MWAHA WOOSOMIYA 42
NCIPO 103 Axitokweene: Yoovaha ya Yehova
Nsukhurele uvahiya wihu “alopwana anhoolela”
“Ukati uwenlyaawe wiirimu, . . . hovaha itthuvo ceepinaatamu.” — EFESU 4:8.
ITTHU INHALEEHU WIITTHUCA
Nhina ula mwahoola, ninaahala woona mananna anamakavihera owanlokoni, mahumu ni mamootoli osirikwiitu cinnikaviheraaya ni manannani ninlamuliyeehu uthoonyera usukhuru itthu impankaaya.
1. Itthuvoni Yesu inivahilyaawe?
YESU khanle ntthu oonihenre ukhala namavaha. Ukati waaryaawe watuninyani, uyo ahovarela nteko ukhulupalyaawe wiira apanke miiriirya cinci ni waakavihera atthu yaapheela ukaviheriya. (Luka 9:12-17) Ni uyo honivaha itthuvo yootepa ukhalana ifayita cinene, ukumyaawe. (Joau 15:13) Ukhuma nenne nunwelelihiyaawe, Yesu khanhiya unikavihera. Uyo enre wiira anhala unlepela Yehova univaha nnepa wowaarya wiira uniitthucihe ni unimaalihe. Khweeliini, uyo ahopanka iyo itthwiiyo. (Joau 14:16, 17, niwehero; 16:13) Ni avarelaka nteko mikutthaano, Yesu nanlelo neera aniitthucihaka wiira naapanke eetthuci ntuninyani motheene.—Mat. 28:18-20.
2. Phaapani akhanle “itthuvo ceepinaatamu” aromoliye nhina Efesu 4:7, 8?
2 Moone itthuvo ikhwaawe Yesu inivahilyaawe. Apostolu Paulu hantikha wiira, Yesu urwaa wawe wiirimu, “hovaha itthuvo ceepinaatamu”. (Nsome Efesu 4:7, 8. a) Paulu hottonkaca wiira Yesu vahile nnyo itthuvonnyo wiira cikavihere maloko nimananna oovirikana. (Efesu 1:22, 23; 4:11-13) Mahukwaala, nnyo “itthuvo ceepinaatamunnyo” cinaahela nhina anamakavihera o wanlokoni, mahumu ni mamootoli osirikwiitu. b Khweeliini, ayo alopwanaayo akhanle oopahuwa ni anaavonya. (Tiya. 3:2) Masi, Apwiiyeehu, Yesu Kristu, anawaavarela nteko ayo mayamunnaayo wiira anikavihere. Ayo akhanle itthu inivahilyaawe.
3. Manannani ninhaleehu ukavihera “itthuvo ceepinaatamu?”
3 Yesu hothanla univaha “itthuvo ceepinaatamu” wiira cilipihe maloko. (Efesu 4:12) Masi otheene cihu, pooti upanka itthu wiira naakavihere ayo mayamunnaayo uwacera saana nrintti wofayita urinaaya. Wiira niiweehe saana iyo itthwiiyo, muupuwele co: Mayamunna akhwaawe anaavara nteko wooteka Isalau Yoomwene. Vano, mayamunna akhwaawe ahinvara uyo ntekooyo, anawaakavihera mayamunna antekateka miteko cikhwaawe, toko, waapyaaca, ulovola ikaruma cinvareliya nteko ni miteko cikhwaawe. Inanna imocaaru, moolumweehu ni citthu cimpankeehu, otheene cihu pooti waakavihera anamakavihera o wanlokoni, mahumu ni mamootoli osirikwiitu impankaaya. Nttwee noone mananna ntekwaaya unnikaviheraaya ni manannani ninlamuliyeehu uthoonyera waasukhuru ayo ni Yesu, nivahile nnyo “itthuvo ceepinaatamunnyo.”
ANAMAKAVIHERA O WANLOKONI
4. Mitekoni caavaraaya anamakavihera o wanlokoni ukati wo maapostolu?
4 Ukati wo maapostolu, ahaavo mayamunna yaathanliya ukhala anamakavihera o wanlokoni. (1 Tim. 3:8) Unkhala khampa wiira Paulu awuuluma anamakavihera o wanlokoni nhina 1 Akorintu 12:28 ukati wantikhilyaawe eeraka “ukavihera”. Citthu cotheene cinthoonyera wiira ayo yanwacera miteko cofayita cinene wiira yaakavihere mahumu ukhalana ukati wo waalipiha mayamunna ni ulalyeera. Wootakihera, pooti ukhalaka wiira anamakavihera o wanlokoni yaanvareliya nteko wiira apanke ikoopiya cowantikhiya co mbiibiliyani awula uthuma ikaruma caapheeliya wiira cipankiye ikoopiya.
5. Mitekoni anamakavihera o wanlokoni cinvaraaya?
5 Muupuwele miteko anamakavihera o wanlokoni cimpankaaya mmalokoni waya. (1 Pet. 4:10) Ayo atthunaka anaawacera nsurukhu, ncoko unlalyeeraaya nloko ni ukawa ilivuru cihu. Akiina anwacera awudiyu ni ividiyu mmikutthaanoni, anamathoonyera awula anaakavihera ulokihaca Isalau Yoomwene. Miteko cootheene nnyo cikhanle cofayita wiira nloko neette nimananna oothotokannya. (1 Akor. 14:40) Uhiya commo, anamakavihera o wanlokoni akhwaawe anaapanka miphantte umikutthaanoni Makhalelo ni Miteko Ceekristau ni myaha cuulupale cimpankiya unkutthaanoni cowuumaleloni isumana. Namakavihera o wanlokoni mmoca, pooti uthanliya wiira ankavihere munna nhoolela ikhurupu yo wuulalyeerani, ni ikwaha cikhwaawe, anamakavihera o wanlokoni pooti ulattuliya ni mahumu wiira arwee yaathotole mayamunna.
6. Kontha isiyani ninlamuliyeehu uvaha ifayita miteko cinvaraaya anamakavihera o wanlokoni?
6 Moone atthu akhwaawe yoolumilyaaya yaacaka inanna anamakavihera o wanlokoni cinkaviheraaya. Anuunu amoca aneehaniya Beberly c o Boliviya, aheera: “Miiva kinawiitthuca citthu cinci mmikutthaanoni nlattu wookaviheriya nanamakavihera o wanlokoni. Nlattu wo citthu ayo cimpankaaya, miiva pooti wiipa, ukomentari umikutthaanoni, uviriyana mwaha muulupale ni wiitthucera ividiyu ni ilatarato cinthoonyiheriya mmamikutthaanoni. Ayo anaawacera ukhikicerya Isalau Yoomwene ni anawaakavihera ale anoona mikutthaano avarelaka nteko videoconferência. Camalaka mikutthaano, ayo phimpacera ukwecakweca Usalau Yoomwene, ukavihera uwacera nsurukhu ni anaanivaha ilivuru cimpheeleehu. Kihaana citthu cinci cowaasukhuru nlattu wo citthu cimpankaaya!” Leslie, nookhala u Colômbia, ni akhanle amwaara ahumu, aheera: “Awannyaka anaakaviheriya cinene nanamakavihera o wanlokoni. Ahikhanle ukaviheriya, ayo khayaahala ukhalana ukati woowacera citthu cikhwaawe. Vano, mi kinawaasukhuru wiivaherera waya wiira akavihere.” Khweeliini, nyuuva nnowoonela commo anamakavihera o wanlokoni winyu.—1 Tim. 3:13.
7. Manannani ninlamuliyeehu uthoonyera waasukhuru anamakavihera o wanlokoni? (Nwehe ciicammo ilatarato.)
7 Masi khuntosa paasi usukhuru itthu anamakavihera o wanlokoni impankaaya. Ibiibiliya inaanikurumica: “Moonihere wiira nnaasukhuru.” (Akol. 3:15) Kristofer, humu mmoca o Finlândia, naattonkaca mananna cinthoonyeraawe usukhuru wawe: “Miiva kinawantikha iwarakha awula imensagem niiveerusu yo mbiibiliyani ni kinanhimeerya woohinkhuwahkuwa mananna uyo kilipihilyaawe awula mananna kinvahaaka ifayita nteko unvaraawe.” Pascal ni Jael, ankhala u Nova Caledônia, anawaalompela anamakavihera o wanlokoni. Pascal neera: “Ala mahukwaala, ni nanlompaka Nluku ni unsukhuru nlattu wa anamakavihera owanlokoni arineehu.” Yehova, khweeliini, nawiiwa ni nawaakhula mavekelweehu, commo, atthu otheene owanlokoni anawaaphwanyera ifayita.—2 Akor. 1:11.
MAHUMU “ANAAVARA NTEKO CINENE”
8. Nlattuni Paulu antikhilyaawe wiira mahumu ‘anaavara nteko cinene? (1 Atesalonika 5:12, 13)
8 Ukati wo maapostolu, mahumu yanvara nteko cinene wiira akavihere nloko. (Nsome 1 Atesalonika 5:12, 13 d; 1 Tim. 5:17) Ayo ‘yanhoolela ‘nloko awula, yantthonkomaniha mikutthaano ni yanlakela citthu nkhayi ni mahumu makhwaawe. Ayo ciicammo, yaanaavaha ikano mayamunna ni mayanuunu woohaakhuwakhuwa, masi ninifento, wiira akhikicere nloko. (1 Atesal. 2:11, 12; 2 Tim. 4:2) Uhiya commo, ayo alopwanaayo yahaana yavaraka nteko wiira yaalihere amucyaaya ni wiira alipihace waamini waya ni upatthannyaaya ni Yehova.—1 Tim. 3:2, 4; Titu 1:6-9.
9. Citthuni mahumu cimpankaaya?
9 Ala mahukwaala, mahumu ciicammo ahaana miteko cinci. Ayo anaalalyeera. (2 Tim. 4:5) Mahumu anaanivaha ntakihero nomaana wiira niikurumice ulalyeera khampa ayova. Ayo ciicammo anaatthonkomaniha nteko woolalyeeriya, nipuro nloko ninlamuliyaaya ulalyeera ni anaanitthenkaca wiira nikhale anamalalyeera omaana. Mahumu ciicammo akhanle masuwiisi osariya ni anakiriri. Ntthu avaraka matampi moolupale, mahumu anawiikurumica unkavihera wiira ntthuuyo aturuwele ukhalana upatthani womaana ni Yehova. Ciicammo, ayo anaapanka yotheene inkhitiryaaya wiira areerihe nloko. (1 Akor. 5:12, 13; Akalas. 6:1) Ni, uhiya commo, mahumu ancuweliya ukhala makampuci. (1 Pet. 5:1-3) Ayo anaatthenkaca myaha cinkhuma mbiibiliyani. Ayo ciicammo anawiikurumica waacuwela atthu otheene o wanlokoni ni anawaathotola. Mahumu makhwaawe anaakavihera uteka-teka awula ulokihaca Isalau Coomwene, utthonkomaniha ikonkereesu ni mikutthaano cuulupale, ikhurupu yo mayamunna Inwuulumana mameetiku, ikhurupu yowaathotola aretta, ni citthu cikhwaawe. Khweeliini, mahumu anaavara miteko cinci!
10. Kontha isiyani ninlamuliyeehu uvaha ifayita nteko unvaraaya mahumu?
10 Yehova haakhuluveliha makampuucyaawe wiira anhala waawacera saana, phimaana ayo khayaalamuliya woova awula usanka. (Jer 23:4) Arokorihu amoca o Finlândia, aneehaniya Johanna, ahoona yiirannyaaka ayo moolumwaayo ukati anumwanaya waawerennyaaya. Ayo aneera co: “Mi unaakirika cinene waattonkela atthu akhwaawe itthu inkiira, masi humu mmoca kahancuwelaaka saana, aahokiviriyana apisakoono nrima, aholompa nkhayi ni miiva ni ahokithoonyera mananna Yehova cinkifentaawe. Mi akinoopuwela sana-saana itthu yuulumilyaaya, masi kinawuupuwela mananna miiva kakhanlyaaka ninnema. Mi kinaakupali wiira Yehova hanveleelihile uyo humuuyo wiira akikavihere ukati miiva kapheelaka.” Nyuuva nnawuupuwela ikwaha mahumu o wanlokoni yuukavihenryaayani?
11. Manannani ninlamuliyeehu uthoonyera waasukhuru mahumu? (Nwehe ciicammo ilatarato.)
11 Yehova naatteeliya nrima nathoonyeraka usukhuru ninrima wotheene “nteko mahumu unvaraaya.” (1 Atesal 5:12, 13) Henrietta ciicammo nokhala u Finlândia, neera: “Mahumu anaapheela cinene unikavihera, masi khunakhala wiira ayo khaarina itthu yoovara awula khaarina marikariko. Ukati nkhwaawe mi kinaarwaaka nipuro ryaawe humu ni kinaamwiirelaka co: Nnaacuwela! Nyuuva humu omaana, kimpheela wiira nyuuva ncuwele iyo itthwiiyo.’” Arokorihu amoca o Turquia, aneehaniya Sera, aneera: “Mahumu anaapheela ukhalana ‘ikuru’ wiira ahihiyerere upanka citthu cinvaraaya. Hiiva pooti waavaha ‘ikuru’ naawantikhelaka iwarakha, naasukhurwelaka ni waalattula uwannyihu wiira naalipihe awula waavarana nteko nkhayi wuulalyeerani.” Humu novara nteko venci wiira akavihere nloko, unamphwanela usukhuriya. Nnoonela cani wuupuwela mananna oothoonyera unsukhuru mahumu?—1 Akor. 16:18.
Nyuuva pooti waavaha “ikuru” anamakavihera o wanlokoni, mahumu ni mamootoli osirikwiitu wiira akhitiri uvilela (Nwehe iparaagarafu 7, 11 ni 15.)
MAMOOTOLI OSIRIKWIITU ANAALIPIHA MALOKO
12. Phaapani Yesu aavarenlyaawe nteko wiira alipihe maloko ukati wo maapostolu? (1 Atesalonika 2:7, 8)
12 “Itthuvo ceepinaatamu” Yesu nivahilyaawe wiira awacere nloko nimananna omaana, cinaakavihera nimananna makhwaawe. Mahumu u Yerusalemu yahonthanla Paulu, Barnabe ni atthu akhwaawe wiira akhale mamootoli osirikwiitu. (Mite. 11:22) Wiira apanke isiyani? Khampa anamakavihera ni mahumu, mamootoli osirikwiitu anaakavihera ulipiha maloko. (Mite. 15:40, 41) Ayo alopwanaayo anaaleva ukatyaaya ni ukumyaaya wiira yiitthucihe ni yaalipihe akhunanaya.—Nsome 1 Atesalonika 2:7, 8. e
13. Mirinttini mamootoli osirikwiitu cirinaaya?
13 Mamootoli osirikwiitu anaaviriha ukati mwinci yeettaka mparapaarani. Mamootoli makhwaawe anaapanka ikwaha cuulupale, yaakhumaka nloko nikhwaawe ni yarwaaka nloko nikhwaawe. Isumana cotheene, mootoli osirikwiitu naataphulela myaha coovirikana, anawaathotola mayamunna. Anaapanka nkutthaano ni mapiyoneeru ni mahumu ni mikutthaano cookhumiya wuulalyeerani. Ayo anaatthenkaca myaha cinci ni anaatthenkaca isempeleeya co isirikwiitu ni ikonkereesu. Mwaakha wotheene, ayo anaasomiha icikola co mapiyoneeru ni ciicammo anaatthenkaca mikutthaano cuulupale co mapiyoneeru o iyo isirikwiitwiiyo. Uhiya commo, ayo ahaana awaceraka citthu cikhwaawe cofayita awula cowaakuvya.
14. Nlattuni uneereehu wiira mamootoli osirikwiitu akhanle itthuvo yo mmalokoni?
14 Kontha isiyani uneereehu wiira mamootoli o isirikwiitu akhanle itthuvo yo mmalokoni? Munna mmoca o Turquia, heera co: “Khula ikwaha annithotolaaya, unaakikurumica cinene waakavihera mayamunna o wanlokoni. Mi kihaacuwela mamootoli enci, masi khaavo tokile ukithoonyera wiira kharina ukati awula khampheela ukoopana mwaha.” Anuunu Johanna, anawuupuwela ikwaha yaavanryaaya nteko woolalyeera ni mootoli mmoca osirikwiitu, masi nno nihukunno khaakhitinri umuulumana ntthu. Ayo aneera: “Uhookhalaru commo, akinliyala nno nihukunno. Asinuunwaaka eeli yaahothamelaca nipuro noottalivana ni miiva yaankinukhelaca. Masi mootoli ahokilipiha ni ahokikavihera woona wiira ukhala uttayi naamucyaaka itthu inhala uvira. Nna co, atthunaka khunhala ureera ukhala wakhiviru naamuciihu awula naasipatthaniihu, masi upeephoni ninaahala urwaa ukhala ukati wotheene nkhayi.” Ayo akhanle matakihero mananna mamootoli akhanlyaaya itthuvo co mmalokoni anthotolaaya.—Mite. 20:37–21:1.
15. a) Toko cinthoonyeraaya 3 Joau 5-8, manannani ninlamuliyeehu waasukhuru mamootoli osirikwiitu? (Nwehe ciicammo ilatarato.) b) Nlattuni ninlamuliyeehu waavaha ifayita asaaraya mayamunna anwacera nloko, ni manannani ninlamuliyeehu upanka iyo itthwiiyo? (Nwehe ikwaaturu ineera “ Nwuupuwele asaaraya”.)
15 Apostolu Joau ahonkurumica Gaio ukhala oowaakhela aletto yaawa ulipiha maloko. Uyo hantikha co: “Waakavihere munkwahani waya nimananna anoncivela Nluku.” (Nsome 3 Joau 5-8. f) Ninhala upanka cani? Inanna imoca, ukhanle waavaha iyoolya mamootoli osirikwiitu. Inanna ikhwaawe ukhanle ukavihera nteko woolalyeera isumana inthotolaaya. Anuunu Leslie, khanhiya woonihera waasukhuru mamootoli osirikwiitu nimananna oovirikana. Ayo aneera: “Mi kananlompa Yehova wiira aavahe citthu cimpheelaaya. Mi nkhayi naawannyaka ninaawantikhela iwarakha wiira naasukhuru unithotola waya ni waahimeryaaya mananna cinikavihenryaaya.” Nhiliyale wiira: mamootoli osirikwiitu ciicammo akhanle oopahuwa. Ukati nkhwaawe, ayo anawaanana masakha toko, uwerennya, ukhala niiwasiwaasi ni mpaka waariipa nrima. Nlattu wo moolumo omaana awula waavaha itthu, Yehova pooti univarela nteko wiira aakhule mavekelwaaya ayo mayamunnaayo!—Miru. 12:25.
NINAAPHEELA-THO NANLELO “ITTHUVO CEEPINAATAMU”
16. Makohoni khula munna nolamuliyaawe wiipanka? (Miruku 3:27)
16 Ntuninyani motheene, anaapheeliya mayamunna ampheela wiivaherera wiira akhale “itthuvo ceepinaatamu”. Wakhala wiira nyuuva nhopattisiya, niireke “nnawiikurumica upanka inkhitiriinyu wiira nkavihere”? (Nsome Miruku 3:27. g) Nyuuva nnawiikurumica wiira nkhale namakavihera o wanlokoni? Wakhala wiira nyuuva nhookhala namakavihera o wanlokoni, nnaapheela ukhala humu ni uvara nteko cinene wiira mwaawacere mayamunna o wanlokoni? h Niireke nhaana mpankaka marukunuso muukumini winyu wiira nrwee Icikola Yaanamalalyeera o Umwene? Iyo icikoleeyo, inaahala wuutthenkacani nyuuva ni wuukaviherani wiivaherera cinene uvareliya nteko ni Yesu. Moonaka wiira nnyo iparakhannyo khannohala ukhitiri, munlompe Yehova. Munlepele nnepa wowaarya wiira wuukavihereni uvara khula nrintti nnohaleenyu waakhela.—Luka 11:13; Mite. 20:28.
17. Manannani “itthuvo ceepinaatamu” cinniitthucihaaya nhina Mweneehu, Yesu Kristu?
17 Mayamunna Yesu naathanlaawe ukhala “itthuvo ceepinaatamu” anaathoonyera wiira uyo khanhiya uniwacera ala mahuku ookhiceraala. (Mat. 28:20) Mweneehu Yesu, khanle onifento, namavaha ni naaweha-weha. Uyo naanivaha mayamunna owiitthenkaca saana wiira aniwacere. Moopuwelaka iyo itthwiiyo, nyuuva nnaatepa usukhuru, keera? Vano, mwaavyaavye ukati woothoonyera wiira nnawaavaha ifayita ayo alopwana owiikurumicaayo. Ni nhiliyale unsukhurweela Yehova, kontha uyo phinnivaha “coovaha cotheene coohipahuwa.”—Tiya. 1:17.
NCIPO 99 Nookhalana Anna Imilyau Sinceene
a Efesu 4:7, 8 Kontha Cowantikhiya cineera: “Ukati uwenlyaawe wiirimu, haacisa atthu ootthukiya hovaha itthuvo ceepinaatamu.”
b Mahumu, akhanle Ikhurupu yo Mahumu Anhoolela, Anamakavihera o Mahumu Anhoolela, Anamakavihera o Upeteli ni akhwaawe anwacera miteko cikhwaawe ciicammo akhanle “itthuvo ceepinaatamu.”
c Macina makhwaawe ahaakakhanihiya.
d 1 Atesalonika 5:12 Vano ninawuulepelani, mayamunna, wiira mwaahisime ale aneekurumica uvara nteko iriyariinyu, anohoolelani nyuuva waapwiya ni anoolakani; 13 mwaawacere venci cinene ayo, mwaafentaka, nlattu wo nteko unvaraaya. Nkhalakhale wamoca ninnema.
e 1 Atesalonika 2:7 Uhiya commo, hiiva nihiiyeviha iriyariinyu, toko nthiyana nowaamwiha ni naamaaliha asaanaawe. 8 Coo, nithoonyeraka wuuwacerani, khanaalakenle wuuhimyerani ihapari comaana ca Nluku paahi, masi ciicammo naholakela uvaherera ukumiihu wotheene, kontha ninawuufentani venci.
f 3 Joao 5 Munnaaka oofentiya, weeva unawoonihera ukhuluvelya waa nhina ile unaapankelaa mayamunna, hataa uhaacuwelaka. 6 Ayo ahovaha usaahiti wiira unawaafenta mayamunna o wanlokoni. Sontte, waakavihere munkwahani waya nimananna anoncivela Nluku. 7 Kontha nlattu wo ncina na Nluku, ayo yahorwaa ulalyeera ahiwehereraka uvahiya hataa itthu naale yahaari ayuuta. 8 Phimaana, hiiva ninlamuliya uwaakhelela ayo mayamunnaayo, wiira neettele ikhweeli nkhayi naayo.
g Miruku 3:27 Nhinthuwe itthu yomaana ntthu nopheela ukaviheriya, wakhala wiira nhaana mananna onkavihera
h Wiira ncuwele itthu inlamuliyeenyu upanka wiira nkhale namakavihera o wanlokoni awula humu, moone myaha cineera “Nyuuva nnawiikurumica ukhala namakavihera o wanlokoni?” ni “Nyuuva nnawiikurumica wiira nkhale humu?”, Nwehe irevista Ukhalenla yo Novembro yo 2024.
