaahonlepela Yehova wiira akivahe ucuwelaca ni ukhala owiiyeviha. Miiva keettiha ikarweeyo kivarelaka nteko malakihero yaakumiheriye naahooleli ookuvernu. Waamini waka waahotepa ukhala woolipa ukati kaawonnyaaka mayamunna avaraka nteko nkhayi. Ayo yaahonikavihera ulokihaca iparapaara, yakumihaka citthu caattiyelela iparapaara, uthukumaniha icoolya ni ulovolela cotheene nkaaroni. Niiphiro ayo yannaakhela, yanivahaka iyoolya ni nipuro noorupa.”
Nlipe nrima ukati wo waakavihera mayamunneenyu yaananaka marikariko, masi mpanke citthunnyo nimananna ookhikiceryaa. (Nwehe iparaagarafu 12-13)
NHIHIYE UKHALA OOKHULUVELYA WA YEHOVA
14. Manannani nineeconehu wakhalaka wiira ntthu ninonfenteehu hohiya unswalela Yehova?
14 Itthu yootepa urika uvilela ukhanle ukati mmuciihu awula mpatthaniihu ninonfenteehu ahiyaka unswalela Yehova. (Isaa. 78:40; Miru. 24:10) Nlattu wowaafenta akhunanihu, hinniiriha utepa ukhala niiwasiwaasi uyo ukatyuuyo. Wakhala wiira nyuuva inaawiirannyeelani itthu toko iyo, nkupali wiira Satoki ni Davidi unari wiira nanlelo ahaavo akumi, yanhala ucuwela mananna aneecooneenyu.
15. Konntha isiyani Satoki aalamuliyaawe ukhala oolipa nrima wiira hihiye unkhuluvela Yehova? (1 Mamwene 1:5-8)
15 Satoki khaahiile umwiiwelela Yehova, ukati mpatthannyaawe Apiyatari aalakenlyaawe uhiya umwiiwelela Yehova. Iyo yeerannyeele unahanle ukati vakaani wiira umale ulamulela wa Davidi. Ukati Davidi waahanlyaawe vakani ukhwa, mwaamwanawe eehaniya Atoniya aahomananiha ukhala mwene, hataa ukhalaka wiira Yehova ahokhuluveliha wiira Salomau paahala ukhala mwene. (1 Ikor. 22:9, 10) Apiyatari aholakela unkavihera Atoniya. (Nsome 1 Mamwene 1:5-8. e) Naayo manannaayo Apiyatari aahohiya umwiiwelela, uhiya paahi Davidi, masi ciicammo Yehova. Nyuuva nnaakhitiri wuupuwela mananna Satoki caaryaa we ooripiya nrima ni oovololaca? Myaakha coopwahaka 40, Satoki ni Apiyatari yaahovaraca nteko nkhayi weenankuttho. (2 Sam. 8:17) Ayoca yaateesaca nkhayi “ikasa yonleehano ya Nluku eekhweeli.” (2 Sam. 15:29) Ooyeeli caya yahonkavihera Davidi ulamulela wawe ni yahovara miteko cinci ca Yehova.—2 Sam. 19:11-14.
16. Isiyani atthunaka yankavihenre Satoki ukhala okhuluvelyaa?
16 Satoki khaahile umwiiwelela Yehova, hataa ukati Apiyatari aalakenlyawe uhiya umwiiwelela Yehova ni umpinttela Davidi. Davidi aacuwela wiira ahaana ankhuvelaka Satoki. Ukati waacuwenlyaawe wiira Atoniya ahompinttela, uyo ahonthanla Satoki. (1 Mam. 1:32-34) Unayoonannya wiira Satoki aahokhala oolipihiya cinene nintakihero na Nataa ni naaswali akhwaawe ookhuluvelya yankavihenre mwene Davidi. (1 Mam. 1:38, 39) Ukati Salomau waakhanlyaawe mwene, uyo “ahonthanla Satoki wiira akhale nankuttho nipuro naari Apiyatari.”—1 Mam. 2:35.
17. Manannani nyuva nnolamulyeenyu untakiha Satoki wakhalaka wiira ntthu nonfenteenyu hohiya unswalela Yehova?
17 Manannani nyuuva nnohaleenyu untakiha Satoki wakhalaka wiira ntthu nonfenteenyu naahiya unswalela Yehova? (Jos. 24:15) Yehova naahala wuuvahani ulipa nrima wiira nkhitiri upanka itthu yomaana. Munlompe Yehova ni nhihiyerere ukhala mpatthani aatthu anonkhuluvela Nlukwiihu. Yehova naavaha ifayita cinene ukhuluvelya winyu ni naahala wuutthuvelani nlattu wo wiikurumica winyu.—2 Sam. 22:26.
18. Isiyani nyuva mwiitthucileenyu niitthu yaawiirannyenle amunna Marku wamoca naamwaaraya Sidse?
18 Moone itthu yaakhumelenle amunna Marku ni amwaaraya, Sidsi. Asaanaaya eeli, asithiyana, yaaholakela uhiya weettela ikhweeli. Amunna Marku neera: “Ikhumelo nihuku ninnyariyaawe mwaana, nyuuva nnawoonihera wiira nnanfenta ninrimeenyu wotheene. Nyuuva nnaapanka khula itthu inkitirinyu wiira ihikhale itthu yaahala umpaka pusya. Phimaana, ukati uyo nolakelaawe uhiya unswalela Yehova, unaaniwerya nrima cinene. Masi Yehova khanhiya unikavihera uvilela. Ukati kinvololacaaka, amwaaraka ankhala oolipa ni ayo yavololacaka miiva kinkhala oolipa.” Anuunu Sidse aneera: “Hiiva khanaahala ukhitiri uvilela ayo masakhaayo cahaari ikuru Yehova cinivahilyaawe. Miiva kaahokhala ooripiya nrima ni koopuwela wiira mwanaka aahile weettela ikhweeli nlattu waawaka, vano miiva kahonlompa Yehova kinhimeeryaka itthu yaakisankiha. Woohipica, yaahowa ukoopana mwaha anuunu yaavirihile myaakha ciinci kihinawoona, ayo yaahokikapatta ni yaahokiweha mmithonimmo yiiraka co: ‘Wuupuwele ila Sidsi, itthu iwiirannyenle khunakhala nlattu waawa.’ Kikaviheryaka ni Yehova, kinaakhitiri ukhala ootteeliya kivaraka nteko wa Yehova.”
19. Isiyani nyuuva inlakenleenyu upanka?
19 Yehova nopheela wiira aswalyaawe otheene akhaleke oolipa nrima khampa Satoki. (2 Tim. 1:7) Masi Yehova khampheela wiira nikhuluvele ikuru cihu. Uyo nopheela wiira hiiva nikhuluvele ikuru cinnivahaawe. Vano, wakhala wiira inawuukhumelelani itthu inhala uwiirihani upheela ulipa nrima, nyuuva pooti ukupali wiira Yehova naahala wuukaviherani ukhala oolipa nrima khampa Satoki!—1 Pet. 5:10.
NCIPO 126 Nikhale Oowiilipiha, Oowehaweha, ni a Ikuru
a 1 Ikoronika 12:22 Khula mahuku yanwaa alopwana wiira ankavihere Davidi, mpaka nipuro naamakilyaawe yahocara atthu enci, khampa anakhotto a Nluku. 26 Malevita yahaawo alopwana 4.600. 27 Yehoyata aari nhooleli aasaana a Arawu ni ayo yahaawo alopwana 3.700. 28 Khampa Satoki, mmirawo ofayita ni oliipa nrima, wamoca naahooleli 22 onloko naathumwaane.
b Isaalimu 138:3 Nihuku kiihannyaaka, weeva wahokaakhula; weeva wahokilipiha nrima ni ukikhomaaliha.
c Nwehe ividiyu Os Cristãos Verdadeiros Precisam de Coragem — Para Continuar Neutros, nhina isayiti jw.org.
d 2 Samuweli 15:27 Vano, amwennyaayo yaahomwiirela co Satoki, ari nankuttho: “Nyuuva keera nnaacuwela uhimyaca itthu impheela wiirannya? Nturuwele usittatti ninnema. Woorwaava mwaakuseke asaaneenywaayo: mwaniinyu Ahimaasi, ni Jonataa, mwanaawe Apiyatari. 28 Kinrwaa wuuwehererani mapuro anlapuwaaya atthu waattamela muuthakoni, mpaka ukihimerya itthu.” 29 Vano, Satoki ni Apiyatari yaahokusa ikasa yonleehano ya Nluku eekhweeli ni yahoturusela u Yerusalemu ni iyo yaahokhala wonwo.
e 1 Mamwene 1:5 Uyo ukatyuuyo, Atoniya, mwaana a Hasiti, aheettitthimiha eeraka: “Thimi kinhala ukhala mwene!” Uyo aheetthenkacera ikaaro yomamwene ni aheecavyeera anakavalo, ni ciicammo alopwana 50 yaatthawa uhoolo wawe. 6 Masi athumwaane khayankohakohile yeeraka: “Kontha isiyani umpanka commo?” Atoniya ciicammo aari ooreera cinene, ni ayaariye naayariyeene Apisalau. 7 Atoniya ahomuulumana Yowapi, mwaana a Seruwiya, ni nankuttho Apiyatari, ni ayo yahonkavihera. 8 Masi nankuttho Satoki, ni Pinaaya mwaana a Yehoyata, porofeeta Nataa, Simeyi, Raayi ni anakhotto oolipa a Davidi, khayankavihenre Atoniya.
