Caahovira myaakha woopwahaka mmoca mayamunna Oopeteli yatekaka anteena o WBBR, nipuro naarumihiyaaya iraatiyu u Staten Island, isittatti yo Nova York. Vano, uphwanya waya nipuro, ayo mayamunnaayo yahoteka ipretiyu imoca yuulupale para atthu yaavara nteko ni ikhwaaweeyo nipuro naahala ukaravariya. Vano umaliha waya, mayamunna yahopacera uthotokanihaca ikaruma caapheelaaya wiira “ipacere uruma iraatiywiiyo.” Masi wiira yancere uvarela nteko iraatiywiiyo, ayo yahaana yatthemaka marikariko menci.

Woopacera, yahotthenkaciya anteena o raatiyu. Iyo yaari itthu yoorika kontha anteenaayo yaarina imeeturu 91 irekamelwaaya ni yahaana yeesiyaka mapotto meeli o miri. Khula nipotto naakhalana imeeturu 61 irekamelwaaya. Ikwaha yoopacera khawaakhitiryeele, masi mayamunna yahonkhuluvela Yehova wiira anhala waakavihera ni vano yahokhitirya utthenkaciya anteenaayo. Calvin Prosser, aavara uyo ntekooyo, neera: “Unari wiira nahokhitiri ikwaha yoopacera, hiiva naahala wiira uniitteelaka nrima co: ‘Moone paahi itthu ikhitinriihu upanka!’” Masi mayamunna yaahovarela nteko ikuru caya wiira avare nteko wa Yehova. Masi, nanlelo cahaavo citthu cikhwaawe caapheela urehereriya.

Waanira upacerihiya uvareliya nteko iraatiyu ule ukatyuule ni khawaakhitirya uthuma ikaruma yoohipaca uvareliya nteko. Vano, mayamunna yahokhitiri uthuma iraatiyu yo 500-watt yoopaceriya uvareliya nteko. Masi uhiya uthuma migrofoone, ayo mayamunnaayo yaakumihile migrofoone co telefoone wiira avarele nteko cennyo. Uhiyu mmoca, mweeri wo Fevereiro, mayamunna yaholakela utthukaca wiira attehe. Ukhala wiira ayo yaapheela itthu yaahala ukhitiri wiiwannya, mayamunna yaholakela wiipa icipo  Coomwene. Ernest Lowe anthya oopuwelaka ukati mayamunna yeepaaya. Ayova ni mayamunna yaaholikareliya ni Suwiisi neehaniya Rutherford, b eewile ile iporokaraameele nraatiyu u Brooklyn, waatalivanne ikilomeeturu 25 ninwo.

Amunna Rutherford yaathukanaka ayo mayamunnaayo, yahooluma co: “Mmaalihe citthuuyo kontha uyaakula. Nnokalacereeyo toko wiira apaakha enci annyakula!” Vano mayamunnaayo, yahoona ihaaya ni yaahottipiha iraatiywiiyo. Masi, ayo ciicammo yaahokhala ookhuluvela kontha yaahonenela wiira yaatthenkaca wiira arumihe iraatiywaaya.

Nihuku 24 mweeri wo Fevereiro mwaakha wo 1924, ukati woopacera waarumihiyaaya iraatiyu, amunna Rutherford ahevaherera utaphulela nraatiyuni “ihapari co Mwene cimmuuluma Mesiya.” Ayo aneera wiira itthu yaapheelaaya “waari waakavihera atthu, hataa akhalaka okhapila coovirikana awula yuunuwelaka ittiinini, yahaana wiiwa maanaaya ula ukati unkhaleehuula, khampa cinhimyaaya Ibiibiliya.”

Ikwaha yoopacera yaahokhumela saana ni myaakha 33 caawelannyo WBBR phaari iraatiyu yuulupale yo mumphwinkoni.

Mweeri wo Julho mwaakha wo 1924, Anamasoma Ibiibiliya yaahothukumana wiira yoone ikonkereesu u Columbus, Ohio. Mayamunna o ntuninyani motheene yaahowa ni yaheewa myaha niiluka árabe, inglês, francês, alemão, grego, húngaro, italiano, lituano, polonês, russo, ucraniano ni iluuka ineehaniya escandinavos. Miphantte cikhwaawe caarumihiya iraatiyuni. Uhiya commo, mayamunna yaaholepela ijornali yo u estado yo Ohio, wiira yantikhe mwaha waahala upankiya ukonkereesuni khula nihuku.

Neecese, nihuku 24 mweeri wo Julho, atthu woopwahaka 5.000 yonne ikonkereesu yaahorwaa ulalyeera isittatti yooninnya ikonkereesu. Ayo yahovaha ilivuru cene woophiyaka 30.000 ni yahopacera usomiha Ibiibiliya. Irevista A Torre de Vigia (ineehaniya nna co Ukhalenla) inaahimya nno nihukunno ukhala khampa “mphantte waatepile utteeliha nrima cinene ukonkereesuni.”

Itthu ikhwaawe yiirannyeele ukonkereesuni, waari icuma nihuku 25 mweeri wo Julho. Amunna Rutherford yathoonyeraka ulipa nrima yahosoma iwarakha yaawuuluma ahooleli ottiini. Iyo iwarakheeyo, yaakhala khampa inkhuma utiripunaali. Iyo yaawuuluma ahooleli okuvernu, ottiini ni anaamatumihaca “yaahiha apoovu ucuwela wiira Nluku naahala wacaaliha.” Uhiya commo, iyo iwarakheeyo, yaahimya  wiira iyo ikhurupwiiyo inaakavihera mphwinko wo Estados Unidos, yaahimyaka wiira uyo uri mphwinko wo Umwene wa Kristu wo watuninyani. Phimaana, Anamasoma Ibiibiliya yahaana ukhala oolipa nrima ni uvilela wiira yaalalyeere atthu akhwaawe ihapari comaana.

Irevista A Torre de Vigia, uuluma ikonkereesu yaapankiye, neera: “Ikhurupu yankaani yaanakhotto a Yehova ukonkereesuni u Columbus, yaholipihaca waamini waya . . . , owiitthenkaceene wiira yaanane ikapwitti awula khula ikaruma inhalaaya uvarela nteko awananyaaya.” Leo Claus oone iyo ikonkereeswiiyo, neera: “Hi naahokhuma ile ikonkereeswiile waanitteelaka nrima wiira navarele nteko iyo iwarakeeyo ncoko naakhaleehu.

Mweere Outobro, Anamasoma Ibiibiliya yahoopacera ukawa ifolyetu imilau cene co Acusados os Eclesiásticos, co mwaha waapankilyaaya amunna Rutherford ukonkereesuni. Amunna Frank Johnson yaahorwaaniya wiira yakawe ifolyetu isittatti yankaani ineehaniya Cleveland, u Oklahoma. Ayo yaahomaliha ukawa ifolyetu minuutu 20 ihinaaphiya iwoora mayamunna yaahalaaya uwa waacisa. Atthu akhwaawe khawacivenle amunna Frank ulalyeera ni yanvira yaatothacaka amunna Frank. Phimaana, ayo khayalamuliya ukhala inne nipurenne yaawehereraka mayamunna akhwaawe. Vano, ayo yaaholakela wiipitha ikereeja yaattamenryaaya. Ukhala wiira iyo ikereejeeyo khayaariwo atthu, ayo amunnaayo, yaahohiya ifolyetu cikhwaawe mbiibiliyani yaapastore ni ciicammo khula ikhatera. Ayo yaahopanka iyo woohipicapica. Ni ukhala wiira ukatyuuyo nanlelo yahaana, ayo yaahorwaa ikereeja piili yapankaka ciicammo.

Amunna Frank yaahoturuwa yaatthawaka arwaaka nipuru naalehaniye ukumanaciya nimayamunna. Ayo yaahepitha uttuli waya nipuro naatumihiya gasolina yaawehehaka wakhala wiira alopwana yaattharatthara yeera awaaka awula mena. Vano, alopwanaayo yaahovira nkaaroni uhoolo waya nipuro naatumihiya gasolina, masi khayawonacile amuuna Frank. Nuuwakatyaaya, mayamunna yaalalyeera ncoko waaryaaya ayo amunnaayo, yaahophiyaca. Yahaacisa amunna Frank ni yaahorwaaca.

Munna mmoca naahimya itthu yiirannyeele: “Ukati naakhumeehu usittatti, naahovira uhoolo waya ikereeja tthaaru. Yahaavo atthu oophiyaaka 50 uhoolo wo khula ikereeja. Akhwaawe yaasomaka ifolyetu, akiina yaathonyiheraka apastore ifolyetu. Hi ninansukhuru Yehova nlattu woonikhikicere ni woonikavihera waasempa ayo awaananyaayo.”

Anamasoma Ibiibiliya ciicammo yaahonihera ulipa nrima yaalalyeeraka ilapo cikhwaawe. U norte waya ilapo yo França, amunna Józef Krett yaahalalyeera atthu akhwaawe yaathipa maluku yaakhumile u Polônia. Ayo yaarwaa upanka mwaha waarina muru: “Woohipica atthu akhwile anaahala wunwelelihiya.” Mayamunna yaahalattula atthu yaakhala ile isittattiile wiira yaaviriyane uyo mwahooyo. Masi, paatere mmoca ahowiirela atthu yantthara wiira khaavo aahala urwaa uviriyana uyo mwahooyo. Masi, atthu oophiyaka 5.000 yaahoviriyana mwaha wa munna Józef Krett ni waahela nhina ale apastoryaale. Amunna Józef Krett yaahalepela apaatiri uhimya citthu caakupalyaaya, masi ayo yaahokhotta. Vano, amunna Józef Krett yaahokawa ilivuru cotheene caarinaaya ni yahonenela wiira atthu yaalalyeeraaya yampheela wiitthuca ikhweeli co Nnuulumoni na Nluku.—Amos 8:11.

U África, amunna Claude Brown yaahopacera ulalyeera ihapari comaana u Costa do Ouro, ilelo uncuweliya ukhala Gana. Myaha uyo cipankilyaawe ni ilivuru caahiyaawe cihookavihera umwarela ikhweeli iyo ilapweeyo. Ntthu oone myaha ca munna Claude Brown aari John Blankson. Uyo aasoma u Farmácia  ni vano ahonenela wiira hophwanya ikhweeli. Uyo heera: “Mi kihokhala ootteeliya nlattu wookhweeli ciitthucilyaaka ni kinawahimerya akhunanaka ucikola unsomaaka.”

Jhon aheetthuca wiira Ibiibiliya khineetthuciha wiira Nluku, Yesu ni nnepa wowaarya khanle ntthu mmocaaru. Vano, nihuku nimoca, uyo ahorwaa ikereeja imoca ineehaniya Anglicana wiira aakohe apaatiri iyo itthwiiyo. Ayo yahokhuma yatthimakelaka yaakhuwelaka yeera: “Weeva khunaakhala nkristu, upanka mphantte wa Sotwani. Ukhume va!”

Uphiya wawe uwaani, John ahowantikhela iwarakha apaatiri aalattulaka wiira awoopane mwaha waatthuni, nhina uyo mwahooyo. Apaatiri yaahomwakhula yanlattulaka wiira waakumanaciye iskritoriyu yaaporosoore oocikolani yaasomaawe. Vano, aporosoore yaahonkuha John wiira khweelini phantikhile ile iwarakheele.

John ahaakhula: “Thi mi kantikhile.”

Aporosoore yahomwiirela John wiira uhaana wantikhaka iwarakha waalepelaka uleveleliya naapaatiri. Vano, John ahantikha co:

“Apaatiri, aporosoore ahokilepela wiira kantikhe iwarakha kulepelakani ukilevelela ni miiva kihaana kipankaka iyo, mwakupaliki wiira nneetthuciha citthu cowoothiya.”

Ahaminiki, aporosoore yaahonkoha: “John, unaakupali wiira iyo phitthu umpheela wantikha?”

“Iyee. Akhinhala wantikha-tho itthu ikhwaawe.”

“Weeva unaahala woomoliya. Ni khunlamuliya uturuwela usoma-tho ila icikoleela wawuulumaka pusya apaatiri ookereeja inkaviheriya niikuvernu.”

“Masi aporosoore, . . Ukati nyuuva nnosomiheenyu nihiwaka, niireke khunreera upanka makoho?”

“Unaareera ukoha.”

“Phitthu yeerannyeele. Apaatiri yannisomiha Ibiibiliya, vano miiva phakohaka. Masi ayo khaakhitinri waakhula, nlattuni miiva kinhalaka wantikha iwarakha kalepelaka ukilevelela?”

John khomoliye ucikolani nwo, uyo ciicammo khantikhile-tho iwarakha wiira alepele uleveleliya.

Irevista A Torre de Vigia inaathikilela miteko caavariye ule mwaakhoole, yiira: “Pooti waneereehu khampa Davidi ahimilyaawe eeraka: ‘Nyuuva nnaakivaha ikuru wiira kaane ikhotto.’ (Isaalimu 18:39) Uyo waari mwaakha wootikhiniha, kontha nahoona ukaviheriya ni Yehova . . . Apoovwiinyu owiivaherera . . . Anaatteeliya yaalalyeeraka ikhweeli co mbiibiliyani.”

Wuumaleloni ule mwaakhoole, mayamunna yaahuncerera nteko woolalyeera avarelaka nteko iraatiyu. Ayo mayamunnaayo, yaahoteka-tho imisoora yo raatiyu wowaattamela u Chicago. Iyo imisooreeyo yeehaniya WORD, nno naari ncina nomaana kontha “word” ni Inglês maanaaya wiira “nuulumo”, yaavaranaca niitthu yaapheeliya: ulalyeera Nuulumo na Nluku. Iyo ikwaheeyo, ayo yahovarela nteko ikaruma comaana, iraatiyu yo 5.000 watts. Naayo manannaayo, ayo yaahokhitiri ulalyeera ihapari comaana co Mwene ikiloometru cinci mpanka u Canadá.

Mwaakha wo 1925, Yehova ahaakavihera mayamunna wiiweeha saana ihapari conaanaano co mminepani. Anamasoma Ibiibiliya yahaana wiiweeha saana ilivuru ya Apokalipise ikapiitulu 12. Para atthu akhwaawe, iyo itthwiiyo yanhala wiiriha ukakathuwa, masi encyaayo yakhala ootteeliya nlattu wowiiweeha saana citthu ceerannyeele wiirimu ni mananna caakavihenryaaya apoovu a Nluku va watuninyani va.