MWAHA WOOSOMIYA 40
NCIPO 30 Muluku Aka, Moopoli Aka, ni Tiithi Aka
Yehova “nawaamaaliha ale ariipiye nrima”
“Uyo nawaamaaliha ale ariipiye nrima; naatthuka makhwattaaya.” —ISAA. 147:3.
ITTHU INHALEEHU WIITTHUCA
Yehova nawaawacera cinene ale anhuva nlattu wooriipiya nrima. Nhina ula mwahoola, ninaahala woona mananna Yehova mmalamalihaawe uriipiya wihu nrima ni unikavihera waalipiha akhunanihu.
1. Manannani Yehova cineecoonaawe awehaka aswalyaawe?
ISIYANI Yehova noonaawe aawehaka aswalyaawe va watuninyani va? Uyo naanoona nakhalaka ootteeliya ni ooriipiya nrima. (Isaa. 37:18) Yehova anoonaka niikurumicaka unswalela nimananna cimpheelaawe, hataa yanikhumelelaka masakha, uyo naakhala ootteeliya! Uhiya commo, uyo naapheela unikavihera ni unimaaliha.
2. Isiyani Yehova naapankelaawe ale ari ooriipiya nrima ni ninlamuliya upanka isiyani wiira nikaviheriye?
2 Isaalimu 147:3 ineera wiira Yehova ‘naatthukaca makhwattaaya’ ale ariipiye nrima. Nhina iyo Isaalimwiiyo, Yehova naattonkaciya khampa ntthu naawacera ni nifento ale ari ooriipiya. Masi, isiyani inlamuliyeehu upanka wiira niphwanyere ifayita mananna Yehova cinniwaceraawe? Muupuwele co: meetiku pooti upanka itthu yoovirikana wiira anvonihe makhwatta ntthu rakanle. Masi wiira uyo ntthuuyo avone, haana attharaka malakihero anvahiyaawe nuuyo meetikuuyo. Nhina ula mwahoola, ninaahala woona itthu Yehova naahimeeryaawe vencivenci ale ari ooriipiya nrima ciicammo ninaahala woopela mwaha mananna oweettela ayo malakiherwaayo.
YEHOVA NONOONA UKHALA ATTHU OFAYITA
3. Kontha isiyani atthu akhwaawe aneecoonaaya uhikhala ifayita?
3 Ninkhala ituninya atthu enci ahinooniheranaaya nifento. Ni wooriipiha nrima, atthu enci khaneecoona ukhalana ifayita. Atthu akiina anaawiiriha akhunanaya wiicoona uhikhalana ifayita. Anuunwiihu amoca aneehaniya Helen a aneera: “Kunnuwihiye naamuci ahinoonihera nifento. Apaapa waanaacivela nkhitto ni yanniirela khula ukati wiira khanaarina ifayita.” Atthunaka khampa Helen, nyuuva nhopaca uhuvihaciya, utarawaciya ni mpaka wuupuwela wiira khaavo ntthu nowoonani ukhalana ifayita. Waakhala wiira ihopaca uwiirannyeela, nyuuva pooti wuurikani ukupali wiira haawo ntthu noofentani.
4. Toko cinthoonyeraaya Isaalimu 34:18, isiyani Yehova innikhuluvelihaawe?
4 Hataa atthu akhwaawe yuwacerakani pusya, nyuuva nkupali wiira Yehova nawuufentani ni nawoonani ukhalana ifayita. Uyo “nawaattamela atthu ari ooriipiya nrima”. (Nsome Isaalimu 34:18. b) Nyuuva mweecoonaka “uhikhalana ifayita”, muupuwele wiira Yehova nawoona makhalelo omaana o wanrimani winyu ni hoothanlani wiira munswalele. (Joau 6:44) Uyo ri oolikaneene wiira ookavihereni kontha nawoonani ukhalana ifayita cinene.
5. Isiyani inlamuliyeehu wiitthuca nimananna Yesu aawaceraawe atthu yaathanyinya?
5 Pooti waneetthucereehu mananna Yehova cineecoonaawe nattharaka ntakihero na Yesu. Ukati Yesu waaryaawe va watuninyani va, anaawacera atthu yaathanyinya ni anwoonela ikiriri. (Mat. 9:9-12) Wootakihera, ukati athiyana amoca waakwanyilyaaya nlempe nokuwo ya Yesu wiira avone iretta yuulupale yaawerya, Yesu ahaamaaliha ni ahattottopela nlattu wo waamini woolipa waarinaaya. (Mark. 5:25-34) Hi ninaacuwela wiira Yesu notthara makhalelo oohipahuwa a Yehova. (Joau 14:9) Vano, nyuuva pooti wankupaliinyu wiira Yehova naawacera makhalelo omaana nyuuva nrineenyu, uhela nhina waamini winyu ni mananna nnonfenteenyu.
6. Isiyani nyuuva inlamuliyeenyu upanka moonaka wiira khanrina ifayita?
6 Isiyani nyuuva inlamuliyeenyu upanka wakhalaka wiira nanlelo nnawaanyihacera wiira nhaana ifayita uhoolo wa Yehova? Nsome ni muupuwelele iveerusu co mbiibiliyani cinhala wuukaviherani woona mananna Yehova nowoonaaweni ukhalana ifayita. c (Isaa. 94:19) Wakhalaka wiira khankhitinri wiirannyeeha mipika ciiphimenleenyu awula khannokhitiri upanka khampa cimpankaaya akhunaninyu, nhiihukhumu. Yehova khannilepela upanka itthu ihinkhitiriihu. Uyo nopheela wiira nipanke ile inkhitiriihu. (Isaa. 103:13, 14) Wakhala wiira nhopaca uwaceriya pusya naatthu akhwaawe uhuuriipeni nrima mwiirunaneelihaka, kontha nyuuva khunoophwanelani uwaceriya naayo manannaayo! Muupuwele wiira Yehova naahukhumu atthu ootakhala nrima, masi kahi ale antafittiya ni mananna oohiloka. (1 Pet. 3:12) Sandra, aawaceriye pusya ukati waaryaawe mwaana, neera: “Akinhiya unlepela Yehova wiira kiicoone nimananna uyo nkoonaawe.”
7. Manannani citthu ciniirannyenle muukumini wihu cinhalaaya waakavihera atthu akhwaawe?
7 Mwaamini wiira Yehova pooti wuuvarelani nteko nyuuva wiira mwaakavihere atthu akhwaawe. Nyuuva nhaana iparakha yoovara nteko woolalyeera nkhayi nuuyo. (1 Akor. 3:9) Ni citthu coorika nyuuva nvirihileenyu, pooti wuukaviherani wiiceesa nipuro noopacera wo waakavihera atthu anaanana masakha ni waaviriyana saana mananna ayo cineecoonaaya. Naayo manannaayo, nyuuva pooti upanka itthu wiira mwaakavihere. Anuunu Helen yahokaviheriya ni nna co, anawiikurumica waakavihera atthu akhwaawe. Ayo aheera: “Mi kicoona uhikhalana ifayita masi Yehova hokikavihera wiicoona ukhalana ifayita ni naakivarela nteko wiira kaakavihere atthu akhwaawe.” Anuunu Helen ari ootteeliya yaakaviheraka khampa piyoneera owiicaaverya.
YEHOVA NOOPHEELA WIIRA NIICOONE ULEVELELIYA
8. Isiyani Yehova inikhuluvelihilyaawe imphwanyannya nhina Isaiya 1:18?
8 Aswali akhwaawe a Yehova khanhiya ukhala niiwasiwaasi, nlattu wo itampi civanryaaya khalayi ahinaaya upattisiya ni hataa anapattisiye. Masi, nhiliyale wiira Yehova honvaherera mwanawe wiira anoopole kontha naanifenta cinene. Phimaana, uyo noopheela wiira hiiva niicoone uleveleliya nuuyo. Yehova honikhuluveliha wiira ‘wamalaru wuulumaceriya mwahooyo’ d nuuyo, naanilevelela niiraatti. (Nsome Isaiya 1:18. e) Hi ninaasukhuru cinene Yehova nlattu woonilevelela coottheka cihu cokhalayi cotheene! Ni ukati yooyo, uyo neera khanhala uliyala citthu cotheene comaana hiiva cinvareehu.—Isaa. 103:9, 12; Mabere. 6:10.
9. Uhiya wuupuwela citthu cokhalayi, kontha isiyani unreeraaya upanka yotheene inkhitiriihu nenna co ni niweheehaka citthu coohoolo?
9 Wakhala wiira nyuuva unawuuriipani nrima nlattu wo citthu cootakhala mpankileenyu khalayi, mmananihe upanka yotheene inkhitiriinyu wiira muupuwele citthu cimpankeenyu nna co ni cinhaleenyu upanka wahoolo. Moone ntakihero naapostulu Paulu. Uyo anaawoomolanihaca makristau. Nuukatyaaya, ahottharuwa nlattu woopanka iyo itthwiiyo. Masi uyo ankupali wiira Yehova ahonlevelela. (1 Tim. 1:12-15) Niireke Paulu ahoviriha ukati mwinci oopuwelaka citthu caapankilyaawe khalayi? Mena. Uyo khaakhanle ukati mwinci oopuwelaka citthu caapankilyaawe wiira akhale nfariseu aahala uhisimiya. (Afili. 3:4-8, 13-15) Uhiya commo, Paulu ahowacera woohihiyerera nteko woolalyeera ni aweheehaka citthu coohoolo. Khampa Paulu, nyuuva khannohala ukhitiri ulivyaanihera itthu yiirannyeele khalayi. Masi, hiiva pooti unttitthimiha Yehova ni citthu cimpankeehu nna co ni niweheehaka citthu Yehova cikhuluvelihilyaawe upanka uhoolo.
10. Isiyani inlamuliyeehu upanka wakhalaka wiira citthu civanreehu khalayi cahaakumihera masakha akhunanihu?
10 Atthunaka nyuuva unawuuriipani nrima nlattu wo itthu yootakhala mpankileenyu khalayi ni yaakumiherenre masakha akhunaninyu. Isiyani inhala wuukavihera? Mwiikurumice upanka yotheene inkhitiriinyu wiira nlokiherere masakha yaakumihenreenyu akhunaninyu iyo inaahela nhina ulepela uleveleliya. (2 Akor. 7:11) Uhiya commo, munlepele Yehova wiira aakavihere ale mwakumiherenreenyu masakha. Khweeliini, Yehova naahala wuukaviherani nyuuva ni ayo atthwaayo uliyala citthu cotheene ni uturuwela ukhalana nnema.
11. Isiyani ineetthuceehu nintakihero na porofeeta Jonas? (Nwehe ciicammo wakaapani.)
11 Mwiitthucere citthu caavonyileenyu khalayi ni munhiye Yehova wuuvarelani nteko ni mananna cimpheelaawe. Nwehe ntakihero na porofeeta Jonas. Yehova ahonruma wiira arwee u Niinive masi uhiya urwaa u Niinive khampa caarumiyaawe ni Nluku, Jonas ahotthawela ncoko nkhwaawe. Yehova ahomwiitthuciha Jonas itthu yuulupale ni uyo aheetthucera cinene niitthu yaapankilyaawe. (Jonas 1:1-4, 15-17; 2:7-10) Yehova khanhiile Jonas. Ahonvaha iparakha yoorwaa u Niinive. Vano, iyo ikwaheeyo,Jonas woohipica aheewelela. Pooti ukhalaka wiira, ahottharuwa nlattu woohiiwelela ikwaha yoopacera, masi khahiile wiira iyo enhihe iparakha ya Yehova yaakhenlyaawe mmaphiyaaruni.—Jonas 3:1-3.
Ukati porofeeta Jonas woopwelyaawe mmirimani wohopa yuulupale, Yehova ahonlepela-tho Jonas wiira arwee u Niinive alalyeere ihapari ca Nluku (Nwehe iparaagarafu 11.)
YEHOVA NAANILIPIHA AVARELAKA NTEKO NNEPAAWE WOWAARYA
12. Manannani ninhaleehu ukhalana nnema na Yehova canikhumelelaka citthu cahaaweherereehu awula ukhweliya? (Afilipo 4:6, 7)
12 Nlattu wo nnepaawe wowaarya, Yehova naanilipiha ukati cinnikhumelelaaya citthu cahaaweherereehu awula nakhweliyaka. Moone itthu yooriipiha nrima yankhumelenle Roni ni Carol. Wooriipiha nrima, mwanaaya aheeciva. Ayoca aneeraca co: “Khayaamala unikhumelela masakha oorika cinene, masi ila yaahonitepela. Hi nanviriha uhiyu wootheene nanlompa Yehova ni kaanaakhitiri urupa. Ni khweeliini, nahoona nnema nimphwanyannya nhina Afilipo 4:6, 7. f” (Nsome.) Wakhala wiira nyuuva nnawaanana marikariko awula masakha anooriipihani nrima, munhimyeere citthu cotheene cinwiirani Yehova. (Isaa. 86:3; 88:1) Munlepele Yehova wiira oovaheni nnepaawe wowaarya woohihiyerera ni uyo naahala waakhula ulompa winyu.—Luka 11:9-13.
13. Manannani nnepa wowaarya Yehova unhalaaya unikavihera uhihiya unswalela nimananna ookhuluvelya? (Efesu 3:16)
13 Nyuuva nnawiicoona uhikhalana ikuru wiira mpanke khula itthu nlattu wo itthu yooriipihileni nrima? Yawiirannyeelakani iyo itthwiiyo, nkupali wiira nnepa wowaarya wa Nluku unaahala wuuvahani ikuru wiira nhihiyerere unswalela Yehova. (Nsome Efesu 3:16. g) Moone itthu yaakhumelenle arokorihu amoca aneehaniya Flora. Ayo nkhayi naawannyaya yaakavihera khampa mamisiyonaariyu. Ukati awannyaya weettilyaaya uluva ayo yahomwalanaca. Arokorihu aneera: “Mi kahokhala ooriipiya nrima cinene nlattu wo iyo itthwiiyo ni akaakhitiri wuupuwela itthu ikhwaawe. Mi kananlompa Yehova kinlepelaka nnepaawe wowaarya wiira ukikavihere uhilolovaca nhina mminepani. Yehova hokikavihera ukhalana ikuru caapheelaaka wiira kikhitiri uvilela iyo itthwiiyo.” Arokorihu Flora ahoona wiira Yehova haakavihera unkhuluvela cinene uyova ni ayo yahokupali wiira Yehova naahala waakavihera khula masakha anhalaaya uviriha muukumini waya. Ayo anaamalihera yeeraka: “Moolumo amphwanyannya nhina Isaalimu 119:32 ahokikavihera woona mananna Yehova cikikavihenryaawe: ‘Kinaahala weettela iphiro cinyu ninrimaaka wotheene, kontha nyuuva nhokikavihera ucuwela ikano cinyu.’”
14. Isiyani inlamuliyeehu upanka wiira nitepe ukhalana nnepa wowaarya wa Nluku?
14 Unlompa winyu Yehova mwanlepelaka nnepaawe wowaarya, isiyani inlamuliyeenyu upanka? Nvare miteko cinhala wuukaviherani waakhela nnepa wowaarya wa Yehova, wootakihera, urwaa umikutthaanoni ni wuulalyeerani. Nsome Nuulumo na Nluku mahuku otheene, mwapankaka commo, nyuuva naahala ukhalana moopuwelelo omaana. (Afili. 4:8, 9) Ukati unsomeenyu Ibiibiliya, moone matakihero atthu okhalayi yaananne masakha ni moone mananna Yehova aakavihenryaawe uvilela. Sandra, aanana marikariko muukumini wawe, neera: “Ihantisi ya Yusufu khweeliini ihokivara nrima. Uyo khaweherenre wiira masakha yaananaawe ni uhiwaceriya niisariya, uvololihe upatthani waarinaawe ni Yehova.”—Upha. 39:21-23.
YEHOVA NAWAAVARELA NTEKO MAYAMUNNEEHU WIIRA ANIMAALIHE
15. Tipani nohala unilipiha ni manannani? (Nwehe ciicammo ilatarato.)
15 Navirihaka itafaawuti, mayamunneehu pooti unilipiha awula unimaaliha. (Akol. 4:11) Khweeliini, mayamunneehu ni mayanuunwiihu anaanonihera nifento na Yehova. Ayo mayamunnaayo, anaanimaaliha yaniviriyanaka saana yanikhumelelaka itafaawuti. Ayo pooti unisomela iveerusu yo mbiibiliyani inhala unimaaliha awula ulompa nkhayi nihiiva. h (Aroo. 15:4) Atthunaka, mayamunneehu pooti unuupusera mananna Yehova noweheraawe mwahooyo ni naayo manannaayo anaahala unikavihera ukhala oomaala ni uvilela. Awula, yakhalaru paahi vakhiviru ni hi, hataa ihuulumaka itthu, ninaakhala oolipihiya. Hiiva pooti ukhala nimasukhuli ikwaha cikhwaawe, atthunaka uyo pooti ukhala ukati mayamunneehu unhalaaya unikavihera yanivahaka itthuvo awula iyoolya.
Apatthani ookhuluveliya ni akhanle makristau ookhomaala nhina mminepani pooti unimaaliha cinene ni unikavihera (Nwehe iparaagarafu 15.)
16. Isiyani inlamuliyeehu upanka wiira mayamunneehu anikavihere?
16 Wiira nikaviheriye naatthu akhwaawe, nihaana waahimerya itthu impheeleehu. Mayamunneehu ni mayanuunwiihu anaanifenta venci ni ampheela unikavihera. (Miru. 17:17) Masi, ayo pooti uhicuwela mananna cineecooneenyu, phimaana nlepele ukaviheriya. (Miru. 14:10) Wakhala wiira nyuuva nnawaanana masakha, munhimerye mpatthaniinyu ookhomaala nhina mminepani mananna cineecooneenyu. Munhimerye itthu inlamuliyaawe upanka wiira uukavihereni. Atthunaka nyuuva pooti ulakela unthanla humu mmoca awula eeli wiira mwaahimerye itthu inwiirani. Atthunaka mayanuunu anawiicoona ukhala saana yaahimeeryaka mayanuunu akhwaawe ookhomaala nhina mminepani citthu cinwiira.
17. Isiyani inhala uniiriha uhipheela ukaviheriya nimayamunneehu ni mananna ninhaleehu umalamaliha iyo itthwiiyo?
17 Nhivirihe ukati mwinci nnari veekha. Nlattu wo muupuwelelo oohiloka pooti uhuucivelani uviriha ukati nnari naasipatthaniinyu akhwaawe. Ikwaha cikhwaawe, mayamunna pooti uhicuwelela mananna cineecooneenyu awula pooti wuuluma citthu caahala wuuriipihani nrima cinene. (Tiya. 3:2) Masi, nhihiyerere wiira nnyo citthunnyo, cuuhiiheni ukhala nkhayi nimayamunna. Yehova pooti waavarela nteko wiira yuulipiheni. Humu mmoca neehaniya Gavin, aheecoona saana, neera: “Ikwaha cinci, khunkicivela wuulumaca awula uviriha ukati kinari naasipatthannyaaka.” Hataa ukhalaka commo, Gavin nawiikurumica uviriha ukati nari nkhayi nimayamunna ni uyo nawiicoona ukhala saana apankaka commo. Anuunu amoca aneehaniya Amy, aneera: “Nlattu wo masakha avirihilyaka khalayi, miiva unaakirika waakhuluvela atthu. Masi kineera kiitthucaka waafenta mayamunna ni waakhuluvela, khampa Yehova nopankaawe. Mi kinaacuwela wiira iyo inantteeliha nrima Yehova ni miiva ciicammo inaakitteeliha nrima.”
INATIRI CA YEHOVA CINANIMAALIHA
18. Isiyani inlamuliyeehu uweherera oohoolo ni isiyani inlamuliyeehu upanka nna co?
18 Hiiva pooti wankhuluveleehu inatiri coohoolo, kontha woohipica Yehova naahala umalamaliha masakha otheene annikhumelela. (Apoka. 21:3, 4) Waphiyaka uyo ukatyuuyo, citthu cinniphwanyiha masakha nna co, ‘khacinhala uturuwela-tho wanrimani.’ (Isai. 65:17) Khampa noonileehu, Yehova naatthukaca makhwatteehu ala mahukwaala. Phimaana, mphwanyere ifayita itthu yotheene Yehova impankaawe wiira ookavihereni uvilela. Nhikhale ootikhinaca mena vakaani mananna Yehova ‘noowaceraaweni nyuuva.’—1 Pet. 5:7.
NCIPO 7 Yehova ti Ikuru Sahu
a Macina makhwaawe ahaakakhanihiya.
b Isaalimu 34:18 Yehova ri wakhiviru ni ale arina nrima wooriipiya, uyo naawoopola ale ari ni masukhuli.
c Nwehe ikwaaturu “ Nyuuva nhaana ifayita uhoolo wa Yehova.”
d Wiira “nimmalamalihe nanrokottole ninkhalaneehu” ni Yehova, nihaana woonihera uttharuwa ni ulepela uleveleliya nlattu wo matampi nipankileehu ni urukunusa moopuwelelweehu. Navaraka itampi yuulupale, ciicammo nihaana naavyaka ukaviheriya ni mahumu o wanlokoni.—Tiya. 5:14, 15.
e Isaiya 1:18 Nwe, wiira nimalihace milattu cihu,” neera Yehova. Hataa matampiinyu yakhalaka khampa ikoore yookhwiila cinene, anaahala ukhalihiya ootteela khampa ineeve; hataa yakhalaka khampa ikuwo yookhwiila cinene, anaahala ukhala ootteela khampa ntthoce.
f Afilipo 4:6 Ihikhale hataa itthu yowuuhelani isukhuli, masi nhina wo citthu cotheene, munlompe ni munsonttelele Nluku, munsukhurweelaka, wiira muncuwelihe citthu cinlepeleenyu; 7 ni nnema na Nluku, ninvikana moopuwelelo otheene, ninaahala usunka nrimeenyu ni moopuwelelweenyu iriyari ya Yesu Kristu.
g Efesu 3:16 Kinaalompa wiira nuukhulupale wawe, oolipiheni nhina winyu, ni oovaheni ikuru ninnepaawe wowaarya.
