1-2. Toko Angelito, isiyani khula ntthu inlamuliyaawe upanka?

WEEVA ukhanle mwaana o Masaahiti a Yehova? Wakhala, wuupuwele wiira ukhalana upatthani ni Yehova, khinakhala itthu inyarelaniyeehu naasithumwanihu. Hataa ukhalaka wiira asithumwanihu ananswalela Yehova awula mena, otheene cihu nihaana niikurumicaka ukhalana upatthani ni Yehova.

² Woone ntakihero na munneehu mmoca neehaniya Angelito. Amucyaawe otheene yaari Masaahiti a Yehova. Masi, ukati waaryaawe mwanhima, Angelito kheecoona umphiyeera Nluku. Uyo naahimya: “Mi kanswalela Yehova nlattu wowaatakiha amucyaaka paahi.” Masi uyo aholakela uviriha ukati mwinci asomaka Ibiiblya ni oopuwelaka citthu caasomaawe, ciicammo aholakela ulompa cinene. Isiyani yeetthucalyaawe? Angelito naahimya: “Kaheetthuca wiira itthu imoca paahi inhala ukikavihara waaphiyeera Apaapaaka Yehova, ukhanle wiikurumica veekha caka waacuwela ratta.” Yankhumelenle Angelito inaakumihaca makoho moolupale: Ucuwela citthu vakaani ca Yehova unvirikana cani nuncuwela ratta? Ni isiyani ninlamuliyeehu upanka wiira nincuwele Yehova?

3. Unvirikana cani ucuwela citthu vakaani ca Yehova nuncuwela ratta?

³ Ntthu pooti wuupuwela wiira nancuwela Yehova nlattu wowiitthuca ncina nawe ni citthu vakaani cuulumalyaawe awula cipankalyaawe. Masi cihaavo citthu cikhwaawe cinlamuliyeehu upanka wiira nincuwele Yehova ratta. Nihaana nikumihaka ukati wiira niitthuce myaha cawe ni makhalelwaawe omaana. Napankaka iyo, phinhaleehu wancera ucuweleeha isiyani imwiirihale Yehova wuuluma awula upanka citthu. Iyo inaahala unikavihera ucuwela wakhala wiira Yehova cinancivela citthu cinoopuweleehu, cinlakeleehu ni cimpankeehu. Nacuwelaka itthu Yehova impheelaawe  wiira nipanke, nihaana weettela itthu yiitthucaleehu.

4. Kontha isiyani usoma matakihero aatthu o mbiiblyani pooti unikavihera?

⁴ Atthu akhwaawe atthunaka pooti unitarawa nlattu hiiva woopheela unswalela Yehova. Ni ayo pooti utepa unitarawa nanceraka urwaa umikutthaanoni. Masi nankhuluvelaka Yehova, uyo khanhala unihiya. Ni unkhuluvela Yehova phinhala ulipihaca upatthaniihu nuuyova wiira uhimale. Niireke hiiva khweeliini pooti ukhitiri uncuwela Yehova ratta ni ukhala apatthannyaawe? Iyee, pooti ukhitiri! Ni toko cinhaleehu wiitthuca nhina ula mwahoola, matakihero aatthu oopahuwa, toko Moocesi ni mwene Davidi, anaathoonyera wiira hiiva pooti ukhitiri iyo. Ninaahala waakhula makoho meeli: Ayo alopwana ookhuluvelyaayo, awaale cani yancuwelaka Yehova? Ni isiyani hiiva ineetthuceehu ni ntakihero naya?

5. Isiyani Moocesi yaathanlalyaawe?

⁵ Moocesi ahothanla unswalela Nluku. Ukati waarinaawe myaakha 40, Moocesi ahothanla ukhala mphantte wo apoovu a Nluku, maberewu, uhiya ucuweliya khampa “mwaana a mwanawe Farawoo.” (Mabere. 11:24) Uyo aholeva ukhala ntthu oottitthimihiya. Nlattu wowaakavihera maberewu, yaakhalihiye ipottha Wiciipitu, Moocesi aanaahala unvirusa cinene Farawoo—nhooleli muulupale atthu o Wiiciputu yaamoonaaya ukhala khampa nluku. Iyo inthoonyera wiira Moocesi khweeliini ahaana waamini woolipa! Uyo ahonkhuluvela Yehova. Ni ukhuluvela waarinaawe phaalipihacale upatthannyaawe ni Yehova; upatthani waakhanle muukumini wawe motheene.—Miru. 3:5.

6. Nineetthuca isiyani ni ntakihero na Moocesi?

⁶ Nineetthuca isiyani? Toko Moocesi, otheene cihu nihaana nithanlaka unswalela Nluku ni ukhala mphantte waapoovwaawe awula mena. Wakhala wiira nimpheela unswalela Nluku, nihaana niikurumicaka. Ni pooti ukhala wiira atthu ahinoncuwela Yehova anaahala unirukunuwela. Masi naakhuluvelaka Yehova, Apaapeehu owiirimu, uyo khanhala unihiya veekha!

7-8. Isiyani Moocesi yahaahiilyaawe wiitthuca?

⁷ Moocesi khaahiile wiitthuca makhalelo a Yehova ni upanka impheelaawe Yehova. Wootakihera, ukati Yehova wanrumalyaawe Moocesi urwaa waataphula asarayeli yaakhalihiye ipottha Wiciipitu, Moocesi ahoova ni ahomwiirela Yehova imaara cinci wiira kheecoona uhala ukhitiri upanka itthu yaarumiyaawe. Yehova ahonthoonyera uthunku Moocesi, awula, ahocuwela itthu yaamwiira ni ahonkavihera. (Nkw. 4:10-16) Moocesi aakhanle cani? Uyo ahokhitiri upanka itthu yaapheelaawe Nluku ni ahonveleelihera ihapari cohukhumu Farawoo, nlopwana atthu yaamoonaaya ukhala khampa nluku. Ni wahoolo, Moocesi ahomoona Yehova avarelaka nteko ikuru cawe ukati waawooponlyaawe asarayeli ni wammalamalihalyaawe Farawoo ni anatoropaawe u Mar Vermelho.—Nkw. 14:26-31; Isaa. 136:15.

⁸ Anataphuliyeene Wiciipitu, asarayeli khayaahiile uttekutta. Hataa ukhalaka commo, Yehova ahothoonyera uvilela; ni Moocesi ahoona iyo. (Isaa. 78:40-43) Moocesi ciicammo ahomoona Yehova athoonyeraka wiiyeviha venci ukati wanlepenlyaawe wiira hiwiivakace asarayeli, ni woonalyaawe wiira Yehova ahopanka itthu yanlepenlyaawe.—Nkw. 32:9-14.

9. Toko cinthoonyeraaya Maberewu 11:27, upatthani wa Moocesi ni Yehova waari manannani?

⁹ Uvira waya uyo ukatyuuyo, upatthani wa Moocesi ni Yehova waholipa venci, mpaka wahokhala khampa Moocesi aanaawoona Athumwaane owiirimu, Yehova. (Usome Maberewu 11:27.) Ibiiblya, ithoonyeraka mananna  caakhanlyaaya woolipa upatthani wa Moocesi ni Yehova, ineera co: “Yehova aanaamuulumana Moocesi co ni co, toko pinaatamu cimmuulumaawe pinaatamu nkhunanawe.”—Nkw. 33:11.

10. Isiyani ninlamuliyeehu upanka wiira nincuwele Yehova ratta?

¹⁰ Nineetthuca isiyani? Wiira nincuwele Yehova ratta, khaninlamuliya paahi wiitthuca makhalelwaawe. Nihaana ciicammo napankaka itthu impheelaawe. Impheelaawe Yehova phiila: “mpheela wiira atthu okhapila cotheene yoopwe ni acuwele ikhweeli.” (1 Tim. 2:3, 4) Ni inanna imoca yoopanka itthu impheelaawe Yehova ukhanle uwiitthuciha akhwiihu myaha cawe.

11. Nlattuni uneereehu wiira nawiitthucihaka akhwiihu myaha ca Yehova, hiiva ciicammo ninaatepa uncuwela ratta?

¹¹ Imaara cinci, nawiitthucihaka akhwiihu myaha ca Yehova, hiiva ciicammo ninaatepa uncuwela ratta. Wootakihera, ninawoona uthunku wa Yehova ukati unnikaviheraawe waaphwanya ale ampheela ukhala apatthannyaawe. (Joau 6:44; Mite. 13:48) Ninawoona ikuru co Nuulumo na Nluku nawoonaka atthu anaasomiheehu Ibiiblya yahiyaka upanka citthu coohinamaana ni yanceraka uthoonyera makhalelo o phiyaaru. (Akol. 3:9, 10) Ni ninawoona uvilela wa Nluku namoonaka aavahaka ukati atthu enci o ncoko unlalyeerehu wiira ancuwele ni yoopwe.—Aroo. 10:13-15.

12. Toko cinthoonyeraaya Nkwaha 33:13, isiyani Moocesi yanlepenlyaawe Nluku, ni nlattuni waalepenlyaawe iyo?

¹² Moocesi aanaavaha ifayita cinene upatthannyaawe ni Yehova. Hataa ukhalaka wiira ahokaviheriya ni Nluku upanka citthu cinci cootikhiniha, Moocesi ahonlepela Yehova niihisima wiira ankavihere uncuwela ratta. (Usome Nkwaha 33:13.) Moocesi aarina myaakha coopwaha 80 ukati waalepenlyaawe uncuwela Yehova ratta. Uyo aanaacuwela wiira nanlelo ahaana eetthucaka citthu cinci ca Athumwane o wiirimu.

13. Inannani imoca ninthoonyereehu wiira ninaavaha ifayita upatthaniihu ni Nluku?

¹³ Nineetthuca isiyani? Hataa ukhalaka wiira nancenre unswalela Yehova khalayi, nihaana nivahaka ifayita ni uwacera upatthaniihu ni Yehova. Ni inanna imoca yoopanka iyo, ukhanle umuulumana Yehova ninlompaka.

14. Kontha isiyani ulompa ikhanle itthu yofayita inhala unikavihera uncuwela ratta Nluku?

¹⁴ Wapheelaka ukhalana upatthani woolipa ni ntthu, weeva uhaana uhihiya umuulumana. Phimaana, uhihiye unlompa Yehova ni uhoove unhimyera citthu cinoopuwelaa ni cinwiira wanrimani. (Efesu 6:18) Nrokorihu mmoca nkhala u Turquia, neehaniya Krista, neera: “Khula ukati kimmuulumanaaka Yehova kinhimyeraka citthu cinoopuwelaaka ni koonaka wiira uyo naakikavihera, kinaatepa unfenta ni unkhuluvela. Ilelo, kinonwehera Yehova khampa Apaapaaka ni mpatthannyaaka.”

15. Isiyani Yehova ihimyalyaawe amwaacaka Davidi?

¹⁵ Mwene Davidi oonuwenle nlaponi ya atthu yanswalela Yehova Nluku. Masi uyo khathanlale unswalela Yehova nlattu wowaatakiha amucyaawe awula atthu yaakhalanaawe. Davidi ahaana upatthani woolipa ni Nluku, hataa phimaana Yehova aananfenta cinene. Yehova mwaneene aheera wiira Davidi aari ‘nlopwana antteeliha nrima.’ (Mite. 13:22) Davidi aawaale cani akhalanaka upatthani woolipa ni Yehova?

16. Isiyani Davidi yeetthucalyaawe ukati waawehaawe citthu cowumpiya?

¹⁶ Davidi ahoncuwela Yehova ukati waawehaawe citthu cowumpiya. Ukati Davidi waaryaawe mmirawo, uyo aanaakhala woonene ukati mwinci awaceraka ikhontwaa ca athumwane. Atthunaka uyo phuukati Davidi wancenryaawe wuupuwela cinene citthu Yehova cumpalyaawe. Wootakihera, ukati Davidi  waawehaawe wiirimu, uyo khoona paahi itthonttwa, masi ciicammo aanawoona makhalelwaawe ule ompale nnyo citthunnyo. Mpaka Davidi ahantikha eeraka: “Irimu cinaalalya uttitthima wa Nluku, cinaalalya nteko uvanryaa ni matataa.” (Isaa. 19:1, 2) Ni ukati Davidi woopuwelaawe mananna ootikhiniha cumpiyaaya apinaatamu, aanaakhitiri woona ucuwelaca wa Yehova. (Isaa. 139:14) Ukati Davidi waakhalaawe oopuwelaka citthu cotheene Yehova cumpalyaawe, uyo aanawiicoona uyeva eelattanihaka ni Nluku khanle nkhulupale.—Isaa. 139:6.

17. Isiyani ineetthuceehu noopuwelaka citthu cumpalyaawe Yehova?

¹⁷ Nineetthuca isiyani? Uciveliye ni citthu cumpalyaawe Nluku. Uhuutteele nrima paahi nlattu wookhala ntuninyani yooreera yumpalyaawe Nluku. Ukumihe ukati wiira woone citthu cowumpiya ni utikhinace nnyo citthunnyo. Khula nihuku, woonaka citthu cowumpiya—toko miri, inama ni atthu—wuupuwele cinwiitthuciha cani makhalelo a Yehova. Wapankaka commo, khula nihuku unaahala wiitthuca citthu cinci ca Apaapaa onifento. (Aroo. 1:20) Ni unaahala woona wiira nifento naa ni Yehova ninaavira nitepaka ulipa.

18. Toko cinthoonyeraaya Isaalimu 18, isiyani Davidi yaakupalyaawe?

¹⁸ Davidi aanaakupali wiira Yehova phankavihera. Wootakihera, Davidi ahokhikicera ikhontwaa ca athumwane wiira cihikhuuriye ni kharamu, ciicammo niinama ineehaniya urso. Uyo ukatyuuyo, Davidi ahokupali wiira aakhitinri wiiva cile inama cile nlattu wookaviheriya ni Yehova. Ukati wantthemalyaawe natoropa oorekama eehaniya Koliyasi, Davidi ahoona ratta-raatta wiira Yehova phaamweettihera. (1 Sam. 17:37) Ni waakhitinryaawe woopwa ukati waalupatthiyaawe ni mwene nanttima Sawuli, Davidi ahocuwela wiira oopoliye ni Yehova. (Isaa. 18, moolumo ooculu ikapiitulu) Unari wiira Davidi aari nlopwana owiicoona, uyo aanaahala upheela waaminakaciya nlattu wo citthu caakhitinryaawe upanka. Masi Davidi aari ntthu owiiyeviha ni aanaakupali wiira Yehova phankavihera muukumini wawe.—Isaa. 138:6.

19. Isiyani ineetthuceehu ni ntakihero na Davidi?

¹⁹ Nineetthuca isiyani? Khuntosa paahi unlepela Yehova wiira anikavihere. Nihaana ciicammo nihiitthaalaka wiira noone ukatini ni manannani cinnikaviheraawe. Wakhala wiira hiiva naatthu owiiyeviha, ninaahala woona wiira cihaavo citthu cihinkhitiriihu veekha cihu ni wiira Yehova naanikavihera upanka citthu cihinkhitiriihu. Ni khula ukati unhaleehu umoona Yehova anikaviheraka, upatthaniihu ni uyo unaahala utepa ukhala woolipa. Munna mmoca nkhala u Fiji ni nonswalela Yehova ukhuma nenne no khalayi neehaniya Issac, ahooneeha wiira iyo ikhanle ikhweeli. Uyo naahimya: “Koopuwelaka uttuli, kinawoona wiira Yehova hokikavihera ukhuma ukati wancenryaaka usoma Ibiiblya mpaka nna va. Nlattu wo iyo, kimmona Yehova ukhala eekhweeli muukumini waka.”

20. Isiyani yankavihenre Davidi ukhalana upatthani womaana ni Yehova ni iyo inniitthuciha isiyani?

²⁰ Davidi hotakiha makhalelo a Yehova. Yehova numpale wiira nikhitiri utakiha makhalelwaawe. (Upha. 1:26) Neetthucaka makhalelo a Yehova unaatepa uhinirika untakiha. Davidi anancuwela ratta Nluku, Apaapaawe owiirimu, phimaana, uyo aanaakhitiri untakiha Nluku ukati wowaawacera akhunanawe. Wuupuwele itthu imoca inthoonyera iyo. Davidi ahontthekela Yehova ukati weettalyaawe uluva ni Pate-Sepa ni ahowiiviiha awannyawe Pate-Sepa. (2 Sam. 11:1-4, 15) Hataa ukhalaka commo, Yehova aholakela umoonela ikiriri Davidi. Kontha isiyani? Kontha Davidi ciicammo ahowoonela ikiriri  akhwaawe. Nlattu wookhalana upatthani woolipa ni Yehova, Davidi ahokhala mwene oofentiya cinene naapoovu asarayeli, ni Yehova aheera wiira mamwene akhwaawe o Isarayeli yaalamuliya utthara ntakihero na Davidi.—1 Mam. 15:11; 2 Mam. 14:1-3.

21. ‘Nantakihaka Nluku’ toko cinsovenrihiyeehu nhina Efesu 4:24 ni 5:1, isiyani inhala unikhumelela?

²¹ Nineetthuca isiyani? Ninlamuliya ‘untakiha Nluku.’ Nantakihaka Nluku, ninaahala uphwanya ifayita, ni ciicammo ninaahala uncuwela ratta. Natakihaka makhalelo a Yehova, ninaathoonyera wiira hiiva nikhanle asaanaawe.—Usome Efesu 4:24; 5:1.

22-23. Isiyani inhala ukhumelela neettelaka myaha ca Yehova cineetthuceehu?

²² Toko ciitthucaleehu mpaka va, Yehova naanithoonyera makhalelwaawe avarelaka nteko citthu cumpalyaawe ni Ibiiblya. Iyo ilivurwiiyo khinlikananiya ni inoocara matakihero aatthu ookhuluvelya yanswalela Nluku anlamuliyeehu waatakiha, toko Moocesi ni Davidi. Yehova hopanka mphanttyaawe. Hiiva ciicammo nihaana nipankaka mphantteehu. Nihaana nitthukulaka meethweehu, manyarwiihu ni mirima cihu wiira niviriyane ni niitthuce cinene myaha ca Yehova.

²³ Khaninhala uhiya wiitthuca myaha ca Yehova. (Ekles. 3:11) Masi itthu yofayita cinene khunakhala wiitthuca citthu cinci, masi ukhanle uvarela nteko awula weettela citthu cineetthuceehu. Napankaka iyo ni nantakihaka Paapeehu onifento, Yehova, uyo khanhala uhiya uniphiyeera hiiva. (Tiya. 4:8) Nnuulumoni nawe, uyo naakhuluveliha wiira khanhala waahiya ale aneekurumica uncuwela ratta.