MWAHA WOOSOMIYA 19
Nlipihace waamini winyu wonatiri cinooluma ituninya yonaanaano?
“Niireke wiira [Yehova] ahimyaka itthu khampaka?”—MANU. 23:19.
NCIPO 142 A Esperança Que Nos Dá Coragem
NINHALA WIITTHUCANI? a
1-2. Isiyani inlamuliyeehu upanka ukati unweherereehu uwa ituninya yonaanaano?
IKHANLE itthu yoonitteeliha nrima ucuwela wiira Yehova naahala umalamaliha citthu coohiloka co ila ituninya yoohinamaaneela ni uwaana ituninya yophiyaaru inhaleehu ukhala. (2 Pet. 3:13) Hi khanincuwela ukatini ituninya yonaanaano inhalaaya uwa, masi cihaavo citthu cinnithoonyera wiira unhaleela ukati vakaani.—Mat. 24:32-34, 36; Mite. 1:7.
2 Niwehereraka uphiya uyo ukatyuuyo, otheene cihu nihaana nilipihacaka waamini wihu wonatiri cinooluma ituninya yonaanaano, hataa ukhalaka wiira niitthucile ikhweeli phiyaaru awula khalayi. Kontha isiyani? Kontha hataa nikhalanaka waamini woolipa, nuuwakatyaaya nwo waamininwo pooti ulolovaca. Phimaana hataa apostolu Paulu aheera: “Uhaamini ikhanle itampi inaakuva unihapusa.” (Mabere. 12:1) Wiira waamini wihu uhilolovace, nihaana nihihiyereraka wuupuwela citthu cinoonihera wiira uhanle vakaani uphiya ukati unhaleehu ukhala ntuninyani yophiyaaru.—Mabere. 11:1.
3. Ninhala wiitthucani nhina ula mwahoola?
3 Nhina ula mwahoola, ninaahala woona citthu tthaaru ninlamuliyeehu upanka wiira nilipihace waamini wihu wonatiri ca Yehova cinooluma ituninya yonaanaano: (1) Wuupuwela woopoliya wihu, (2) wuupuwela ikuru ca Yehova ni (3) uvara miteko co mminepani. Ciicammo, ninaahala woona manannani itthu Yehova yanhimenryaawe Habakuki cinlipihacaaya waamini wihu ilelo. Masi, woopacera ninaahala woona wiira nihaana nilipihacaka wamini wihu wonatiri cinooluma ituninya yonaanaano, wiira nikhitiri uvilela masakha moolupale anniphwanya ilelo.
UKATI NINLAMULIYEEHU UKHALANA WAAMINI WOOLIPA
4. Nihaana nikhalanaka waamini woolipa ukati woolakela upanka citthuni?
4 Mahuku otheene hiiva nihaana nilakelaka upanka citthu, cihaavo citthu cuulupale ni cankaani. Ni itthu inhala unikavihera ulakela citthu comaana, ukhanle ukhalana waamini woolipa. Wootakihera, mahuku otheene nihaana nilakelaka itthu yoohala upanka, nhina apatthani, mathukelo, usoma, uthelanaca, asaana ni nteko. Waanareera wiikoha co: ‘Kiireke wiira citthu kinlakelaaka upanka cinawoonihera wiira kinaakupali wiira ila ituninyeela inhala vakaani umalamalihiya, ni woohipica inaahala uwa ituninya yonaanaano? Awula kimpaka citthucaka khampa atthu anoopuwela wiira khawankitirya ukhalana ukumi woohimala?’ (Mat. 6:19, 20; Luka 12:16-21) Nalipihacaka waamini wihu wiira ituninya yonaanaano ihanle vakaani uwa, ninaahala uthanla upanka citthu comaana.
5-6. Kontha isiyani nihaana nikhalanaka waamini woolipa yaniphwanyaka masakha? Ntakihere.
5 Hiiva ciicammo, nihaana nikhalanaka waamini woolipa wiira nikhitiri uvilela masakha. Atthunaka ninaalupatthiya, ihoniphwanya iretta yuulupale awula ihonikhumelela itthu ikhwaawe yoniripiha nrima cinene. Wiipaceroni, hiiva pooti wuupuwela wiira ninaahala ukhitiri uvilela ayo masakhaayo. Masi yakhalaka wiira unaavira ukati mwinci woohimala masakha anikhumelenle ni anaanikhumelela ikwaaha cinci, nihaana nikhalanaka waamini woolipa wiira nikitiri uvilela ni uhihiya unswalela Yehova kunitteelaka nrima.—Aroo. 12:12; 1 Pet. 1:6, 7.
6 Yanikhumelelaka masakha, hiiva pooti wuupuwela wiira ituninya yonaanaano Yehova khuluvelihilyaawe khinhala uwa-tho. Niireke wiira iyo itthwiiyo inoonihera wiira waamini wihu khulipile? Mena. Muupuwele ila itthwiila: Nakhalaka iriyaryaaya ilimwe, nyuuva pooti wuupuwelaka wiira khinhala urupa-tho ipula, masi khweeliini iyo inaahala urupa. Inanna imocaaru, hiiva nakhalaka ooripiya nrima pooti wuupuwela wiira ituninya yonaanaano Nluku khuluvelihilyaawe khinhala uwa. Masi wakhalaka wiira waamini wihu uholipa cinene, ninaahala ukupali wiira inatiri ca Nluku cinaahala wiirannya. (Isaa. 94:3, 14, 15; Mabere. 6:17-19) Naaminiki iyo itthwiiyo, khaninhala uhiya uhoolelihera muukumini wihu umwiwelela Yehova.
7. Moopuweleloni ohinamaana anlamuliyeehu unyema?
7 Hiiva ciicammo, nihaana nikhalanaka waamini woolipa wiira nilalye ihapari comaana. Atthu enci anaalalyeereehu anoona wiira ihapari comaana cinooluma ituninya yonaanaano cikhanle citthu comaana paahi cinlalyeereehu, masi khacinakhala ikhweeli. (Mat. 24:14; Ezek. 33:32) Masi hi khaninlamuliya uhiyerera wiira moopuwelelwaaya ayo atthwaayo anihapuse. Wiira ninyeme uhapusiya ni itthu inoopuwelaaya ayo atthuwaayo, nihaana nihihiyaka ulipihaca wamini wihu. Nttwee noone mananna mararu anlamuliyeehu ulipihaca wamini wihu.
MUUPUWELE WOOPOLIYA WIHU
8-9. Kontha isiyani wuupuwela cinene woopoliya wihu unaalipihaca waamini wihu?
8 Inanna imoca yoolipihaca waamini wihu, ukhanle wuupuwelela woopoliya wihu. Woopoliya wihu ni Nluku unoonihera wiira uyo naahala wiirannyeeha citthu cotheene cikhuluvelihilyaawe. Wuupuwela nlattuni Yehova nvahalyaawe mwanawe wiira aakhwe ni anoopole, ni wuupuwela citthu cotheene Yehova caalevilyaawe nlattu wo iyo itthwiiyo, unaahala ulipihaca waamini wihu wiira inatiri ipankalyaawe yoonivaha ukumi woohimala ntuninnyani yonaanaano, inaahala wiirannya. Nlattuni waneereehu commo?
9 Wiira Yehova anoopole, uyo ahonveleeliha mwanawe nonfentaawe cinene wiira ayariye khampa pinaatamu oohipahuwa va watuninnyani va. Ni uwakati Yesu waaryaawe va watuninnyani va, yaahonkhumelela masakha oorika. Wahoolo, uyo ahokhwa ni mananna oowerya, khweeliini ukhwa wa Yesu wahonwerya cinene Yehova. Nlukwiihu oofenta khaahala unhiya mwanawe uhuvihiya ni wiiviya wiira hiiva nikhalane ukumi wooreera wo myaakha vakaani paahi. (Joau 3:16; 1 Pet. 1:18, 19) Ukhala wiira Yehova wahonwerya cinene wiiviya wawe Yesu, iyo inoonihera wiira uyo naahala upanka yotheene inkhitiryaawe wiira hiivano nakhalane ukumi woohimala ntuninnyani yonaanaano.
MUUPUWELE IKURU CA NLUKU
10. Toko cinthoonyeraaya Efesu 3:20, Yehova haana ikuru wiira apanke isiyani?
10 Itthu yonayeeli inhala unikavihera ulipihaca waamini wihu, ukhanle wuupuwela ikuru ca Yehova. Uyo haana ikuru wiira apanke citthu cotheene cinkhuluvelihaawe. Khweeliini, ukumi woohimala ntuninyani yonaanaano pooti ukhala itthu yoohikhitiryaa moonelwaaya apinaatamu. Masi ikwaha cinci, Yehova naakhuluveliha upanka citthu apinaatamu cihinkhitiryaaya upanka, kontha uyo khanle Nakuru-Cotheene. (Jó 42:2; Mark. 10:27) Vano niireke inaahala ukhala isariya uweherera wiira inatiri cimpankaawe Nluku cikhaleke citthu cinkhitiryaaya upanka apinaatamu?—Nsome Efesu 3:20. b
11. Nttonkace inatiri ca Nluku ceerannyeele, masi caakhanle khampa khacaahala wiirannya maweherwaaya apinaatamu. (Nwehe ikwaaturu ineera: “ Inatiri cuulupale ciirannyaale.”)
11 Nttwee noone inatiri Yehova caapankenlyaawe apoovwaawe khalayi ni caakhanle khampa khacaahala wiirannya. Uyo ahonkhuluveliha Aparahaamu ni Sara wiira yanhala unnyara mwaana, hataa ukhalaka wiira yahooluvala. (Upha. 17:15-17) Uyo ciicammo aheera wiira anhala uvaha ucuulu wa Aparaahumu ilapo yo Kanaa. Iyo inatiriiyo yaakhala khampa khayaahala wiirannya, kontha asarayeli, yaari ucuulu wa Aparahaamu, yahokhala myaakha cinci anari ipottha Wiciipitu. Masi iyo inatiriiyo yaheerannya. Uvira waya myaakha cinci, Yehova aheera wiira apwiyawe yeehaniya Elisapete yanhala unnyara mwaana. Yehova ciicammoo ahokhuluveliha wiira Maria, nthiyana mwaaruusi, anhala unnyari mwaana a Nluku ni iyo itthwiiyo yanhala wiirannyeeha inatiri yaapankilyaawe myaakha cinci uttuli, ujardim yo Eeteni!—Upha. 3:15.
12. Nnya iveerusunnya: Josuwe 23:14 ni Isaiya 55:10, 11 cinthoonyera cani ikuru ca Yehova
12 Noopuwelaka mananna Yehova ciirannyeehalyaawe inatiri cawe, waamini wihu wiira naahala uwaana ituninya yonaanaano unaatepa ukhala woolipa. (Nsome Josuwe 23:14; Isaiya 55:10, 11. c) Ala manannaala, ninaahala utepa ukhala owiitthenkaceene wiira naakavihere akhwiihu ucuwela wiira ituninya yonaanaano khinakhala ithele, masi ikhanle itthu yokhweeli. Aacaka ituninya yonaanaano ni irimu yonaanaano cinhala uwa, Yehova aheera co: “Ala moolumwaala akhanle ookhuluvelya ni akhanle okhweeli.”—Apoka. 21:1, 5.
MWIIKURUMICE UVARA MITEKO CO MMINEPANI
MIKUTTHAANO CO WANLOKONI
Cinaanikavihera ulipihaca waamini wihu (Nwehe iparaagarafu 13)
13. Manannani mikutthaano cinlipihacaaya waamini wihu?
13 Itthu yoneeraru inhala unikavihera ulipihaca waamini wihu ukhanle wiikurumica uvara miteko co mminepani. Wootakihera, muupuwele mikutthaano co wanlokoni. Arokorihu amoca aneehaniya Anna d avirihile myaakha cinci yakaviheraka nimananna oovirikana nteko wowiivahereriya ukati wotheene, aheera co: “Mikutthaano cinaalipiha waamini waka khampa nankura. Hataa ukhalaka wiira munna notaphulela mwaha unanrika utaphulela mwahooyo awula hataa ukhalaka wiira khiivo itthu yonaanaano ineetthucihaawe, khula ukati inaakhalaka itthu inkikavihera wiiweeha Ibiiblya ni inlipihaca waamini waka.” Hiiva ciicammo, waamini wihu pooti ukhala woolipa neewelelaka ikomentaariyu cinvahaaya mayamunneehu umikutthaanoni.—Aroo. 1:11, 12; 10:17.
NTEKO WOOLALYEERA
Unaanikavihera ulipihaca waamini wihu (Nwehe iparaagarafu 14)
14. Manannani nteko woolalyeera cinlipihacaaya waamini wihu?
14 Uvara nteko woolalyeera ciicammo unaalipihaca waamini wihu. (Mabere. 10:23) Arokorihu aneehaniya Barbara avirihile myaakha coovikana 70 yanswalelaka Yehova aheera: “Moonelwaaka, uvara nteko woolalyeera ikhanle itthu inlipihaca waamini waka. Keekurumicaka waahimerya akhwaaka inatiri comaana ca Yehova, waamini waka unaatepa ukhala woolipa.”
USOMA WO VEEKHA
Unaanikavihera ulipihaca waamini wihu (Nwehe iparaagarafu 15)
15. Manannani usoma wo veekha cinlipihacaaya waamini wihu? (Nwehe ciicammo ilatarato.)
15 Itthu ikhwaawe inlipihaca waamini wihu, ukhanle usoma wo veekha. Arokorihu aneehaniya Susan unawaacivela upanka iporokaraama yo mahuku unhalaaya usoma, ayo aheera co: “Itominku, miiva kintthenkacaka irevista Ukhalenla yosumana inweeyo. Nihuku nookeliya nteko ni nameeli, mi kintthenkaca mikutthaano co weeriyari isumana ni mahuku makhwaawyaayo phi mahuku ampankaaka usoma wo veekha Ibiiblya.” Nlattu woopanka iporokaraama yo mahuku ansomaaya, anuunu Susan anaakhitiri ulipihaca waamini waya. Arokorihu aneehaniya Irene, avirihile myaakha cinci avaraka nteko nipuro ninhooleliyaaya miteko cihu ntuninyani motheene, aneera wiira usoma inatiri co mbiiblyani unaalipihaca waamini waya. Ayo aheera: “Mi kinaakhala ootikinihiya koonaka inatiri ca Yehova cineerannyaaya hataa nhina citthu cankaani caahimiye.” e
“KHWEELIINI INAAHALA WIIRANNYA”
16. Nlattuni nineereehu wiira itthu Yehova yanhimenryaawe Habakuki innaca hiiva ilelo? (Nwehe Maberewu 10:36, 37.)
16 Aswali akhwaawe a Yehova anaaweherera umalamalihiya ila ituninyeela ukhuma nenne nokhalayi. Mawehero aapinaatamu pooti ukhalaka toko wiira inatiri ca Nluku cinaapica wiirannya, masi Yehova naacuwela mananna aswalyaawe cineecoonaaya. Ni khalayi, uyo ahomwiirela co porofeera Habakuki: “Iwooni nanlelo khunaphiya ukatyaaya. Iyo inawaakuva wiira iphiye wuumaleloni waya, ni khinhala wootha. Hataa ipicaka, uhihiye uweherera! Kontha khweeliini inaahala wiirannya. Khinhala ucerewa!” (Habak. 2:3) Niireke wiira Yehova oolumile iyo itthwiiyo wiira ammaalihe paahi Habakuki? Awula oolumile ayo moolumwaayo wiira anikavihere hiiva ciicammo? Apostolu Paulu ahorumiya ni Nluku wantikha itthu inoonihera wiira ayo moolumwaayo ciicammo anwaaca makristau anweherera ituninya yonaanaano. (Nsome Maberewu 10:36, 37. f) Phimaana, hataa ukhalaka wiira hiiva ninawoona upica wiirannya inatiri ca Nluku, iyo inatiriiyo khweeliini inaahala wiirannya. Khinhala ucerewa!
17. Manannani arokorihu cineettelaaya ikano Yehova yanvahilyaawe Habakuki?
17 Mayamunna enci ahoviriha myaakha cinci yeettelaka ikano ya Yehova inhimya wiira hiiva nihaana nikhalaka atthu ooweherera. Wootakihera, arokorihu aneehaniya Louise, yancenre uswalela Yehova mwakha wo 1939. Ayo aheera: “Ule ukatyuule mi koopuwela wiira ikhotto yo Harmacetom, yaahala uwa kihinamaliha usoma icikola, masi iyo itthwiiyo khayeerannyeele. Itthu inkikavihera myakha cotheene civinre ukhanle usoma ihantisi co mbiiblyani cinwuuluma atthu yanweherenre Yehova wiirannyeeha inatiri cawe toko Nowee, Aparahaamu, Yusufu ni atthu akhwaawe. Uhihiya uweherera unaakikavihera ni unawaakavihera akhwaaka ukhuluvela wiira ituninya yonaanaano iri wakhiviru.” Khweeliini, mayamunna anonswalela Yehova ikhumelo nenne nokhalayi anaakupaleela ayo moolumwaayo.
18. Manannani uweha citthu cowumpiya cinlipihacaaya waamini wihu wiira ituninya yonaanaano inaahala uwa?
18 Ninaacuwela wiira ituninya yonaanaano ilelo khiivo. Masi nkoopuwelani citthu cirivo ni cinooneehu, toko itthonttwa, miri, inama ni atthu. Khaavo ntthu novaanyiha wiira nnyo citthunnyo cihaavo. Masi uhaavo ukati wahaarivwaaya. Unookhalaru wiira khacaarivo, ilelo nnyo citthunnyo cihaavo ni hiiva ninnoona, kontha Yehova humpa. (Upha. 1:1, 26, 27) Nlukwiihu hokhuluveliha uwaana ituninya yonaanaano ni uyo naahala upanka iyo itthwiiyo. Iyo yeerannyaaka, atthu anaahala ukhalana ukumi womaana mpaka. Waphiyaka ukati Yehova ulakenlyaawe, ituninya yonaanaano inaahala ukhala itthu yokhweeli, khampa citthu cotheene cirivo ni cinooneehu.—Isai. 65:17; Apoka. 21:3, 4.
19. Manannani cinhaleenyu ulipihaca waamini winyu?
19 Ukati unweherereehu uwa ituninya yonaanaano, nihaana niikurumicaka upanka yotheene inkhitiriihu wiira nilipihace waamini wihu. Nsukhurweele woopoliya wihu, muupuwele ikuru ca Yehova ni nhihiye wiikurumica uvara miteko co mminepani. Mwapankaka commo, nyuuva nnaahala ukhala nkhayi naale “anaakhela itthuvo cikhuluvelihiye nlattu wo waamini ni nlattu woovilela waya.”—Mabere. 6:11, 12; Aroo. 5:5.
NCIPO 139 Imagina-te no Paraíso
a Atthu enci ilelo, khankupali inatiri cinooluma ituninya yonaanaano. Ayo atthwaayo anoopuwela wiira nnyo inatirinnyo cikhanle ithele cooreera cinttonkaciya paahi, cihikhanle ikhweeli. Masi hiivano, ninaakupali wiira inatiri cotheene cinaahala wiirannya. Uhookhalaru commo, nihaana niikurumicaka wiira waamini wihu nnyo inatirinnyo uhihiye ukhala woolipa. Ninhala ukhitiri cani ulipihaca waamini wihu? Ula mwahoola unaahala waakhula.
b Efesu 3:20 Ni ule, niikuru Cawe nvara nteko nhina wihu, pooti upanka citthu cuulupale cinene coopwaha khula itthu inkhitiriihu wuupuwela.
c Josuwe 23:14 Vano, mi kinhala vakaani ukhwa, ni nyuuva nnaacuwela sana-saana ninrimeenyu wotheene ni niiroohweenyu yotheene, wiira nhina citthu comaana cotheene caakhuluvelihilyaawe Yehova, Nlukweenyu, khanivo nanka nuulumo nimoca nihiirannyeele. Citthu cotheene cihowiirannyeelani. Khiivo nanka itthu ihiirannyeele. Isaiya 55:10 Kontha, toko ipula ni ukame cinkhuruwaaya wiirimu ni cihinturuwelaaya wiirimu cihinaaya umicera itthaya ni umeliha icoolya, caavahaka ipyo ale anaala ni waavaha iyoolya ale anlya, 11 co phinhalaaya ukhala nuulumo ninkhuma wamalakuni waka. Khaninhala ukihokoleela woohiitthu, masi ninaahala upanka ile ikicivenle Ni ninaahala upanka irumenlyaaka.
d Macina makiina ahaakakhanihiya.
e Nyuuva pooti uphwanya myaha cinci cinooluma inatiri co mbiiblyani nipuro nantikhiye “Profecias” nhina Índice das Publicações da Torre de Vigia. Wootakihera, nwehe mwaha uneera “O que Jeová prediz se cumpre” nrevistani Ukhalenla 1 yo Janeiro yo 2008.
f Maberewu 10:36 Nyuuva nhaana nvilelaka, wiira mwapankaka intthunaawe Nluku, mwaakhele itthu ikhuluvelihiyeenyu. 37 Ni “unhaleela ukati vakaani paasi,” ni “ule nowa naahala uwa ni khanhala upicapica.”
