Nlamulo nihimiye nhina Deuteronomiyu 22:25-27 khaninapheela uthoonyera wiira nlopwanooyo haana isariya awula mena, kontha waanawoonannya wiira uyo hottheka. Nlamulo nihimiye nhina nnyo iveerusunnyo nimpheela woonihera isariyaawe nthiyanooyo. Nttwee niiweehe mwaha wotheene.

Iveerusu coopacera cimmuuluma nlopwana nonrupanaca “nsittatti” nthiyana pakaneliye. Nlattu woopanka iyo, uyo nlopwanooyo heetta uluva, kontha nthiyana pakaneliye aaweheriya khampa ootheliya. Vano nthiyanooyo? Iveerusu ineera wiira nthiyanooyo khakhuwale. Unari wiira ahokhuwa, atthu akhwaawe yaanahala umwiiwa ni yanaahala urwaa umwaakiha. “Mwanthiyanooyo, nlattu woohikhuwela,” ciicammo aheetta uluva; kahi paahi nlopwanooyo.—Deut. 22:23, 24.

Masi wakhalaka wiira nthiyana hopanka ile ihimiye nhina Deuteronomiyu 22:25-27, uyo nlattuuyo waahukhumwiya ni mananna makiina. Iyo ineera: “Masi, wakhala wiira nlopwanooyo mphwanyale utakhwani mwaaruusi aapakaneliye, honkhitiri ni honrupanaca, nlopwana nrupanacalyooyo paahi phinlamuliya wiiviya; uhimpake itthu mwaaruusi. Mwaaruusi khavarale itampi wiira eeviye. Ula nlattuula unaalatanaca ni nlattu wa nlopwana nonkhumela nkhunanaawe ni nomwiiva. Kontha mphwanyale utakhwani, ni mwaaruusi aapakaneliye hokhuwa, masi khaarivo ntthu oomwaakuvela.”

Yakhumelelaka iyo, masuwiisi yoolumacera nlattu yaanankhuluvela nthiyanooyo. Toko cani? Waanaakupaliya wiira uyo ‘ahokhuwa, masi khaarivo ntthu oomwaakuvela.’ Phimaana, uyo kheettale uluva. Masi nlopwanooyo aanaahukhumwiya nlattu wontuphela nthiyana ni nlatttu woweetta uluva, kontha uyo ‘ahonkhitiri mwaaruusi aapakaneliye ni ahonrupanaca.’

Phimaana, hataa ukhalaka wiira nno nlamulonno naahoolelihera uthoonyera isariyaawe nthiyana, nlamulo khaninvonya neeraka wiira nlopwanooyo hottheka nlattu wontuphela nthiyana ni woweetta uluva. Pooti wankupaliihu wiira masuwiisi yaanaahala ‘utotha ratta-raatta ucuwela mwahooyo’ ni yaanaahala uhukhumu yattharaka ikettelo cowoonannya caavahalyaawe Nluku imaara cinci.—Deut. 13:14; 17:4; Nkw. 20:14.