Unoonannya wiira mena. Sotwani khaamwiirenle Hawa wiira alyaaka nhokorokho waakhottihiye, irutthwaawe phaahala ukhwa ni iroohwaawe nanlelo yaanaahala ukhala ikumi. Avarelaka nteko inwaa, Sotwani ahomwiirela Hawa: “Nyuuva khweeliini khannohala ukhwa.” Coo, Sotwani aamwiirela Hawa wiira alyaaka nhokorokho wo ule mwiryuule, nanlelo aanaahala ukhala nkumi ni ukhalana ukumi womaana—woohihala unkhuluvela Nluku.—Upha. 2:17; 3:3-5.

Masi wakhala wiira itthu ineetthucihiya ilelo wiira irooho khinkhwa khikhumakhumale u Eeteni, vano ikhumakhumale ukatini? Khanincuwela ratta-raatta. Masi ninaacuwela wiira ittiini cowootha cotheene cahomalamalihiya ukati waawilyaaya ucara wo maaci menci mahuku a Nowee. Khiivo nanka itthu yeetthucihiya niittiini yowootha yoopwaale uyo ukatyuuyo. Atthu yanswalela Nluku weekhweeli paahi phoopwaale: Nowee naamucyaawe.

Phimaana, ile ineetthucihiya wiira irooho khinkhwa pooti ukhala wiira ipatthuwacale unavinre ucara wo maaci menci waawile ukati wa Nowee. Ukati Nluku waavirikanihalyaawe iluuka u Papeli ni atthu waamwarenlyaaya “ntuninyani motheene,” ayo atthwaayo khweeliini yahorwaana mapuro yaathemenlyaaya moopuwelelo owiiriya wiira pinaatamu haana irooho ihinkhwa. (Upha. 11:8, 9) Masi hataa ukhalaka wiira iyo itthwiiyo ikhumakhumale ukatini, ninaakupali wiira Sotwani Tiyapu, “athumwaane wootha,” phikumihacale ni naakhala ootteeliya oonaka iyo itthu yowoothiyeeyo imwaryeelaka ntuninyani motheene.—Joau 8:44.