Unaakhitiri waakhula makoho yoopeliye mwaha mmarevistani Ukhalenla co 2019?

Isiyani impheelaaya uhimya inatiri ya Nluku ineera: “Khiivo ikaruma yokhotto ipankiye wiira uhasaraniye inhala wuukhitiri”? (Isai. 54:17)

Hiiva pooti ukupali wiira Yehova naahala unikhikicera wiira nihihasariye niikuru coohinamaana, toko “iphyoo yaatthu oonanara mirima.” (Isai. 25:4, 5) Awananiihu khanhala ukhitiri unitthema, kontha Yehova pooti urukunusa khula itthu yootakhala inhalaaya umananiha upanka wiira anihasare.—w19.01-T, ipaag. 6-7.

Inannani Yehova caathoonyenryaawe isariya ukati wowaawacera atthu o Kanaa ni asarayeli yanrukunuwenle?

Yehova ahaahukhumu ale yaararuwa awula yahaawacera ratta athiyana ni asaana. Masi uyo ahaavaha iparakha atthu yaamwiiwelela ni yaawacera akhwaaya niisariya.—w19.02, ipaag. 22-23.

Isiyani ninlamuliyeehu upanka nakhalaka ukati umpankaawe nivekelo ntthu hiri Saahiti a Yehova?

Ninlamuliya umaala ni uthoonyera ihisima. Khaninlamuliya wiira “amem” ni khaninlamuliya waavaha matata atthu ukati woolompiya. Hiiva pooti upanka nivekelo nihu noomaaleliya.—w19.03, ipaag. 31.

Kontha isiyani upankiya asinamwane usece ni ntthu muulupale ikhanle itampi yuulupale?

Umpanka mwanhima usece inkhala itampi inonkhirini mwanhima nopankiya, inkhala itampi yoohinamaana wanlokoni, unkhala waatthekela akhulupale ookuvernu ni unkhala untthekela Nluku. Mapuro arivo malamulo anruma ukasariya ule romoliye wiira hompanka usece mwanhima, mahumu anawiiwelela ayo malamulwaayo.—w19.05, ipaag. 9-10.

Manannani ninlamuliyeehu urehererya awula ulokihaca moopuwelelweehu?

Citthu cuulupale cinlamuliyeehu upanka phi cila: umuulumana Yehova, wuupuwela nitothaka mananna oolokihaca meettelweehu ni waathanla ratta apatthaniihu.—w19.06, ipaag. 11.

Manannani ninlamuliyeehu wiitthenkaca wiira nalipe ukati woolupatthiya?

Nihaana nilipihacaka upatthaniihu ni Yehova. Nihaana nikupaliki wiira Yehova naanifenta ni wiira uyo khanhala unihiya; usoma Ibiiblya khula nihuku ni uhihiya ulompa; ukupali wiira iparakha cinhalaaya uwaana Umwene wa Nluku cinaahala wiirannya; uhela mmuru iveerusu co mbiiblyani cinnicivela ni icipo cinonttottopela Yehova.—w19.07, ipaag. 2-4.

Manannani cinhaleehu waakavihera amuciihu woopwa?

Wiira naakavihere amuciihu woopwa, ikhanle itthu yofayita uthoonyera wiira ninawaawacera, uthoonyera meettelo omaana, waavilela ni uthoonyera unamaana.—w19.08, ipaag. 15-17.

Toko Yesu cikhuluvelihalyaawe nhina Matewus 11:28, manannani cimphwanyihiyeehu ikuru?

Hiiva nihaana ahooleli omaana, apatthani omaana ni nteko womaana.—w19.09, ipaag. 23.

Yehova nnikavihera cani wiira nipheele upanka itthu ni nnivaha cani ikuru wiira nikhitiri upanka? (Afili. 2:13)

Nasomaka Nuulumo na Nluku ni noopuwelaka insomeehu, Nluku pooti unikavihera upheela upanka inoncivela ni pooti univaha ikuru yopanka itthu. Nnepaawe wowaarya pooti wuncerera ucuwelaca wihu.—w19.10, ipaag. 20, 21.

Citthuni weeva cinlamuliyaa upanka uhinaaya ulakela upanka itthu yuulupale?

Citthu thanu cinlamuliyaa upanka phi cila: utothe ucuwela ratta, ulompe ulepelaka ucuwelaca, wuupuwele nlattuni umpheelaa upanka itthu, wiihelele mipika ni wuupuwele isiyani khweeliini inhalaa ukhitiri upanka.—w19.11, ipaag. 27-29.

Ukati Sotwani woolumaawe ni Hawa, niireke Sotwani anhimyera Hawa wiira irooho khinkhwa, toko cinkupalyaaya atthu enci ilelo?

Unoonannya wiira mena. Sotwani khaamwiirenle Hawa wiira irutthwaawe phaahala ukhwa ni iroohwaawe nanlelo yaanaahala ukhala ikumi. Uyo aamwiirenle Hawa wiira khaahala ukhwa. Khiivo nanka itthu yowiitthucihiya ni ittiini cowootha yoopwaale ukati waawile ucara wo maci menci mahuku a Nowee. Moopuwelelo owiiriya wiira irooho khinkhwa apacenre Nluku hinaaya waamwarusa atthu yaateka inupa yoorekama yo Papeli.—w19.12, ipaag. 15.