MWAHA WOOSOMIYA 43
NCIPO 90 Nilipihaneke Mukina ni Mukhwaawe
Mmalamalihe makoho ankhalaneenyu
“Nwehacere saana citthu cotheene.”—1 ATESAL. 5:21.
ITTHU INHALEEHU WIITTHUCA
Umalamaliha makoho anniriiha waanyihacera nteko unonvareleehu Yehova.
1-2. a) Makohoni aswali a Yehova akhwaawe atthunaka ankhalanaaya? b) Isiyani inhaleehu woona nhina ula mwahoola?
ATTHU enci ntuninyani motheene, anaakhala niiwasiwaasi. a Wootakihera, mmuupuwele mmirawo neekoha wakhala wiira khweeliini Yehova nanwacera. Nlattu wo iyo, uyo pooti uhipheela upattisiya. Awula mmuupuwele munna aalakenle khalayiiru unvarela nteko cinene Yehova, uhiya upheela uhimiya ntuninyani awula waavya ukhalana mihakhu. Vano nna co, uyo nophwanya nsurukhu woopheela wiilihera paahi ni nawaanyihacera wakhala wiira aholakela itthu yomaana ukati waaryaawe mmirawo. Moopuwele arokorihu amoca owuuluvala ahinkhitiri unvarela nteko Yehova khampa khalayi. Atthunaka ayo pooti ukhala oovololaca nlattu woohikhitiri upanka citthu caapankaaya khalayi. Nyuuva nhopaca wiikoha co: ‘Kiireke Yehova khweeliini naakiwacera? Kiireke citthu cotheene cimpankenlyaaka Yehova cihaana ifayita? Kiireke miiva nanlelo kihaana ifayita uhoolo wa Yehova?’
2 Nakhalanaka moopuwelelo khampa ayo, waamini wihu pooti ulolovaca ni mpanka uhiya unswalela Yehova. Nhina ula mwahoola, ninaahala woona manannani mattharelelo o mbiibiliyani anhalaaya unikavihera nakhalanaka makoho khampa ala (1) ‘Khweeliini Yehova naakiwacera?’, (2) ‘Kiireke citthu cilakenlyaka uvara khalayi cikhanle comaana?’ awula (3) ‘Kiireke miiva nanlelo kihaana ifayita uhoolo wa Yehova?’
ISIYANI INHALA UNIKAVIHERA UPHWANYA WAAKHULIYA WAYA MAKOHO ANKHALANEEHU?
3. Inannani yoomalamaliha makoho ankhalaneehu?
3 Inanna inhala unikavihera uphwanya waakhuliya waya makoho ankhalaneehu, ukhanle utotha Nnuulumoni na Nluku. Napankaka commo, ninaakhala oolipa nhina mminepani, ninaalipihaca upatthaniihu ni Yehova ni ninaakhala owiitthenkaceene wiira ‘nilipihace waamini wihu.’—1 Akor. 16:13.
4. Manannani ninhaleehu ‘uwehacera saana citthu cotheene’? (1 Atesalonika 5:21)
4 Nsome 1 Atesalonika 5:21. b Ibiibiliya inaanikurumica ‘uwehacera saana citthu cotheene.’ Isiyani impheelaaya uhimya? Maanaaya wiira nihaana niweheraka saana wakhala wiira makoho ankhalaneehu akhanle omaana. Ninaapanka iyo nalattanihaka niitthu inhimyaaya Ibiibiliya. Wootakihera, moone ntakihero nammirawo niikoha wakhala wiira khweeliini Yehova nanwacera. Niireke uyo pooti waakhalanaawe ayo moopuwelelwaayo ni ukupali wiira Yehova nanwacera? Mena. Uyo haana ‘awehaceraka saana citthu cotheene’, oopuwelaka mananna Yehova cinweheraawe mwahooyo.
5. Manannani nimmwiweehu Yehova aakhulaka makoho ankhalaneehu?
5 Usoma Ibiibiliya ikhanle inanna “yoomwiiwa” Yehova anuulumanaka wiira aakhule makoho ankhalaneehu. Masi wiira niiweehe saana mananna Yehova noopuwelaawe nhina makoho ankhalaneehu, hiiva nihaana wiikurumica. Wiira nipacere, ninlamuliya usoma miphantte co mbiibiliyani cinlipiherera mwahooyo. Hiiva ciicammo pooti wanvareleehu nteko ilivuru cinvahaaya mphwinko woothotokanihiya wa Yehova wiira nitothe mwahooyo. (Miru. 2:3-6) Uhiya commo, nihaana unlompa Yehova wiira anicaalihe ukati woototha ni unikavihera woona mananna cinweheraawe mwahooyo. Vano, nihaana waavyavya mattharelelo o mbiibiliyani ni matakihero aatthu yaaviriha itafaawuti toko cirineehu. Itthu ikhwaawe innikavihera ukhanle usoma ihantisi co mbiibiliyani caatthu yaarina moopuwelelo ni moonelo mamocaaru arineehu.
6. Manannani mikutthaano cinnikaviheraaya umalamaliha makoho ankhalaneehu?
6 Inanna ikhwaawe “yoomwiiwa” Yehova anuulumanaka cikhanle mikutthaano. Narwaaka umikutthaanoni, nihaana ukati wowiiwa mwaha awula ikomentaariyu cinhala unikavihera uphwanya waakhuliya waya makoho nirineehu. (Miru. 27:17) Vano, nttwee noone mananna oomalamaliha makoho ninkhalaneehu.
‘KIIREKE KHWEELIINI YEHOVA NAAKIWAACERA?’
7. Nikohoni atthu akhwaawe ankhalanaaya?
7 Nyuuva nhopaca wiikoha wakhala wiira Yehova nawuuwacerani? Wakhalaka wiira ntthu nawiicoona uhikhalana ifayita, atthunaka uyo pooti wuupuwela wiira akinhala ukhitiri ukhala mpatthani amumpi o citthu cotheene. Unawiira mwene Davidi ciicammo ahokhalana moopuwelelo oolikanaca. Uyo ahokhala ootikhinihiya woona wawe wiira Yehova nawaawacera apinaatamu oopahuwa. Vano, ahokoha eeraka: “Oo Yehova, pinaatamu isiyani iryaawe wiira weeva unwehe, ni mwaana apinaatamu ooweherera ukhwa isiyani iryaawe, wiira unwacere?” (Isaa. 144:3) Nnohala uphwanya vayi waakhuliya waya nna nikohonna?
8. Toko cinthoonyeraaya 1 Samuweli 16:6, 7, 10-12, isiyani Yehova inonwehaawe khula ntthu?
8 Ibiibiliya inaaniitthuciha wiira Yehova nawaawacera atthu aneecoona uhikhalana ifayita. Wootakihera, Yehova ahonveleeliha Samuweli uwannyawe Jessé wiira anthanle mwanaawe mmoca ukhala mwene o Isarayeli. Uyo ukatyiiyo, Jessé ahowiihanaca asaanaawe 7. Masi uyo khamwiihanne Davidi ari eetthyaako. c Hataa ukhalaka commo, Yehova ahonthanla Davidi wiira akhale mwene. (Nsome 1 Samuweli 16:6, 7, 10-12. d) Yehova anoncuwela Davidi ni ahoona makhalelo aarinaawe ukhala wiira uyo anvaha ifayita cinene citthu co mminepani.
9. Kontha isiyani nyuuva nnolamuliyeenyu ukupali wiira Yehova nawuuwacerani? (Nwehe ciicammo ilatarato.)
9 Muupuwele mananna Yehova thoonyenryaawe wiira nawuuwacerani nyuuva. Wootakihera, uyo nawuuvahani ikano cinvaranaca niitthu nnopheeleenyu. (Isaa. 32:8) Iyo inthoonyera wiira Yehova nawuucuwelani sana-saana nyuuva ni naacuwela itthu nnopheeleenyu. (Isaa. 139:1) Weettela muukumini winyu ikano ca Yehova ni woona mananna ikhanlyaaya itthu yomaana, nyuuva nnaahala utepa ukupali wiira Yehova nawuuwacerani. (1 Ikor. 28:9; Mite. 17:26, 27) Yehova naavaha ifayita yotheene impankeenyu wiira munswalele. Uyo naacuwela makhalelweenyu o wanrimani winyu, phimaana, naapheela ukhala wakhiviru ninyuuva. (Jer. 17:10) Ni Yehova noopheela wiira nyuuva ntthune ukhala mpatthannyaawe.—1 Jo. 4:19.
‘Wakhalaka wiira nyuuva nnantotha Yehova, nnaahala umphwanya.’—1 Ikor. 28:9. (Nwehe iparaagarafu 9.) g
KIIREKE CITTHU CILAKENLYAKA UVARA KHALAYI CIKHANLE COMAANA?
10. Nuupuwelaka citthu cilakenleehu khalayi, makohoni atthunaka hiiva ankhalaneehu?
10 Ikwaha cikhwaawe, ntthu pooti wiikohaka wakhala wiira citthu cilakenlyaaya khalayi cikhanle comaana. Wootakihera, Atthunaka ntthu hohiya nteko womaana waavaraawe awula hohiya umweetta nakoso wiira anvarele nteko cinene Yehova. Masi vano, atthunaka uhovira ukati mwinci awula myaakha cinci. Uyo ntthuuyo atthunaka nawoona atthu yaalakenle nimananna oovirikana ni ankhala toko nna co ahaana nsurukhu mwinci ni anaakhala saana. Vano, uyo ntthuuyo pooti wiikohaka co: ‘Kiireke citthu cotheene cimpankenlyaaka Yehova cihaana ifayita? Kiireke kaalamuliya uvara nteko cinene wiira kikhalane nsurukhu mwinci?’
11. Moopuweleloni oohiloka nasaalimu antikhile ikapiitulu 73 aarinaawe?
11 Wakhala wiira nhaana makoho toko ayo, moone mananna nasaalimu antikhile ikapiitulu 73 eeconnyaawe. Uyo ahowoona atthu akhwaawe yahanswalela Yehova ni yaakhala khampa yampuha, yankhala saana ni khayaakhala niiwasiwaasi muukumini waya. (Isaa. 73:3-5, 12) Wakhala khampa canweettela saana citthu cotheene. Nlattu wo iyo itthwiiyo, nasaalimu ahokhala oovololaca, oopuwelaka uhiya unswalela Yehova. Uyo ahokhala “nimasukhuli nihuku notheene.” (Isaa. 73:13, 14) Isiyani yaapankilyaawe wiira amalihe ayo moopuwelelo oohilokaayo?
12. Toko cinthoonyeraaya Isaalimu 73:16-18, isiyani yankavihenre nasaalimu ukhala ninnema?
12 Nsome Isaalimu 73:16-18. e Nasaalimu ahorwaa mpanka nipuro naaswaleliya Yehova. Urwaa wawe nwo, uyo ahokhitiri ukhalana moopuwelelo omaana. Uyo ahocuwela wiira, hataa akhalaka saana, ayo atthwaayo khayaarina niweherero noohoolo. Vano nasaalimu ucuwela wawe iyo itthwiiyo, uyo ahophwanya nnema ni woona wiira weesa nipuro noopacera citthu co mminepani yaari itthu yomaana yaalakenlyaawe. Naayo manannaayo, uyo aholipihaca itthu yaalakenlyaawe upanka, uhihiya unswalela Yehova.—Isaa. 73:23-28.
13. Mwakhalaka niiwasiwaasi nhina citthu nlakenleenyu khalayi, isiyani inhala wuukaviherani ukhala ninnema nenna co? (Nwehe ciicammo ilatarato.)
13 Ibiibiliya, ciicammo inaahala wuukaviherani nyuuva ukhala ninnema. Manannani? Muupuwele citthu comaana nyuuva nrineenyu, uhela nhina upatthaniinyu ni Yehova. Muupuwele wiira ule hinonswalela Yehova rina paahi citthu cinvahaaya ila ituninyeela. Atthu enci anaavaha ifayita cinene citthu cirinaaya ni ampheela wiilawa muukumini waya kontha para ayova anuupuwela paahi citthu cirinaaya. Masi unaavirikana ninyuuva. Uhiya waakhela itthuvo ca Yehova nenna co, nyuuva nnaacuwela wiira nhaana ukumi woohimala uhoolo ni naarwaa waakhela iparakha caahaweherereenyu. (Isaa. 145:16) Ni muupuwele co: khamuncuwela manannani ukumiinyu caahalaaya ukhala unari wiira khamwalakenle unswalela Yehova. Masi itthu imoca yomaana phiila: ule nolakela upanka itthu nlattu wonfenta Nluku ni waafenta akhunanawe khiivo itthu yomaana inonhaleela ni naahala uphwanya itthu impheelaawe wiira akhale ootteeliya.
Nwehehe citthu Yehova cikhuluvelihilyaawe waahoolo (Nwehe iparaagarafu 13.) h
‘KIIREKE MIIVA NANLELO KIHAANA IFAYITA UHOOLO WA YEHOVA?’
14. Nikohoni atthu akhwaawe ninkhalanaaya ni kontha isiyani?
14 Nlattu wowuuluvala, upahuwa awula uwerennya, aswali a Yehova akhwaawe atthunaka khankhitiri unvarela nteko cinene uyova khampa khalayi. Akhwaawe pooti wiikoha wakhala wiira Yehova naavaha ifayita ile impankaaya. Atthunaka ayo pooti wiikoha co: ‘Kiireke miiva nanlelo kihaana ifayita uhoolo wa Yehova?’
15. Namantikha Isaalimu 71 isiyani yaakupalyaawe?
15 Namantikha Isaalimu 71, ahaana ayo moopuwelelwaayo, ni ahonlompa Yehova eeraka: “Uhikihiye ukati kinhalaaka uhikhalana ikuru.” (Isaa. 71:9, 18) Hataa akhalanaka ayo moopuwelelwaayo, nasaalimu khahiile ukhuluvela wiira uhihiyerera unswalela Yehova wookhuluvelya, uyo anhala umweettihera ni unkavihera. Nuuwakatyaaya, uyo aheetthuca wiira Yehova naakhala ootteeliya awoonaka aswalyaawe yeekurumica unswalela woohihiyerera hataa aweryaciyaka.—Isaa. 37:23-25.
16. Isiyani mayamunna owuuluvala inlamuliyaaya umpankela Yehova ni atthu akhwaawe? (Isaalimu 92:12-15)
16 Wakhala wiira nyuuva nhuuluvala, muupuwele mananna Yehova cineecoonaawe oonaka wiikurumica winyu. Hataa nweryaciyaka, Yehova naahala wuukaviherani uhihiyerera ukhala ookhomaala nhina mminepani. (Nsome Isaalimu 92:12-15. f) Phimaana, nhikhale paahi muupuwelaka citthu nyuuva cihinkhitiriinyu upanka, uhiya commo, nweheehe citthu cinhaleenyu ukhitiri upanka. Wootakihera, nyuuva pooti waakavihera akhunaninyu mooniheraka makhalelo omaana ooreera utakihiya ni waawacera nimananna omaana atthu otheene. Nyuuva pooti wuuluma mananna Yehova cuukavihenryaaweni myaakha cotheene civirihileenyu munvarelaka nteko ni ciicammo niweherero nrineenyu nhina inatiri coohoolo. Uhiya commo, nhiliyale wiira ulompa winyu pooti waakavihera cinene atthu akhwaawe. (1 Pet. 3:12) Ikhweeli phiila, hataa nikhalanaka masakhani, otheene cihu pooti wanonvaheehu Yehova yotheene inkhitiriihu ni waakavihera atthu akhwaawe.
17. Kontha isiyani ninlamuliyeehu unyema wiilattaniha naatthu akhwaawe?
17 Nyuuva unawuuriipani nrima nlattu woohikhitiri unvarela nteko cinene Yehova? Nkupali wiira Yehova naavaha ifayita ile yotheene inkhitiriinyu upanka. Nyuuva atthunaka pooti umananiha wiilattaniha naatthu akhwaawe. Masi nyuuva khannolamuliya upanka commo. Kontha isiyani? Kontha Yehova khanlattaniha citthu cimpankaawe khula ntthu (Akalas. 6:4) Wootakihera, Maria ahonvaha Yesu makhura oonukhela cinene yaathumiya nsurukhu mwinci. (Joau 12:3-5) Woovirikana, athiyana amoca yaakhweliye awannyaya yaahovaha ncanko ntempulu nsurukhu waarina ifayita vakaani. (Luka 21:1-4) Masi Yesu, khalattanihile citthu caapankilyaaya ayo athiyana eelyaayo, uhiya commo, uyo ahoona wiira itthu yaapankilyaaya yoonihenre ukhalana ikhalelo imocaaru ukhanle, waamini. Inanna imocaaru, Yehova naavaha ifayita itthu yotheene impankeenyu wiira moonihere waamini winyu ni nifento ninyu, hataa moonaka wiira khinaafayita.
18. Isiyani inhala unikavihera umalamaliha makoho ankhalaneehu? (Nwehe ikwaaturu “ Nuulumo na Yehova pooti wuukaviherani umalamaliha makoho ankhalaneenyu.”)
18 Ikwaha cikhwaawe, otheene cihu ninaakhalana makoho. Khampa noonileehu, Nuulumo neekhweeli na Nluku, Ibiibiliya, inaanikavihera umalamaliha makoho ankhalaneehu. Phimaana, nihaana upanka yotheene inkhitiriihu para ukupali wiira makoho ankhalaneehu khweeliini nihomalamaliha. Woohaanyihacera, Yehova nawoonani ukhalana ifayita ni nawuuwacerani nyuuva. Uyo naavaha ifayita wiikurumica winyu wiira mweese nipuro noopacera Umwennyaawe muukumini winyu ni nawiicoona ukhanyererihiya wuutthuvelani. Mwaamini wiira Yehova naawoona aswalyaawe otheene wiira unawaaphwanela ufentiya ni uwaceriya.
NCIPO 111 Citthu cinnitteeliha nrima
a NUULUMO NOOTAPHULELIYA: Ibiibiliya inawuuluma makoho makhwaawe anoonihera uhimwaamini Yehova ni inatiri cawe. Masi ula mwahoola, ninooluma makoho oovirikana naayo. Uhiya commo, ninoopela mwaha makoho anniriiha waanyihacera wakhala wiira nihaana ifayita uhoolo wa Yehova awula wakhala wiira citthu cilakenleehu niholakela ni mananna oocuwelaca.
b 1 Atesalonika 5:21 Nwehacere saana citthu cotheene; nvaresese ile ikhanle yomaana.
c Ibiibiliya, khinhimya myaakha mikavi aarinaawe Davidi ukati Yehova wanthanlilyaawe ukhala mwene, masi unawoonannya wiira uyo aari mmirawo.—Nwehe irevista Sentinela 1 yo Setembro 2011 ipaag. 29 iparaag. 2.
d 1 Samuweli 16:6 Ukati waakelacilyaaya, Samuweli ahomoona Eliyapi ni aheera: ‘Khweeliini, ula phithanliye ni Yehova.’ 7 Masi Yehova ahomwiirela Samuweli: “Uhimoone ureera uwiitho awula urekama, kontha mi kihonkhotta. Kontha Nluku khanoona khampa ntthu cinoonaawe; ntthu noweha ikhove, masi Yehova noweha itthu iri wanrimani.” 10 Ala manannaala, Yesee ahaawana asaanaawe otheene wiira yooniye ni Samuweli, masi Samuweli aheera: “Khaavo mena mmoca vaa thanliye ni Yehova.” 11 Vano Samuweli ahonkoha Yesee: “Khaavo-tho mwana nhaleela?” Yesee ahaakhula eeraka: “Naahalela mmoca, omwankaani; rwaale uliha ikhontwaa.” Samuweli ahomwiirela Yesee: “Munrume ntthu; arwee amwiihane. Kontha khaninhala wonkomaca wiira nilye, mpaka wanhalaawe uwa. 12 Coo, ahoruma wiira eehaniye ni uyo ahowa. Arii mmirawo oosiseerya, ni ooreera meetho ni ikhove. Yehova ahomwiirela Samuweli: “Wunwe! Ula phinthanlilyaaka. Uhaana unhelaka makhura wanru.
e Isaalimu 73:16 Ukati waamananihilyaaka ucuwelela iyo, kahokhala pusya, 17 mpaka kahokela nnupani yowaarya yuulupale ya Nluku, ni mmo kahocuwela itthu inhala uwiirannyeela wahoolo. 18 Khweeli, Weeva unweesa nipuro noothererya. Weeva unawaamalamaliha.
f Isaalimu 92:12 Masi ale aneettela isariya anaahala uphuwa khampa nkole ni anaahala wuunuwa khampa mwiri wo Líbano uneehaniya iseeturu. 13 Ayo anaaliya ipuwa ya Yehova; amphuwa nhina ipuwa ca Nlukwiihu. 14 Hataa wanhalaaya wuuluvala, anaahala wiimiha mihokorokho cinci; anaahala ulipa cinene ni uwinciva ukumi, 15 Yansipaka Yehova wiira Nluku nasariya. Uyo mwalaaka, ni khanhiya uthoonyera isariya
