Yehova naapheela cinene wiira ale anthelana ikacamentu akhale ootteliya ni ahimwalanace. (Mat. 19:4-6) Wakhalaka wiira iyo phi itthu nyuuva intotheenyu, nnohala umphwanya cani ntthu oohala unthelana ikacamentu? Ukhala wiira Yehova phinumpale, uyo naacuwela isiyani inhala unikavihera umphwanya ntthu oohala unthela ni ukhala ootteeliya muuthelanani wihu. Phimaana, mwattharaka ikano cinvahaawe, nyuuva khweeliini nnaahala uphwanya utteeliya. Nttwee noopele mwaha nnyo ikanonnyo.

Woopacera, nihaana nicuwelaka ila itthwiila: “Nrima khunkhuluvelya cinene ni khuneevaraca. Tipani nhala ukhitiri ucuwela?” (Jer. 17:9) Atthu eeli ampheela uthelana ikacamentu yacuwelanaka ni yanceraka uviriha ukati mwinci nkhayi, ayo anawancera upheelana cinene ni nlattu wo iyo, unawaarika wuupuwela ratta. Ntthu nolakela upanka citthu co muuthelanacani eettiheraka itthu immwiira wanrimani, pooti wahoolo urwaa uttharuwa. (Miru. 28:26) Phimaana, khunreera atthu eeli ahincuwelana ratta wooniherana nifento awula uhimeryana khula ntthu irinaawe wanrimani. Uhiya commo, ayo ahaana yacuwelaka tookooni makhalelo omaana arinaawe khula ntthu, ahinaaya ulakela uthelanaca ikacamentu.

Miruku 22:3 ineera: “Ntthu ankhili oonaka itthu yowoopiha naahuluwa, masi ntthu oohankhili naasicenra ni naattharuwa.” Nlattuni unoopihaaya uvarela nteko aplikatiivu ni isayiti co mwinternetini cimpankiya wiira cinkavihere ntthu uncuwela nlopwana awula nthiyana oohala unthelana ikacamentu? Woocukuliha nrima, ahaavo athepiye ni ntthu ancuwenlyaaya mwinternetini. Uhiya commo, atthu owootha pooti ukhalana ikontha mwinternetini wiira yaathepye atthu ni awinnyere nsurukhu. Ayo atthu owoothaayo pooti wuuluma wiira akhanle Masaahiti a Yehova masi ahikhanle.

Moone itthu ikiina inthoonyera wiira unawoopiha uvarela nteko nnyo aplikatiivunnyo. Isayiti co mwinternetini cikiina cinanlikaniha nlopwana ni nthiyana wiira yaakavihere ucuwela khampa anaaphwanelana uthelana ikacamentu awula mena. Masi khiivo itthu intthoonyera wiira nnyo isayitinnyo cinhimya ikhweeli. Mweemele ni muupuwele: uthelana ikhanle itthu yuulupale. Wakhala wiira nnontotha ntthu oohala unthelana ikacamentu, woonela winyu wanhala ureera ukhuluvela iporokaraama co nkomputatooreni coopankiya naapinaatamu wiira cuuthoonyereni ntthu ooreera unthelana ikacamentu? Niireke iporokaraama  coopankiya naapinaatamu phiri cookhuluvelya uvikana ikano co mbiiblyani?—Miru. 1:7; 3:5-7.

Nhina Miruku 14:15 ninaaphwanya ikano ikhwaawe, ineera: “Ntthu oohicuwelaca nakupali khula nuulumo nineewaawe, masi ule rina ankhili nawuupuwela uratteene hinatthi upanka itthu.” Ukati wonwehacera ntthu wakhala wiira naahala ukhala ntheli omaana awula ntheliya omaana, nyuuva nhaana muncuwelaka tookooni. Khannohala ukhitiri uncuweleeha uyo ntthuuyo mwinternetini. Woonela winyu, niireke uveleeliherana ifootu ni imensace cinci unaatosa wiira muncuweleehe uyo ntthuuyo? Atthu enci yoopuwenle wiira ahomphwanya ntthu omaana oohala unthela awula waathela, yahokhala ootikhinihiya ikwaha yoopacera yoonanacilyaaya co ni co.

Nasaalimu mmoca heera: “Akinaapatthanana atthu owootha ni kinawaahuluwa ale anvitha makhalelwaaya.” (Isaa. 26:4) Atthu enci wiira yooniye ureera, anawootha nhina ifootu cinhelaaya mwinternetini. Ayo anaamananiha wiittiyelelaca ni uvitha makhalelwaaya oohinamaana ukati woowantikhela imensace akhunanaya. Nyuuva nhaana muupuwelaka nnya citthunnya: hataa ntthu eeraka wiira khanle Saahiti a Yehova, niireke uyo khweeliini khanle nkristau oopattisiya? Khanle ntthu oolipa munnepani? Haana upatthani woolipa ni Yehova? Naahisimiya wanlokoni, awula khanle ntthu rina meettelo ahinreera utakihiya ni khanle ntthu oohireera umpatthanana? (1 Akor. 15:33; 2 Tim. 2:20, 21) Niireke uyo khari naamwaarawe awula naawanuwawe? Wiira mwaakhule ala makohwaala, nyuuva nhaana mmoopanaka mwaha Saahiti a Yehova nkiina noncuwela saana ntthu nopheeleenyu uthenla awula wuuthelani. (Miru. 15:22) Khweeliini, ntthu nonswalela Yehova khaahala wuupuwela mena vakaani unthela ntthu hinonswalela Yehova.—2 Akor. 6:14; 1 Akor. 7:39.

Toko conneehu, uvarela nteko aplikatiivu ni isayiti co mwinternetini wiira muntothe ntthu oohala unthelana ikacamentu, unawoopiha. Masi ahaavo mananna makhwaawe oncuwela ntthu oohala uthelanana. Nipuro ninkhaleenyu, khaavo ntthu nomooneenyu wiira wanhala ureera unthelanana ikacamentu? Waahikhottihiyeke, Masaahiti a Yehova anawoonanacaka mmamikutthaanoni co wanlokoni, mmamithukumanoni cosirikwiitu ni mmakonkereesuni.

Vano wakhalaka wiira khawankhitirya woonanaciya mmamikutthaanoni coopenleehu mwahannyo nlattu woretta yo koronaviiru (COVID-19), hiiva ninthukumana navarelaka nteko interneti. Ukati wo nnyo mikutthaanonnyo mayamunna ni miyanuunu athupa pooti ucuwelana. Ciicammo, anaakhitiri woona mananna cimpankaaya miphantte caya umikutthaanoni co wanlokoni ni pooti uviriyana ikomentaariyu caya cinthoonyera waamini waya. (1 Tim. 6:11, 12) Ciicammo unaakhitirya uwoopana mwaha mayamunna akiina nhina ikhurupu cankaani, camalaka upankiya mikutthaano. Mwathukumanaka ni Masaahiti a Yehova akhwaawe mwinternetini, nyuuva nnaakhalana ukati woomoona ntthu noocivelani mananna cinaawaceraawe akhwaawe ni iyo pooti wuukaviherani uncuwela saana. (1 Pet. 3:4) Wahoolo, mwacuwelanaka ratta, nnaahala ukhitiri woona wakhala wiira nhomphwanya ntthu nontotheenyu awula mena.

Miyamunna ni miyanuunu athupa yattharaka ikano co mbiiblyani ukati woolakela uthelana ikacamentu, anaakhala ootteeliya muukumini waya. Miruku 18:22 ineera: “Ntthu nomphwanya nthiyana omaana phwanyile itthu yomaana, ni nanciveliha Yehova.”