MWAHA WOOSOMIYA 16
“Mwanrokoraa naahala wunwelela”!
“Yesu ahomwiirela [Marta] co: ‘Mwanrokoraa naahala wunwelela.’”—JOAU 11:23.
NCIPO 151 Ele Chamará
NINHALA WIITTHUCANI? a
1. Manannani Mateus coonihenryaawe ukupaleeha weekhweeli niweherero no wunwelelihiya atthu ookhwa?
MWANHIMA mmoca neehaniya Mateus haana iretta yuulupale imwiirihile wooperariya ikwaha cinci. Ikwaha imoca, uyo oona iporokaraama yo khula mweeri yo JW Broadcasting.® Wiimaleloni iyo iporokaraameeyo, uyo ahoona ncipo nawooniheraka atthu owunwelelihiya yaakheleliyaka upeephoni. b Umala waya iporokaraama, Mateus ahaarukunuwela asithumwaane, waavarela matataaya ni ahowiirela: “Paapa, maana, nyuuva nhoona? Hataa miiva kikhwaaka, mi kinaahala wunwelelihiya. Nkiweherere!” Munnokhitiri wuupuwela mananna asithumwaane ciicoonilyaaya ukati wonnyaaya wiira mwanaya ankupaleela niweherero no wunwelelihiya atthu ookhwa?
2-3. Kontha isiyani unaareera wuupuwela niweherero no wunwelelihiya atthu ookhwa?
2 Nihaana nihihiyereraka ukumiha ukati wiira nuupuwele niweherero no wunwelelihiya atthu ookhwa. (Joau 5:28, 29) Kontha isiyani? Kontha khanincuwela nihuku ninhaleehu ukhalana iretta yuulupale awula nihuku ninhaleehu ukhweliya. (Ekles. 9:11; Tiya. 4:13, 14) Niweherero no wunwelelihiya atthu ookhwa pooti univaha ikuru cimpheeleehu wiira nivilele masakha anaananeehu. (1 Atesal. 4:13) Ibiiblya inaanikhuluveliha wiira Apaapeehu o wiirimu, Yehova, anaanicuwela saana ni anaanifenta venci. (Luka 12:7) Ayo anaanicuwela saana, phimaana anaahala ukhitiri ununweleliha nimakhalelweehu okhalayi ni nimoopuwelelweehu. Ayo anaanifenta venci, phimaana ampheela univaha ukumi wiira nikhale mpaka, ni hataa nakhwaaka, ayo anaahala ununweleliha wiira nikhalane uyo ukumyuuyo!
3 Nhina ula mwahoola, ninhala upacera woona nlattuni ninlamuliyeehu ukupali wunwelelihiya waatthu ookhwa. Vano, ninaahala woopela mwaha ihantisi yo mbiiblyani inlipihaca waamini wihu. Nhina iyo ihantisiiyo, phikumihiyaaya murwaaya ula mwahoola: “Mwanrokoraa naahala wunwelela.” (Joau 11:23) Woomalela, ninaahala woona isiyani inlamuliyeehu upanka wiira nikupaleehe niweherero no wunwelelihiya atthu ookhwa.
NLATTUNI NINLAMULIYEEHU UKUPALI WUNWELELIHIYA WAATTHU OOKHWA?
4. Wiira nikupali itthu ikhuluvelihiyeehu, isiyani inlamuliyeehu ukupaleeha? Ntakihere.
4 Wiira nikupali itthu ninkhuluvelihiyeehu, nihaana nikupaleehaka wakhala wiira ntthu nikhuluvelihile naapheela ni naakhitiri upanka itthu ikhuluvelihilyaawe. Muupuwele nna nlattaniheronna: ihovira iphyoo yuulupale nipuro ninkhaleenyu ni iyo ihokwanyulaca inupeenyu. Vano mpatthaniinyu naawa ni naawiirelani co: ‘Mi kinaahala wuukavihera urehereryaca inupaa.’ Iyo itthwiiyo inthoonyera wiira uyo naapheela wuukaviherani. Ni wakhala wiira uyo mpwaniinyuuyo khanle namatekateka inupa ni haana ikaruma coovarela nteko wiira alokihace inupeenyu, nyuuva nnaahala ukhuluvela wiira uyo haana ikuru ni nawoorya upanka itthu ikhuluvelihilyaawe. Phimaana, nyuuva nnaahala ukupali itthu ikhuluvelihilyaawe. Niireke wiira inanna imocaaru hiiva pooti wankupaliihu inatiri ya Nluku inooluma wunwelelihiya waatthu ookhwa? Niireke wiira uyo khweeliini naapheela ni haana ikuru wiira eerannyeehe iyo inatiriiyo?
5-6. Nlattuni ninkupaliihu wiira Yehova naapheela uwunweleliha atthu ookhwa?
5 Niireke wiira Yehova naapheela uwunweleliha atthu ookhwa? Khweeliini, uyo naapheela. Wiira anithoonyihere wiira uyova naapheela uwunweleliha atthu ookhwa, uyo haaruma atthu enci yantikhile Ibiiblya wuuluma wunwelelihiya waatthu ookhwa unhala wiirannya wahoolo. (Isai. 26:19; Ose. 13:14; Apoka. 20:11-13) Ni Yehova akhuluvelihaka wiira naahala upanka itthu, uyo khweeliini naahala upanka. (Jos. 23:14) Ciicammo, Yehova noona upica uphiya ukati unhalaawe uwunweleliha atthu ookhwa. Nincuwela cani iyo itthwiiyo?
6 Moone itthu yantikhilyaawe Jó. Uyo aanaakupali wiira akhwaaaka, Yehova aanaahala unukheliya nuuyo ni aanaahala umunweleliha wiira ahokoleele ukhala nkumi. (Jó 14:14, 15) Yehova ciicammo anannukhela aswalyaawe otheene akhwile. Uyo noona upica uphiya ukati unhalaawe uwunweleliha ni waavaha ukumi womaana ni utteeliya. Vano, atthu enci akhwile woohincuwela Yehova, isiyani inhala uwiirannyeela? Nlukwiihu oofenta ciicammo naahala uwunweleliha ayo atthwaayo. (Mite. 24:15) Yehova nopheela waavaha ukati wookhala asipatthannyaawe ni ukhalana ukumi woohimala. (Joau 3:16) Unawoonannya wiira Yehova khweeliini naapheela uwunweleliha atthu ookhwa.
7-8. Nlattuni ninlamuliyeehu ukupali wiira Yehova naakhitiri uwunweleliha atthu ookhwa?
7 Niireke wiira Yehova ciicammo naakhitiri uwunweleliha atthu ookhwa? Uyo khweeliini naakhitiri, kontha khanle Nluku “Nakuru-Cotheene.” (Apoka. 1:8) Uyo haana ikuru cinci cinonkhitiriha untthema khula nwanani, hataa ciicammo ukhwa. (1 Akor. 15:26) Ucuwela iyo itthwiiyo unaanivaha ikuru ni unaanimaaliha. Moone itthu yaawiirannyenle arokorihu aneehaniya Emma Arnold. Ayo naamucyaaya yahaakhumelela masakha menci ukati waalavaniyaaya ikhotto yonayeeli yo ntuninyani. Uyo ukatyuuyo yahokhwa atthu enci yaafentaaya yaakhala mapuro ipartiitu Nazi yaavarihacaaya nteko atthu. Wiira arokorihu Emma ammaalihe mwanaya mwanthiyana, ayo yahomwiirela co: “Unari wiira ukhwa uhaana ikuru wiira waakhalihe atthu mmahiye mpaka, iyo itthwiiyo yaahala uthoonyera wiira ukhwa uhaana ikuru unvikana Nluku, keera?” Masi, khiivo itthu irina ikuru unvikana Yehova, Nlukwiihu Nakuru-Cotheene. Uyo phumpile ukumi ni khweeliini haana ikuru wiira aahokolosere ukumi atthu akhwile.
8 Ihaavo itthu ikhwaawe innikupaliha wiira Nluku naakhitiri uwunweleliha atthu ookhwa: ukhalaka wiira wuupuwela wawe khummalela. Wootakihera, uyo nawiihana khula itthonttwa nincina naya. (Isai. 40:26) Ciicammo, uyo naakhitiri uwuupuwe atthu akhwiile. (Jó 14:13; Luka 20:37, 38) Yehova khunonrika wuupuwela mananna caaryaawe khula ntthu khwile nohalaawe umunweleliha, toko ikhovyaawe, makhalelwaawe, citthu cankhumelenle ukati waaryaawe nkumi ni moopuwelelwaawe.
9. Nlattuni nyuuva nnokupaliinyu inatiri ipankilyaawe Yehova yoowunweleliha atthu ookhwa?
9 Khweeliini, hiiva pooti wankupaliihu inatiri Yehova ipankilyaawe yoowunweleliha atthu ookhwa, kontha ninaacuwela wiira uyo naapheela ni naakhitiri upanka iyo itthwiiyo. Masi, ihaavo itthu ikhwaawe inlamuliya uniiriha ukupali wunwelelihiya waatthu ookhwa: Yehova ahonweleliha atthu ookhwa khalayi. Khalayi, Yehova ahaavaha ikuru aswalyaawe ni ahonvaha ikuru Yesu wiira awunwelelihe atthu ookhwa. Vano, nttwee noopele mwaha ikwaha imoca Yesu waamunwelelihilyaawe ntthu ookhwa. Iyo inoolumiya nhina Joau ikapiitulu 11.
AHOKHWA MPATTHANI MUULUPALE A YESU
10. Ihaparini yooriipiha nrima Yesu yaahimeriyaawe ni uyo aapankile isiyani? (Nwehe Joau 11:1-3.)
10 Nsome Joau 11:1-3. c Nttwee nihokoleele uttuli ni nuupuwele itthu yeerannyeele waaliteeya yeehaniya Betânia mwaakha wo 32 nawile Kristu. Yesu ahaana apatthannyaawe omaana ale aliteeyaale. Apatthannyaawe yaari Laazaru ni asirokoraawe eeli yeehanaciya Marta ni Maria. (Luka 10:38-42) Masi Laazaru ahowerennya ni asirokorawe yahokhala nimasukhuli cinene. Phimaana, ayo yahoruma wiira oolumaniye Yesu. Uyo aari mphantte nkhwaawe wo mooloko Jordão, ni wiira ntthu aphiye nwo, ahaana avirihaka mahuku meeli eettaka. (Joau 10:40) Woocukuliha nrima, atthunaka iwoora Yesu yaahimeeriyaawe wiira mpwanaawe anwerennya, Laazaru phaakhwaawe. Hataa acuwelaka wiira mpwanaawe ahokhwa, Yesu ahohiya yaviraka mahuku meeli hinaaya urwaa u Betânia. Phimaana, uwakati Yesu waaphiilyaawe u Betânia, yahovira mahuku macese Laazaru nakhwile. Masi, nlattuni Yesu waahiilyaawe uviraka ukati mwinci? Kontha uhiya upheela waakavihera paahi asimpwanaawe, uyo aapheela upanka itthu yaahala umwiiriha Nluku Yehova uttitthimihiya.—Joau 11:4, 6, 11, 17.
11. Isiyani hiiva nineetthucereehu ihantisi ya Laazaru nhina upatthani?
11 Ila ihantisiila ciicammo inaaniitthuciha ikano yomaana nhina upatthani. Muupuwele ila itthwiila: ukati Marta ni Maria wanveleelihenryaaya moolumo Yesu, ayo khayanlepenle wiira arwee mpaka u Betânia, masi yahowiira unhimeerya paasi wiira mpatthannyaawe anwerennya. (Joau 11:3) Uhiya commo, Yesu pooti waamunwelelihaawe Laazaru naryeene wonwo. Waahookhalaru commo, uyo aholakela urwaa mpaka u Betânia wiira awoonanane asimpwanaawe, Marta ni Maria. Nyuuva nhaana mpatthaniinyu ciicammo nohala wuukaviherani hataa nyuuva nhinlepenle? Nyuuva nnaaweherera wiira uyo mpatthaniinyuuyo naahala wuukaviherani hataa ukhalaka “ukati wo masankiho.” (Miru. 17:17) Ni hiiva ciicammo pooti wanoonihereehu ukhala apatthani omaana khampa Yesu. Vano nttwee nituruwele ihantisi ya Laazaru ni noone isiyani yeerannyeele wahoolo.
12. Isiyani Yesu yankhuluvelihilyaawe Marta ni kontha isiyani yaalamuliyaawe ukupali itthu yaakhuluvelihiyaawe? (Nwehe Joau 11:23-26.)
12 Nsome Joau 11:23-26. d Marta ahocuwela wiira Yesu ahophiya u Betânia. Vano uyo ahokhuma wiira amwiikamele ni umphwanya wawe, uyo ahomwiirela co: “Pwiiya, unari wiira mwahaavo va, mwanrokoraka khaahala ukhwa.” (Joau 11:21) Khweeliini, Yesu anhala ukhitiri unvoniha Laazaru. Masi uyo aapheela upanka itthu yuulupale ni yootikhiniha. Uyo ahonkhuluveliha Marta, eera co: “Mwanrokoraa naahala wunwelela.” Ni uyo ciicammo ahonhimerya Marta itthu ikhwaawe yaahala umwiiriha waamini itthu yaakhuluvelihiyaawe: “Thi mi kikhanle wunwelelihiya waatthu ookhwa ni ukumi.” Ni iyo ikhanle ikhweeli kontha Yesu ahovahiya ikuru ni mwaneene Nluku wiira awunwelelihe atthu ookhwa. Hataa phimaana uyo ahokhitiri uwunweleliha atthu eeli nimananna oovirikana: mwanthiyana mmoca aanowiira akhwaaka, uyo nuumunweleliha; ni mmirawo mmoca atthunaka aamunwelelihile nihuku nenno naakhwilyaawe. (Luka 7:11-15; 8:49-55) Vano Laazaru, aavirihile mahuku macese nakhwile ni irutthwaawe yahontta. Niireke wiira Yesu anhala ukhitiri umunweleliha?
“LAAZARU, UKHUMELE UNO VATYOONO!”
Yesu ahoona uthunku ni wahonwerya nrima uwoona wawe asimpwanaawe anari oocukulaca (Nwehe iparaagarafu 13-14)
13. Toko cinhimyaaya Joau 11:32-35 isiyani Yesu yaapankilyaawe ukati waamonnyaawe Maria ni atthu akhwaawe yonlaka? (Nwehe ciicammo ilatarato.)
13 Nsome Joau 11:32-35. e Muupuwele wiira nyuuva mwahaavo nno nipuronno ni mwaanawoona citthu ceerannya! Mwanrokorawe Laazaru nkiina, eehaniya Maria, ahomoonanana Yesu ni ahonhimerya itthu imocaaru niile yoolumilyaawe Marta: “Pwiiya, unari wiira mwahaavo va, mwanrokoraka khaakhwa.” Maria ni atthu akhwaawe yaarivo nne nipuronne wahaariipa nrima cinene. Uwakati Yesu waawonnyaawe ayo atthwaayo, ahokhala ooriipiya nrima cinene ni ahokhala nimasukhuli. Nlattu wonwerya nrima waawoonaawe asipatthannyaawe anari ooriipiya nrima, Yesu ciicammo ahancera wunla. Uyo ancuwela mananna cinweryaaya akhwaaka ntthu anfenteehu. Khweeliini, ninoona upica uphiya ukati unhalaawe umaliha ukhwa.
14. Isiyani nimmwiitthucereehu Yehova noopuwelaka mananna Yesu ceeconnyaawe umoona wawe Maria onlaka?
14 Mananna Yesu ciiconnyaawe umoona wawe Maria onlaka unniitthuciha wiira Yehova khanle Nluku rina uthunku. Nincuwela cani? Toko nonneehu mwaha uvinre, Yesu naatakiha sana-saana uthunku ni moopuwelelo Aathumwaane Yehova. (Joau 12:45) Phimaana, nasomaka wiira Yesu ahowoonela uthunku asipatthannyaawe mpaka ahonla, hiiva pooti waneereehu wiira Yehova ciicammo nawoona uthunku venci anoonaka ninari pusya ni nonlaka. (Isaa. 56:8) Wuupuwela iyo itthwiiyo unaanikavihera utepa upheela umpatthanana Nlukwiihu Yehova. Khannaamini?
Yesu ahoonihera wiira uyo ahaana ikuru wiira awunwelelihe atthu ookhwa (Nwehe iparaagarafu 15-16)
15. Toko cinhimyaaya nhina Joau 11:41-44 nttonkace itthu yeerannyeele uwakati Yesu waaphiilyaawe nipuro naari mahiye a Laazaru. (Nwehe ciicammo ilatarato.)
15 Nsome Joau 11:41-44. f Yesu ahophiya nipuro naari mahiye a Laazaru ni aholepela wiira nikumihiye Nluku naakhunenle mahiye. Marta aheera wiira iyo itthwiiyo khayaalamuliya upankiya, kontha irutthu ya Laazaru atthunaka yahancera unukha. Masi Yesu ahaakhula eeraka co: “Akoohimenrye wiira waaminiki unaahala woona miiriirya ca Nluku?” (Joau 11:39, 40) Vano, Yesu ahoweha wiirimu ni aholompa waatthuni. Uyo aapheela unttitthimiha Yehova nlattu wo itthu yaahala wiirannya. Yesu ahokhuwela eeraka co: “Laazaru ukhumele uno vatyoono!” Ni Laazaru ahokhuma mmahiyeni eettaka. Yesu ahokhitiri upanka itthu atthu enci yoonaaya wiira khayaahala wiirannya.—Nwehe niwehero nhina Joau 11:17 no Bíblia de Estudo.
16. Manannani ikapiitulu 11 yolivuru ya Joau cinlipihacaaya waamini wihu inatiri yo wunwelelihiya atthu ookhwa?
16 Ikapiitulu 11 yolivuru ya Joau inaalipihaca waamini wihu wunwelelihiya waatthu ookhwa. Manannani? Muupuwele itthu Yesu yankhuluvelihilyaawe Marta. Uyo enre co: “Mwanrokoraa naahala wunwelela.” (Joau 11:23) Khampa Athumwaane, Yesu ciicammo naapheela ni naakhitiri upanka itthu ikhuluvelihilyaawe. Wunla wa Yesu unthoonyera wiira uyo naapheela ninrimaawe wotheene umaliha ukhwa ni uhuva unniphwanya nlattu wookhweliya. Ciicammo, uwakati Laazaru waakhumalyaawe mmahiye, Yesu ahothoonyera wiira naakhitiri uwunweleliha atthu ookhwa. Vano muupuwele itthu Yesu yaamuupusenryaawe Marta: “Akoohimenrye wiira waaminiki unaahala woona miiriirya ca Nluku?” (Joau 11:40) Hi nihaana isariya yo waamini wiira inatiri ya Nluku inhimya wunwelelihiya waatthu ookhwa wahoolo, khweeliini inaahala wiirannya. Masi isiyani ninlamuliyeehu upanka wiira iyo inatiriiyo itepe unikhalela yokhweeli?
MANANNANI NIWEHERO NO WUNWELELIHIYA ATTHU OOKHWA NINHALAAYA UTEPA UNIKHALELA NOKHWEELI?
17. Isiyani ninlamuliyeehu wuupuwela nasomaka ihantisi cinooluma wunwelelihiya waatthu ookhwa ciri mbiiblyani?
17 Nsome ni nkumihe ukati wiira muupuwele wunwelelihiya waatthu ookhwa ukhumelenle myaakha uttuli. Mbiiblyani ninaaphwanya ihantisi 8 caatthu yunwelelihiye wiira aturuwele ukhala va watuninyani va. g Nnoonela cani nyuuva ukumiha ukati wiira nsome nnyo ihantisinnyo sana-saana. Woopanka commo, muupuwele wiira ayo yaari atthu okhweeli—alopwana, athiyana ni asaana. Ni ntothe wiitthucera itthu nnyo ihantisinnyo. Muupuwele manannani khula ikwaha yunwelelihiyaawe ntthu innikhuluvelihaaya wiira Nluku naapheela ni naakhitiri waaturusela atthu ukumyaaya. Venci-venci, nkumihe ukati wiira nsome muupuwelaka wunwelelihiya urina ifayita cinene: wa Yesu Kristu. Wunwelelihiya wa Yesu wahooniya naatthu enci ni unaanikavihera ulipihaca waamini wihu. Nhiliyale iyo itthwiiyo.—1 Akor. 15:3-6, 20-22.
18. Nnohala uphwanyera cani ifayita icipo cinooluma wunwelelihiya waatthu ookhwa? (Nwehe ciicammo niwehero.)
18 Mwiiwelele ni mwiipe “icipo” cihu cinooluma wunwelelihiya waatthu ookhwa. h (Efesu 5:19) Nnyo iciponnyo cinaalipihaca waamini wihu nno niweherero nomaananno. Mwapankaka commo, nnaahala utepa ukupali wunwelelihiya waatthu ookhwa. Mwiiwelele ni mwiitthuce wiipa nnyo iciponnyo. Nyuuva pooti woopela mwaha moolumo o khula ncipo wuuswalini winyu waamuci. Mweese icipo cotheene mmuru winyu ni wanrimani. Commo, wakhalaka wiira nnawaanana marikariko o muukumini awula akhwaaka ntthu mwanfenteenyu, nnepa wowaarya wa Yehova unaahala wuukaviherani wuupuwela itthu inhimyaaya nnyo iciponnyo ni nyuuva nnaahala ukhalana ikuru ni umaalihiya.
19. Isiyani inlamuliyeehu wuupuwela nhina wunwelelihiya waatthu ookhwa? (Nwehe ikwaaturu “ Nyuuva nnohala waakohani?”)
19 Nvarele nteko moopuwelelweenyu. Yehova numpili wiira nikhitiri wiicuupuwela ninari upeephoni. Anuunwiihu amoca aheera co: “Mi kihoviriha ukati mwinci kuupuwelaka ukumyaaka kinari upheephoni, koonaka unukhela ifoloore citaphuwaka.” Mweemele ni muupuwele mananna cinhalaaya ukhala ukati unhaleehu waacuwela alopwana ni athiyana ookhuluvelya anoolumiya mbiiblyani. Tipani nyuuva oocivenleni uncuwela? Isiyani nyuuva yoocivenleni waakoha? Muupuwele ciicammo mananna cinhalaaya ukhala nyuuva mwaaphwanyaka amuciinyu ni asimpwaniinyu akhwile. Muupuwele khula itthu inhaleenyu uvara mwaaphwanyaka. Itthuni yoopacera inhaleenyu uhimya? Unhala ukhala cani ikwaha yoopacera nnohaleenyu waakapatta ni mananna nyuuva cinhaleenyu utteeliya?
20. Nimpheela ulakela upanka isiyani?
20 Hi ninaasukhurweela venci nikhuluveliho Yehova ninivahilyaawe noowunweleliha atthu ookhwa. Hi pooti wankupaliihu wiira iyo itthwiiyo inaahala wiirannya, kontha Yehova naapheela ni naakhitiri upanka itthu ikhuluvelihilyaawe. Phimaana, nimpheela ulakela ulipihaca waamini wihu nno niweherero nomaananno. Napankaka commo, ninaahala umwaatanana Yehova, Nluku noniirela otheene co: ‘Ntthu nonfenteenyu naahala wunwelela!’
NCIPO 147 A Vida Eterna – Que Bela Promessa!
a Wakhalaka wiira nhokhweliya, woohaanyihacera niweherero no wunwelelihiya atthu ookhwa ninawuumaalihani. Masi nyuuva mwaahala waahimerya cani akhunaninyu itthu inwiirihani ukupali nno niwehereronno? Ni isiyani inlamuliyeenyu upanka wiira nkupaleehe nno niwehereronno? Ula mwahoola umpheela unikavihera otheene cihu hiiva ulipihaca waamini wihu niweherero no wunwelelihiya atthu ookhwa.
b Nno nciponno nineera Estava Aqui Tão Perto ninkumiheriya nhina iporokaraama yo JW Broadcasting yo Novembro yo 2016.
c Joau 11:1 Nlopwana mmoca eehaniya Laazaru anwerennya; uyo aari o Betânia, aliteeya yaakhalaawe Maria nkhayi nimwaamunnawe eehaniya Marta. 2 Uyo phi Maria eetthenle makhura oonukhela mmuru waya Apwiiya Yesu ni aawutacile mannyaaya niikharari cawe; Laazaru aawerennya, aari nyeenyaawe Maria. 3 Phimaana, asirokorawe yahoruma wiira eereliye Yesu co: “Pwiiya, ule nofenteenyu naawerennya.”
d Joau 11:23 Yesu ahomwiirela co: “Mwanrokoraa naahala wunwelela.” 24 Marta woocipwa enre co: “Kihocuwela wiira naahala wunwelela nihuku noomalela.” 25 Yesu ahowiirela:“Thi mi kikhanle wunwelelihiya waatthu ookhwa ni ukumi. Ule nohala ukaamini, hataa akhwaaka naahala ukhala-tho nkumi. 26 Ni otheene ale ari nuukumi ni ankaamini, khanhala ukhwaa-tho. Unaakupali iyo?
e Joau 11:32 Maria uphiya wawe nipuro naaryaawe Yesu ni waamonnyaawe, ahokhoroma uhoolo wawe ni ahomwiirela: “Pwiiya, unari wiira mwahaavo va, mwanrokoraka khaakhwa.” 33 Ukati woonalyaawe wiira uyova ni ayuuta yanveleela yaanawunla, Yesu wahomwiira uthunku ni ahokhala ni masukhuli. 34 Vano Yesu ahokoha: “Munsikhile nipuroni?” Ayo yahomwiirela: “Pwiiya, nweeke mwawooneke.” 35 Ni Yesu ahancera wunla.
f Joau 11:41 Phimaana, nahocusihiya nluku. Woohipica, Yesu ahowusa meetho, uweha wiirimu ni phanceraka wiira: “Paapa, kihoosukhuruni kontha nhokiiwa. 42 Kinnocuwela khweeli wiira munnokiiwelela, masi kipankenle iyo nlattu waatthu arinaaka va, wiira yaamini wiira thinyu nkivelelihile.” 43 Umaliha wawe wuulumaca, ahokhuwela amwiihanaka ule aakhwaale: “Laazaru, ukhumele uno vatyoono!” 44 Nlopwana aakhwaale ahokhuma natthukaciye metto ni matata, ni navilikeleliye ikuwo uwiitho. Yesu aheerela co: “Muntthukulace ni munhiye arwee.”
g Nwehe ikwaaturu “Oito ressurreições registradas na Bíblia” nhina irevista Ukhalenla 1 yo Agosto yo 2015, ipaag. 4, ceekunya.
h Ntothe nnyo iciponnya: “Imagina-te no Paraíso” (Ncipo 139), “Pensa nas Bênçãos de Jeová!” (Ncipo 144), ni “Ele Chamará” (Ncipo 151). Nnya iciponnya ciri nhina ilivuru yocipo Nimwiipele Icipo Yehova Ninrima Wootteeliya. Ntothe ciicammo nnya iciponnya nsayitini jw.org: “Estava Aqui Tão Perto,” “No Mundo Que Aí Vem,” ni “Um Lugar Que Vais Querer Conhecer.”
